Marcos 2

Sa Pagbulung Hu Piglantingan Ha Etaw

(Marcos 2:1-12; Mateo 9:1-8; Lucas 5:17-26)

1Su pila en ha aldaw ha makalikù si Jesus diyà ta Capernaum napaliman hu mga etaw ha nakaulì en si Jesus. 2Aman inamul-amulan haena hu mga etaw na harì en sidan agkaaul bisan ta pultahan, dayun tinultulan sidan hi Jesus hu lalang hu Dios. 3Nakadiyà daan sa haepat ha mga etaw ha taglanting hu minatay en sa dibaluy ha lawa din. 4Harì sidan pakaubay diyà ki Jesus ta madakel tungkay sa mga etaw aman namanahik sidan diyà ta atep daw pusuwi sa tenged hi Jesus, dayun hinawil dan duun su agkadaluwan ha taghidegaay duun hu banig. 5Su matun-an hi Jesus ha adagi gayed sa pagsalig dan inikagiyan din su agkadaluwan, “Napasaylu en sa mga salà nu.”

6Amin daan tagpinuu diyà ha mga manunudlù hu Kasuguan ha nakahenà-henà, 7“Imbà iyan din hayan ikagiya? Tagtameyesen din sa Dios ta iyan dà gayed sa Dios makapasaylu hu mga salà.”

8Ba sa mga henà-henà dan sagunà natun-an hi Jesus aman inikagiyan din sidan, “Imbà kaw taghenà-henaay hu iling tayan? 9Inu diay sa malumu ha ikagiyen duun taini ha agkadaluwan? Iyan ba sa, ‘Napasaylu en sa mga salà nu’ daw ku iyan ba sa, ‘Bangun kad, luluna sa banig nu daw hipanaw kad en’? 10Ba iman igpaahà ku inyu ha siak sa Batà hu Etaw amin ku kagahem dini ta kalibutan hu pagpasaylu hu mga salà.” Aman inikagiyan din su etaw ha minatay en sa dibaluy ha lawa din, 11“Bangun kad, luluna su banig nu daw ulì kad en.” 12Sagunà haena minangun daw uwita su banig din dayun awà diyà ta kandan. Sa alan ha mga etaw nangabeleng daw dinayè dan daan sa Dios hu kagi, “Hurà kuy pa gayed makaahà hu agkailing taini.”

Sa Pag-umaw Ki Levi

(Marcos 2:13-17; Mateo 9:9-13; Lucas 5:27-32)

13Si Jesus duminuun dà paman hu kilid taena ha danaw. Madakel gayed ha mga etaw sa duminiyà ta kandin aman nanudlù dayun haena. 14Su taghipanaw si Jesus naahà din sa tagpinuu ha tagpanukut hu buhis ha tagngaranan ki Levi sa batà hi Alfeo. Inikagiyan din haena, “Dumuma ka kanak” aman huminitindeg si Levi daw duma kandin.

15Su tagkaen si Jesus diyà ta balay hi Levi madakel ha mga manunukut hu buhis daw mga masinupaken sa nakigsalu kandin daw hu mga tinun-an din ta madakel sa namanlupug kandin. 16Su maahà hu mga manunudlù hu Kasuguan ha sakup hu mga Parisiyu ha si Jesus nakigsalu hu mga masinupaken daw hu mga manunukut hu buhis, ininsaan dan su mga tinun-an, “Imbà hayana pakigsalu hu mga limbungan ha manunukut hu buhis daw hu mga masinupaken?”

17Su mapaliman haena hi Jesus uminikagi, “Sa harì agkadaluwan harì daan tagpabulung, ba sa agkadaluwan tagkinahanglan hu mamumulung. Sa pagdini ku kenà para hu mga matareng en ba sa tuyù ku iyan sa mga makasasalà.”

Sa Panginginsà Mahitenged Hu Pagsalang Hu Pagkaen

(Marcos 2:18-22; Mateo 9:14-17; Lucas 5:33-39)

18Amin panahun ha sa mga sumusunud hi Juan ha Tagpamautismu daw sa mga Parisiyu suminalang hu pagkaen. Amin mga etaw ha duminiyà ki Jesus daw nanginginsà, “Imbà tagsalang hu pagkaen sa mga sumusunud hi Juan daw sa mga sumusunud hu mga Parisiyu ba sa ikaw ha mga tinun-an harì gayed tagsalang?”

19Tuminubag si Jesus, “Mabaluy ba diay ku amin kaamulan ha sa mga inimbita harì kumaen ku diyà pa ta kandan sa agpangasawa? Harì gayed haena mabaluy. 20Ba mauma sa panahun ha ipaawà en diyà ta kandan su agpangasawa daw human sidan agsalang hu pagkaen.

21“Hurà etaw ha agtapikan din hu bag-u ha manggad sa daan en ha pinaksuy, ta ku buhaten din haena su bag-u ha manggad bà dà aglegkè daw su daan ha pinaksuy bà dà daan agkahigbit. 22Iling daan ha hurà etaw ha itagù din sa bag-u pa ha binu duun hu daan en ha talaguay ha anis, ta ku buhaten din haena bà dà magbutu daw kahudhud su binu. Kinahanglan gayed ha sa bag-u pa ha binu duun dà daan itagù hu bag-u pa ha talaguay.”

Sa Tagbayà Hu Aldaw Hu Paghimlay

(Marcos 2:23-28; Mateo 12:1-8; Lucas 6:1-5)

23Amin aldaw hu Sabadu ha nakaagi say Jesus duun hu uma. Su taghipanaw sidan namanimù sa mga tinun-an din hu mga bunga taena ha mga pamulahen duun. 24Inikagiyan hu mga Parisiyu si Jesus, “Ahaa nu, imbà supaka hu mga tinun-an nu sa Kasuguan mahitenged hu Aldaw hu Paghimlay?”

25-26Ba tuminubag si Jesus, “Hurà nuy ba diay kabasa haena sa binuhat hi David su panahun ha si Abiatar iyan pa tungkay labaw ha sinaligan hu paghalad? Su mangauhul si David daw sa mga duma din sumineled si David duun ku Tabirnakulu daw kan-a su supas ha inhalad duun hu Dios dayun inilahan din su mga duma din bisan ku para dà ngaay haena hu mga sinaligan hu paghalad.”

27Dayun inikagiyan sidan hi Jesus, “Mahinengdanen gayed sa etaw dì hu Kasuguan ta sa Aldaw hu Paghimlay intagana hu Dios ha makapaayad hu etaw. 28Aman siak sa Batà hu Etaw iyan a tagbayà bisan hu Aldaw hu Paghimlay.”

Currently Selected:

Marcos 2: bkd

Highlight

Copy