Mata 18
18
Nɛ́ɛ̀réè kùmsə̀n nɛ́ŋ gbàáro gú?
(Markus 9.33-37; Luka 9.46-48)
1Sɛŋ də bərə, nɛ́b sáànmbə̀ bərì gbarà Yéésù sunú, bít bə̀ dɛ̀rə̀: «Nɛ́ɛ̀réè kùmsə̀n nɛ́ŋ gbàáro Vɛnɛ́b gààrú gú?»
2Yéésù dɛ̀rà wàà bɛ̀ŋ́sə̀wà nə́ŋ̀á, yaà dí'ù boò númú, 3bít bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná, íí pɛ́n tɛ́m, íí bíl kìínmbə̀ yɛb bɛ̀ŋ́sə̀ bəd kíin síngə́, íí bán piìnmbə̀ Vɛnɛ́b gààrə́ gá. 4Nɛ́ŋ gbàáro Vɛnɛ́b Gààd lɛgə́ paà bə̀ rú bə̀, kùmsə̀n màn aa bí' yíl oò bə̀ dùú, bít bíl kìínmbə̀ wàà bɛ̀ŋ́sə̀wà aa kíin doó. 5Dáà nɛ́ŋə̀ nə́ŋ̀ kè' wàà bɛ̀ŋ́sə̀wà nə́ŋ̀ì oò yiilú, kìínmbə̀ wàà aa yée kíin máá nɛ́gə́lú gə́, kè' mə́ì kɔ̀.»
Yíl gú'ǹmbə̀ kə̀ nɛ́ŋə̀ záàn páànmbə̀ invaksə́ rú
(Markus 9.42-48; Luka 17.1-2)
6«Màn aa mà' wàà bɛ̀ŋ́sə̀wà nə́ŋ̀, bɔ̀' tɛ́mbagké oòì, yɛb bɛ̀ŋ́sə̀ bəraa tə́ mə́ bagǹ də tə́ŋə́ gə́, aa dá sɔɔ̀n də, dáà boò tabə̀ nagə̀l bəŋ gàálú, bít pà' boò lɛ́'ù nwuu gbà'á rú. 7Búúd dá kuùm nɛ́b aa zɔ̀ŋə yɛ́b bərə yílú, in aa bə̀ tə́ ma'ǹ bɔ̀b nɛ́b bəd boò dàà kə̀ tɛ́mbagké boò rə bòórú! In bəraa tə́ nɛ́b bəd tɛ́mbagké bɔ̀'ǹ yérə, dá kuùm sɛŋ gə́ kóólé. Zá búúd dá kuùm màn aa in bəraa dá sɔ̀dǹ oò naà rə yílú!
8«Dáà tə́ nɛɛ̀n ń bòórú, sínkɔ̀ dun ń bòórú, ń tə́ taà tɛ́mbagké ń bɔ̀'ǹ gə́, ǹ və̀rə̀ kúnú, bít làà ǹ lɛ́' bə̀ zɔ̀ŋ bùúd kə̀ ámda. Aa dá sɔɔ̀n də gə́, ǹ pìì gɔ̀ŋsə́ aa bɛ́d bə gá rə rú, kə̀ nɛɛ̀n nə́ŋ̀ní, sínkɔ̀ dun nə́ŋ̀ní, kə̀ kuùmbə̀ kə̀ nɛɛ̀n iira, kə̀ dun iira, bít dáàn piìnmbə̀ laa aa fə́' bə gá rə rú gə́ roó. 9Bít dáà tə́ núù ń bòórú, ń tə́ taà tɛ́mbagké ń bɔ̀'ǹ gə́, ǹ sɔ̀rə̀ kúnú, bít làà ǹ lɛ́'ù zɔ̀ŋ bùúd kə̀ ámda. Aa dá sɔɔ̀n də gə́, m̀ pìì gɔ̀ŋsə́ aa bɛ́d bə gá rə rú, kə̀ núù nə́ŋ̀ní, kə̀ kuùmbə̀ kə̀ núù iira, bít dáàn piìnmbə̀ laa aa fə́' bə gá rə rú gə́ roó.»
Bɛ̀rə̀ bɔ̀b yàá, bít sàà bə̀ bɔ̀bə̀ yàá
(Luka 15.3-7)
10«Ìì gú' yíl íí kə̀ yɛb bəraa yée ɛgǹmbə̀ kìínmbə̀ in tɛdń kíin. Mə́ tə́ ii kíìn baanàá, kə̀ aakíin də, malaika bəraa tə́ bə̀ nwáàn də, dìì bə̀ sáá sɛŋ gə́ kóólé, Báá mə́ lɛgə́ paà bə̀ númú. [ 11Kàandə, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, yaà nɛ́b bəraa bɔ̀b də súùnmbìá.]
12«Íí sèl tə́ leè gú? Nɛ́ŋ váàndo nə́ŋ̀ kùmì kə̀ bɛ̀rə̀ bəd naà laa núnà, bít nə́ŋ̀ bɔ̀bì gə́, zá' dàà bɛ̀rə̀ ɔ̀d kam bəraa laa naara zè kób zè dàànə́ŋ̀ní, bɔ̀b síndə fɔ̀g ba, kɔ̀l yílú, ɛ̀m dá sàà bɛ̀rə̀ nə́ŋ̀ aa bɔ̀b də géè? Dákíìn saanàá. 13Sàà bɔ̀bə̀wàì gə́, mə́ tə́ ii kíìn baanàá, tɛ́m làmkè aa dá kiìn kə̀ oòrə, dá sə̀n kam bəraa laa naara zè kób zè dàànə́ŋ̀ní, bɔ̀b síndə bə̀ kanàá. 14Kə̀ nɛɛ̀n aarə kíin sɔ̀ŋ, Báá íí aa lɛgə́ paà rə, í' gə́, yɛb bɛ̀ŋ́sə̀ bəraa rə, kóó nə́ŋ̀má oò bɔ̀b sí.»
Nɛɛ̀n aa íí dá ma'ǹ dú, sɛŋ aa ɔ̀dkudvɛɛ̀l nə́ŋ̀ mà' invaksə́ì roó
15«Dáà ɔ̀dkudvɛɛ̀l nə́ŋ̀ mà' invaksə́ì kə̀ ám gə́, ɛ̀m dá m̀ bɔ̀bə̀ kúnú, bít ǹ ì'ù invaksə́ aa mà' n doó. Zá ìì kùm íí iirə ní. Kè' n nwɔŋì gə́, kìd ḿ bí'ùwàì wálke nɛ́b bagké bə̀ bəd tə́ŋú. 16Zá məə n nì nwɔŋ ke'ǹmbə̀ gə́, ɛ̀m dá m̀ pà'à nɛ́d bagké nə́ŋ̀, sínkɔ̀ iira, ǹ wál kə̀ ám tá, bɔ̀b nwɔŋ gə́ kóólé, oò gámmíìn sedako bəd iira, sínkɔ̀ toorə númú, kìínmbə̀ Núúboòd Gìdń bàà rə kíin. 17Zá məə bə̀ nwɔŋì kiìnmbə̀ sɔ̀ŋ gə́, m̀ bàà Eklisiya bərá. Bít məəì Eklisiya bəd kiìnmbə̀ sɔ̀ŋ gə́, ǹ zígə̀ kìínmbə̀ nɛ́ŋə̀ aa bàg Vɛnɛ́b síndə kíin, sínkɔ̀ kìínmbə̀ nɛ́d ba'káám bə̀ ke'ǹ kíin.» 18Mə́ tə́ ii kíìn baanàá, aarə nwɔŋ sɔ̀ɔ̀ná: «In aa íí wáálì zɔ̀ŋə yɛ́b bərə, dákíìn wáàl lɛgə́ poú. Bít in aa íí bìnì zɔ̀ŋə yɛ́b bərə, lɛgə́ paà kɔ̀ dákíìn binmínàá.»
Vɛnɛ́b wáàl nyɛɛ̀mbə̀ ɔ̀dba
19«Mə́ tə́ ii kíìn baàn sɔ̀ŋ, dáà nɛ́b bəd iirə aí tə́ŋú, ìì wálì ɔ̀dbə zɔ̀ŋə yɛb ba, kóó in déè nyɛɛ̀mbə̀ gə́, Báá mə́ aa lɛgə́ paà rə, dá bə̀ kíìn piinàá. 20Kə̀ aakíin, zɔ̀ŋ aa nɛ́b bəd iira, sínkɔ̀ toora ìì wál bə máá nə́gə́lə́ rə, máá kɔ̀ mə́ tə́ boò tə́ŋú.»
Nɛ́d tù' bə̀ ma'ǹ aa məə ɔ̀d oò nə́ŋ̀ invaksə́ lɛ́'ǹ daànmbə̀ rə zagəmá
21Kàanyée gə́, Piyɛr ɛ̀m gbarà Yéésù sunú, bít yaà dɛ̀rə̀: «Báátììkpɛ̀ŋá, sɛŋ leè má taà ɔ̀dkuvɛɛ̀l mə́ invaksə́ lɛ́'ǹ daanì, dàà invaksə́ ma'ǹmbə̀ kə̀ máá síngə́ roó? Dá wə́ə̀n sɛŋ nə́ŋsínàì?» 22Yéésù kè' í' bààù: «Ə́ùwə́, mə́ tə́ən kíìn baanàá, oò wə́ə́ sɛŋ nə́ŋsínà ní sí, zá oò wə́ə́ sɛŋ laa toora zè kób zɔ̀ŋ nə́ŋsínà. 23Kə̀ taàbìá, Vɛnɛ́b Gààd lúŋ tə́ gààd gbà'á nə́ŋ̀á, í' bə̀ nɛ́b tù' bə̀ ma'ǹ bəǹ bəd boò ùd bəǹ in aa boò mà' kə̀ basaa bəǹ pii bə̀ naà roó. 24Bə́ŋ̀ sód bə̀ ààùwà nɛ́ŋə̀ nə́ŋ̀á, bàgə̀ ba' kpob zùúm. 25Nɛ́ɛ̀m kə̀ in aa dáù káàn də naà sín yée gə́, nɛ́ŋ gbàáro oò zígə̀, bə̀ kò' boò lɛ́bə̀ kíìn kə̀ kɔ̀' kíin, kə̀ kéèn oò tá, kə̀ yɛb oò bəd tá, bít kə̀ in aa kə̀ naà rə tə́ kóólé, bɔ̀b oò káá kə̀ kpobá. 26Nɛ́d tù' bə̀ ma'ǹ yaà pí' yɛ́b bə kə̀ dunlígə̀rá, Báá oò Tììkpɛ̀ŋ númú, bít bààù: ‹Gbàároá, ǹ sìd mə́ kúnú, bít máan kíìn káàn bí'ǹ kóólé!› 27Báá oò Tììkpɛ̀ŋ búúd mà'ù gə́, lɛ́' dàà nɛ́d tù' bə̀ ma'ǹ oò zá' ɛ̀m kúnú, bít dààù ba'kpob də yàá.
28«Bòórú nɛ́d tù' bə̀ ma'ǹ zá' vúg gbaarú gə́, dáá sáŋ kə̀ ɔ̀d oò nə́ŋ̀á, bə̀ mà' tù' ɔ̀dba, bàgə̀ ba' wàà bɛ̀ŋ́sə̀wàá. Kɔ̀ŋ kò'ù, bít nwɔ̀rə̀ gàálú, bàà: ‹Ǹ káá mə́ kpob aa mə́ bàg n doó!› 29Ɔ̀d oò nə́ŋ̀ pí' yɛ́b bə kə̀ dunlígə̀d oò númú gə́, tàŋ̀ nɛɛ̀n, bàà: ‹Ǹ sìd mə́ kúnú, bít máan kíìn káàn bí'nàá!› 30Zá ɔrə̀ nə́ŋ̀ aarə məə bée, bít kò' dáá pááù wúltígə́l bə̀ rú, káá oò bɛ́' bəǹ kpob bəǹ sína. 31Zɔ̀ŋ aa nɛ́b tù' bə̀ ma'ǹ kam bəraa ìì bé' in aa taà kàan yée gə́, tɛ́m nwuu bə̀ì gbàákù. Bít ɛ̀m dá bə̀ bàà nɛ́ŋ gbàáro boò in aa taà rə gə́ kóólé. 32Kàanyée gə́, nɛ́ŋ gbàáro boò tùm dɛ̀d kɔ̀'váàn də gə́, bít bààù: ‹Éì, ámda ń kɔ̀'váàn vaksə́ bə̀ aa yóo! Lò' mə́ daàn ba' zùúm, nyɛmsɛ́l aa ḿ mà' mə́ rə bòórú. 33Ám kɔ̀, ɛ̀g dáàn bé' ɔ̀dnə́ŋ̀ ń búúd kə̀ nɛɛ̀n aa ɛ̀g mə́ bé'n búúd dú yérə kíin.› 34Bít nɛ́ŋ gbàáro oò nɔ̀m mà'ù yée gə́, kò' piiù gààd gban bəd nɛɛ̀n tɛ́mú, dá boò pááù wúltígə́l bə̀ rú, káá oò bɛ́' bəǹ sína ba' kpob aa bəǹ bàgə̀ rə kə̀ zɔ̀ŋtá.»
35Bít Yéésù bàà zəg sɔ̀ŋ: «Báá mə́ aa lɛgə́ paà rə, dá ii ma'ǹ kə̀ aarə kíin. Kóó nɛ́ɛ̀réè, aí tə́ŋú, lɛ́' dàà ɔ̀dkuvɛɛ̀l oò invaksə́ aa mà'ù rə kə̀ tɛ́m nə́ŋ̀ní síngə́ roó.»
Currently Selected:
Mata 18: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
