Yohana 13
13
Yéésù sùg nɛ́b sáànmbə̀ oò bəd duná
1Sɛŋ də, nyɛ́d sɛŋ nə́ŋ̀ní, Paska dákíìn wə́ə́nàá. Yéésù gàb yàá, sɛŋ aa zá' bəǹ dá yɛ́b aa daàn, bít bəǹ dá ɛɛ̀m Báá bəǹ səǹ də, wə́ə́ yàá. Í' nɛ́b oò bəd sɛŋ gə́ kóólé zɔ̀ŋə yɛ́b ba, í' bə̀ yaà wə́ə́ sɛŋ aa val dáù ko'ǹ bərə zé.
2Yéésù kə̀ nɛ́b sáànmbə̀ oò bəd tá, bə̀ tə́ gbèd nyàmbídń bə̀ líínàá. Sámbàŋyɛ́rə̀ kɔ̀, kò' Yudas, Simon Iskariyot wàà tɛ́mì gbòód, bɔ̀b Yéésù ko'ǹ lɛ́bm̀bìá. 3Yéésù gàb yàá, bəǹ vúgà Vɛnɛ́b sunú, bít bəǹ dá bídǹ Vɛnɛ́b sunú. Bít gàb yàá, Báá pii dàà bəǹ in gə́ kóólé tə́ nɛɛ̀n tɛ́mú. 4Yéésù zá' lɛgú, dìì téébúrù kàd ba, nyàd dàál oòra, bít dàà gɔ̀' wàà dùù bìá, pà' gɔ̀' si' bə̀ tədǹ nə́ŋ̀á, tab oò sə́gú. 5Bítsɔ̀ŋ, kɔ̀b kə́d wəl magə̀ gbà'á rú, pìì nɛ́b sáànmbə̀ oò bəd dun sugǹmbìá, bít tə̀d kə̀ gɔ̀saa tab sə́gə́ roó. 6Yaà wə́ə́ Simon Piyɛr bə gə́, Simon bààù: «Báátììkpɛ̀ŋá, ámda ń dá mə́ sə̀n dun sugǹ wa?»
7Yéésù kè' í'ù: «Ń gàb in aa mə́ tə́ ma'ǹ bə́ŋyée rə sé, zá ń dá taà gabm̀ bòórú.»
8Piyɛr bààù: «Ə́ùwə́, kóó nɛ́mbínì, ǹ sùg mə́ dun sí.»
Yéésù kè' í'ù: «Mə́ sùg n dun síngə́, in nə́ŋ̀má wáal n kə̀ máá sɔ̀ŋ sé.»
9Simon Piyɛr bààù: «Tə́ kàangə́, Báátììkpɛ̀ŋá, ǹ sùg mə́ dun ní sí, zá ǹ sùg mə́ nɛɛ̀n kə̀ yílə tá!»
10Yéésù bààù: «Màn aa nyìŋ wəlì rə, ɔ̀d wəl nyiìŋmbə̀ sɔ̀ŋ gá, sínkɔ̀ dá dun ní sugàá. Kàandə, si' oò kə̀ zɔ̀ŋtá tə́ nyɛdkèá. Íí tə́ nyɛdkèá, aíra, zá nɛ́ŋə̀ nə́ŋ̀ tə́ aí tə́ŋú, oò gə́, nyɛd sé.»
11(Yéésù gàb màn aa dáù ráàn lɛ́bm̀ də yàá. Kə̀ taàbìá, bàà taá: «Zá nɛ́ŋə̀ nə́ŋ̀ tə́ aí tə́ŋú, oò gə́, nyɛd sé.»)
12Zɔ̀ŋ aa Yéésù sùg bɛ́' nɛ́b sáànmbə̀ oò bəd dun gə́, páá dàál oòra, dá kùm zɔ̀ŋ aa zá' dàà rə ba, bít bàà bə̀: «Íí gàb in aa mə́ mà' ii yérə yèè? 13Íí dɛ̀d mə́: ‹Nɛ̀n bə́ ra› bít ‹Báátììkpɛ̀ŋ bə́ ra›, íí bàà vɛ́nà, mə́ tə́ kàani! 14Dáà tə́ kàangə́, máá mə́ Báá íí Tììkpɛ̀ŋá, bít mə́ nɛ̀n íí ra, mə́ sùg ii dun yàá. Aí kɔ̀ dáá ìì sùg ɔ̀dnə́ŋ̀ bəd dun aí bòdba. 15In aa mà' də́' mə́ ì' ii yérə, aí kɔ̀ dáá ìì mà' kìínmbə̀ nɛɛ̀n aa mə́ mà' ii yérə kíni. 16Mə́ tə́ ii kíìn baanàá, aarə nwɔŋ sɔ̀ɔ̀ná' Nɛ́d tù' bə̀ ma'ǹ nə́ŋ̀má kàn nɛ̀n oò kə̀ gbà'á gá. Gbantumsə̀ kɔ̀, kàn nɛ́ŋə̀ aa tùmə̀wà rə kə̀ gbà'á gá. 17Bə́ŋyée íí gàb in aarə yàá. Íí mà' in aarəì kə̀ tù' gə́, Vɛnɛ́b dá ii nɛɛ̀n zígǹ yílú.
18«Mə́ gám nwɔŋ aa kə̀ aí kóólé sé. Mə́ gàb nɛ́b bəraa sàà mə́ vúŋ də yàá. Zá Núúboòd Gìdń nwɔŋ aa bàà rə, oò ma'míìn kúnú: ‹Màn aa líí gbèd kə̀ máá tə́ rə, zá' nə́gə̀d tə́ kə̀ máára.› » 19Mə́ tə́ ii kíìn baàn bə́ŋyóo, bə́ŋ̀ in də yaà oò wə́ə́ sína sí; bɔ̀b in də yaà wə́ə́ì gə́, ìì bàg mə́ kúnú: «Mə́ nɛ́ŋə̀ aa túrú zèd kə̀ zèd doó.» 20Mə́ tə́ ii kíìn baanàá, «aarə nwɔŋ sɔ̀ɔ̀ná' nɛ́ŋə̀ aa kè' màn aa mə́ tùm dəì rə, kè' máára. Bít màn aa kè' mə́ rə, kè' màn aa tùm máà roó.»
Yéésù bàà vú' gə́, bə̀ Yudas dáá bəǹ sə̀n lɛ́bàá
(Mata 26.20-25; Markus 14.17-21; Luka 22.12-23)
21Zɔ̀ŋ aa Yéésù gám bé' nwɔŋ bəraa gə́, tɛ́m nyágə́lə̀ gbàákù, bít bàà: «Mə́ tə́ ii kíìn baanàá, aarə nwɔŋ sɔ̀ɔ̀ná, nɛ́ŋə̀ nə́ŋ̀ tə́ aí tə́ŋú, dá mə́ sə̀n lɛ́bàá.»
22 Nɛ́b sáànmbə̀ bəd bə̀ ɛ̀g ɔ̀dnə́ŋ̀ bəd boò bòdba. Zá bə̀ gàb nɛ́ŋə̀ aa Yéésù gám nwɔŋ oò yílə́ rə sé. 23Nɛ́ŋə̀ nə́ŋ̀ nɛ́b sáànmbə̀ oò bəd tə́ŋú, nɛ́ŋə̀ aa Yéésù í' kàn nɛɛ̀n doó, kùm pè' kə̀ oò tá. 24Simon Piyɛr yàlə̀ nɛɛ̀ná, bààù gə́, oò dɛ̀d Yéésù kúnú, gám nwɔŋ aarə tə́ nɛ́ɛ̀réè yílə́ gú? 25Kàanyée gə́, nɛ́d sánán də, əb Yéésù gíìlú, bít dɛ̀rə̀: «Báátììkpɛ̀ŋá, nɛ́ɛ̀réè gú?»
26Yéésù kè' í'ù: «Má bə̀rɛ́d weeké pa'ǹ pá'ǹ nwɔgə̀ magə̀rú' màn aa mááù piìn də, oòra dá mə́ sə̀n lɛ́bàá.»
Kàanyée gə́, Yéésù pà' bə̀rɛ́d weeké gə́, tìm nwɔgə̀rú, bít pii Yudas, Simon Iskariyot wàá. 27Zɔ̀ŋ aa Yudas kè' bə̀rɛ́d weeké gə́, Satan kò' bɛ́'ù taà tɛ́má. Yéésù bààù: «In aa ń í' ma'ǹmbə̀ rə, ǹ mà' kúnú, kə̀ báŋ!»
28(Nɛ́b aa bə̀ kùm wərə̀ rə kɔ̀, nɛ́ŋə̀ nə́ŋ̀má gàb sáaraa Yéésù bààù kə̀ nwɔŋ aarə sé. 29Màìgə́, Yudas kò' sáá sə̀n ba' nə́əd yée gə́, nɛ́b kambəd ìì sèl gə́, ìì bàà Yéésù bààù dáá oò lɛ́b in aa bənə́ í'nnə́ kə̀ wálke ma'ǹmbə̀ roó, sínkɔ̀ oò pii nɛ́b búúd bə̀ bəd in nə́ŋ̀á.) 30Yudas kè' bə̀rɛ́d weeké aa kə̀ aakíin gə́, bít vúg zɔ̀ŋ də bəní. Sɛŋ də, tígə́l tə́ kíìn ká'nàá.
Indaŋ̀mbə̀ puuá
31Zɔ̀ŋ aa Yudas vúg gə́, Yéésù bàà: «Bə́ŋyée nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, dá kaŋsɛ́l kíìn bɔbàá. Bít Vɛnɛ́b dá kaŋsɛ́l oò bɔbm̀ kə̀ wàà oòra. 32Dáà Vɛnɛ́b bɔ̀b kaŋsɛ́lì kə̀ oò gə́, Vɛnɛ́b dá wàà oò kaŋsɛ́l piìn kə̀ yíl oòra. Vɛnɛ́b dáù kaŋsɛ́l aarə piìn bə́ŋyée ní.» 33Yéésù bàà sɔ̀ŋ: «Yɛb í'sɛ̀lbə̀ mə́ bərá, mə́ tə́ kə̀ aí tə́ sɛŋ wàà zɔ̀gɔ̀ ní bìá. Íí dá mə́ kíìn saanàá. Bít kìínmbə̀ mə́ bàà Yahudu bəd nɛ́b yíl bə̀ bəd də kíin, mə́ tə́ ii taà baàn kɔ̀' Íí bán dáànmbə̀ zɔ̀ŋ aa mə́ tə́ dáàn bərə gá. 34Mə́ tə́ ii indaŋ̀mbə̀ puu piinàá' Ìì í' ɔ̀dnə́ŋ̀ bəd íí bòdba, kìínmbə̀ máá kɔ̀ mə́ í' ii rə kíni. 35Dáà íí í' ɔ̀dnə́ŋ̀ bərì íí bòdbə gə́, nɛ́b bəd kóólé, bə̀ dá ii taà gabàá, íí nɛ́b sáànmbə̀ mə́ bərá.»
Yéésù bàà gə́, Piyɛr dáá bəǹ kíìn məə̀n daanàá
(Mata 26.31-35; Markus 14.27-31; Luka 22.31-34)
36Simon Piyɛr dɛ̀rə̀: «Báátììkpɛ̀ŋ bə́ ra, ń tə́ dáàn bá?» Yéésù kè' í'ù: «Ń bán mə́ bagǹmbə̀ bə́ŋyée, zɔ̀ŋ aa mə́ tə́ dáàn bərə gá. Zá ń dá mə́ taà bagǹ bòórú.»
37Simon Piyɛr bààù: «Báátììkpɛ̀ŋá, kə̀ níìbə̀ mə́ bán n taà bagǹmbə̀ bòórú bə́ŋyée gá gú? Máá gə́, mə́ kùd si' yàá, gɔ̀ŋsə́ mə́ piìnmbə̀ ám bòórú!»
38Yéésù kè' í'ù: «Vɛ́nà gə́, ń kùd si' yàá, gɔ̀ŋsə́ ń piìnmbə̀ máá bòórúì? Mə́ tə́ən kíìn baanàá, aarə nwɔŋ sɔ̀ɔ̀ná' bə́ŋ̀ kòò váàn dá nwɔɔ̀m gə́, ń dá baàn sɛŋ toora, bəǹ gàb mə́ sé.»
Currently Selected:
Yohana 13: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
