Lucas 7
7
Sa Pagbulung Hu Suluguen Hu Kapitan
(Lucas 7:1-10; Mateo 8:5-13)
1Su makapenga si Jesus mag-ikagi duun hu mga etaw duminiyà dayun ta Capernaum. 2Amin diyà kapitan hu sundalu ta Roma na amin din pinalanggà ha suluguen ha apit en gayed agpatay hu dalu. 3Su mapaliman ku kapitan sa mahitenged ki Jesus pinasuguan din haena hu mga magulang ha Judio ta daw mahangyù dan ha bulungen din haena sa suluguen. 4Su makauma sidan diyà ki Jesus pinagayukan dan haena hu kagi dan, “Saini ha kapitan hu sundalu angayan ha buligan nu 5ta palanggà kuy kandin sikuy sa mga Judio daw binuhatan kuy hu simbahan.” 6Aman duminuma si Jesus kandan.
Ba su ubay en sidan diyà ta balay amin impasal-aw kandan ku kapitan ta daw maikagiyan si Jesus, “Ginuu, bay-an kad agdayun ta agkagayhà a ku dumini ka ta balay ku 7daw kenà a daan angayan hu pagdiyan ta ikaw. Ba bà nu dà ikagiya ha maulian en haini sa suluguen ku. 8Natun-an ku ha mahimu nu haini ta siak suluguen a daan hu agalen ku ha sundalu daw amin daan mga sundalu ha sakup ku. Ku ipahipanaw ku sidan agtuu gayed sidan. Bisan inu sa igsugù ku hu suluguen ku agbuhaten din daan haena.”
9Su mapaliman haena hi Jesus nabeleng gayed dayun sumininalu duun hu mga kaet-etawan ha namanduma kandin daw migyanaen, “Ikagiyen ku inyu ha hurà ku pa gayed naahà duun hu mga kaliwatan hi Israel ha agkailing taini sa pagtuu din.” 10Su makalikù en haena sa mga sinugù diyà ta balay naahà dan ha naulian en su suluguen.
Sa Pagkabanhaw Hu Batà
11Hurà kalugay duminuun si Jesus hu banuwa ha tagngaranan ta Nain daw namanduma daan sa mga tinun-an din daw sa madakel ha mga etaw. 12Su ubay en sidan ta pultahan ta kutà taena ha banuwa amin dan naahà ha taglanting hu minatay. Saena ha minatay maama ha sabubuwa dà ha batà hu bahi ha balu, daw madakel ha mga etaw duun taena ha banuwa sa namanduma kandin. 13Su maahà hi Jesus su bahi ha balu nahid-uwan din aman inikagiyan din, “Harì ka tag-agalà.”
14Dayun inubayan din haena sa lungun daw ibiti aman nakataleen su taglanting duun. Minikagi si Jesus, “Bangun kad.” 15Migbangun haena sa minatay ha tag-ikagi en, dayun indiyà hi Jesus ki Inay din.
16Sa alan ha mga etaw nangahaldek daw dinayè dan sa Dios ha tagyanaen, “Sa labaw ha prupita nakauma dini ta kanuy daw duminini sa Dios hu pagbulig hu mga etaw din.” 17Saena ha tultulanen mahitenged ki Jesus nakalekep duun hu alan ha mga banuwa diyà ta Judea daw hu ubayà taena.
Si Jesus Daw Si Juan Ha Tagpamautismu
(Lucas 7:18-35; Mateo 11:2-19)
18Tinultulan si Juan Ha Tagpamautismu hu mga sumusunud din mahitenged hu alan ha binuhat hi Jesus. 19Aman inumaw hi Juan sa daruwa ha sumusunud din daw sugua diyà ki Jesus ha insaan dan, “Iyan kad ba haena su intagnà ha makauma dini ta kalibutan daw ku amin pa ba lain ha pagsalapen day?” 20Aman su makadiyà en sidan ki Jesus minikagi sidan, “Impadini kay hi Juan hu pag-insà ku iyan kad ba haena su intagnà ha makauma dini ta kalibutan daw ku amin pa ba lain ha pagsalapen day.”
21Duun taena ha panahun naulian hi Jesus sa madakel ha mga etaw ha amin dan mga dalu daw binugaw din sa mga busaw ha tuminagù duun hu mga etaw daw amin daan mga buta ha nakaindan. 22Aman tinubag sidan hi Jesus, “Likù kaw diyà ki Juan daw tultuli hu napaliman nuy daw hu naahà nuy ha binuhat ku. Saena iyan sa nakaindan sa mga buta daw nakahipanaw sa mga pigket, nangaulian sa mga sanglahen daw nakapaliman en daan sa mga bengel. Amin en daan nabanhaw ha minatay daw sa Maayad ha Tultulanen insangyaw en daan duun hu mga makaluluuy ha mga etaw. 23Malipayen gayed sa etaw ha harì tagduwa-duwa hu pagsalig din kanak.”
24Su umulì en haena sa mga sumusunud hi Juan inikagiyan hi Jesus sa mga kaet-etawan, “Inu sa tuyù nuy su dumiyà kaw ki Juan duun taena ha pinakabulung-bulung ha lugar? Duminiyà kaw ba hu pag-ahà hu etaw ha agkailing hu salaysay ha ku agkalamagen agkahuyung dà? 25Duminiyà kaw ba daan ta daw maahà nuy sa tungkay madagway ha pinaksuy din? Hurà gayed ta sa etaw ha tagpinaksuy hu madagway daw mahayahay sa pagtimà din duun taw dà agkaahà hu mga balay hu harì. 26Kenà ba iyan man inahà nuy diyà sa prupita? Laus gayed ha prupita si Juan daw labaw pa haena 27ta iyan en su sinubay duun hu insulat ha lalang hu Dios ha tagyanaen,
‘Igpauna ku dì ikaw ta daw makapangandam hu ag-agiyan nu.’
28Ikagiyen ku inyu ha duun taini ha kalibutan hurà en labaw dì ki Juan, ba bisan sa kinaminusan ha tagharian hu Dios labaw pa daan dì ki Juan.”
29Su mapaliman haena hu mga etaw alan sidan bisan sa mga manunukut hu buhis ha nabautismuwan en hi Juan nakakilala ha hustu gayed sa mga paagi hu Dios. 30Ba sa mga Parisiyu daw sa mga manunudlù hu Kasuguan hurà dan dawata sa katuyuan kandan hu Dios aman hurà daan sidan kabautismuwi su anay hi Juan.
31Dayun minikagi si Jesus, “Inu man sa agpailingan ku inyu? 32Agkailing kaw hu mga batà ha tag-alù-alù duun hu baligyaanan ha tag-ikagi duun hu mga duma dan, ‘Tagkanta kay ba bà su hurà nuy duun labet. Taglugul kay ba harì kaw tag-agalà hu inyu.’ 33Su makauma si Juan Ha Tagpamautismu sa tagsalang hu pagkaen daw hurà inum hu binu inikagi nuy ha bà dà haena agkalibeg. 34Siak sa Batà hu Etaw sa harì tagsalang hu pagkaen daw pag-inum kagi nuy paman, ‘Ahà kaw tayana ha agapan daw beleng-beleng, sa mga amigu din mga limbungan ha mga manunukut hu buhis daw mga masinupaken.’ 35Ba saena ha duminawat hu katudluanan ku daw hu ki Juan nakakilala ha hustu gayed sa mga paagi hu Dios.”
Si Jesus Diyà Ta Balay Hi Simon Sa Parisiyu
36Amin Parisiyu ha mig-imbita ki Jesus hu pagkaen diyà ta balay din aman duminiyà si Jesus ta kandin daw kaen. 37Amin bahi duun taena ha banuwa ha makasasalà gayed. Su mapaliman din ha si Jesus tagkaen duun hu balay taena ha Parisiyu duminiyà daan haena ha tag-uwit hu pahumut ha intagù duun hu butilya ha alabastru. 38Luminuhud su bahi ha tag-agalà diyà ki Jesus aman nalemeg sa paa hi Jesus hu mga luhà din. Tinarapuwan din sa paa hi Jesus ta buhuk din daw hadeki dayun hudhudi hu pahumut.
39Su maahà haena ku Parisiyu ha mig-imbita ki Jesus nakahenà-henà haena, “Ku laus pa haini ha prupita matun-an din en ngaay ha makasasalà gayed haini sa bahi ha mig-ibit kandin.”
40Ba inikagiyan haena hi Jesus, “Simon, amin ku ag-ikagiyen ikaw.”
Tuminubag si Simon, “Manunudlù, inu man?”
41Minikagi si Jesus, “Amin daruwa ha etaw ha suminambay hu salapì duun hu sapian ha etaw, sa sabuwa suminambay hu lalima ha gatus daw sa sabuwa kalimahan dà. 42Hurà sidan makailis aman bà din en haena linipati en. Sin-u man kandan sa adagi gayed sa pagpalanggà din ku sapian?”
43Tuminubag si Simon, “Iyan gid haena sa adagi sa sambay din ha linipatan.”
Tuminubag daan si Jesus, “Laus hayan.”
44Dayun uminahà si Jesus duun ku bahi daw ikagiyi si Simon, “Naahà nu ba haini sa bahi? Sumineled a dini ta balay nu ba hurà nu buhata sa sumalà ha naanadan taw. Hurà a ikaw ilahi hu wahig ha ighenaw ku ta paa ku, ba saini ha bahi hinenawan din sa paa ku hu luhà din daw tinarapuwan din ta buhuk din. 45Hurà a ikaw tahuri ta hurà ka hadek kanak sumalà hu naanadan taw, ba saini ha bahi su pagseled din dini pighadekan din sa paa ku. 46Hurà nu daan lanahi sa ulu ku, ba saini ha bahi inugsakan din hu pahumut sa paa ku. 47Aman ikagiyen ku ikaw ha pinasaylu en sa madakel ha mga salà din ta adagi sa pagpalanggà din kanak. Ba saena ha atiyuay dà sa mga salà din ha napasaylu atiyuay dà daan sa pagpalanggà din.”
48Dayun inikagiyan hi Jesus haena sa bahi, “Pinasaylu en sa mga salà nu.”
49Sa duma ha tuminampu duun ku miggastu nakahenà-henà, “Inu gid haini ha etawa sa pakapasaylu hu salà?”
50Ba inikagiyan hi Jesus su bahi, “Sa ingkaluwas nu iyan sa pagsalig nu kanak aman ulì kad ha malinawen.”
Currently Selected:
Lucas 7: bkd
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
