Gbantumsə̀ bəd Tùsá 1
1
Nwul Gìdń aa Yéésù bàà dàà gbantumsə̀ oò bəd doó
1Teofil, núúboòd éèn də̀gə̀ də̀gə̀ bə̀ aa mə́ bád də, mə́ ùd in aa Yéésù mà' rə gə́ kóólé, kə̀ aa sán nɛ́b bəd də tá. Sɛŋ aa éèn sɔ̀d tù' rú roó, 2yaà wə́ə́ sɛŋ aa Vɛnɛ́b pà' ná'ù lɛgə́ paà rə bə zé. Bə́ŋ̀ dá na'ǹ gə́, ùd nɛ́b bəraa sààvúŋ kìínmbə̀ gbantumsə̀ oò bəd kíin də nwɔŋ bəraa yée kə̀ Nwul Gìdń kpɛŋsɛ́lá. 3Sɛŋ aa díímà valə́ rə, yaà ì' yíl oò gbantumsə̀ oò bəd núùrú, í' bə̀ i'ǹmbə̀ bəǹ tə́ kə̀ gɔ̀ŋsá' yaà ì' yíl oò boò núùrú, sɛŋ laa iira, bít bàà bə̀ Vɛnɛ́b Gààd nwɔŋá. 4Nyàm nə́ŋ̀ Yéésù tə́ in líìn kə̀ gbantumsə̀ oò bəd tə́ yée gə́, bàà bə̀ nwɔŋ aa yée kə̀ kpɛŋsɛ́lá: «Zá' ìì dàà Urusalima bìl sí, zá kùm ìì nwán Nwul Gìdń aa Báá bə́n bàà dàà bəǹ dááiyà tùmà roó. Gbád mə́ bààiyà nwɔŋ aarəì nyàam kpɔ̀ɔ̀m. 5Kə̀ aakíin, Yohana gə́, pii nɛ́b bəd baptisma kə̀ wəlá; zá sɛŋ zɔ̀gɔ̀ gə́, Vɛnɛ́b dáá ii baptisma piìn kə̀ Nwul Gìdńná.»
Na'ké Yéésù bə̀ lɛgú
6 Yéésù gbantumsə̀ bəd ìì wál ɔ̀dbə gə́, bə̀ dɛ̀rə̀ nwɔŋ aa yóo: «Báátììkpɛ̀ŋá, bə́ŋyée ń dá bée ma'ǹ, bɔ̀b Israila oò ləə gààd sɔ̀ŋì?»
7Yéésù kè' í' bə̀: «Íí dá sə̀n sɛŋ aarə, kə̀ nyàm aarə gabm̀ gá, sɛŋ aa Báá mə́ və̀d zígà kə̀ kpɛŋsɛ́l oò roó. 8Zá sɛŋ aa Nwul Gìdń dáà síìmmà aí yílə́ rə, íí dá kpɛŋsɛ́l nə́ŋ̀ bɔbàá. Kàanyée gə́, íí dáá sedako ma'ǹ máá yílú, íí dáá nwɔŋ mə́ baàn Urusalima bìlú, íí dááráàn Yahudiya yɛ́b ba, kə̀ Samariya yɛ́b ba, bít íí dááráàn wə́ə̀n zɔ̀ŋ aa yɛ́b dùg bəroó.»
9Zɔ̀ŋ aa bàà tá' nwɔŋ bəraa yée gə́, zá' na' kíìn lɛgə́ poú. Nɛ́ɛ̀m boò kɔ̀ dìì bə̀ tə́ù ɛgǹ gə́, mɔb yaà kágə̀ kíìn boò núùrú.
10Bə́ŋ̀ bə̀ tə́ núù ɛgǹ lɛgə́ paà, zɔ̀ŋ aa Yéésù tə́ na'ǹ bərə gə́, bə̀ bé' nɛ́b vɔ̀ɔ̀m bəd iira, bə̀ páá gɔ̀' biírá, yaà bə̀ vúg bóò səǹ zé bùúd, 11bít ìì bàà bə̀: «Íí nɛ́b Galili bə̀ bərá, kə̀ níìbə̀ íí dìì taà zɔ̀ŋə kə̀ núù ɛgǹmbə̀ lɛgə́ gú? Yéésù aa Vɛnɛ́b pà' náù lɛgú, aí núùrú yérə, dáà bídǹnà kə̀ nɛɛ̀n aa íí bé'ù tə́ na'ǹ lɛgə́ rə kíin.»
Nɛ́ŋə̀ aa pɛ́n Yudas doó
12Kàanyée gə́, Yéésù gbantumsə̀ bəd zá'à kɔ̀l wàà aa Oliva nyìì bəd dìì bərə gə́, bə̀ bírà kíìn Urusalima bìlú. Zɔ̀ŋ aarə bùùd kə̀ Urusalima bìl sé, bùùd wə́ə́ kílomɛ́tà nə́ŋ̀ sé. 13Nɛ́ɛ̀m bíd yaà bə̀ wə́ə́ bìlə́ gə́, taà bə̀ na' wúlbàgə̀l aa wúl ɔ̀d yílə́ rə rú, zɔ̀ŋ aa ləə bə̀ sáá bərə ba. Nɛ́b aarə' Piyɛr ra, Yohana ra, Yakuba ra, Andre ra, Filip da, Tomas da, Bartelemi ra, Mata ra, Yakuba Alfa wàá, Simon aa nə́' kè' yɛ́b oò roó, kə̀ Yuda Yakuba wàà tá. 14Yéésù gbantumsə̀ bəraa yérə kóólé, ìì wál tɛ́m boò bəd nə́ŋ̀ní. Ìì dìì Vɛnɛ́b nyɛɛ̀mbìá, kə̀ nɛ́b kɛ́ɛ̀m bəd tá, kə̀ Mariyama, Yéésù nuù tá, kə̀ Yéésù kudvɛɛ̀l bəd tá.
15Sɛŋ bəraa rə bərə, nɛ́b bagké bəd laa nɔ̀ŋgɔ̀s ìì wál wərà, Piyɛr zá' lɛgə́ boò tə́ŋú, bàà bə̀: 16-17«Ɔ̀dkudvɛɛ̀l mə́ í'sɛ̀lbə̀ bərá, Núúboòd Gìdńnú rə, Nwul Gìdń bàà kə̀ Dauda gú' gə́, in nə́ŋ̀ dákíìn ma'mínàá. Nwul Gìdń gám nwɔŋ də Yudas yílú. Yudas də, nɛ́ŋə̀ nə́ŋ̀ obə́n tə́ŋə́ bìá; mà' tù' tə́ kə̀ obə́n tá. Nwul Gìdń bàà gə́, Yudas dá nɛ́b bəd aàn Yéésù dáàn ko'ǹmbìá. In aarə ma'míìn yàá.»
( 18Yudas lɛ́b lɛsá. Basaa lɛ́b kə̀ lɛ' rə, tù' vaksə́ oò aa mà' rə piiù sùnú. Dá yi' kə̀ yíləsá, bàgə̀l oò péé taá, bít nwud oò bəd vúgə́l taà gbaarú. 19Nɛ́b Urusalima bə̀ kóólé, bə̀ kìì nwɔŋ aa yàá. Bə̀ kìì nwɔŋ aa yée gə́, bə̀ dɛ̀d taà lɛsaa rə kə̀ boò nwɔŋú: «Akɛldama», taà kùmsə̀n baànmbə̀ «Nyɛ̀lə́m lɛsá.»)
20«Kàandə, bád ìì dàà tə́ núúboòd náb bə̀ bərú:
‹Ligə̀ oò bə̀ gə́, oò kùm ígá, nɛ́ŋə̀ oò kùm dú wərə̀ sí.›
bítsɔ̀ŋ:
‹Nɛ́ŋə̀ gɔ̀ŋ oò pà' tù' oòrə kúnú.›
21-22Ogə́ nɛ́ŋə̀ nə́ŋ̀ yaà oò wál kə̀ obə́n tá, bɔbm̀ kuùmbə̀ sedako díímke valə́ bə̀ oò bìá. Sàà báà vú'ǹnə̀ nɛ́b aa ɛ̀mà kə̀ obə́n tə́ rə tə́ŋú, zɔ̀ŋ bəraa Yéésù gəə̀l sáá bə sɛŋ gə́ kóólé kə̀ obə́n tə́ rə ba. Sɔ̀rà sɛŋ aa Yohana bàà baptisma piìnmbə̀ nwɔŋ dú roó, yaà wə́ə́ nyàm aa Yéésù na' bə lɛgə́ paà rə ba.»
23Kàanyée gə́, bə̀ gɔ̀n nɛ́b bəd iirə nə́gə́lá' Yusufu, nɛ́ŋə̀ aa bə̀ nə́gə́l oò Barsabas, bít nə́gə́l ɔ̀d oò kɔ̀ Yustus doó, kə̀ Matias da. 24Bít wál ìì nyɛ̀m Vɛnɛ́b kə̀ aakíin: «Báátììkpɛ̀ŋá, ń gàb nɛ́b bəd kóólé tɛ́m yàá. Kə̀ taàbìá, ǹ ì' bə́ nɛ́ŋə̀ aa sàà ń vúŋ nɛ́b aa iirə yée tə́ŋə́ roó, 25bɔ̀b oò bíl gbantumsə̀ ń da, oò pà' tùsaa Yudas zá' dàà, bít tə́ ráàn kuùm zɔ̀ŋ aa bə́ŋyée kùm bəroó.» 26Bə̀ lɛ́' sáásá, bít Matias yaà líí sə̀n sáásá roó. Oòra yaà bíl sə̀n Yéésù gbantumsə̀ kób zè iirúb doó.
Currently Selected:
Gbantumsə̀ bəd Tùsá 1: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
