Lucas 9

Sa Mga Panugun Hi Jesus Duun Hu Mga Tinun-an Din

(Lucas 9:1-6; Mateo 10:5-15; Marcos 6:7-13)

1-2Amin panahun ha inamul-amul hi Jesus su sampulù daw daruwa ha tinun-an din dayun sinugù sidan hu pagpanunultul mahitenged hu pagharì hu Dios daw pinagaheman din sidan ta daw maulian sa agkangadaluwan daw mabugaw dan sa mga busaw ha tuminagù duun hu mga etaw. 3Inikagiyan din sidan, “Ku humipanaw kaw harì kaw mag-uwit hu bisan inu iling hu sugkud daw hu lutù nuy, hu salapì daw hu ilisan nuy. 4Bisan sin-u ha tagibalay sa magpaseled inyu duun kaw en magtimà taman ha umawà kaw duun taena ha banuwa. 5Ku makaduun kaw hu banuwa ba hurà en dumawat inyu awai haena, ba pugpuga sa aliyabuk diyan ta paa nuy ta iyan haena timaan ha silutan gayed sidan hu Dios.” 6Aman namanhipanaw su mga tinun-an hi Jesus daw pamanduun hu migkalain-lain ha banuwa ha migsangyaw hu Maayad ha Tultulanen daw naulian dan daan sa agkangadaluwan duun hu bisan hindu.

Sa Henà-henà Hi Herodes Mahitenged Ki Jesus

(Lucas 9:7-9; Mateo 14:1-2; Marcos 6:14-16)

7Su mapaliman hi Herodes ha harì ta Galilea sa mga nahitabù miglibeg gayed ku sin-u si Jesus, ta sa duma tag-ikagi ha iyan kun haena si Juan Ha Tagpamautismu ha nabanhaw, 8sa duma tag-ikagi ha iyan en kun haena si Elias ha nakahiwal daw sa duma tag-ikagi ha nabanhaw sa sabuwa duun taena ha mga prupita su anay. 9Ba uminikagi si Herodes, “Pinapungulan kud en si Juan. Sin-u man gid haini sa tagsubayen hu mga etaw?” Aman agkabayaan din gayed ag-ahaa si Jesus.

Sa Pagpakaen Ku Lalima Ha Libu Ha Mga Etaw

(Lucas 9:10-17; Mateo 14:13-21; Marcos 6:30-44; Juan 6:1-14)

10Su makalikù en haena sa mga apustulis ha sinugù hi Jesus intultul dan diyà ta kandin sa alan ha nangabuhat dan. Dayun dinuma sidan hi Jesus ha iyan dà sidan payanaen duun ku banuwa ha tagngaranan ta Bethsaida. 11Su matun-an haena hu kaet-etawan namanlupug sidan. Nahid-uwan sidan hi Jesus aman tinultulan din sidan mahitenged hu pagharì hu Dios daw naulian din daan sa agkangadaluwan.

12Su panday en agkahapun inikagiyan si Jesus hu mga tinun-an din, “Sugua nud en sa mga etaw ha mamanduun sidan hu ubayà ha mga banuwa ta daw makapan-ahà sidan hu agkan-en dan daw hu matidugahan dan ta pinakabulung-bulung haini ha lugar.”

13Ba tuminubag si Jesus, “Iyan kaw en mag-ila kandan hu pagkaen.”

Uminikagi sidan, “Amin dini pagkaen ba lalima dà ha buuk ha supas daw daruwa dà daan ha buuk ha sedà. Agkabayà ka ba ha mamalit kay pa hu igpakaen taini ha mga etaw?” 14Ta lalima ha libu sa kadakelen hu mga maama.

Ba inikagiyan hi Jesus sa mga tinun-an din, “Ipapinuu sa mga etaw hu tigkalimahan.” 15Aman binuhat dan su insugù hi Jesus daw namaminuu su mga etaw. 16Tinimù hi Jesus su lalima ha supas daw su daruwa ha sedà dayun huminangad diyà ta langit daw ampui haena. Su makapenga en mag-ampù pinangebing din su supas daw su sedà daw sugua su mga tinun-an din ha ipakaen haena hu mga etaw. 17Su mangabuhì en sidan pinangamul hu mga tinun-an su nasamà duun, saena sampulù pa daw daruwa ha ambung.

Sa Inikagi Hi Pedro Mahitenged Ki Jesus

(Lucas 9:18-21; Mateo 16:13-20; Marcos 8:27-30)

18Amin panahun ha mig-ampù si Jesus ha iyan dà. Sa mga tinun-an din uminubay diyà ta kandin aman ininsaan din sidan, “Sin-u a man duun hu pag-ikagi hu mga etaw?”

19Tuminubag sidan, “Sa duma tag-ikagi ha iyan ka kun si Juan Ha Tagpamautismu daw sa duma tag-ikagi daan ha iyan ka kun si Elias, sa duma tag-ikagi ha sabuwa ka duun hu mga prupita su anay ha nabanhaw.”

20Dayun ininsaan sidan hi Jesus, “Sinyu, sin-u a man duun hu henà-henà nuy?”

Tuminubag si Pedro, “Iyan ka su Misiyas ha sinugù hu Dios.”

21Binalaudan hi Jesus su mga tinun-an din ha harì gayed sidan manunultul ha si Jesus iyan en su Misiyas.

Sa Pag-ikagi Hi Jesus Mahitenged Hu Kamatayen Din

(Lucas 9:22-27; Mateo 16:21-28; Marcos 8:31—9:1)

22Minikagi daan si Jesus, “Kinahanglan ha siak sa Batà hu Etaw mag-antus a hu madakel ha mga pasipala daw pagtameyesen a hu mga magulang daw hu mga labaw ha sinaligan hu paghalad daw hu mga manunudlù hu Kasuguan. Daw kinahanglan daan ha pahimatayan a kandan ba duun hu ikatulu ha aldaw mabanhaw a dà.”

23Dayun minikagi si Jesus duun hu kaet-etawan, “Bisan sin-u sa agkabayà agsunud kanak kinahanglan ha lipatan din gayed sa kandin ha agkabayaan daw aldaw-aldaw antusen din sa alan ha mga malegen bisan duun hu kamatayen ta daw makasunud kanak. 24Ta bisan sin-u sa agkanugun hu kinabuhì din matay dà gihapun, ba saena ha tagsunud kanak bisan duun hu kamatayen mailahan hu kinabuhì ha hurà din katapusan. 25Inu man sa pulus hu etaw ku maangken din sa tibuuk ha kalibutan ba malaag sa kinabuhì din? 26Bisan sin-u haena sa ikagayhà din sa pagsunud kanak daw sa mga lalang ku siak sa Batà hu Etaw ikagayhà ku daan asem haena ku lumikù a dini ha magpangaluanlag iling hu Dios ha Amay ku daw hu mga balinsuguen din. 27Laus gayed sa ag-ikagiyen ku inyu ha amin inyu tagtiyadeg dini iman ha harì pa matay na maahà dan en sa pagharì hu Dios.”

Sa Pagkahalin Hi Jesus

(Lucas 9:28-36; Mateo 17:1-8; Marcos 9:2-8)

28Su nangkasimana en sa kaikagiya hi Jesus taena dinuma din si Pedro, si Juan daw si Santiago duun hu bubungan hu pag-ampù. 29Su kamulu pa si Jesus tag-ampù tigkan haena nahalin daw sa pinaksuy din tagpangaluanlag ha ben kaputì en gayed. 30Tigkan daan nakahiwal sa daruwa ha etaw ha iyan si Moises daw si Elias 31ha tagpangaluanlag daan daw nakiglalang ki Jesus. Sa piglalangan dan iyan sa kamatayen hi Jesus ha madani en matuman diyà ta Jerusalem. 32Si Pedro daw sa mga duma din agpandayen agtidugahen ba naahà dan sa pagpangaluanlag hi Jesus daw hu mga duma din. 33Su ag-awà en su daruwa diyà ki Jesus inikagiyan dayun hi Pedro si Jesus, “Ginuu, maayad ta dini kay. Buhatan day inyu hu tatulu ha lawig ta daw matukid kaw ki Moises daw ki Elias.” Ba hurà katun-i hi Pedro ku inu sa tag-ikagiyen din.

34Su tag-ikagi pa si Pedro amin gabun ha nakabungkus kandan aman nangahaldek gayed sidan. 35Dayun amin lageng ha napuun duun ku gabun ha tagyanaen, “Iyan en haini Batà ku ha pinilì ku aman magpaliliman kaw kandin.” 36Su maiwas haena sa lageng iyan dà naahà dan si Jesus. Duun taena ha panahun hurà gayed itultul hu mga tinun-an su naahà dan.

Sa Pagbugaw Hu Mabalaw Ha Busaw

(Lucas 9:37-43; Mateo 17:14-18; Marcos 9:14-27)

37Su maisab ha aldaw ha tumubang si Jesus daw sa tatulu ha tinun-an din duun taena ha bubungan sinal-aw sidan hu madakel tungkay ha mga etaw. 38Amin diyà etaw ha nangumaw, “Ginuu, kahid-uwi sa batà ku ha maama ta sabubuwa dà haini. 39Ku agtagu-an haini hu busaw agpakakulahì daw agkabidbid ha tagbulà-bulà sa bàbà din. Malagdà dà ag-awà diyà ta kandin sa busaw daw agpakadaet haena kandin. 40Hinangyù kud sa mga tinun-an nu ha ipaguwà dan su busaw ba hurà dan gayed kahimu.”

41Minikagi si Jesus, “Sinyu ha mga etaw sa harì agtuu daw suminuway duun hu pagkamatareng, nalugay en sa pagduma-dumahà taw. Inu pa diay kalugay sa pag-angat ku ha tumuu kaw kanak?” Dayun inikagiyan din su amay, “Uwita dini sa batà nu.”

42Su tagdiyà en su batà tigkan tinaguan hu busaw aman nakadaghà diyà ta bugtà daw nabidbid. Ba binaldeng hi Jesus haena sa busaw daw naulian su batà dayun indiyà hi Jesus ki Amay din. 43Nangabeleng sa alan ha mga etaw hu pagkagamhanan hu Dios.

Sa Ikaduwa Ha Pag-ikagi Hi Jesus Mahitenged Hu Kamatayen Din

(Lucas 9:44-45; Mateo 17:22-23; Marcos 9:30-32)

Su kamulu pa sa mga etaw agkabeleng hu binuhat hi Jesus inikagiyan din sa mga tinun-an, 44“Palilimani nuy gayed haini sa ag-ikagiyen ku iman inyu ha siak sa Batà hu Etaw laus ad en itugyan duun hu aghimatay kanak.” 45Ba hurà dan katun-i sa kahulugan taena ha inikagi din ta inheles haena kandan ta daw harì dan pa masabut, daw nahaldek daan sidan hu pagpanginginsà ki Jesus mahitenged taena.

Sa Labaw Duun Hu Mga Tinun-an

(Lucas 9:46-48; Mateo 18:1-5; Marcos 9:33-37)

46Migsawalà sa mga tinun-an hi Jesus ku sin-u sa labaw kandan. 47Ba natun-an hi Jesus sa henà-henà dan aman tinimù din sa sabuwa ha atiyuay ha batà daw ipaabay kandin. 48Dayun inikagiyan din sidan, “Bisan sin-u sa agdawat taini ha batà tumenged kanak agdawat daan kanak, daw saena ha agdawat kanak agdawat daan hu Dios ha migsugù kanak. Ta saena ha kinaminusan diyan ta inyu iyan labaw hu alan.”

Sa Harì Agsupak Ki Jesus

(Lucas 9:49-50; Marcos 9:38-40)

49Minikagi si Juan, “Ginuu, amin day naahà ha etaw ha migbugaw daan hu mga busaw pinaagi hu ngaran nu aman binaldeng day haena ta kenà taw man duma.”

50Ba tuminubag si Jesus, “Harì nuy haena agbaldenga ta sa etaw ha harì agsupak kanuy duma taw daan.”

Sa Banuwa Ha Hurà Dawat Ki Jesus

51Su madani en si Jesus aglikù diyà ta langit nahenhenaan din ha dumiyà ta Jerusalem. 52Amin din impauna duun hu sabuwa ha banuwa diyà ta Samaria ta daw maandam sa kinahanglanen din. 53Ba sa mga etaw duun taena ha banuwa harì agkabayà ha umagi si Jesus diyà ta kandan ta natun-an dan en ha saena Judio ha tagdiyà ta Jerusalem. 54Su matun-an haena hu mga tinun-an din ha si Santiago daw si Juan inikagiyan dan si Jesus, “Ginuu, agkabayà ka ba ha ipabulus day sa hapuy ta daw mangasunug sidan?” 55Ba si Jesus sumininalu diyà ta kandan daw baldenga sidan, 56dayun duminuun say Jesus hu lain ha banuwa.

Sa Agpamanduma Ngaay Ki Jesus

(Lucas 9:57-62; Mateo 8:19-22)

57Su taghipanaw en si Jesus diyà ta dalan amin etaw ha minikagi diyà ta kandin, “Agduma a ikaw bisan hindu ka duun agpayanaen.”

58Ba tuminubag si Jesus, “Sa laku amin din tagtimaan daw sa mga tagbis amin dan daan mga dalagpuay, ba siak sa Batà hu Etaw hurà ku himlayà.”

59Amin pa sabuwa ha etaw ha inikagiyan hi Jesus, “Dumuma ka kanak.”

Ba tuminubag haena, “Ginuu, harì a pa makaduma ikaw iman ta iglebeng ku pa si Amay ku.”

60Inikagiyan haena hi Jesus, “Su mga etaw ha hurà dan pa kinabuhì iyan en maglebeng hu mga minatay, ba sikaw hipanaw ka daw isangyaw nu sa mahitenged hu pagharì hu Dios.”

61Amin pa daan etaw ha minikagi, “Ginuu, agduma a ikaw ba agpanamilit a pa enà duun hu pamilya ku.”

62Si Jesus tuminubag, “Hurà gayed pulus hu etaw ha tagharian hu Dios ku agkailing taena ha tag-ibit en hu daru ba taglingiay pa diyà ta kahudiyanan.”

Currently Selected:

Lucas 9: bkd

Highlight

Copy