Mata 21
21
Yéésù tə́ piìn Urusalima bìlú, kìínmbə̀ gààd gbà'á kíin
(Markus 11.1-11; Luka 19.28-40; Yohana 12.12-19)
1Zɔ̀ŋ aa Yéésù kə̀ nɛ́b sáànmbə̀ oò bəd tá, ɛ̀m bə̀ gbarà Urusalima bìl kàrú, bít yaà bə̀ wə́ə́ Bɛdfaze bìlú, kɔ̀l wàà aa Oliva nyìì bəd dìì bərə gə́, Yéésù tùm nɛ́b sáànmbə̀ oò bəd iira númú, 2bàà bə̀: «Ìì ɛ̀m bìl aa aí númú yée rú. Dá íí wə́ə́ì kíinní, íí dá bɔbm̀ bə̀ tab vɔɔmlə̀ nyììro tə́ wərà, kə̀ vɔɔmlə̀ wàà tá. Ìì bìn bà kúnú, bít ìì àà bà zɔ̀ŋə máá sunú. 3Nɛ́ŋə̀ nə́ŋ̀ dɛ̀ri nwɔŋ nə́ŋ̀ì gə́, kè' ìì í'ù, ìì bàà: ‹Báátììkpɛ̀ŋ í' tə́ kúnú.› Bít kə̀ nwɔŋ aa nuù yée kíinní, dá ii daàn, íí dákíìn ɛmàá.»
4In aa ma'míìn kàandə, bɔ̀b nwɔŋ aa Vɛnɛ́b gbantumsə̀ bàà dàà rə, oò wə́ə́ kúnú.
5«Ìì bàà nɛ́b Siona bìlə́ bə̀' Ìì ɛ̀ga! Gààd íí tóò yaànà aí sunú,
nyìì tə́ kə̀ tɛ́m ɔ̀gkeá, bít na'à tə́ vɔɔmlə̀ yílú, kə̀ vɔɔmlə̀
nyììro yílú.»
6 Nɛ́b sáànmbə̀ bərì ɛ̀m kúnú, bít ɛ̀m dá ìì mà' kìínmbə̀ nɛɛ̀n aa Yéésù bàà bà rə kíin. 7Kò' bə̀ àà vɔɔmlə̀ nyììro rə, kə̀ wàà tá. Bə̀ wɔ̀d gɔ̀' boò bəd vɔɔmlə̀ bəraa rə yílú, bít Yéésù na' kùm yílú wərà. 8Nɛ́b bəd zùúm, bə̀ wɔ̀d gɔ̀' boò bəd kpaŋ̀ tɛ́mú. Bít nɛ́b kam və̀l téé nɛɛ̀n bərá, ìì wɔ̀d kpaŋ̀ tɛ́mú, bɔ̀b oò bə̀ káŋ̀mbìá. 9Nɛ́b aa ké' kpaŋ̀ doó, kə̀ nɛ́b kam bəraa ɛ̀m bòórú rə tá, bə̀ páà kpə̀ə́ǹá, bə̀ bàà: «Kaŋsɛ́l tə́ nɛ́ŋə̀ aa bə̀ dɛ̀rə̀ Dauda Wàà rə naú; Vɛnɛ́b oò zíg màn aa tóò yaànnà Báátììkpɛ̀ŋ nə́gə́lú rə nɛɛ̀n yílú! Kaŋsɛ́l tə́ Vɛnɛ́b naà lɛgə́ poú!»
10Zɔ̀ŋ aa Yéésù ɛ̀m dá pìì Urusalima bìlə́ ní, bìl kə̀ zɔ̀ŋtá, wáá kúnú. Bə̀ bàà: «Aa yée gə́, nɛ́ɛ̀réè gú?» 11Nɛ́b zùúm bəd kè' í' bə̀ bàà: «Aarə Vɛnɛ́b gbantumsə̀ Yéésù ra, vúgà Nazaratu bìlú, Galili yɛ́b ba.»
Yéésù nìŋvúŋ nɛ́b dùm bə̀ gə́ə̀l bəd láŋsə́ wúuú
(Markus 11.15-19; Luka 19.45-48; Yohana 2.13-22)
12Yéésù pìì láŋsə́ wúuú, nìŋvúŋ nɛ́b aa tə́ dùm gə́ə̀l lə kə̀ nɛ́b dùm bə̀ lɛ́bm̀ bəd tə́ kóólé. Sùdlɛ́l nɛ́b ba' bə̀ pɛ́ɛ̀n bəd téé bəraa bə̀ pɛ́n ba' bəroó, bít kə̀ nɛ́b mìrə̀ bə̀ gə́ə̀l bəd téé kuùmbìá. 13Bít bàà bə̀: «Bád bə̀ dàà tə́ Vɛnɛ́b núúboòrú: ‹Wúl mə́ dá kuùm wúl aa nɛ́b bəd dá mə́ nyɛɛ̀m dú roó.› Zá aí gə́, pà' íí mà'ù kìínmbə̀ vɔ̀g lib aa lííro bəd wál bə̀ sáá rú rə kíin!»
14Nyəd bəd kə̀ nɛ́b dun kɛlké bəd tá, gbad bə̀ yaà Yéésù səǹ láŋsə́ wúuú, bít oò kɔ̀ gáŋ bə̀ sisá. 15Láŋsə́ gààd bəd kə̀ nɛ̀n indaŋ̀mbə̀ bəd tá, zɔ̀ŋ aa bə̀ bé' inwulubə̀ bəraa tə́ ma'ǹ doó, kə̀ nɛɛ̀n aa yɛb bɛ̀ŋ́sə̀ bəd tə́ nwɔŋ kpaàm baàn dú láŋsə́ wúu: «Kaŋsɛ́l gə́, tə́ Dauda Wàà naà» rə gə́, nɔ̀m mà' bə̀ kúnú. 16Kàanyée gə́, bə̀ bàà Yéésù: «Ń kìì nwɔŋ bəraa bə̀ tə́ baàn də sínì?» Yéésù kè' í' bə̀: «Èè, gád íí bèd Núúboòd Gìdń nwɔŋ aa bàà rə sínì' Mà' ń vúŋ nwɔŋ káŋke bə̀ bəd yɛb bɛ̀ŋ́sə̀ bəd gú' ba, bít kə̀ yɛb aa tə́ vuùm bərə gú' ba.»
17Bítsɔ̀ŋ, zá' dàà bə̀ gə́, vúg kíìn bìl bòórú, ɛ̀m Betaniya bìlú, dá ləə wərà, tígə́lú.
Yéésù yɛ̀l gààm nyìì nwɔŋyɛɛ̀lá
(Markus 11.12-14, 20-24)
18Nwúndù oòrə, kə̀ limtá, nɛ́ɛ̀m Yéésù vúgà Betaniya bìlú, tóò kidǹ bídǹnà Urusalima bìlə́ yée gə́, gulùm nwuù yàá. 19Bé' gààm nyìì nə́ŋ̀ kpaŋ̀ kàd bə gə́, bít ɛ̀m gbarà nyìì dùú. Zá dá bɔ̀b yɛsə̀ bəd ní, wàà gə́ bə sé. Kàanyée gə́, bàà gààm nyìì: «Ń lɛ̀b yɛb sɔ̀ŋ gá!»
Kə̀ nwɔŋ aa nuù yée kíinní, gààm nyìì wàd yàá. 20Nɛ́b sáànmbə̀ bərì bé' in aa taà yée kàangə́, kò' bə̀ yíl yàá, bít ìì bàà bəd: «Ééleè kə̀ nwɔŋ aa nuù yée kíinní, gààm nyìì aa wàd taà gú?»
21Yéésù kè' í' bə̀, bàà: «Mə́ tə́ ii kíìn baanàá, aarə nwɔŋ sɔ̀ɔ̀ná' dáà íí tə́ kə̀ tɛ́mbagké naú, bít íí zìb pìrə̀ síngə́, íí dá in aa mə́ mà' gààm nyìì aa yée ma'ǹ ní gá. Zá màìgə́, íí bàà kɔ̀l aa yàá: ‹Ǹ gbad kíìn zɔ̀ŋ aa ba, bít zá' dá ǹ pí' nwuu gbà'á rú› gə́, aarə dákíìn ma'mínàá. 22Dáà íí tə́ kə̀ tɛ́mbagké naà gə́, in aa íí nyɛ̀m Vɛnɛ́b naà rə gə́ kóólé, dá ii kíìn piinàá.»
Láŋsə́ gààd bəd dɛ̀d Yéésù gə́, nɛ́ɛ̀réè piiù sə̀n kpaŋ̀ nɛ́b bəd Nwɔŋ Puu Sɔ̀ɔ̀nkè yaàn sáànmbə̀ láŋsə́ wúu gú?
(Markus 11.27-33; Luka 20.1-8)
23Sɛŋ aa Yéésù pìì láŋsə́ wúu rə, sɔ̀d nɛ́b bəd Vɛnɛ́b nwɔŋ sáànmbìá. Kàanyée gə́, láŋsə́ gààd bəd kə̀ dám bəd tá, ìì gbarà Yéésù sunú, bít ìì dɛ̀rə̀: «Nɛ́ɛ̀réè piinnà sə̀n kpɛŋsɛ́l, ḿ mà' taà kə̀ in bəraa rə gú? Bít nɛ́ɛ̀réè pii n sə̀n kpɛŋsɛ́l, in aarə ma'ǹmbə̀ gú?»
24Yéésù kè' í' bə̀: «Máá kɔ̀ má ii nwɔŋ nə́ŋ̀ dɛràá; kè' íí í' mə́ nwɔŋ aarə ìì gə́, máá ii taà zɔ̀ŋ aa mə́ bɔ̀bà kpɛŋsɛ́l bə, mə́ mà' kə̀ in bəraa rə baanàá. 25Nɛ́ɛ̀réè pii sə̀n Yohana kpɛŋsɛ́l, yaà oò pii nɛ́b bəd baptisma gú? Vɛnɛ́bì? Sínkɔ̀ nɛ́b bərì?»
Bít bə̀ pìì nwɔŋ nyá'ǹmbə̀ boò bòdba, ìì bàà: «Dáà kè' bə́n í'ǹ bə́n baàn tə́' Vɛnɛ́b tùmə̀wà sə̀n gə́, dá bə́n dɛdǹ: ‹Kə̀ níìbə̀ íí bàgə̀ taà sín gú?› 26Zá dáà bə́n baànnì' Nɛ́b bəd tùmə̀wà sə̀n kɔ̀, bə́n nuùn nɛ́b zùúm bərá. Kàandə, bə̀ ɛ̀g Yohana tə́ kìínmbə̀ Vɛnɛ́b gbantumsə̀ kíin.»
27Kàanyée gə́, kè' bə̀ í' Yéésù: «Bə́ gàb sé.» Bít Yéésù bàà bə̀: «Máá kɔ̀ mə́ bàà ii zɔ̀ŋ aa mə́ bɔ̀bà kpɛŋsɛ́l bə, mə́ mà' kə̀ in bəraa rə gá.»
Yɛb vɔ̀ɔ̀m iirə zagəmá
28Yéésù bàà zəg láŋsə́ gààd bəd, kə̀ nɛ́b gbàád bəraa Yahudu bəd gààd númú rə tá, nwɔŋ ɔ̀ɔ̀raa sɔ̀ŋ: «Zá íí sèl níì in aa bə gú? Nɛ́ŋ váàndo nə́ŋ̀ kə̀ yɛb vɔ̀ɔ̀m bəd iira. Ɛ̀m dá wàà éèn də̀gə̀ də̀gə̀ bə̀ sunú, bít bààù: ‹Wàà mə́ra, nyà'aa yée, ɛ̀m dá m̀ mà' tù' lɛsú.› 29Wàà kè' í', bàà: ‹Mə́ í' sé, mə́ dáá gá.› Zá záàn bòórú gə́, pɛ́n tɛ́m yàá, bít zá' ɛ̀m kíìn lɛsú. 30Bítsɔ̀ŋ, báá oò dáá wàà váàndo nə́ŋ̀ də sunú, bít bààù nwɔŋ luùm nə́ŋ̀ní rə ní. Wàà váàndo nə́ŋ̀ aarə, kè' í', bàà: ‹Èè báá, má kíìn dáánàá.› Zá bít bòórú gə́, dáá lɛsú sé. 31Yɛb vɔ̀ɔ̀m bəraa iirə yée, nɛ́ɛ̀réè mà' sə̀n in aa báá boò í' rə gú?» Bít láŋsə́ gààd bəd kə̀ Yahudu bəd dam bəd tá, kè' bə̀ í', bə̀ bàà: «Wàà váàndo éèn də̀gə̀ də̀gə̀ bìá.»
Kàanyée gə́, Yéésù bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná, nɛ́b ba'káám bə̀ ke'ǹ bəd kə̀ nɛ́b kɛ́ɛ̀m labsə̀ bə̀ bəd tá, éèn bə̀ dá sə̀n piìn kə̀ aíra Vɛnɛ́b gààrú. 32Kə̀ aakíin də, Yohana nɛ́d baptisma bə̀ piìn yaaì aí sunú, ì' ii kpaŋ̀ wɔ̀ɔ̀lə̀ì Vɛnɛ́b númú, bít íí kè' nwɔŋ oò bə̀ sé. Zá nɛ́b ba'káám bə̀ ke'ǹ bəd kə̀ nɛ́b kɛ́ɛ̀m labsə̀ bə̀ ma'ǹ bəd tá, bə̀ bàgə̀ yàá. Zá kə̀ insɔ̀ɔ̀n aa íí bé' yée tə́ kóólé, íí pɛ́n tɛ́m, íí bàgə̀ sé.»
Yéésù gám zagəm nwɔŋ, nɛ́b lɛ' bə̀ nwáàn vaksə́ bə̀ bəd yílú
(Markus 12.1-12; Luka 20.9-19)
33«Ìì kìì zagəm ɔ̀d nə́ŋ̀á' Nɛ́d lɛ' bə̀ nə́ŋ̀ làm lɛsá, ləg téé bərá, tèè pááù tə́ŋú kə̀ gáŋá; bít páá nagə̀l téé yɛb bə̀ sɛbm̀má, kùd zɔ̀ŋ aa nɛ́b lɛ' bə̀ nwáàn bəd bə̀ dá kuùm bəroó. Bòórú gə́, pà' pii lɛ' rə, nɛ́b lɛ' bə̀ laàm bəd naú, bít zá' ɛ̀m sɛ̀ɛ́n zɔ̀ŋ bùúrá. 34Sɛŋ téé yɛb bə̀ yɛbm̀ yaà wə́ə́ gə́, tùmà nɛ́b tù' bə̀ ma'ǹ oò bəd nɛ́b lɛ' bə̀ laàm bəd sunú, boò pii bəǹ téé yɛb obəǹ bìá. 35Zá nɛ́b lɛ' bə̀ laàm bəd sə̀d bə̀ kò' nɛ́b tù' bə̀ ma'ǹ bəraa rə kúnú. Bə̀ zìb nə́ŋ̀ kúnú, nə́ŋ̀ ɔ̀d kɔ̀ bə̀ lò'ù kúnú, bít nə́ŋ̀ toorúb də kɔ̀ bə̀ lààù kə̀ bəŋá. 36Nɛ́d lɛ' bə̀ tùm àà nɛ́b tù' bə̀ ma'ǹ ɔ̀d kambəd sɔ̀ŋ, kànsə̀n aa bəraa kíin doó. Bít nɛ́b lɛ' bə̀ nwáàn bərì mà' bə̀ kə̀ nɛɛ̀n aarə kíinní sɔ̀ŋ. 37Bít bòórú gə́, tùmà wàà oò boò sunú, bàà: ‹Wàà mə́ gə́, bə̀ dáù kíìn ləə̀n sɔ̀ɔ̀nkè.› 38Zá zɔ̀ŋ aa nɛ́b lɛ' bə̀ nwáàn bəd bə̀ bé' wàà rə tóò yaànà kàangə́, bə̀ bàà bəd boò bòdba: ‹Ìì ɛ̀ga, màn aa dá valligə̀ líìn də yóo. Ìì yaà zìb báà lo'ǹnə̀ kúnú. Bə́n ma'ǹnì kàangə́, báàn sə̀n valligə̀ oòrə líínàá!› 39Bít sə̀d bə̀ kò'ù taá, pà' bə̀ ɛ̀mə̀ kə̀ lɛ' bòórú, bít zìb dá bə̀ lò'ù kúnú.
40«Sɛŋ aa nɛ́d lɛ' bə̀ yaaì rə, dá nɛ́b lɛ' bə̀ nwáàn bəraa ma'ǹ leè gú?»
41 Láŋsə́ gààd bəd kə̀ nɛ́b gbàád bəraa Yahudu bəd gààd númú rə tá, kè' bə̀ í'ù: «Dá nɛ́b bəraa rə lodǹ tɛ́m yɛ̀ɛ́l bìá, bít pà' dá lɛ' rə piìn nɛ́b lɛ' bə̀ nwáàn kam bəd naú; aa bəraa bə̀ dáù téé yɛb piìn, sɛŋ aa téé yɛb ú'ì roó.»
42Bít Yéésù bàà bə̀:
«Gàb íí bèd Vɛnɛ́b nwɔŋ aa bə̀ bád Núúboòd Gìdń bərú rə sínì?
Bəŋ aa nɛ́b wúl bə̀ wə'ǹ bəd làà bə̀ lɛ́' rə,
yaà bíl bəŋ yíl bə̀ yàá. Aarə Báátììkpɛ̀ŋ tùsá,
bít aarə kɔ̀, insɔ̀ɔ̀nkè gbà'á aa bé' bə́n bedǹ síndoó!»
43Yéésù bàà zəg sɔ̀ŋ: «Kə̀ taàbìá, mə́ tə́ ii taà baanàá, zɔ̀ŋ aa íí kùm bə Vɛnɛ́b gààrə́ rə, Vɛnɛ́b pà' dákíìn zá'nàá, bít bə̀ dá nɛ́b kun gɔ̀ŋ bəraa bə̀ tə́ in aa Vɛnɛ́b í' rə ma' ǹ də piinàá. [ 44Màn aa yi'ì bəŋ aarə yílə́ rə, nɛ́ŋə̀ aarə, dá kɛɛ̀l dugǹ bəní. Bít dáà bəŋ aarə pí'ì nɛ́ŋə̀ nə́ŋ̀ yílə́ gə́, bəŋ də dá nɛ́ŋə̀ aarə bí'ǹ kə̀ yɛ́b məsə́g kíin.]»
45 Láŋsə́ gààd bəd kə̀ Farisa bəd gə̀b tá, bə̀ kìì zagəm bəraa Yéésù nàà bə̀ yée kàangə́, sèl bə̀ gàb naàní, gám tə́ obənə́ yílú. 46Bít bə̀ sàà nɛɛ̀n aa bə̀ dáù ko'ǹ dú roó. Zá bə̀ nùù nɛ́b zùúm bərá. Nɛ́b bəd bə̀ pà' Yéésù kìínmbə̀ Vɛnɛ́b gbantumsə̀ kíin.
Currently Selected:
Mata 21: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
