Lucas 4

Sa Pagpanulay Ki Jesus

(Lucas 4:1-13; Mateo 4:1-11; Marcos 1:12-13)

1Uminawà si Jesus diyà ta Jordan ha tinaguan en hu Balaan ha Ispiritu daw inuwit haena hu Balaan ha Ispiritu duun hu pinakabulung-bulung ha lugar 2ha duun daan sinulay hi Satanas seled hu kap-atan ha aldaw. Duun taena ha panahun suminalang si Jesus hu pagkaen aman su maiwas en haena tungkay gayed nauhul.

3Inikagiyan hi Satanas, “Ku Batà ka hu Dios ikagiyi haini sa mga batu ha mabuhat ha supas.”

4Ba tuminubag si Jesus, “Sa lalang hu Dios nakasulat en ha tagyanaen, ‘Kenà iyan dà igkauyag hu etaw sa kalan-enen.’”

5Dinuma si Jesus hi Satanas duun hu bubungan dayun tigkan din impaahà ki Jesus sa alan ha mga ginharian ta kalibutan 6-7daw inikagiyan din si Jesus, “Ku simbahen a ikaw saini ha agkaahà nu ig-ila ku ikaw ta daw pagharian nu, ta saini in-ila kanak ta daw makaila ku hu bisan sin-u ha agpilien ku.”

8Ba si Jesus tuminubag, “Sa lalang hu Dios nakasulat en ha tagyanaen, ‘Iyan dà sa Dios ha Magbabayà hu alan angayan ha simbahen daw alagaran.’”

9Dayun si Jesus dinuma en paman hi Satanas duun hu kinatangkawan ha atep taena ha Timplu diyà ta Jerusalem daw ikagiyi, “Ku Batà ka hu Dios sabay ka duun taini 10ta sa insulat ha lalang hu Dios tagyanaen,

‘Suguen hu Dios sa mga balinsuguen hu pagbantay ikaw 11daw tamuken ka kandan ta daw harì ka mabugel.’”

12Ba tuminubag si Jesus, “Sa lalang hu Dios nakasulat en ha tagyanaen, ‘Harì agsulaya sa Dios ha Magbabayà hu alan.’”

13Su mapengahan en hi Satanas buhata sa alan ha paagi din hu pagsulay inawaan din si Jesus hu mababà ha panahun.

Sa Puunaan Hu Pagtudlù Hi Jesus

(Lucas 4:14-15; Mateo 4:12-17; Marcos 1:14-15)

14Luminikù si Jesus diyà ta prubinsya ta Galilea ha ginaheman hu Balaan ha Ispiritu daw sa tultulanen mahitenged kandin nakalekep duun hu alan ha mga banuwa diyà. 15Migtudlù haena duun hu mga simbahan hu mga Judio daw dinayè hu kaet-etawan.

Si Jesus Diyà Ta Nazareth

(Lucas 4:16-30; Mateo 13:53-58; Marcos 6:1-6)

16Duminiyà si Jesus ta Nazareth ha duun daan mig-adagi. Sumalà hu batasan din ku Sabadu ha iyan Aldaw hu Paghimlay duminuun haena hu simbahan hu mga Judio. Dayun huminitindeg hu pagbasa hu lalang hu Dios 17aman in-ila kandin sa balasahen ha insulat hi Isaias sa prupita. Binekal din haena duun hu agkabayaan din agbasaha ha tagyanaen, 18“Sa Balaan ha Ispiritu ha sinugù hu Dios uminulin dini ta kanak tumenged ta pinilì a kandin ha magsangyaw hu Maayad ha Tultulanen duun hu mga makaluluuy. Impadini a kandin ta daw matultulan ku sa mga prisu ha malibri sidan daw sa mga buta makaindan, mabuligan ku daan sa agdaeg-daegen 19daw tultulan ku daan sidan ha makauma sa panahun ha luwasen hu Dios sa kaet-etawan.”

20Su makapenga si Jesus magbasa inlikù din su balasahen duun ku mig-ila kandin dayun mininuu hu pagtudlù. Sa mga etaw uminahà diyà ta kandin 21aman inikagiyan din sidan, “Iman taini ha aldaw saini ha lalang hu Dios ha pigbasa ku natuman en.”

22Sa alan ha nakapaliman kandin migdayè kandin daw nabeleng daan sidan hu maayad ha lalang hi Jesus aman nanginginsà sidan, “Kenà ba batà dà man hayana hi Jose?”

23Ba inikagiyan sidan hi Jesus, “Amin duma inyu ha nakahenà-henà, ‘Mananambal, unaha bulunga sa ikaw ha dalu. Buhata daan duun taini ha banuwa nu sa napaliman day ha binuhat nu diyà ta Capernaum.’” 24Minikagi pa si Jesus, “Laus gayed sa ag-ikagiyen ku inyu ha sa prupita harì agdawaten duun hu kandin ha banuwa. 25Ikagiyen ku inyu ha su anay ha panahun pa hi Elias sa prupita nakauma sa kauhul tumenged ta hurà udan hu tatulu ha tuig daw tengà. Madakel ha mga Judio ha mga balu ha bahi sa miglised, 26ba si Elias hurà ipadiyà hu Dios ta kandan ta duun dà taena ha balu ha bahi ha kenà Judio diyà ta Sarepta ha sakup ta Sidon. 27Daw su anay ha panahun pa hi Eliseo sa prupita madakel gayed sa mga Judio ha sanglahen, ba duun taena iyan dà naulian si Naaman sa kenà Judio ha taga-Siria.”

28Su mapaliman haena hu mga etaw diyà ta simbahan tungkay gayed sidan nangapauk. 29Aman huminitindeg sidan daw abuga si Jesus duun taena ha banuwa, dayun ginuyud dan haena duun ku dalama ta agkabayaan dan en ngaay aghuluga. 30Ba si Jesus luminubuk duun ku mga etaw dayun hipanaw.

Sa Etaw Ha Tinaguan Hu Busaw

(Lucas 4:31-37; Marcos 1:21-28)

31Duminiyà si Jesus ta Capernaum ha sakup ta Galilea daw nanudlù diyà su Aldaw hu Paghimlay. 32Sa kaet-etawan nangabeleng gayed ta sa pagtudlù hi Jesus amin duun gahem.

33Diyà ta simbahan amin etaw ha tinaguan hu busaw ha tagkulahiay, 34“Jesus ha taga-Nazareth, inu sa labet nu kanay? Duminini ka ba hu pagsilut kanay? Agkakilala ku ikaw ha sinugù ka hu Dios.”

35Ba binaldeng haena hi Jesus, “Hagteng ka daw awà ka diyan tayan.” Pinaagi hu gahem ku busaw nabantang su etaw duun hu atubangan dan dayun guminuwà su busaw, ba su etaw hurà kabugel.

36Sa alan ha mga etaw diyà nangabeleng gayed daw miglalang-lalang hu kagi dan, “Inu gid haini ha katudluanan? Ta saini ha etaw amin din gahem ha bisan sa mga busaw agkabugaw din.” 37Sa tultulanen mahitenged ki Jesus nakalekep duun hu alan ha ubayà ha mga banuwa diyà.

Sa Pagbulung Hu Mga Etaw

(Lucas 4:38-41; Mateo 8:14-17; Marcos 1:29-34)

38Uminawà si Jesus diyà ta simbahan daw duminiyà ta balay hi Simon. Agkagenaw sa ugang ha bahi hi Simon daw hinangyù dan si Jesus ha buligan din haena, 39aman inubayan din dayun naulian. Sagunà haena migbangun daw sugbahi say Jesus.

40Su madani en agpanukilem pinan-uwit hu mga etaw diyà ki Jesus sa mga etaw ha hurà mag-iling sa dalu dan, dayun dinampà sidan hi Jesus aman alan sidan naulian. 41Amin daan madakel ha mga busaw ha namangguwà duun hu mga etaw ha tagkulahiay hu kagi dan, “Iyan ka gayed Batà hu Dios.” Ba binaldeng sidan hi Jesus ha harì mag-ikagiyà ta nakilala dan en ha si Jesus iyan su Misiyas.

Sa Pagpanudlù Hi Jesus Duun Hu Mga Simbahan

(Lucas 4:42-44; Marcos 1:35-39)

42Su maselem en huminipanaw si Jesus payanaen duun hu pinakabulung-bulung ha lugar aman pinan-ahà haena hu mga etaw. Su maahà dan en si Jesus pighawidan dan diyà ta kandan. 43Ba inikagiyan din sidan, “Kinahanglan gayed ha sa Maayad ha Tultulanen mahitenged hu pagharì hu Dios isangyaw ku daan duun hu duma ha mga banuwa ta iyan haini indini ku ta kalibutan.” 44Aman nanudlù haena duun hu mga simbahan hu mga Judio diyà ta Judea.

Currently Selected:

Lucas 4: bkd

Highlight

Copy