Aepa Gemae 41
41
Yosefeʼa kini vekamo Feloʼmo ageʼniya alagamunamo aepaʼamo ha paiʼniya gemae
1-2 #
Nen 2:1-3
Inagi maiʼnagenoʼaeʼmo lole kafugamo ago utegenoʼaeʼmo kini vekamo Feloʼa alagamuna ageʼniye. Ageʼniyana agaiʼamo uno nelamiya aniʼmo agiʼnaleʼmo he tino maiʼnigeʼapa seveniʼa pulumaka anagaʼmo alagepa apafayaʼe pulumaka anagaʼmo anipatiʼmo eʼa hai eʼa ani agiʼnale haneʼniya kahaumo neʼnageno apakeʼniye. 3Inagi henagaʼamo ani pulamakamogi apakamelagamo seveniʼa pulumaka anagaʼmo apayamufaʼalagaʼage huteno hosu apakufaʼe pulumaka anagaʼmo anipati hai eʼa alagepa pulumaka anagaʼmogi hapaopaleʼmo maiʼnae. 4Apayamufaʼalagaʼage huteno hosu apakufaʼe pulumaka anagaʼmogimo alagepa apafayaʼe pulumaka anagaʼmo ago hapaeʼa neʼnae. Kini vekamo Feloʼa ani kava huno alagamunamo ageteno aupatiʼmo he tiʼniye. 5He titeno halate au kaleʼnenoʼaeʼmo magoʼe huno alagamuna ageyana seveniʼa vitimo magoke viti yosa avoyafatiʼmo haineteno alagepa alagamo aeno afu leʼnigeno ageʼniye. 6-7Henagaʼamo seveniʼa hosuʼniya viti avoyamo afole aiʼnigeno amuko yasimo aliteno leno apasaga neligeʼapaeʼmo seveniʼa hosuʼniya viti avoyamoʼmogimo seveniʼa alagepa viti avoyamo neʼnageno ageʼniye. Feloʼa ani alagamunamo agetenoʼaeʼmo aupatiʼmo he tiʼniyana alagamunageʼmo ageʼniye. 8#Nen 2:4-11Inagi netepiʼmo he tinoʼaeʼmo aipamoʼmo kana huʼnigeno afiteʼa ageʼnaya vayaʼaifeʼmo ge huʼnigeʼa eʼnageno Feloʼa lole alagumunamo ageʼniya kavafeʼmo hapa paiʼniyaʼmonanafa apakaepatiʼmo mago aepaʼamo ha paisiya vekamo oʼmaiʼniye.
9Inagi nofi alagafati aniteʼmo neʼyagaiya vekamoʼmo kini vekamo Felofeʼmo ha painoʼaeʼmo, Hemenimo hosu kavaʼniyeʼmo nagesamo afiʼnove. 10Hogoteka aliʼyakamo neʼaluʼa vekalafeʼmo kaipamo leka laʼatetekaeʼmo nagaiʼniʼe peleti maya nekaya noteʼmo neʼyagaiya vekaʼeʼmo ami vayaʼaiteʼmo yagaino apateʼniya vekamo kalavusi nopiʼmo kalavusi huka laʼateʼnane. 11Laʼateʼnanagetaʼaeʼmo magoke haniʼilagamo nagaeʼe agaeʼeʼmo alagamunamo ageʼnoʼae. Ageʼnoʼa alagumunamoʼmo alu aepa alu aepaʼamo haneʼniye. 12Mago Himulu neya vekamo laʼagaeʼeʼmo magokepi lokaeno maiʼniye. Agaemo ami vayakaleʼmo yagaino neʼapateya vekamo aliʼyaʼamo neʼaliye. Laʼagaemo ani neya vekaeʼmo alagamuna ageʼnoʼa kavafeʼmo ha paiʼnoʼagenoʼaeʼmo alagamunamo aepaʼamo laʼaha paiʼniye. 13Laʼaha paiʼniya kavaʼmo laʼagaetegamo ago afole aiʼniye. Aliʼyakaleʼmo halate uka aliyo, huno alino nateteno peleti mayamo nekaya nopiʼmo neʼyagaiya vekamo yosaleʼmo aneʼmu aeno asaiʼniye.
14 #
Nen 2:25
Kini vekamo Feloʼa ani gemo afitenoʼaeʼmo Yosefefeʼmo utapa ge hiyo, huno huteno aliʼyaʼamo neʼaliya vayaʼmo alino apateʼnigeʼa uʼa kalavusifatiʼmo avaleliʼa eʼnae. Yosefeʼa avenanapa ayokaʼmo haleno ataleteno alagepa kukenamo alino vaino alitegeʼa kini vekalegamo avaleliʼa eʼnae. 15Feloʼa Yosefefeʼmo ha painoʼaeʼmo, Mago alagamuna ageʼnova kavaʼmo aepaʼamo naha paisiya vekamo oʼmaiʼniye. Oʼmaiʼniyaʼmonanafa kagaefeʼmo ani ge huʼnageʼna afiʼnove. Alagamunamo gemo afiteka aepaʼaeʼmo afaʼa hugane, huʼa naha paiʼnae, huno huʼniye. 16#2 Ko 3:5Yosefeʼa geʼaleʼmo aeno atagaina hunoʼaeʼmo, Nagaiʼnimo alagamuna gemo aepaʼamo afaʼa kaha opaigufa Gotikeʼmo aepaʼamo afaʼa kaha paisigeno kaipamoʼmo falu hugiye, huno ha paiʼniye. 17Kini vekamo Feloʼa hunoʼaeʼmo, Alagamuna geʼnifiʼmo nagaiʼnimo uno nelamiya aniʼmo agiʼnaleʼmo he tiʼna maiʼnogeʼa 18malage huʼa seveniʼa alagepa apafayaʼe pulumaka anagaʼmo anipatiʼmo eʼa hai eʼa ani agiʼnaletiʼmo kahaumo neʼnageʼna apakeʼnove. 19Henagaʼamo seveniʼa pulumaka anagaʼmo apayamufaʼalagaʼage huteno hosu apakufaʼe pulumaka anagaʼmo anipatiʼmo eʼa hai eʼnae. Ani agufa hosu apakufaʼe pulumaka anagaʼmo muki Isipi haopalegamo mago maiʼnageʼna oʼapakeʼnova agufa pulumaka anagaʼmo maiʼnae. 20-21Apayamufaʼalagaʼage huteno hosu apakufaʼe pulumaka anagaʼmogimo alagepa pulumaka anagaʼmo ago hapaeʼa neʼnae, huta apaketa aeto osuʼnone. Hogoteʼa hosu apakufaʼekeʼmo maiʼnaya agufa kava huʼa maiʼnae. Inagi nagaemo naupatiʼmo ago he tiʼnove. 22Halate nau kaleʼneʼnaeʼmo alagamuna ageʼnovana malage huʼa seveniʼa vitimo magoke viti yosamo avoyafatiʼmo haiʼeteʼa alagepa alagamo aeʼa afu leʼnageʼna ageʼnove. 23-24Henagaʼamo seveniʼa viti avoyamo afole aiʼnigeno amuko yasimo aliteno leno asaga liʼnigeno seveniʼa hosu viti avoyamoʼa seveniʼa alagepa viti avoyamo neʼnageʼna ageʼnove. Nagaemo afiteʼa ageʼnaya vayaʼaifeʼmo ani kavafeʼmo hapa paiʼnogeʼa afiʼnayaʼmonanafa magoke vekamoʼa aepaʼamo afaʼa naha opaiʼniye.
25Yosefeʼa Kini vekamo Felofeʼmo ha painoʼaeʼmo, Ani lole alagamunalaʼmoʼmo magoke agufa aepaʼamo haneʼniye. Gotiʼa hisiya kavafeʼmo alino kave liʼniye. 26Seveniʼa apafayaʼe pulumaka anagaʼmo maiʼnaya kava huno seveniʼa kafugae. Ani kava huno seveniʼa alagepa viti avoyamo haneʼniya kava huno seveniʼa kafugamae. Ani lole alagamunalaʼmoʼmo magoke agufa aepaʼamo haneʼniye. 27Seveniʼa apayamufaʼalagaʼage pulumaka anagaʼmo afole aiʼnaya kava huno seveniʼa kafugamae. Seveniʼa hosu viti avoyamo amuko yasimo aliʼnigeno leno asaga liʼnigeno alagamo ohaneʼniya viti avoyamo haneʼniya kava huno seveniʼa kafugamo kafu kavaʼmo afole aigiye. 28Kaha paiʼnova agufa kava huno Gotiʼa hisiya kavafeʼmo alino kave liʼniye. 29Seveniʼa kafugamo muki Isipi koteʼmo asole neʼyaʼmo afole aigiye. 30Afole aigiyaʼmonanafa ani kafugamo henagaʼamo seveniʼa kafugamo lusi kafu kavaʼmo afole aisigeʼa muki Isipi vayaʼmogimo alagepa asole yaʼmo afole aiʼniya kafugaeʼmo apake kanisigeno kafu kavaʼmoʼa ani koʼmo alagi alino hosu huno atalegaiye. 31Asole neʼyaʼmo afole aisiya kafugamo akamelegaʼamo lusi kafu hu kavaʼmo afole aigiyaʼmofeʼmo asole neʼyaʼmo afole aiʼniya afinafeʼmo ago apake kanigiye. 32Gotiʼa alagi afole aigiye, huno agesamo afiʼniyaʼmofeʼmo Gotiʼa lole kanaleʼmo magoke agufa aepaʼamo haneʼniya alagamunalaʼmo alino kave liʼniye. Aise afinaʼmo utesigeno Gotiʼa ani kavaʼmo alino afole aino ategaiye. 33Afole aigiyaʼmofeʼmo Felogamo Isipi koteʼmo yagaisiyafeʼmo mago afiteno ageʼnisiya vekamo kahauya huka ageka lekana paika ato. 34#Mai 6:6-8Kagaemo mani Isipi koteʼmo yagaisaya vayaʼmo lekana paika apategeʼa seveniʼa kafugamo asole neʼyaʼmo afole aisiya neʼyapatiʼmo ani vayaʼmogimo aliʼa fako huʼa faefuʼa hetamamo aliʼa magoke hetamamo malegae. 35Ani vayaʼmogimo seveniʼa kafugamo afole aisiya neʼyaʼmo aliʼa anupa huʼa neʼyaʼmo neʼmalaya nopiʼmo maleyo. Apakaemo Felo aiyafiʼmo maiʼneʼa muki taoniʼafiʼmo aliʼa maleyo. 36Inagi seveniʼa kafugamo kafu kavaʼmo afole aisigeʼapaeʼmo aliʼa maleʼnisaya neʼyaʼmo negae. Ani kavaʼmo hisayana kafu hisaya afinaʼmo muki vayaʼmo neʼyafeʼmo kafu osisayafeʼmo ani kavaʼmo hiyo, huno ha paiʼniye.
Kini vekamoʼmo Yosefeʼmo hogote vekamo maiteno yagaisiyafeʼmo lekana paino ateʼniya gemae
37 #
Sam 105:19
Kini vekamo Feloʼe aliʼyaʼamo neʼaliya vayaʼeʼmo Yosefeʼa apakesamo apamiʼnigeʼa afiteʼapaeʼmo kanalene, huʼa huʼnae. 38Feloʼa aliʼyaʼamo neʼaliya vayaʼaifeʼmo hapa painoʼaeʼmo, Goti Aunemeʼamoʼmo ani vekafi maiʼniye. Alu vekamo ani agufa vekaeʼmo kahauya huta agesupiye. 39Inagi Feloʼa Yosefefeʼmo ha painoʼaeʼmo, Gotiʼa muki ani kavaʼamo alino kave liʼniyaʼmofeʼmo kagaemo afiteka ageʼnana agufa kava huno mago afiteno ageʼniya vekamo alagi oʼmaiʼniye. 40#Nen 5:29Kagaemo muki noʼnifi haneʼniya yateʼmo yagaige muki vayaʼnileʼmo yagaika apatege hugane. Nagaemo kini siateʼmo maisuva kavatetiʼmo aeʼna kaga segauve. 41Afiyo, huno, muki Isipi koteʼmo yagaika apatesanafeʼmo lekana paiʼna kateʼnove, huno ha paiteno 42ayatetiʼmo liniʼamo asagino Yosefe ayateʼmo vaino ateʼniye. Ani linileʼmo kini vekamo alagena yaʼamo haneʼniye. Feloʼa alagepa kukenamo alino vaino ateteno goli senimo lugoʼafiʼmo huno ateʼniye. 43#Est 6:9Agaemo Yosefeʼmo alino ateʼnigeno akame huno talalafiʼmo uno haino fai maiteno uʼnigeʼa aliʼyaʼamo neʼaliya vayaʼmo uʼa hogoteteʼapaeʼmo lapaleʼyamo faiyo, huʼa huʼnae. Feloʼa ani kavaʼmo huʼniya kavatetiʼmo Yosefeʼa muki Isipi koteʼmo yagaino apatesiyafeʼmo lekana paino ateʼniye. 44Feloʼa Yosefefeʼmo hunoʼaeʼmo, Nagaemo kini vekamo maiʼnove. Kagaemo kanalene, huka osisanaʼmoʼmo muki Isipi vayapatiʼmo magoke vekamoʼmo agaiʼamo hauʼnisiya kavaʼmo afaʼa osugiye, huno ha paiʼniye. 45Feloʼa Yosefeʼmo agi atenoʼaeʼmo Yafanati Paniyaʼae huno ateʼniye. Atetenoʼaeʼmo mago a mafaʼnemo agiʼamo Asenatiʼmo avaleno amiʼnigeno Yosefeʼmo aliʼniye. Asenati afoʼamoʼmo Ono taonifiʼmo mono huno neʼapateya vekamo agiʼamo Poti Felaʼmae. Inagi Yosefeʼa muki Isipi haopalegamo uneno huno ageʼniye.
46Ani afinaʼmo Yosefeʼa tetiʼa kafugamo maiʼnenoʼaeʼmo aepa faino ani kini vekamo aliʼyaʼmo aliʼniye. Inagi Yosefeʼa Kini vekamo Feloʼmo ataleno muki Isipi haopalegamo uneno huno ageʼniye. 47Inagi seveniʼa kafugamo asole alagepa neʼyaʼmo afole aiʼniye. 48Yosefeʼa ani seveniʼa alagepa kafugamo asole neʼyaʼmo muki taoniʼafiʼmo alino anupa huno neʼyaʼmo neʼmalaya nokopiʼmo maleʼniye. Agaemo muki taoniʼafiʼmo haneʼniya hoyafatiʼmo neʼyaʼmo alino ani taonifiʼmo haneʼniya nopiʼmo malete malete huʼniye. 49Yosefeʼa viti neʼyaʼe alu neʼyaʼeʼmo alino maleʼniya neʼyaʼmoʼa ani kahaepagana huʼnigeno vayaʼmogimo lekana opaisaya kavaʼmo huʼniye.
50Kafu hisaya kafugamo afole oʼaiʼnigenoʼaeʼmo Yosefe aʼmo Asenatiʼmo lole mafaʼnelaʼmo alino anateʼniye. Asenati afoʼamoʼmo Poti Felaʼmo Ono taonifiʼmo mono huno neʼapateya vekamo maiʼniye. 51#Aep 46:20Inagi Yosefeʼa hunoʼaeʼmo, Gotiʼa naha maeʼnigeʼna kana yaʼmo aliʼnova kavafeʼmo nage kaniʼna atalege afoʼnimo afamo anaga vayaʼaeʼmo nage kaniʼna apatalege huʼnove. Ani kavaʼmo huʼniyaʼmofeʼmo Yosefeʼa yege mafaʼnemo agimo Manasaʼae huno ateʼniye. 52Agaemo hunoʼaeʼmo Gotiʼa naha maeʼnigeʼna kana yaʼmo aliʼnova koteʼmo muki huʼnova kavaʼnimoʼa alagepa kavaʼageʼmo afole aiʼniye. Ani kavaʼmo huʼniyaʼmofeʼmo napa tu mafaʼnemo agiʼamo Ifalemiʼae huno ateʼniye.
53-54Inagi seveniʼa alagepa kafugamo ago hano huʼnigeno seveniʼa kafu hisaya kafugamo Yosefe ha paiʼniya kavaʼmo afole aiʼniye. Muki kotegamo kafu huʼnayaʼmonanafa Isipi koteʼmo neʼyaʼmo afaʼa haneʼniye. 55Henagaʼamo magoʼe alopa kafu kavaʼmo afole aiʼnigeʼapaeʼmo muki Isipi kote vayaʼmogimo kini vekaeʼmo alopa gefatiʼmo neʼyafeʼmo keya aeʼa ge huʼnae. Feloʼa muki vayaʼaifeʼmo hapa painoʼaeʼmo, Utapa Yosefeʼmo lapa paisiya gemo akame hutapa ani lapa paisiya kavaʼmo hiyo, huno hapa paiʼniye. 56Muki kotegamo kafu kavaʼmo afole aiʼnigenoʼaeʼmo Yosefeʼa neʼyaʼmo aliʼa maleʼnaya noʼmo yakiʼnigeʼa Isipi vayaʼmogimo neʼyaʼmo miya faiʼnae. Ani afinaʼmo lusi kafu kavaʼmo afole aiʼniye. 57Muki kotegamo maiʼnaya vayaʼmogimo Isipi kotegamo eʼa Yosefetetiʼmo neʼyaʼmo miya faiʼnae. Muki alu kotega alu kotegamo lusi kafu kavaʼmo afole aiʼniyaʼmofeʼmae.
Currently Selected:
Aepa Gemae 41: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
