Mateo 20
20
Sa Mga Sinuhulan
1“Sa pagharì hu Dios agkailing hu etaw ha suminelem nan-ahà hu agsuhulan din ha magtrabahu duun hu uma din. 2Su mga etaw ha naahà din pigsabutan dan ha agsuhulan din sidan hu tigsabuwa ha salapì ta iyan haena naanadan ha suhul hu sabuwa ha etaw kada aldaw, dayun impatrabahu din sidan.
3“Su agliwaraan en sa saselem nan-ahà dà paman haena hu mga etaw ha bà dà tagtimaay diyà ta balegyaanan. 4Inikagiyan din sidan, ‘Magtrabahu kaw daan duun hu uma ku ta agsuhulan ku inyu hu tumanan ha suhul nuy.’ 5Aman saena ha mga etaw migtrabahu dayun.
“Amin pa daan impatrabahu din su agkaugtu en daw su agkabalalay en sa aldaw. 6Su agsalep en sa aldaw minisab pa gayed nan-ahà hu mga etaw ha bà dà tagtimaay. Aman ininsaan din, ‘Imbà kaw bà dà tag-aldaw tagtimaay?’
7“Tuminubag sidan, ‘Hurà man tagpatrabahu kanay.’
“Aman inikagiyan din sidan, ‘Diyà kaw ta uma ku daw magtrabahu kaw.’
8“Su agpanukilem en inikagiyan din su sinaligan din, ‘Amul-amulen sa mga etaw ha migtrabahu daw iyan nu unahan suhulan su nahudiyan.’
9“Saena ha daw en migtrabahu su sumalep en sa aldaw nasuhulan hu tignangkabuuk ha salapì. 10Aman saena ha suminelem dà migtrabahu nakahenà-henà ha adagi gayed sa kandan ha suhul dì su nahudiyan, ba tigsabuwa dà daan ha salapì sa insuhul kandan. 11Su matimù dan en haena sa salapì migtamudmud su nauna duun ku agpanuhul 12hu kagi dan, ‘Saena ha nahudiyan nangkauras dà sa pagtrabahu dan, ba sikay sa nangauna minaldaw kay magtrabahu daw napasù-pasuan kay pa gayed na impag-iling nu dà sa insuhul nu kanay.’
13“Ba saena ha tagpanuhul minikagi, ‘Hurà ku inyu limbungi ta sa nauyunan taw ha suhulan ku inyu hu tignangkabuuk ha salapì in-ila ku inyu. 14Timua nuy en haini daw ulì kaw en. Iyan en pagbayà ku ha sa nahudiyan ilahan ku daan iling hu insuhul ku inyu. 15Kenà ba iyan a man tagbayà hu salapì ku? Imbà kaw agkasina ta kalalagan a?’
16“Aman sa etaw ha tagkahudiyan iyan diay mauna, daw madakel sa tagkauna iman ha iyan man diay mahudiyan.”
Sa Ikatulu Ha Pag-ikagi Hi Jesus Mahitenged Hu Kamatayen Din
(Mateo 20:17-19; Marcos 10:32-34; Lucas 18:31-34)
17Su tagdiyà si Jesus ta Jerusalem tinabis din sa mga tinun-an din daw ikagiyi, 18“Tagdiyà kuy en iman ta Jerusalem. Siak sa Batà hu Etaw itugyan a duun hu mga labaw ha sinaligan hu paghalad daw hu mga manunudlù hu Kasuguan. Hukuman a kandan hu kamatayen 19daw itugyan a daan kandan duun hu mga etaw ha kenà Judio ha iyan magtameyes daw maglagkut kanak. Dayun ilansang a kandan duun hu krus ba duun hu ikatulu ha aldaw mabanhaw a dà.”
Sa Paghangyù Hu Inay Hi Santiago Daw Hi Juan
(Mateo 20:20-28; Marcos 10:35-45)
20Sa asawa hi Zebedeo duma hu daruwa ha mga batà din ha tinun-an duminiyà ki Jesus daw luminuhud duun hu atubangan din ta amin din aghangyuen.
21Aman ininsaan hi Jesus, “Inu man sa agkabayaan nu?”
Tuminubag haena, “Sa aghangyuen ku ikaw iyan sa ku magharì ka asem saini ha mga batà ku iyan ipapinuu duun hu abay nu, sa sabuwa diyan ta kawanan daw sa sabuwa diyan ta gibang nu.”
22Ba inikagiyan hi Jesus su daruwa, “Harì nuy gayed agkatun-an sa taghangyuen nuy. Maantus nuy ba sa mga melegen ha maul-ulahan ha madani en makauma dini ta kanak?”
Tuminubag sidan, “Hee, maantus day.”
23Inikagiyan sidan hi Jesus, “Maagiyan nuy gayed sa malegen ha maul-ulahan iling hu kanak, ba kenà a iyan tagbayà ku sin-u sa makapinuu dini ta kawanan ku daw ta gibang ku ta iyan tagbayà taena sa Amay ku.”
24Su mapaliman haena ku sampulù ha mga duma dan ha tinun-an napaukan dan gayed su daruwa ha migsuled. 25Inamul hi Jesus su mga tinun-an din daw ikagiyi, “Natun-an nuy en ha sa mga agalen hu kenà mga Judio iyan tagbayà hu mga sakup dan daw sa mga sinaligan dan iyan tagsugù hu mga ginsakupan dan. 26Ba saena harì mahimu diyan ta inyu ta ku amin inyu agkabayà ha iyan labaw kinahanglan ha iyan mabuhat ha suluguen nuy, 27daw ku amin inyu agkabayà gayed ha iyan tungkay labaw kinahanglan ha iyan daan ulipen hu alan. 28Bisan siak sa Batà hu Etaw kenà ku iyan indini ta kalibutan ta daw mabuligan a hu mga etaw, ba sa pagdini ku iyan sa pagbulig daw sa pagpakamatay ta daw malibri sa kaet-etawan ha naulipen hu salà.”
Sa Pagbulung Hu Daruwa Ha Buta
(Mateo 20:29-34; Marcos 10:46-52; Lucas 18:35-43)
29Su tag-awà en si Jesus daw sa mga tinun-an din diyà ta Jerico madakel gayed sa mga etaw ha namanduma kandan. 30Amin daan daruwa ha buta ha tagpinuu diyà ta kilid ta dalan. Su mapaliman dan ha aglabay en si Jesus diyà ta kandan nangulahì sidan, “Ginuu ha Kaliwat hi David, kahid-uwi kay ikaw.”
31Binaldeng sidan hu mga etaw ta igpahagteng dan ngaay, ba bà dà nasì kadaging sa pangulahì dan ha tagyanaen, “Ginuu ha Kaliwat hi David, kahid-uwi kay man ikaw.”
32Aman tuminaleen si Jesus daw umawa su mga buta ha kagi din, “Inu man sa agkabayaan nuy ha buhaten ku diyan ta inyu?”
33Tuminubag sidan, “Ginuu, makaindan kay ngaay.”
34Nahid-uwan gayed sidan hi Jesus aman dinampà din sa mga mata dan. Sagunà sidan nakaindan daw pamanduma ki Jesus.
Currently Selected:
Mateo 20: bkd
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
