Marcos 3

Sa Pagbulung Hu Kimay

(Marcos 3:1-6; Mateo 12:9-14; Lucas 6:6-11)

1Sumineled en paman si Jesus duun hu simbahan hu mga Judio daw amin daan etaw diyà ha nakimay. 2Sa duma ha mga etaw tagpan-ahà hu katarengan ta daw makasumbung dan si Jesus, aman binantayan dan ku bulungen din ba haena duun hu Aldaw hu Paghimlay. 3Inikagiyan hi Jesus su kimay, “Dumini ka ta atubangan hu alan.”

4Dayun ininsaan din daan sa mga etaw, “Inu sa intugut hu Kasuguan ha buhaten taw duun hu Aldaw hu Paghimlay? Iyan ba sa pagbuhat hu maayad daw ku iyan ba sa madaet? Iyan ba sa pagluwas hu etaw daw ku iyan ba sa pagdaet kandin?” Ba hurà gayed sidan magtubag.

5Mighelaw-helaw diyà ta kandan si Jesus ha napauk, ba naguul daan tumenged ta madesen sa henà-henà dan. Dayun inikagiyan din su etaw ha nakimay, “Bunhata sa alima nu.” Aman binunhat din haena dayun sagunà naulian. 6Su mga Parisiyu namangguwà daw miglalang-lalang sidan hu mga sakup hi Herodes ku in-inuwen dan sa kahimatayi ki Jesus.

Sa Pagbulung Hu Mga Etaw Duun Hu Danaw

(Marcos 3:7-12; Mateo 12:15-16; Lucas 6:17-19)

7Uminawà si Jesus diyà duma hu mga tinun-an din dayun duminuun sidan ku danaw. Namanduma kandan sa madakel tungkay ha mga etaw ha nangapuun diyà ta prubinsya ta Galilea. 8Su mapaliman hu mga etaw sa mga binuhat hi Jesus madakel sa duminiyà ta kandin ha nangapuun ta prubinsya ta Judea, ta Jerusalem duun hu mga banuwa ha sakup ta Idumea layun ta Jordan hu mga banuwa ha ubayà ta Tiro daw ta Sidon. 9Tumenged ta madakel tungkay sa mga etaw sinugù hi Jesus su mga tinun-an din ha mag-andam hu barutu ha aglulanan din ta daw harì malipit hu mga etaw, 10ta madakel sa nangaulian din ha nangadaluwan aman sa duma ha tagdadalu agliet gayed ta ag-ibit ngaay kandin. 11Su maahà haena hu mga etaw ha tinaguan hu busaw namanluhud sidan duun hu atubangan din daw namangulahì, “Iyan ka gayed Batà hu Dios.” 12Ba binalaudan sidan hi Jesus ha harì dan ikagiyen ku sin-u.

Sa Pagpilì Hi Jesus Hu Mga Apustulis

(Marcos 3:13-19; Mateo 10:1-4; Lucas 6:12-16)

13Duminuun si Jesus hu buntud daw inamul-amul sa mga etaw ha agkabayaan din. 14Dayun pinilì su sampulù daw daruwa ha pigngaranan din ha mga apustulis ta daw makigduma-duma kandin daw masugù din hu pagpanunultul 15daw magaheman daan hu pagbugaw hu mga busaw ha tuminagù duun hu mga etaw. 16Iyan haini su sampulù daw daruwa ha pinilì din, si Simon ha pigngaranan din ki Pedro, 17si Santiago daw si Juan sa pigdagnayan din hu Boarneges ha tagkahulugan hu Mga Etaw ha Agkailing hu Lugung, saini ha daruwa mga batà hi Zebedeo. 18Pinilì daan hi Jesus si Andres daw si Felipe, si Bartolome daw si Mateo, si Tomas daw si Santiago sa batà hi Alfeo, si Tadeo daw si Simon sa sakup hu Cananiyo 19daw si Judas Iscariote ha iyan miglimbung ki Jesus.

Sa Labaw Dì Ki Satanas

(Marcos 3:20-30; Mateo 12:22-32; Lucas 11:14-23; 12:10)

20Sumineled si Jesus duun hu balay daw madakel en paman ha mga etaw sa nangaamul-amul diyà ta kandin, aman hurà en panahun hi Jesus daw hu mga tinun-an din hu pagkaen. 21Su mapaliman haena hu mga kadumahan din inelegan dan ta agtimuen dan ngaay, ta sa mga etaw tag-ikagiyà ha agkalibeg en si Jesus.

22Amin mga manunudlù hu Kasuguan ha nangapuun diyà ta Jerusalem ha tagyanaen, “Tinaguan haini hi Beelsebul sa agalen hu mga busaw aman agkabugaw din sa mga busaw.”

23Inamul-amul hi Jesus sa mga etaw daw ikagiyi pinaagi hu mga pananglitan ha tagyanaen, “In-inuwen man hu pagbugaw hi Satanas hu duma din ha busaw? 24Ku amin ginharian ha tagsasabà sa mga etaw duun agkabengkag gayed, 25daw ku amin pamilya ha magsasabà mabengkag daan haena. 26Aman ku sabaen hi Satanas sa mga sakup din sa ginharian din mabengkag gayed daw mahanaw. 27Henhenaa nuy ha hurà bisan sin-u ha makaseled duun hu balay hu mabis-ay ha etaw hu pag-agaw hu mga butang din ku harì din unahen bakusen su mabis-ay ha etaw daw human din katimù sa mga butang duun taena ha balay. 28Laus gayed sa ag-ikagiyen ku inyu ha mabaluy pa ha pasayluwen sa alan ha mga salà hu etaw bisan sa pagtameyes hu duma, 29ba saena ha migpasipala hu Balaan ha Ispiritu harì en gayed mapasaylu.”

30Inikagi din haena ta sa duma ha etaw tag-ikagi ha si Jesus tinaguan hu busaw.

Sa Kadumahan Hi Jesus

(Marcos 3:31-35; Mateo 12:46-50; Lucas 8:19-21)

31Nakauma si Inay hi Jesus daw sa mga suled din. Diyà dà sidan tagtiyadeg ta guwà daw pinaelegan dan si Jesus. 32Madakel ha mga etaw sa tagpinuu ha nakalibut diyà ki Jesus, aman inikagiyan dan haena, “Si Inay nu daw sa mga suled nu diyà ta guwà ta amin dan kun tuyù ikaw.”

33Ba si Jesus tuminubag, “Iman ikagiyen ku inyu ku sin-u sa inay ku daw sa mga suled ku.” 34Dayun uminahà haena duun hu mga etaw ha nakalibut diyà ta kandin daw ikagi, “Taini en sa inay ku daw sa mga suled ku, 35ta bisan sin-u sa tagtuman hu agkabayaan hu Dios iyan en haena inay ku daw mga suled ku.”

Currently Selected:

Marcos 3: bkd

Highlight

Copy