ᓬᐅᒃ 10

ᒋᓴᔅ ᑳᑮ ᒫᒋᓂᔕᐙᒡ ᓃᔣᓯᒥᑕᓇᔑᓃᔑᓐ

1ᐊᐲ ᑳᑎᐯᒋᑫᒡ ᑳᐃᔥᒀ ᑲᑲᓅᓈᒡ, ᒦᔥ ᑳᑮᐅᓇᑭᒫᒡ ᓃᔣᓯᒥᑕᓇᔑᓃᔑᓐ#10.1 ᓃᔣᓯᒥᑕᓇᔑᓃᔑᓐ: ᐋᓂᑕ ᑫᑌ ᐅᔑᐲᐃᑲᓂᕽ ᓃᔣᓯᒥᑕᓇ ᐃᔑᐲᐃᑳᑌ᙮ 72 ᐃᓂᓂᐗᐞ ᒋᓀᓃᔑᓂᒡ ᒋᑮ ᓃᑳᓂ ᐊᔨᔖᓂᒡ ᒥᓯᐌ ᐆᑌᓈᑳᕽ, ᐊᔮᐎᓂᕽ ᑲᔦ ᐐᓐ ᐃᑯ ᐙᐊᓂ ᐃᔖᒡ᙮ 2#Mat 9.37-38. ᐅᐅ ᐁᑮᐃᓈᒡ: ᐹᑏᓇᑦ ᑫᒪᓂᔑᑳᑌᑭᐸᓐ, ᐋᐱᒋ ᑕᔥ ᐊᑳᓰᓄᐗᒃ ᐅᑕᓄᑮᒃ᙮ ᑲᑴᒋᒥᒃ ᑭᔐᒪᓂᑑ ᑳᑎᐯᑕᕽ ᒪᓂᔑᑫᐎᓐ ᒋᐃᔑᓂᔕᐙᒡ ᐅᑕᓄᑮᐞ ᒋᒫᒨᔕᑭᓂᑫᓂᒡ ᐅᑭᑎᑫᐎᓂᕽ᙮ 3#Mat 10.16. ᒦᑕᔥ ᐃᔑ ᒫᒑᒃ᙮ ᒦ ᐃ ᐁᔑᓈᑯᓯᔦᒃ ᑖᐱᔥᑰ ᒫᓇᒑᓂᔕᒃ ᑳᐃᔖᐙᒡ ᒣᑴ ᒪᐄᑲᓂᑳᕽ᙮ 4#Mat 10.7-14; Mark 6.8-11; Luke 9.3-5. ᑫᑯ ᒫᒌᑑᑫᒃ ᑭᔔᓂᔮᐗᔑᐙᓐ, ᑭᐲᓇᐃᑲᓂᐗᔑᐙᓐ ᑲᔦ, ᑳᑭᑭᔥᑲᒣᒃ ᐁᑕ ᑭᒪᑭᓯᓂᐙᓐ ᑭᑲᒫᒌᑑᒻ᙮ ᑫᑯ ᑭᐱᒌᑫᒃ ᒋᐅᑕᒬᐌᑑᔦᒃ ᑮᔥᐱᓐ ᐊᐎᔭ ᓇᑭᔥᑲᐌᒃ᙮ 5ᐋᑎ ᑕᔥ ᐃᑯ ᑫᔑ ᐲᑎᑫᔦᒃ ᐙᑳᐃᑲᓂᕽ, ᒦ ᐅᐌ ᓂᑕᒻ ᑫᐃᑭᑐᔦᒃ: ᑭᑲᔕᐌᑖᑯᓯᒻ ᐅᐅᒫ ᐙᑲᐃᑲᓃᕽ ᐁᔮᔦᒃ᙮ 6ᑮᔥᐱᓐ ᑕᔥ ᒥᓄᐐᒌᐎᓀᒀ ᐃᐃᒫ ᑳᐊᔮᐙᒡ ᐙᑳᐃᑲᓂᕽ, ᐃᐃᒫ ᐃᔑᓇᑲᑕᒧᒃ ᐃᐃᐌ ᑳᑮᐃᑭᑐᔦᒃ ᑮᐱᐲᑎᑫᔦᒃ: ᐱᓵᓐ ᐱᒫᑎᓯᒃ᙮ ᑮᔥᐱᓐ ᑕᔥ ᐃᓈᑎᓯᓯᒀ ᐃᐃᒫ ᐙᑳᐃᑲᓂᕽ, ᑮᐌ ᐅᑖᐱᓇᒧᒃ ᐃᐃᐌ ᑳᑮᐃᑭᑐᔦᑭᐸᓐ᙮ 7#1 Cor 9.14; 1 Tim 5.18. ᒦᔥ ᐃᐃᒫ ᑳᑮᐃᔑ ᐲᑎᑲᓂᑰᔦᒃ ᑫᔑ ᐊᔮᔦᒃ, ᐱᓵᓐ ᐃᑯ ᐃᓇᒋᑫᒃ, ᐃᔑᒥᓂᑴᒃ ᑲᔦ ᐋᓃᓐ ᐃᑯ ᐁᓇᔕᒥᑰᔦᒃ, ᐊᓃᔥ ᒋᑎᐸᐊᒪᐎᑎᐸᓐ ᐊᐎᔭ ᑳᐊᓄᑮᒡ᙮ ᑫᑯ ᐐᓐ ᐹᐲᑎᑫᑫᒃ ᐯᐸᑳᓐ ᐅᐙᑳᐃᑲᓂᑳᕽ᙮ 8ᐋᑎ ᐱᑯ ᐆᑌᓈᑳᕽ ᐁᔑ ᐲᑎᑫᔥᑳᔦᒃ, ᑮᔥᐱᓐ ᑕᔥ ᐃᑭ ᐯᒫᑎᓯᐙᒡ ᐃᓀᓂᒥᓀᒀ ᐱᓵᓐ ᒋᐲᔖᔦᒃ, ᐱᓵᓐ ᐃᑯ ᒦᒋᒃ ᑫᑰᓐ ᑫᐊᔕᒥᑰᔦᒃ᙮ 9ᒥᓍᒋᐃᑾᒃ ᑳᐋᑯᓯᐙᒡ ᐃᐃᒫ ᐆᑌᓈᕽ ᑳᐊᔮᐙᒡ ᐅᐅ ᒋᔑ ᐐᑕᒪᐌᒀ: ᐋᔕ ᑭᐯᔕᐙᐸᑕᒧᐙᒻ ᑭᔐᒪᓂᑑ ᒋᑎᐯᓂᒥᓀᒃ᙮ 10#Acts 13.51. ᐊᐲ ᑕᔥ ᐊᓂ ᐲᑎᑫᔥᑳᔦᒃ ᐆᑌᓈᕽ, ᐊᐎᔭᒃ ᑕᔥ ᐃᓀᑕᓯᒀ ᐃᐃᒫ ᒋᐲᔖᔦᒃ, ᒦᑲᓈᕽ ᐃᔖᒃ ᐅᐅ ᒋᐃᑭᑐᔦᒃ: 11ᐃᐃ ᓴ ᑳᐹᔥᑭᓀᓭᒃ ᑭᑑᑌᓈᒥᐙᕽ ᑳᐊᑯᑫᒃ ᓂᓯᑎᓈᕽ ᓂᑑᒋ ᐹᐹᐎᓯᑌᔑᒨᓄᒥᓐ ᒋᐅᒋ ᑭᑭᓇᐙᒋᓈᑯᑑᔮᕽ ᐁᓈᑎᓯᔦᒃ᙮ ᑫᑯ ᑕᔥ ᐗᓃᑫᑫᒃ ᐋᔕ ᐁᐯᔣᐸᑕᒧᐌᒃ ᑭᔐᒪᓂᑑ ᒋᑎᐯᓂᒥᓀᒃ᙮ 12#Gen 19.24-28; Mat 10.15; 11.24. ᑭᐐᑕᒪᐎᓂᓂᒻ ᐊᐲ ᑎᐹᑯᓂᑫᐎᑮᔑᑲᒃ ᑭᔐᒪᓂᑑ ᓇᐗᒡ ᐅᑲᑰᐹᓯᓈᓐ ᐃᐃ ᔂᑕᒻ Sodom ᐊᐲᒡ ᐐᓐ ᐃᐃ ᐆᑌᓈᓂ᙮

ᐋᓃᓐ ᑫᐃᔑᓭᐙᒡ ᑳᑌᐺᑕᓯᒀ ᐆᑌᓈᕽ ᐁᔮᐙᒡ

(Matthew 11.20-24)

13 # Isa 23.1-18; Ezek 26.1; 28.26; Joel 4.4-8; Amos 1.9-10; Zech 9.2-4. ᑮᓇᐙ ᑾᕒᐋᓯᓐ Chorazin ᑳᐊᔮᔦᒃ ᑭᑲ ᐅᒑᓂᒥᓯᒻ᙮ ᑫᑮᓇᐙ ᑭᑲ ᐅᒑᓂᒥᓯᒻ ᐯᓭᑕ Bethsaida ᑳ ᐊᔮᔦᒃ᙮ ᑮᔥᐱᓐ ᐃᓂ ᑳᐙᐸᑕᒣᒃ ᒫᒪᑳᒋᒋᑫᐎᓇᓐ ᑮᓈᑯᒋᑳᑌᑯᐸᓀᓇᓐ ᐃᐃᒫ ᐆᑌᓈᕽ ᑕᔭᕒᐃᕽ Tyre, ᓵᐃᑕᓂᕽ Sidon ᑲᔦ, ᐋᔕ ᒣᐎᔕ ᐅᑖᑮ ᐱᓯᑳᓈᐙᓐ ᑳᐊᓴᐱᐌᑲᓂᓂᑭᓐ ᑲᔦ ᒣᐎᔕ ᐅᑖᑮ ᐲᐎᐌᐱᓈᓈᐙ ᐲᑸᓂ ᐅᑎᒀᓂᐙᕽ ᒋᓈᑯᑑᐙᒡ ᑳᑮ ᑴᑳᑎᓯᐙᒡ᙮ 14ᒫᒥᑲᐎᒃ ᐃᑕᔥ ᐅᐅ: ᐊᐲ ᑎᐹᑯᓂᑫᐎ ᑮᔑᑲᒃ, ᑭᔐᒪᓂᑑ ᓇᐗᒡ ᐅᑲ ᑰᐹᓯᓇᐙᐞ ᐃᐃ ᑕᔭᕒᐃᕽ, ᓵᐃᑕᓂᕽ ᑲᔦ ᑳᐃᔑ ᐊᔮᓂᒡ ᐊᐲᒡ ᑮᓇᐙ᙮ 15#Isa 14.13-15. ᑮᓇᐙ ᑕᔥ ᑲᐸᕒᓂᔭᒥᕽ Capernaum ᑳᐊᔮᔦᒃ; ᑭᑮᐃᓀᑖᒻ ᐃᓇ ᐁᐐᐃᔥᐯᓂᑎᓱᔦᒃ ᑭᒋᑮᔑᑯᕽ ᐃᓇᑫ ᒫᐗᒡ ᒋᑭᒋ ᐃᓀᑖᑾᒃ ᑭᑑᑌᓈᒥᐙ? ᐌᑎ ᐅᓂᐴᒃ ᑳᔑ ᐊᔮᐙᒡ ᑭᑲᐃᔑ ᐌᐱᓂᑰᒻ᙮

16 # Mat 10.40; Mark 9.37; Luke 9.48; John 13.20. ᒦᔥ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᐊᐌᓀᓐ ᐃᑯ ᑫᐱᓯᑕᐎᓀᒃ, ᓃᓐ ᑳᐱᓯᑕᐎᒡ᙮ ᐊᐌᓀᓐ ᐃᑯ ᑳᐋᓇᐌᓂᒥᓀᒃ, ᓃᓐ ᐅᔕ ᑳᐋᓇᐌᓂᒥᒡ᙮ ᐊᐌᓀᓐ ᐃᑕᔥ ᐃᑯ ᑳᐋᓇᐌᓂᒥᒡ ᐅᑖᓇᐌᓂᒫᓐ ᐃᓂᐌᓂᐗᓐ ᑳᐲᒋᓂᔕᐅᒥᒡ, ᑮᐃᑭᑐ᙮

ᑮᐱᑮᐌᐙᒡ ᐃᑭ ᓃᔣᓯᒥᑕᓇᔑᓃᔑᓐ ᑳᑮᒫᒋᓂᔕᐅᑣᐸᓐ

17ᐃᑭ ᑕᔥ ᓃᔣᓯᒥᑕᓇᔑᓃᔑᓐ ᐃᓂᓂᐗᒃ ᑳᐱᑮᐌᐙᒡ ᐐᑫ ᑮᐱ ᒌᑫᑕᒨᒃ ᐁᑮᐃᑭᑐᐙᒡ: ᑌᐯᒋᑫᔭᓐ, ᒪᒋᐊᒑᑾᒃ ᓴ ᑮᐸᑕᐲᐗᒃ ᒋᓵᑲᐊᒧᐙᒡ ᐊᐲ ᑮᑲᓅᓇᑭᑣ ᑭᐐᓱᐎᓂᕽ ᐅᒋ, ᑮᐃᑭᑐᐗᒃ᙮

18ᒦᑕᔥ ᒋᓴᔅ ᑳᐃᓈᒡ: ᓂᑮᐙᐸᒫ ᓭᑕᓐ Satan ᑭᒋᑮᔑᑯᕽ ᐁᐅᒋ ᐸᑭᔑᕽ ᑖᐱᔥᑰ ᑳᓈᔕᑮᔮᑌᓭᒃ ᐁᑮᐃᔑᓈᑯᓯᒡ᙮ 19#Psa 91.13. ᐱᓯᑕᐎᔑᒃ, ᑭᑮᒦᓂᓂᓂᒻ ᐅᔕ ᑲᔥᑭᐁᐎᓯᐎᓐ ᒋᑕᑯᑳᓀᒀ ᑳᑯᑖᓀᑖᑯᓯᐙᒡ ᑭᓀᐱᑰᒃ, ᐃᑭ ᑲᔦ ᐅᓱᐎᐙᕽ ᑳᐅᒋ ᒌᓱᐌᐙᒡ, ᑲᔦ ᑕᔥ ᒋᔖᑰᒋᑑᔦᒃ ᒥᓯᐌ ᐁᔑ ᒪᔥᑲᐎᓰᒡ ᐊᐊ ᓭᑕᓐ ᑳᓇᑳᓂᐌᒡ᙮ ᑳᐐᓐ ᑫᑰᓐ ᑭᑲ ᐐᓴᑳᐱᓇᓂᑯᓰᒻ᙮ 20ᑫᑯ ᑕᔥ ᐐᓐ ᐅᒋ ᒌᑫᑕᑫᒃ ᐁᐱᓯᑕᐎᓀᒀ ᒪᒋᐊᒑᑾᒃ, ᓇᐗᒡ ᐅᒋ ᒥᓉᑕᒧᒃ ᑭᐐᓱᐎᓂᐙᓐ ᐁᐅᔑᐲᐃᑳᑌᑭᓐ ᑭᒋᑮᔑᑯᕽ᙮

ᒥᓉᑕᒧᐎᓐ ᑮᒧᔥᑭᓀᔥᑳᑯᒡ ᒋᓴᔅ

(Matthew 11.25-27; 13.16-17)

21ᒦᑕᔥ ᐃᐃ ᐯᔑᑾᓐ ᑎᐸᐃᑲᓐ ᒋᓴᔅ ᐅᑮ ᒌᑫᑕᒧᔥᑳᑰᓐ ᑭᔐᒪᓂᑑᓐ ᐅᑕᒑᑯᓂ᙮ ᒦᔥ ᑳᐃᑭᑐᒡ: ᓂᑌᑌ, ᒦᑴᒡ ᑭᑎᓂᓐ, ᑳᑎᐯᑕᒪᓐ ᑮᔑᒃ, ᐊᑭ ᑲᔦ, ᐋᓃᔥ ᑳᐐᓐ ᑭᑮ ᑭᑫᑕᒨᓈᓰᒃ ᐅᓄ ᑫᑰᓇᓐ ᐃᑭᐌᓂᐗᒃ ᑳᑲᑮᑖᐌᑕᒧᐙᒡ ᑳᑭᑫᑖᓱᐙᒡ ᑲᔦ, ᐃᑭ ᑕᔥ ᐐᓐ ᐋᐱᒋ ᑳᑭᑫᑕᓯᒀ ᑫᑰᓐ ᑭᑮᐙᐸᑕᐋᒃ᙮ ᓂᑌᑌ, ᒦ ᐅᐌ ᐁᔑ ᒥᓍᐸᑕᒪᓐ᙮

22 # John 3.35; 10.15. ᒦᑕᔥ ᑳᐊᓂ ᐃᑭᑐᒡ: ᓂᑌᑌ ᑕᔥ ᑲᑭᓇ ᑫᑰᓂᓂ ᓂᑮᒦᓂᒃ᙮ ᑳᐐᓐ ᐊᐎᔭ ᐅᑭᑫᓂᒫᓰᓐ ᐃᓂ ᐅᑯᓯᓯᒫᓐ, ᒦ ᐁᑕ ᐊᐊ ᑳᐅᔫᓯᒥᓐᒡ᙮ ᑳᐐᓐ ᑲᔦ ᐊᐎᔭ ᐅᑭᑫᓂᒫᓰᓐ ᐃᓂ ᑳᐅᔫᓯᒥᒥᓐᒡ, ᒦ ᐁᑕ ᐊᐊ ᐅᑯᓯᓯᒫ᙮ ᐃᐃ ᑕᔥ ᐁᑕ ᑲᔦ ᑳᐃᓀᑕᕽ ᐅᑯᓯᓯᒫ ᒋᑭᑫᑕᒨᓈᒡ᙮

23ᒋᓴᔅ ᐅᑮ ᑴᑭᑳᐸᐎᑕᐙᐞ ᐅᑭᑭᓄᐊᒪᐙᑲᓇᐞ ᐁᐃᓈᒡ: ᐁᑕᑕᐌ ᑮᓇᐙ ᑭᔕᐌᑖᑯᓯᒻ ᐁᐙᐸᑕᒣᒃ ᐅᐅ ᑳᐙᐸᑕᒣᒃ᙮ 24ᑭᐐᑕᒪᐎᓂᓂᒻ ᐱᐹᑏᓄᐗᒃ ᑭᔐᒪᓂᑑᓐ ᑫᓅᑕᒪᐙᐙᒡ, ᐃᑭ ᑲᔦ ᑭᒋᐅᑭᒫᒃ ᐁᑮᐃᔑ ᒥᓴᐌᑕᒧᐙᒡ ᒋᐙᐸᑕᒧᐙᒡ ᓅᑯᒻ ᑮᓇᐙ ᑳᐙᐸᑕᒣᒃ, ᑳᐐᓐ ᐃᑕᔥ ᐅᑮᐙᐸᑕᓰᓈᐙ᙮ ᑲᔦ ᑕᔥ ᒋᓅᑕᒧᐙᒡ ᑫᑰᓇᓐ ᑮᓇᐙ ᑳᓅᑕᒣᒃ, ᑳᐐᓐ ᑕᔥ ᐅᑮᓅᑕᓰᓈᐙ, ᐅᑮᐃᓈᓐ᙮

ᐁᐊᐌᒋᑳᓱᒡ ᐃᓂᓂ ᓴᒣᕒᐃᔭ ᑳᐅᒌᒡ ᐁᑮᑰᐹᓯᓈᑫᒡ

25 # Mat 22.35-40; Mark 12.28-34. ᐯᔑᒃ ᑕᔥ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ ᐅᑮᑲᑴ ᐗᓂᑮᔗᐃᑰᓐ ᐁᑮᐃᔑ ᑲᑴᒋᒥᑯᒡ: ᐅᑭᑭᓄᐊᒫᑫ, ᐋᓃᓐ ᑫᐃᔑᒋᑫᔮᓐ ᒋᐊᔮᔮᓐ ᑳᑭᑫ ᐱᒫᑎᓯᐎᓐ, ᐅᑮᐃᑰᓐ᙮ 26ᒦᔥ ᒋᓴᔅ ᑳᐃᓈᒡ: ᐋᓃᓐ ᑕᔥ ᐁᔑᐲᐃᑳᑌᒃ ᐃᐃ ᑫᑌ ᐅᓇᔓᐌᐎᓐ? ᐋᓃᓐ ᐁᔑᓂᓯᑐᑕᒪᓐ?

27 # Lev 19.18; Deut 6.5. ᒦᑕᔥ ᑳᐃᑯᒡ: ᑭᑖ ᓵᑭᐋ ᑌᐯᒋᑫᒡ ᑭᑭᔐᒪᓂᑑᒻ ᐃᐃᒫ ᒥᓯᐌ ᑭᑌᐃᕽ, ᐃᐃᒫ ᑲᔦ ᒥᓯᐌ ᑭᑕᒑᑯᕽ, ᐃᐃᒫ ᑲᔦ ᒥᓯᐌ ᑭᒪᔥᑲᐎᓰᐎᓂᕽ, ᐃᐃᒫ ᑲᔦ ᒥᓯᐌ ᑭᓈᑲᑕᐌᑕᒧᐎᓂᕽ᙮ ᒋᓵᑭᐋᒡ ᑲᔦ ᑮᒋᐱᒫᑎᔅ ᑖᐱᔥᑰ ᑳᔑ ᓵᑭᐃᑎᓱᔭᓐ, ᐅᑮᐃᑰᓐ᙮ 28#Lev 18.5. ᒦᔥ ᒋᓴᔅ ᑳᐃᓈᒡ: ᑾᔭᒃ ᑭᑎᔑᓇᑴᑕᒻ᙮ ᒦ ᐅᐌ ᐃᔑᒋᑫᓐ, ᒦᔥ ᒋᐊᔮᔭᓐ ᐱᒫᑎᓯᐎᓐ, ᐅᑮᐃᓈᓐ᙮ 29ᐃᓂ ᑕᔥ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ ᑮᐐᑲᑴ ᑫᒋᓇᐅᐙᓐ, ᒦᔥ ᑳᐃᔑ ᑲᑴᒋᒥᑯᒡ: ᐊᐌᓀᓐ ᑕᔥ ᐊᐊ ᓃᒋᐱᒫᑎᔅ?

30ᒦᑕᔥ ᐅᐅ ᒋᓴᔅ ᑳᐃᓈᒡ: ᐯᔑᒀ ᐃᓂᓂ ᒉᕒᐆᓴᓬᐊᒥᕽ Jerusalem ᑮᐅᒋ ᒫᒑ ᐁᑮᐃᔖᒡ ᒉᕒᐊᑰ Jericho ᐆᑌᓈᕽ᙮ ᒣᒀ ᑕᔥ ᐁᐱᒥ ᐊᔮᒡ ᐅᑮᒨᒋᔥᑲᐞ ᐅᑮᐅᑎᑎᓂᑰᐞ ᐁᑮᒪᑲᒥᑯᒡ, ᑳᑮ ᑭᑭᔥᑲᕽ ᑲᔦ ᐁᑮᒪᑲᒥᓐᒡ, ᑲᔦ ᑕᔥ ᐁᑮ ᐸᐸᑭᑌᐅᑯᒡ᙮ ᒦᔥ ᑳᐃᔑ ᓇᑲᓂᑯᒡ, ᐁᑮᐋᐱᑑᓂᐳᒡ᙮ 31ᓇᐃᑖᒃ ᑕᔥ ᐊᓇᒥᐁᐎᑭᒫ ᑫᐐᓐ ᑮᐱᐱᒪᐊᑑ ᐃᐃ ᒦᑲᓈᓂ᙮ ᐊᐲ ᑕᔥ ᐁᐙᐸᒫᒡ ᐁᐱᒥᔑᓂᓂᒡ ᐃᓂ ᑳᑮᒦᑳᒋᑲᓂᐎᓂᒡ, ᒦ ᐃ ᓇᐹᒡ ᐃᓇᑫ ᑳᐃᔑ ᐌᒫᔥᑲᐙᒡ᙮ 32ᒦᑕᔥ ᑫᐐᓐ ᐊᐊ ᐊᓇᒥᐁᐗᓄᑮᐋᑲᓐ ᓬᐄᐸᔨᕽ Levite ᐌᑕᑳᓀᓯᒡ#10.32 ᓬᐄᐸᔨᕽ Levite ᐌᑕᑳᓀᓯᒡ ᑳᐃᓂᓐᒡ ᒦ ᐊᐌ ᐃᓂᓂ ᑳᑮ ᐅᒋ ᑎᐯᑖᑯᓯᒡ ᐃᒫ ᓬᐄᐹᐃ Levi ᑳᐅᑕᑳᓀᓯᐙᒡ, ᒦ ᐃᐌᓂ ᐅᑕᓄᑮᐎᓂᐙ ᒋᐐᒋᑣᐙᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ ᒣᒀ ᐁᐲᑎᑳᓂᐗᓂᓂᒃ᙮ ᐅᑮᐱ ᐅᑎᑖᓐ ᐃᐃᒫ᙮ ᐊᐲ ᑕᔥ ᐁᐙᐸᒫᒡ ᐁᐱᒥᔑᓂᓂᒡ ᐃᓂ ᐃᓂᓂᐗᓐ, ᒦ ᐃ ᑫᐐᓐ ᓇᐹᒡ ᐃᓇᑫ ᑳᐃᔑ ᐌᒫᔥᑲᐙᒡ᙮ 33ᐯᔑᒃ ᑕᔥ ᐃᓂᓂ ᓴᒣᕒᐃᔭ Samaria ᐌᒌᒡ ᐁᐱᒥ ᐊᔮᒡ ᐃᐃᒫ ᒦᑲᓈᕽ ᐅᑮᐱ ᐅᑎᑖᓐ ᐁᔑ ᐱᒥᔑᓂᓂᒡ ᐃᓂ ᐃᓂᓂᐗᓐ᙮ ᐁᐙᐸᒫᒡ ᐃᑕᔥ ᐅᑮ ᑰᐹᓯᓇᐙᓐ᙮ 34ᒦᔥ ᑳᑮᓈᓯᑲᐙᒡ ᐁᐱᒥᔑᓂᓂᒡ᙮ ᐅᑮ ᓰᑭᓈᓐ ᔔᒥᓈᐴᓂ, ᐱᒥᑌᓂ ᑲᔦ ᐁᑮᐋᐸᒋᑑᒡ ᐁᑮ ᐴᓯᓈᒡ ᑳᐃᔑ ᓇᒣᔮᐱᓇᓂᒥᓐᒡ᙮ ᒦᔥ ᑲᔦ ᑳᐃᔑ ᓰᑑᐱᓈᒡ, ᐁᑮᐊᓂ ᐗᑭᒋᔑᒫᒡ ᐃᐃᒫ ᒥᑕᑎᒨᓯᕽ᙮ ᐅᑮᐃᔑᐎᓈᓐ ᑲᔦ ᑲᐯᔒᐎᑲᒥᑯᕽ, ᐁᑮᐊᐎ ᓈᓈᑲᒋᐋᒡ᙮ 35ᐊᐲ ᑕᔥ ᐁᐊᓂ ᐙᐸᓂᓂᒃ ᐁᐐᐊᓂ ᒫᒑᒡ, ᐅᑮ ᑭᑎᓈᐞ ᓃᔑᓐ 2 ᐙᐹᐱᑯ ᔔᓂᔮᓴᐞ ᐁᑮᒦᓈᒡ ᑳᑲᓇᐌᑕᒥᓂᒡ ᑲᐯᔒᐎᑲᒥᒃ ᐁᑮᐃᓈᒡ: ᑾᔭᒃ ᑲᓇᐌᓂᒻ᙮ ᐊᐲ ᑕᔥ ᐱᑮᐌᔮᓐ ᐱᑭᐱᒌᔮᓐ ᐅᐅᒫ, ᑭᑲ ᑎᐸᐊᒪᐎᓐ ᐋᓃᓐ ᒥᓂᒃ ᑫᒣᑎᓂᑫᐃᒃ ᐁᑲᓇᐌᓂᒪᒡ, ᐅᑮᐃᓈᓐ᙮ ᒦ ᐃ ᒋᓴᔅ ᑳᐃᓈᒋᒧᒡ᙮

36ᒦᑕᔥ ᒋᓴᔅ ᑳᐃᔑᑲᑴᒋᒫᒡ: ᐋᓃᓐ ᑮᓐ ᐁᓀᑕᒪᓐ ᐃᑭᐌᓂᐗᒃ ᓂᓯᓐ 3 ᑳᑮᐱᒥ ᐊᔮᐙᒡ, ᐊᐌᓀᓐ ᐊᐊ ᑳᑮ ᑑᑕᕽ ᑖᐱᔥᑰ ᐁᐐᒋᐱᒫᑎᓰᒫᒡ ᐃᓂᐌᓂᐗᓐ ᐃᓂᓂᐗᓐ ᑳᑮ ᒦᑳᓂᑯᓂᒡ ᐅᑮᒨᒋᔥᑲᐞ? ᐅᑮᐃᓈᓐ᙮ 37ᒦᑕᔥ ᑳᐃᑯᒡ: ᐊᐊᐌ ᓴ ᑳᑮ ᑰᐹᓯᓇᐙᒡ ᐃᓂ ᐃᓂᓂᐗᓐ, ᐅᑮᐃᑰᓐ᙮

ᒦᔥ ᒋᓴᔅ ᑳᐃᓈᒡ: ᒦ ᐃ ᐊᓂᔑ ᒫᒑᓐ, ᐯᔑᑾᓐ ᐅᐅ ᒋᐃᔑᒋᑫᔭᓐ, ᐅᑮᐃᓈᓐ᙮

ᒋᓴᔅ ᑮᒪᐗᑎᓵᒡ ᒫᕒᑕᐗᓐ ᐃᓂ ᑲᔦ ᒣᕒᐄᓐ

38 # John 11.1. ᒋᓴᔅ ᑕᔥ ᐅᑭᑭᓄᐊᒪᐙᑲᓇᐞ ᑲᔦ ᒣᒀ ᐁᐱᒥ ᐊᔮᐙᒡ ᐅᑮᐱ ᐅᑎᑖᓈᐙ ᐆᑌᓇᐌᔅ᙮ ᒦ ᐃᒫ ᑳᑮ ᐲᑎᑲᓂᑯᒡ ᐃᑴᐗᓐ ᒫᕒᑕ Martha ᐁᔑᓂᑳᓱᓂᒡ᙮ 39ᒫᕒᑕ ᑮᐊᔮᐗᓐ ᐐᒋᑴᓐ ᒣᕒᐃ Mary ᐁᔑᓂᑳᓱᓂᒡ᙮ ᒦᐗᓐ ᐃᓂ ᑳᑮᐊᐱᓂᒡ ᐁᔑᓯᑌᐱᓂᒡ ᑳᑎᐯᒋᑫᓂᒡ ᐁᐱᓯᑖᐙᓂᒡ ᐋᓃᓐ ᐁᔑ ᑭᑭᓄᐊᒫᑫᓂᒡ᙮ 40ᒫᕒᑕ ᑮᐅᒋ ᐅᒑᓂᒣᑕᒻ ᐐᓐ ᐁᑕ ᒋᐊᓄᑮᒡ ᐁᐸᒦᑖᑫᒡ᙮ ᐯᔓ ᑮᐲᔖ ᐁᑮᐱ ᐃᑭᑐᒡ: ᑌᐯᒋᑫᔭᓐ, ᑳᐐᓐ ᐃᓇ ᑫᑰᓐ ᑭᑎᓀᑕᓰ ᐁᐐᒋᐃᓯᒃ ᓂᒋᑴ ᐅᐅᐌ ᐊᓄᑮᐎᓐ ᑳᑑᑕᒫᓐ᙮ ᐐᑕᒪᐤ ᒋᐱ ᐐᒋᐃᒡ, ᑮᐃᑭᑐ᙮

41ᒦᔥ ᑳᑎᐯᒋᑫᒡ ᑳᐃᔑ ᓇᑴᑕᐙᒡ: ᒫᕒᑕ, ᒫᕒᑕ, ᐁᑕᑕᐌ ᓃᐱᐗᐞ ᑫᑰᓐ ᑭᒥᑯᔥᑳᒋᐃᑯᓐ, ᐁᐗᓇᔥᑴᐃᑯᔭᓐ ᑲᔦ᙮ 42ᐯᔑᒃ ᐁᑕ ᔖᑰᒡ ᑫᑰᓐ ᓃᑳᓀᑖᑾᓐ᙮ ᒣᕒᐃ ᑕᔥ ᐐᓐ ᐅᑮᐅᑖᐱᓈᓐ ᐁᐐᐃᔑᒋᑫᒡ ᑳᒥᓄᓈᑾᓂᓂᒃ, ᑳᐐᓐ ᑕᔥ ᑕᒪᑲᒫᓰ ᐃᐃᐌᓂ, ᐅᑮᐃᓈᓐ᙮

Currently Selected:

ᓬᐅᒃ 10: OJBS

Highlight

Copy