Hch 1

Esᵽíritu Santore mijare yiñaꞌajããrãñu, Jesúre ãrĩka

1-2¿Teófilo, yaje mime? Bikija ᵽaᵽera miroꞌsi yiᵽũataũꞌmuraᵽe. Jesúre imaroyiraᵽaka, suᵽabaatirã kiwãrõroyiraᵽakakaka saᵽi mire yibojaᵽũaraᵽe. Ritaja mire yibojaikareka maboꞌikakurirã Tuᵽarãre kire eꞌemiaekarõꞌõjĩrã miroꞌsi yoꞌotiyiraᵽe. Maboꞌikakurirã Tuᵽarãte kire eꞌemiaerã baaeka ruᵽu kirika bojariroka bojarimaja kiwãꞌmaekarãka kimaeka. Esᵽíritu Santore kire jeyobamaka kiyaᵽaeka uᵽakaja nabaarũkiakaka nare kibojaeka. 3Reyakoꞌomakaja kiᵽuᵽatũrũeka beꞌrõ ĩꞌrãkurimarĩa kimajaroka bojataᵽarũkirãre kiᵽemakotowirika. Ĩꞌᵽarã ᵽoꞌimajarakarĩmi suᵽa nare baabaraka Jesúre imaeka. “Iꞌkitakijioka kime”, nañaokaroꞌsi suᵽa kibaaeka. Suᵽa baabaraka, “Ikuᵽaka yire yiꞌyurãre jãꞌmebaraka Tuᵽarãre nare imaruᵽutarãñu mae”, ãrĩka nare kiwãrõrijarika.

4Ĩꞌrãkuri naka rẽrĩtirã baꞌabaraka kimaeka ᵽoto, ikuᵽaka Jesúre nare bojaeka:

—Jerusalénrãja mija imabe ruᵽu. Maᵽaki Tuᵽarãte mijare bojaeka uᵽakaja Esᵽíritu Santore mijare kiᵽũatarãñu. Suᵽa imarĩ õꞌõrãja kire mija taꞌabe. Koᵽakaja mijare yibojaroyiraᵽaka ãꞌmitiriroyiraᵽarã mija ime. 5Mamarĩ ᵽuri okoaᵽi takaja ruᵽukoꞌa ᵽoꞌimajare Juanre jũjeka. Maekaka ᵽuri noꞌojĩrãmarĩaja Esᵽíritu Santore Tuᵽarãte mijare ñaꞌajããrãñu kiyaᵽaika uᵽakaja mija imawãrũokaroꞌsi,== kika wãrũekarãte kẽrĩka.

Maboꞌikakurirã Jesúre aꞌrika

6Ĩꞌrãrĩmi ate Jesúka rẽrĩtirã ikuᵽaka kire narĩka:

—Yija ĩᵽamaki, “Maekaka ᵽuri Romatatarãte ᵽoatatirã Israel kaꞌiakarãre yijãꞌmerãñu Tuᵽarãte ᵽũataekaki imarĩ”, ¿yaje meñu jeꞌe?== kire narĩka.

7Suᵽa naᵽakãꞌã ikuᵽaka nare kẽrĩka:

—Marãkãꞌã baatirã mija õrĩrũkimarĩa sime. Maᵽaki Tuᵽarã ĩꞌrĩkaja sõñuka. 8-9Iꞌsuᵽaka simakoꞌomakaja Esᵽíritu Santore mijare ñaꞌrĩjãirãka ᵽoto, okajãjia mija jarirãñu. Suᵽa jariwaꞌri aᵽea wejearã aꞌritirã, yika imaekarã imarĩ, yimajaroka nare mija bojarãñu. Jerusalénrã, Judeakaꞌiarã, Samariakaꞌiarã, suᵽabaatirã ritatojo wejearekaoka, yimajaroka mija bojarijarirãñu,== nare kẽrĩka beꞌrõ, kire nayoiyukãꞌãja, maboꞌikakurirã keꞌrika. Oko ũmakakarã keyawaꞌrika ᵽoto kiõiberika. 10Keꞌᵽakãꞌã wejeᵽemarãja nañakoarika. Iꞌsuᵽaka nimekãꞌãja ikuᵽarõꞌõᵽiji ĩꞌᵽarã ángelrãka boia jariroaka jããekarã naᵽõꞌirã ᵽemakotowirirĩkaekarã. 11Toᵽi ikuᵽaka nare narĩka:

—Galileakarã, wejeᵽemarãja mija ñakoariaꞌsi mae. Mijaka imaroyiraᵽaki maboꞌikakurirã Tuᵽarãte kire eꞌemiamaka mija ĩaikijioka toᵽi mija ᵽõꞌirã etarãki ate keꞌyu uᵽakajaoka,== nare narĩka.

Judaswãsa õꞌtorã Matíare neꞌeka

12Olivos wãmeika ᵽusiarã nimaeka aᵽóstolrãka. Iꞌsia beꞌrõ Jerusalénrã naᵽeꞌrika mae, nimaekarõꞌõᵽi koyikuriji simaeka simamaka. 13Wejearã eyatirã wiꞌiarã neyaeka. Ĩmika wiꞌiareka mirĩwaꞌritirã, kurarakarã ĩꞌrãkõꞌrĩmatorãja neyaeka. Ikuᵽati nimaeka torã eyaekarã: Ᵽedro, Juan, Santiago, Andrés, Feliᵽe, Tomás, Bartolomé, Mateo, Alfeo maki Santiago. Suᵽabaatirã aᵽerã imaekarã Simón Celote, suᵽabaatirã Santiago maki Judas. 14Jesúᵽako María, kibeꞌerõꞌõkarã, suᵽabaatirã aᵽerã rõmijãᵽitiyika ĩꞌrãkõꞌrĩmatorãja narẽrĩrijarika ĩꞌrĩka uᵽakaja ᵽuᵽajoawaꞌri Tuᵽarãka jairã.

15Iꞌsuᵽaka nabaaroyika ᵽoto Jesúre ãꞌmitiriᵽẽarĩ naka narẽrĩroyika, ciento veinte rõꞌõjĩrã ᵽoꞌimaja nimaeka. Ĩꞌrãkuri iꞌsirakamarã watoᵽekaᵽi miꞌmirĩkatirã ikuᵽaka Ᵽedrore nare bojaeka:

16—Wãtaka ñoñurã, mija ãꞌmitiᵽe. Bikija mañeki David imaroyikaki Esᵽíritu Santore kire ãᵽakãꞌã, Jesúre nañiꞌaerã Judare bojajããrũkiakaka, kioꞌoeka. 17Mia jeꞌe, yijakakiji Judare imakoᵽeroyiraᵽe. Kika yija imaokaroꞌsi Jesúre yijare wãꞌmaeka uᵽakaja kiwãꞌmaekakioka. 18(Imakoꞌomakaja niñerũ yaᵽawaꞌri Jesúre kibojajããraᵽe. Kibojajããraᵽaka waᵽa niñerũ kire nijika mirãka kiᵽeꞌataraᵽakaᵽi kaꞌia nawaruaraᵽe. Sarã mae kiruᵽukoꞌaᵽi ñaꞌrĩtirã, kiñeꞌmea kijãwataraᵽe kitaᵽisia ᵽoriᵽateribaka. 19Kibaaraᵽaka majaroka ãꞌmitiritirã, Jerusalénkarã Acéldama sawãmejĩꞌaekarã iꞌsia kaꞌia. Nokaᵽi, “Riwekaꞌia”, ãrĩrika simaeka.)#1.19 Probablemente la información en los versículos 18 y 19 no la dijo por Pedro, sino que la añadió Lucas, el escritor, para ayudar el lector entender qué le pasó a Judas. 20Ikuᵽaka bikija Davidre oꞌoeka:

“Baꞌiᵽarãmarĩa jariwaꞌrirãka wiꞌia sarã imaekakire aꞌritaᵽawaꞌrika simamaka. Aᵽika etatirã sarã imaberijĩki”.

Toᵽi ᵽuri,

“Aᵽika oꞌatirã kibaꞌiraberũ mamarĩkaki baꞌiraberimirãka”, ãrĩwaꞌri Davidre oꞌoeka uᵽakaja Judare baaeka.

21-22Suᵽa imarĩ kire oꞌarika sime mae. Maĩᵽamaki Jesúre maᵽõꞌirã imaroyiraᵽaka ᵽoto makaja imaroyiraᵽakire maꞌeyeꞌe. Juanre ruᵽukoꞌa Jesúre jũjemaka ĩaraᵽaki, maboꞌikakurirã Jesúre aꞌraᵽakarõꞌõjĩrã maka imaraᵽaki kimarãñu. Suᵽabaatirã kireyakoꞌomakaja Jesúre ᵽuᵽatũrũraᵽaka beꞌrõ kire ĩaraᵽakioka kimarãkareka jia simarãñu,== Ᵽedrote nare ãrĩka.

23Torãjĩrã mae, ĩꞌᵽarã torã imaekarãte nawãꞌmaeka. “José, Matíasᵽitiyika nime jia ᵽuᵽakirã”, narĩka. José Barsabás kiwãmea imakoꞌomakaja aᵽewãme Justo kire narĩka. 24-25Torãjĩrã mae,

—Yija ĩᵽamaki Jesús, miꞌi mime ritaja ᵽoꞌimajare ᵽuᵽajoaika õñuka. “Ĩꞌĩ kime Judas õꞌtoarã oꞌarũkika mijaka wãrõrimaji”, ãrĩwaꞌri yijare miõrĩrũjebe. Judas ᵽuri yijare aꞌritaᵽaraᵽaki baꞌiaja baarika yaᵽawaꞌri. Suᵽa imarĩ maekaka baꞌiaja baariwaᵽa tiyibeyurõꞌõrã kime,== kire narĩka.

26Suᵽa imarĩ José wãmea ãtarã noꞌojĩꞌaeka, suᵽabaatirã Matías wãmea aᵽorã. Toᵽi mae jotoarã sajaꞌajããtirã, sanajãjeeka mamarĩ ñaꞌrĩrão ĩaokaroꞌsi. Sĩatirã, “Matías kime Tuᵽarãte wãꞌmaiki”, narĩka. Torãjiteᵽi ĩꞌᵽoũꞌᵽuarãeꞌearirakamakiroꞌsi kijarika mae.

Currently Selected:

Hch 1: TNC

Highlight

Copy