Luka 10
10
Yéésù tùm nɛ́b sáànmbə̀ bəd laa toora zè kób zè iira, dá boò bàà nɛ́b bəd Vɛnɛ́b Gààd nwɔŋá
1Bòórú oòrə gə́, Báátììkpɛ̀ŋ sààvúŋ nɛ́b vɔ̀ɔ̀m kambəd laa toora zè kób zè iira. Bít tùm bə̀ iirə iira oò númú, bìl déè rú gə́ kóólé, bít zɔ̀ŋ aa tə́ dáàn bərə gə́ kóólé. 2Bàà bə̀: «Lɛ' kàŋ yàá, zá nɛ́b yɛd bə̀ kɛdǹ bəd gə́, ìì ká' sé. Ìì nyɛ̀m nɛ́d lɛ' bə̀, tùm oò ààiyà nɛ́b tù' bə̀ ma'ǹ bəd zùúm, yaà boò kɛ̀rə̀ yɛrá. 3Ìì ɛ̀m kúnú! Mə́ tùm ii tə́ kìínmbə̀ bɛ̀rə̀ yɛb kíni, gbàál lɛ̀gsɛ́rə̀ bəd tə́ŋú. 4Ìì pà' ba' dìg naà sí, ìì pà' nə́əd naà sí, sínkɔ̀ ìì pà' tábə́ dun iirə sí. Bít íí tə́ ɛɛ̀m gə́, dìì ìì dɔ̀m nɛ́ŋə̀ nə́ŋ̀má kpaŋə́ sí.
5«Íí pììyì ligə̀ nə́ŋ̀ə́ gə́, éèn ìì bàà: ‹Tɛbə̀ oò kùm ligə̀ aa yée rú.› 6Nɛ́ŋə̀ tɛ́m tɛbə̀ bə̀ tə́ wərə̀ gə́, dɔ̀msɛ̀l tɛbə̀ bə̀ íí rə, dá kuùm oò yílú. Kàan síngə́, dɔ̀msɛ̀l tɛbə̀ bə̀ íí rə, dáà bídǹnà aí yílə́ ní. 7Ìì kùm ligə̀ aarə rú, ìì líí, bít ìì nyəə in aa bə̀ pii ii yiìl wərə̀ rə kúnú. Kàandə, nɛ́d tù' bə̀ ma'ǹ gə́, bɔ̀b sáá sòò ba' oò kúnú. Ìì pìì ligə̀ kə̀ ligə̀ sí.
8«Màìgə́, bìl aa íí dáráàn piìn dú rə, bə̀ kè' iiyì gə́, ìì líí in aa bə̀ dá ii piìn də kúnú. 9Ìì gáŋ nɛ́b mad bə̀ bəraa bìlə́ rə si' kúnú, bít ìì bàà nɛ́b bìlə́ bə̀ bəd də nwɔŋ aa yóo: ‹Bə́ŋyée, sɛŋ aa Vɛnɛ́b dá Gààd ləə̀n aí yílə́ rə gbad yaà wə́ə́ yàá.› 10Zá màìgə́, bìl aa íí tə́ dáàn piìn dú rə, nɛ́b bìlə́ bə̀ bəd kè' ii síngə́, vúg dáá ìì dìì kpaŋú, bít ìì bàà: 11‹Bə́ dì' yɛ́b məsə́g aa zɔ̀ŋə aí bìlú, bag obə́ dun bərəì aí yílú. Zá ìì gàb nwɔŋ aa yée kíìn sɔ̀ɔ̀nkè' Vɛnɛ́b Gààd gbaràì aí sunú.› 12Mə́ tə́ ii kíìn baanàá' Nyàm aa Vɛnɛ́b dá nɛ́b bəd fágǹ bərə, nɛ́b aa Sodoma bìlə́ rə, fágə́n boò dá kuùm bɛ̀ŋ́sə̀wàá. Zá bìl bəraa rə, fágə́n boò nwuu dá sə̀n Sodoma bìlə́ bə̀ kanàá.»
Bìl bəraa ìì məə Vɛnɛ́b nwɔŋ ke'ǹmbə̀ roó
(Mata 11.20-24)
13«Búúd tə́ aí yílú, íí nɛ́b Korazin bìlə́ bə̀ bərá! Búúd tə́ aí yílú, íí nɛ́b Bɛdsaida bìlə́ bə̀ bərá! Mə́ mà' inwulubə̀ bəd zùúm aí tə́ŋú. Dáà inwulubə̀ luùm bəraa rə, ma'míìn tə́ Tirus bìlú, kə̀ Sidon bìlə́ gə́, bɔ̀b nyà'aa nɛ́b bəraa bìl bəraa yée rú rə, bə̀ pɛ́n tɛ́mì kpɔ̀ɔ̀m. Dáà nyà'aa nɛ́b bəraa rə bə̀ páá val gɔ̀' yàá, bít bə̀ zàd teemì boò yílú, bɔbm̀ i'ǹmbə̀ bənə́ sɔ̀gnnə́ yàá. 14Kə̀ taàbìá, fágə́n sɛŋə́ gə́, íí nɛ́b Korazin bìlə́ bìá, kə̀ nɛ́b Bɛdsaida bìlə́ bə̀ tá, fágə́n aí bə̀ dá sə̀n nɛ́b Tirus bìlə́ bə̀ fágə́n, kə̀ nɛ́b Sidon bìlə́ bə̀ fágə́n tá, kanàá. 15Aíra, íí nɛ́b Kapɛrnaum bìlə́ bə̀ bərá, sèl íí bàà na' bənə́ dáráàn wə́ə̀n lɛgə́ paà Vɛnɛ́b yiìl wa? Ma'míìn gá. Vɛ́nà gə́, bə̀ dá ii sí'ǹ aàn yɛ́b dùú, zɔ̀ŋ aa val bəd ləə bərə ba.
16«Bít bàà nɛ́b sáànmbə̀ oò bəd nwɔŋ aa yóo' Màn aa zɛ̀ŋ iiyì rə, zɛ̀ŋ máára. Màn aa məə iiyì rə, məə máára; bít màn aa məə mə́ì rə, məə màn aa tùm máà roó.»
Bídke nɛ́b sáànmbə̀ bəd laa toora zè kób zè iirə bìá
17 Nɛ́b sáànmbə̀ bəraa laa toora zè kób zè iirə rə, bə̀ bírà kə̀ tɛ́m làmkè gbà'á, bít bə̀ bàà: «Báátììkpɛ̀ŋá, màìgə́ nwul vaksə́ bəd máá, bə́ gám bə̀ nwɔŋì ám nə́gə́lə́ gə́, bə̀ ləə bə́ kúnú!»
18Yéésù kè' í' bə̀, bàà: «Mə́ bé'à Satan pí'à lɛgə́ poú, kìínmbə̀ yɛ́bsə̀ kíni. 19Ìì zɛ̀ŋ túŋá! Mə́ pii iiyà kpɛŋsɛ́l ɛɛ̀mbə̀ bi' bəd yílú, kə̀ mii bəd yílú. Bít mə́ pii iiyà kpɛŋsɛ́l kànsə̀n ɔ̀dmáàn bəd bə̀ sɔ̀ŋ. 20Tɛ́m íí oò làm ii kə̀ nɛɛ̀n aa nwul vaksə́ bəd ləə iiyà yée sí. Zá ìì kìì tɛ́m làmkè kə̀ nə́gə́l íí bəraa Vɛnɛ́b bád oò núúboòrú, lɛgə́ paà roó.»
Yéésù tə́ Vɛnɛ́b káŋàá
(Mata 11.25-27; 13.16-17)
21Sɛŋ aarə bəní sɔ̀ŋ, Yéésù nyìì kə̀ tɛ́m làmkèá, kə̀ Nwul Gìdńná, bít bàà: «Mə́ tə́ən kíìn káŋàá, Báá, Báátììkpɛ̀ŋ aa kùm lɛgə́ paà kə̀ yɛ́b bə tə́ roó. Mə́ tə́ən kíìn káŋàá, kə̀ in bəraa ń ì' nɛ́b aa gàb in síndə núùrú, bít ḿ mə́' nɛ́b in bə̀ gabm̀ bəd núùrú, bít kə̀ nɛ́b wágə̀n bə̀ bəd núùrú yóo. Èè, Báá, mə́ tə́ən kíìn káŋàá. Kàandə, sɔ̀ɔ̀n n kúnú, ḿ mà' taà kàani.»
22Kàanyée gə́, bàà nɛ́b bəd: «Báá mə́ pii mə́ in gə́ kóólé nɛɛ̀n tɛ́mú. Nɛ́ŋə̀ nə́ŋ̀má gàb wàà sé, wàà báá oò nə́ŋ̀ní gàb sùnú. Bít nɛ́ŋə̀ nə́ŋ̀má gàb wàà Báá sé, wàà oò nə́ŋ̀ní gàb sùnú. Nɛ́ŋə̀ aa dá wàà Báá gabm̀ də, dá kuùm nɛ́ŋə̀ aa wàà í'ù Báá oò i'ǹmbə̀ rə ní.»
23Yéésù lìb bí' núù nɛ́b sáànmbə̀ oò bəd sunú, bít bàà boò ní: «Nɛ́b aa bə̀ tə́ in aa íí bé'à yérə bé'ǹ də, Vɛnɛ́b zíg bə̀ nɛɛ̀nì yílə́ vɛ́nà. 24Kàandə, mə́ tə́ ii kíìn baanàá, Vɛnɛ́b gbantumsə̀ bəd zùúm, kə̀ gààd gbàád bəd tá, bə̀ ɔ̀rà in aa íí bé' yée bé'ǹmbìá, zá ìì bé' sé, bít bə̀ ɔ̀rà in aa íí kìì rə kiìnmbìá, zá ìì kìì sé.»
Nɛ́d sɔ̀ɔ̀n Samariya bə̀ zagəmá
25Kàanyée gə́, nɛ̀n indaŋ̀mbə̀ nə́ŋ̀ í' Yéésù bàgə̀l piìnmbìá. Zá' dìì lɛgú, bít dɛ̀d Yéésù: «Nɛ̀ná, má níì ma'ǹ, má taà gɔ̀ŋsə́ aa bɛ́d bə gá rə bɔbm̀ gú?»
26Yéésù bààù: «Bə̀ bád níì Vɛnɛ́b indaŋ̀mbə̀ rú gú? Màìgə́, ń tə́ù gádǹ gə́, ń kììù tə́ leè gú?»
27Màn váàn kè' í', bàà: « ‹Ǹ í' Báátììkpɛ̀ŋ Vɛnɛ́b ḿ da, kə̀ tɛ́m ḿ tə́ kóólé, kə̀ nyì' ń tə́ kóólé, kə̀ kpɛŋsɛ́l ń tə́ kóólé, bít kə̀ inselké ń tə́ kóólé.› Bítsɔ̀ŋ: ‹Ǹ í' ɔ̀dnə́ŋ̀ ń kìínmbə̀ nɛɛ̀n aa ń í' yíl ámbə̀ rə kíni.› »
28Kàanyée gə́, Yéésù bààù: «Kè' ń í'ì sɔ̀ɔ̀nkè. Ám kɔ̀ dá m̀ mà' kə̀ aarə kíni, ń dá taà gɔ̀ŋsə́ aa bɛ́d bə gá rə bɔbàá.»
29Zá nɛ̀n indaŋ̀mbə̀ í' yíl oò bə̀ nyɛ́'ǹmbìá, dɛ̀d taà Yéésù: «Nɛ́ɛ̀réè kùmsə̀n ɔ̀dnə́ŋ̀ mə́ gú?»
30Yéésù kè' í', bàà: «Nɛ́ŋ váàndo nə́ŋ̀ símà Urusalima bìlú, tə́ ɛ̀m Yeriko bìlú. Yaà pí' lííro kpaŋ̀ bə̀ vədǹ bəd nɛɛ̀n tɛ́mú. Sə̀ŋ bə̀ kò'ù kúnú, nyá' bə̀ kè'ù gɔ̀' bərá, bə̀ zìbə̀ kúnú, bít zá' bə̀ dààù tə́ŋtəŋ gɔ̀ŋsə́ kə̀ valá. 31Sɛŋ aarə bəní, nɛ́d láŋsə́ bə̀ ma'ǹ nə́ŋ̀ zá' bàgà kpaŋ̀ aa roó. Zɔ̀ŋ aa bé' nɛ́ŋ váàndo aa gə́, áá bàg kpaŋ̀ kàd ba. 32Nɛɛ̀n aarə rú ní, nɛ́ŋə̀ nə́ŋ̀ Levi bəd kun tə́ŋú, ɛ̀m yaà wə́ə́ zɔ̀ŋ aarə ba, bé' nɛ́ŋ váàndo aa ləə kàanyée gə́, áá bàg kpaŋ̀ kàd ba. 33Zá nɛ́ŋ váàndo nə́ŋ̀ Samariya yɛ́b bə bə̀ tə́ sɛ̀ɛ́n kpaŋ̀ oò ɛmàá, yaà wə́ə́ oò sunú. Zɔ̀ŋ aa bé'ù ləə kàangə́, búúd mà'ùwì gbàákù. 34Nɛ́d Samariya bə̀ aarə, ɛ̀m gbarà oò sunú. Yaà wə́ə́ gə́, vú' kílə́m kə̀ badn tá, sùgə̀ kə̀ núgə́l bəraa sisə́ roó, bít tab kágə̀ kə̀ gɔ̀sá. Bítsɔ̀ŋ, pà' kúmə̀ oò vɔɔmlə̀ yílə́ gə́, ààù sɛ̀ɛ́n bəd wúuú, dá nwánə̀ kúnú. 35Nwúndù oòrə, zá' dá ɛɛ̀m gə́, vúŋ ba' lɛ̀ɛ́ŋə̀ iira, pii nɛ́d sɛ̀ɛ́n wúl bə̀ nwáànná, bít bàà: ‹Ere, basaa yóo, ǹ nwán nɛ́ŋ váàndo aa kúnú. Màìgə́, mə́ bíràì zɔ̀ŋə gə́, in ɔ̀ɔ̀raa ń bɔ̀' yílə́ wərə̀ rə, kə̀ yíl mə́ra, yaà máàn kíìn káàn bí'nàá.›
36«Zɔ̀ŋ aa gám bə̀ bɛ́' nwɔŋ aa gə́, Yéésù dɛ̀d nɛ̀n indaŋ̀mbə̀: ‹Ám naà gə́, nɛ́b bəraa toorə yée tə́ŋə́ gə́, màn déè kùmsə̀n nɛ́ŋ váàndo aa lííro kpaŋ̀ bə̀ vədǹ bəd sə̀ŋ bə̀ kò' yée ɔ̀dnə́ŋ̀ gú?› »
37 Nɛ̀n indaŋ̀mbə̀ kè' í', bàà: «Nɛ́nə̀ aa mà'ù sɔ̀ɔ̀nkè yérə, oòra kùùmsə̀n ɔ̀dnə́ŋ̀ oòra.»
Kàanyée gə́, Yéésù bààù: «Ám kɔ̀ ǹ ɛ̀m kúnú, bít dá m̀ mà' kə̀ aarə kíin.»
Marta kə̀ Mariyama tá, Yéésù sím tə́ boò yiilú
38Zɔ̀ŋ aa Yéésù tə́ ɛɛ̀m kpaŋə́ kə̀ nɛ́b sáànmbə̀ oò bəd tə́ gə́, dáá bə̀ pìì bìl nə́ŋ̀ú. Nɛ́ŋ kéèndo nə́ŋ̀ nə́gə́l oò Marta, kè'ù oò yiilú. 39Nɛ́ŋ kéèndo aarə, kə̀ kudvɛɛ̀l naú, nə́gə́l oò Mariyama. Mariyama kùm Báátììkpɛ̀ŋ dùú, bít tə́ nwɔŋ aa tə́ nɛ́b bəd sáàn də zɛŋàá. 40Marta gə́, nɔ̀ŋà kə̀ tù' zùúm bəd nwàànùú. Yaà wə́ə́ gə́, bàà Yéésù: «Báátììkpɛ̀ŋá, kudvɛɛ̀l mə́ dàà mə́ tə́ tù' gə́ kóólé ma'ǹ mə́ nə́ŋ̀ní yérə, mà' n in sínì? Ogə́, ǹ bààù yaà oò láŋ mə́ ba.»
41Báátììkpɛ̀ŋ kè' í', bààù: «Marta, Marta, ń sèl in tə́ kúnú, bít ń nìŋ tə́ in zùúm zùúm bòórú. 42Zá in nə́ŋ̀ní kùmsə̀n in pɛ̀sə́ bə̀ aa dá nɛ́ŋə̀ gbá'ǹ doó. Mariyama sàà pà' in aa sɔ̀ɔ̀n kàn nɛɛ̀n doó, bít aa nɛ́ŋə̀ bán nyá'ǹ ke'ǹmbə̀ oò naà gá roó.»
Currently Selected:
Luka 10: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
