Marcos 5

Sa Pagbulung Hu Etaw Ha Tinaguan Hu Mga Busaw

(Marcos 5:1-20; Mateo 8:28-34; Lucas 8:26-39)

1Si Jesus daw sa mga tinun-an din nakalayun duun ku danaw ha ubay diyà ta Gadara. 2Su kumawas en si Jesus sinal-aw hu etaw ha tinaguan hu busaw ha duun napuun hu panlebengà. 3Duun haena tagtimà hu mga lebeng daw hurà bisan sin-u ha pakabakus kandin bisan pa ku kadinahan, 4ta kapila en bakusa sa mga paa daw sa mga alima din ba bà din dà agpamugtua sa kadina. Hurà gayed bisan sin-u ha pakaegen kandin. 5Aldaw daw ku daleman taghipanawà diyà ta panlebengà daw diyà ta bubungan ha tagkulahiay daw tagbugelaen din sa lawa din hu mga batu.

6Su matan-aw din si Jesus minulalaguy haena diyà ta kandin daw luhud duun hu atubangan din. 7Nangulahì gayed ha tagyanaen, “Jesus sa Batà hu Dios ha iyan Magbabayà hu alan, inu sa labet nu kanak? Aghangyuen ku ikaw ha harì a ikaw pasipalahan.” 8Naikagi din haena ta ag-ikagiyan hi Jesus ha umawà su busaw.

9Dayun ininsaan hi Jesus, “Sin-u sa ngaran nu?”

Tuminubag haena, “Sa ngaran ku Libu-libuwen tumenged ta madakel kay.” 10Su busaw tagpagayukà diyà ki Jesus ha harì sidan bugawen duun taena ha lugar.

11Ubay diyà ta kandan sa balalayan ha amin duun madakel tungkay ha mga babuy ha tagpanuwal. 12Pinagayukan hu mga busaw si Jesus ha ipaulì sidan duun ku mga babuy. 13Tinugutan din en daan sidan, aman guminuwà su mga busaw duun ku etaw daw namanagù duun ku daruwa ha libu ha mga babuy. Namamulaguy su mga babuy diyà ta alug daw nangakasabay sidan duun ku danaw dayun nangalemes.

14Su mga etaw ha tagbantay ku mga babuy namamulaguy daan payanaen diyà ta banuwa daw duun hu ubayà ha mga lugar daw intultul dan su nahitabù, aman namandiyà sa mga etaw ta ag-ahaen dan su nahitabù. 15Su makauma sidan diyà ki Jesus naahà dan su etaw ha tinaguan hu mga busaw su anay ha tagpinuuwà diyà ba maayad en sa henà-henà din daw migpinaksuy en, aman su mga etaw nangahaldek gayed. 16Su nakaahà taena nanunultul dayun ku nainu-inu sa ingkaulii taena ha tinaguan hu mga busaw daw sa nahitabù ku mga babuy. 17Aman hinangyù hu mga etaw si Jesus ha umawà gayed duun taena ha lugar.

18Su taglulan en si Jesus duun ku barutu, huminangyù kandin sa tinaguan hu mga busaw ha agduma ngaay. 19Ba bà dà inikagiyi hi Jesus, “Umulì kad duun hu mga kadumahan nu daw itultul sa binuhat hu Dios daw sa kahid-uwi din ikaw.” 20Aman huminipanaw su naulian daw panunultul duun hu mga banuwa ta Decapolis ku inu kaadagi sa binuhat kandin hi Jesus. Sa alan ha nakapaliman kandin nangabeleng gayed.

Sa Minatay Ha Batà Daw Sa Bahi Ha Daluwanen

(Marcos 5:21-43; Mateo 9:18-26; Lucas 8:40-56)

21Su makalikù en si Jesus diyà ta layun inamul-amulan dà paman hu madakel tungkay ha mga etaw. Su diyà pa ta kilid ta danaw, 22amin sabuwa ha agalen duun hu simbahan hu mga Judio ha nakauma ha tagngaranan ki Jairo. Su maahà din si Jesus luminuhud diyà ta atubangan din 23daw minagayuk ha tagyanaen, “Sa laga-laga ku agpatay en aman dumiyà ka daw dampaa ta daw maulian.” 24Dayun duminuma kandin si Jesus.

Namanduma daan su madakel tungkay ha mga etaw na agkangalipit en sidan. 25Amin daan bahi diyà ha sampulù en daw daruwa ha tuig sa kahudhud din. 26Naamin en sa salapì din pagbayad hu mga tagpamulung ba bà dà nasì tag-iseg sa dalu din. 27Su mapaliman din sa tultulanen mahitenged ki Jesus uminubay haena diyà ta talikudan din daw ibiti sa pinaksuy taena 28ta nahenhenaan ku bahi, “Bisan ku bà a dà makaibit duun hu pinaksuy hi Jesus maulian a gayed.” 29Su maibitan din en sa pinaksuy hi Jesus sagunà uminendà sa kahudhud din daw nagedam din ha naulian en.

30Sagunà natun-an hi Jesus ha amin naulian pinaagi hu gahem din, aman sumininalu duun hu mga etaw daw panginginsà, “Sin-u sa uminibit hu pinaksuy ku?”

31Tuminubag sa mga tinun-an din, “Madakel man ha mga etaw sa agpakalipit ikaw. Imbà ka agpanginginsà ku sin-u sa uminibit ikaw?”

32Ba mighelaw-helaw si Jesus ku sin-u sa migbuhat taena. 33Su matun-an ku bahi sa nahitabù kandin luminuhud duun hu atubangan hi Jesus ha taghugdunan hu kahaldek din dayun intultul din sa alan. 34Inikagiyan haena hi Jesus, “Sa ingkaulii nu iyan sa pagsalig nu kanak. Ulì ka ha malinawen ta naulian kad en hu dalu nu.”

35Su kamulu pa si Jesus tag-ikagi nakauma sa mga etaw ha napuun ta balay hi Jairo su agalen taena ha simbahan ha tagyanaen, “Su laga-laga nu minatay en aman harì nud en agsamuka sa Manunudlù.”

36Ba saena hurà en bali-baliya hi Jesus ta inikagiyan din en su agalen, “Harì ka agkasamuk ba bà ka dà salig kanak.”

37Iyan din dà dinuma si Pedro, si Santiago daw sa suled taena ha si Juan. 38Su makauma en sidan diyà ta balay taena ha agalen naahà din sa agkangasamuk daw tag-agalaay hu madaging. 39Sumineled si Jesus duun taena ha balay daw uminikagi, “Imbà kaw agkangasamuk daw tag-agalaay? Saini ha batà hurà patay ba bà dà tagtiduga.” 40Ba bà dan dà agkapatawahi si Jesus.

Su ipaguwà sidan hi Jesus duun taena ha balay dinuma din sa mga laas taena ha batà daw su tatulu ha tinun-an din, daw sumineled sidan duun ku inugsakan taena ha batà. 41Su makaseled sidan inibitan hi Jesus sa alima ku batà daw ikagiyi, “Tabita kumi” ha tagkahulugan, “Sikaw sa batà, bangun kad.” 42Sagunà minangun su batà daw maghiphipanaw, sampulù en daw daruwa sa tuig taena. Duun taena nangabeleng gayed sidan 43ba binalaudan sidan hi Jesus ha harì dan haena itultul duun hu bisan sin-u. Dayun suminugù si Jesus ha ilahan dan su batà hu pagkaen.

Currently Selected:

Marcos 5: bkd

Highlight

Copy