Mata 24
24
Yéésù bàà gə́, láŋsə́ wúl aa dákíìn wɔbàá
(Markus 13.1-2; Luka 21.5-6)
1Yéésù vúg láŋsə́ wúuú, bít nɛ́ɛ̀m zá' tə́ ɛɛ̀m gə́, nɛ́b sáànmbə̀ oò bəd bə̀ gbarà oò sunú, yaà bə̀ ì'ù nɛɛ̀n aa bə̀ wə̀' láŋsə́ wúl aa rú roó. 2Kàanyée gə́, Yéésù kè' í', bít bàà bə̀: «Íí bé' in bəraa yéeì kóólé sɔ̀ɔ̀nkèì? Mə́ tə́ ii kíìn baanàá, aarə nwɔŋ sɔ̀ɔ̀ná, sɛŋ nə́ŋ̀ dáà kíìn yaanàá, in bəraa íí bé' yée kóólé, bə̀ dákíìn yi'nàá; bəŋ nə́ŋ̀má ləə bəŋ ɔ̀d nə́ŋ̀ yílə́ gá.»
Búúd bəraa dáà yaànà nɛ́b bagké bəd yílú, bə́ŋ̀ yɛ́b dá bɛ́dǹ doó
(Markus 13.3-13; Luka 21.7-19)
3Yéésù na' dá kùm kɔ̀l aa Oliva nyìì bəd dìì bərə ba, nɛ́b sáànmbə̀ oò bəd gbarì yaà oò sunú, boò ní, bít ìì dɛ̀rə̀: «M̀ bàà bə́ kúnú, nɛ́mbínì, in aarə dá taà wə́ə̀n gú, bít níì dá sə̀n sɛŋ aa kid ń dáà bídǹnà bərə, kə̀ sɛŋ aa yɛ́b dá bɛ́dǹ bərə i'ǹ gú?»
4Yéésù kè' í' bə̀, bàà: «Ìì gú' yíl íí ra, ìì dàà nɛ́ŋə̀ nə́ŋ̀má záá oò lɛ́' ii sí. 5Kàandə, nɛ́b gúsuúm bə̀ bəd zùúm, bə̀ dáà kíìn yaanàá. Bə̀ dáà yaànnà máá nə́gə́lú, bít kóó nɛ́ɛ̀réè, dá baàn: ‹Máára mə́ kùmsə̀n Nɛ́ŋə̀ aa Vɛnɛ́b tɔ̀bə̀ gààd kílə́m yílə́ roó!› Bít záá ìì dá nɛ́b bəd lɛ́ɛ̀l zùúm. 6Íí dá dìímsə̀ bùm bə̀ nə́'ǹ bəd kiìn zɔ̀ŋ kə́d ba, bít kə̀ nwɔŋ bəd zɔ̀ŋ bùúd ba. Ìì gú' gíbm̀bìá. In aarə oò wə́ə́ kúnú. Zá in aarə dá sə̀n kuùm bɛ́dke yɛ́b bə̀ gbòód gá. 7Yɛ́b nə́ŋ̀ dá bùm nə́'ǹ kə̀ yɛ́b ɔ̀d nə́ŋ̀ gɔ̀ŋá, bít gààd bəraa yɛ́b nə́ŋ̀ bərə, bə̀ dá nə́gə̀d zá'ǹ kə̀ gààd kam bəraa yɛ́b nə́ŋ̀ gɔ̀ŋ bəroó. Gulùm bəd dá kuùm yɛ́b gɔ̀ŋ gɔ̀ŋ, kə̀ wá'ke yɛ́b bəd bə̀ tá. 8In bəraa rə kóólé, dá kuùm kìínmbə̀ nwuukè bəraa nɛ́ŋ kéèndo bàgə̀l bə̀ sɔ̀d bɔ̀b sáá sɛŋ aa tə́ wàà lɛbm̀ də kíin.
9«Sɛŋ aarə, nɛ́b bəd kò' bə̀ dá ii piìn gààd bəd naú, bɔ̀b boò í' ii búúrá. Bít bə̀ dá ii kíìn loràá. Nɛ́b kun bəd kóólé, bə̀ dá ii kíìn zeenàá, máá nə́gə́lú. 10Sɛŋ aarə rú rə, nɛ́b bəd zùúm, nùù bə̀ dá tɛ́mbagké boò bəd kíìn daanàá. Bə̀ dá ɔ̀dnə́ŋ̀ bəd dáàn lɛ́bàá, bít bə̀ dá ɔ̀dnə́ŋ̀ bəd zeèn boò bòdba. 11Nɛ́b gúsuúm bə̀ bəd zùúm, bə̀ dáà kíìn yaanàá. Bə̀ dá baàn bənə́ Vɛnɛ́b gbantumsə̀ bərá, bə̀ dá nɛ́b bəd záàn lɛ́ɛ̀l zùúm. 12Invaksə́ sa' dá bɛ́dǹ yɛ́b bə kóólé. Nɛ́b bagké bəd zùúm, í'sɛ̀l boò dákíìn tɛbàá. 13Zá nɛ́ŋə̀ aa kpɛŋ̀ dììyì kə̀ tɛ́mbagké oò, yaà wə́ə́ì sɛŋ aa yɛ́b dá bɛ́dǹ bərə zé rə, Vɛnɛ́b dáù kíìn súúnàá. 14Nɛ́b tù' bə̀ ma'ǹ mə́ bəd bə̀ dá Nwɔŋ Puu Sɔ̀ɔ̀nkè Vɛnɛ́b Gààd bə̀ aarə, baàn zɔ̀ŋə yɛ́b bə kóólé, bɔ̀b sedako oò ma'míìn kíìn nɛ́b zɔ̀ŋə yɛ́b bə bə̀ bəd kóólé númú. Bít bòórú gə́, yɛ́b dá taà bɛ́ràá.»
Yéésù gám nwɔŋ invaksə́ gbà'á aa dáà yaànnà rə yílú
(Markus 13.14-23; Luka 21.20-24)
15«Daniɛl, Vɛnɛ́b gbantumsə̀, gám nwɔŋ ‹Innyìbbə̀ vaksə́› aa tə́ Vɛnɛ́b wúl yɛɛ̀l də yílú. Íí dá bé'ǹ innyìbbə̀ vaksə́ aarə, dá diìn zɔ̀ŋ gìdń ba, Vɛnɛ́b wúuú.» (Ogə́, màn aa tə́ gádǹ də, kìì oò kùd nwɔŋ aarə kíìn sɔ̀ɔ̀nkè.) 16Sɛŋ aarə, nɛ́b aa dá bə̀ kuùm tə́ Yahudiya yɛ́b bərə, nùù boò na' kɔ̀l ba. 17 Màn aa dá kuùm tə́ oò wúl yílə́ rə, sím oò yaà wúu in oò bəd yaàn pú'ǹmbə̀ sí, zá oò nùù kúnú. 17Màn aa dá kuùm tə́ oò wúl yílə́ rə, sím oò yaà wuú in oò bəd yaàn pú'ǹmbə̀ sí, zá oò nùù kúnú. 18Bít màn aa dá kuùm tə́ lɛsə́ rə kɔ̀, kid oò bírà yiìl, dàál oò yaàn pa'ǹmbə̀ sí. 19Níì búúd luùm də dá sə̀n wə́ə̀n nyàm aarə bə, nɛ́b kɛ́ɛ̀m bàgə̀l bə̀ bəd yílú, kə̀ aa bəraa tə́ yɛb vuùm úùm də yílə́ gú! 20Ìì nyɛ̀m Vɛnɛ́b, bɔ̀b ìì bɔ̀b in bəraa rə nuùnmbə̀ nwan nyìì tə́ŋtəŋú, sínkɔ̀ nyàm nyi'ǹmbə̀ sɛŋə́ sí! 21Kə̀ aakíin də, sɛŋ aarə rú rə, búúd nwuu dá sə̀n búúd bəraa sɛŋ aa yɛ́b sɔ̀d dú, yaà wə́ə́ kə̀ bə́ŋyée kíin zé rə kanàá; bít kóó in aarə ɔ̀d nə́ŋ̀má ma'míìn kə̀ aarə kíin sɔ̀ŋ gá. 22Bít dáà Vɛnɛ́b və̀rà sɛŋ aarə kə́d síngə́, nɛ́ŋə̀ nə́ŋ̀má súú gá. Zá və̀d sɛŋ aarə, nɛ́b oò bəraa sààvúŋà rə bòórú.
23«Sɛŋ aarə, dáà nɛ́ŋə̀ nə́ŋ̀ bààiyì: ‹Ìì ɛ̀ga, Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə tə́ zɔ̀ŋə!› Sínkɔ̀: ‹Oò tə́ wərà› gə́, ìì bàgə̀ sí. 24Kə̀ aakíin də, nɛ́d nɛ́b bəd bə̀ súùn gúsuúm bə̀ bəd kə̀ Vɛnɛ́b gbantumsə̀ gúsuúm bə̀ bəd tá, bə̀ dáà kíìn yaanàá, bə̀ dá inwulubə̀ bəd ma'ǹ kə̀ in də́dǹ bə̀ tó'ǹ bəd tá, bɔ̀b nɛ́b bəd bə̀ záàn lɛ́lǹmbìá. Dáà dákíìn ma'míìn gə́, záá bə̀ dá lɛ́ɛ̀l kə̀ nɛ́b aa Vɛnɛ́b sààvúŋà rə tá. 25Ìì zɛ̀ŋ túŋá! Gbád mə́ bààiyà nwɔŋ aarə yàá.
26«Sɛŋ aarə, dáà nɛ́ŋə̀ nə́ŋ̀ bààiyì: ‹Ìì ɛ̀ga, oò tə́ fɔ̀gú› gə́, ìì dáá zɔ̀ŋ də bə sí. ‹Ìì ɛ̀ga, sínkɔ̀ bə̀ bàà ii tə́ zɔ̀ŋ mə́'ke rú› gə́, ìì kè' nwɔŋ aa bə̀ bàà ii yérə sí. 27Sɛŋ aa Nɛ́ŋ Váàndo Wàà dáà bídǹnà bərə, dá kuùm kìínmbə̀ nɛɛ̀n aa yɛ́bsə̀ tə́ ibm̀ dú nyàm go' bə kə̀ nyàm pìì bərə kíin. 28Zɔ̀ŋ aa in val kùm bərə, dúmə́ bəd kɔ̀ ìì dá wáàl tə́ zɔ̀ŋ aarə ba.»
Yéésù bàà nɛɛ̀n aa Nɛ́ŋ Váàndo Wàà dáà bídǹnà rú roó
(Markus 13.24-27; Luka 21.25-28)
29«Kə̀ nwɔŋ aa nuù yée kíinní, búúd nwuukè aa nyàm bəraa rú yée rə taàì gə́, nyàm dá tígə́l laanàá. Sòòbírə̀ nyɛd sɔ̀ŋ gá, dùdù yɛb dáà kíìn píìl yɛ́b ba. Bít Vɛnɛ́b dá kpɛŋsɛ́l bəraa lɛg bərə kíìn wáánàá, kìínmbə̀ téé nyìì bəd kíin. 30Kàanyée gə́, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, in oò nə́ŋ̀ dá i'míìn lɛg ba. Bít kàandə, nɛ́b kun bəraa yɛ́b bərə kóólé, bə̀ dá taà nwɔŋ kpəə̀n dalàá. Bə̀ dá nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə bé'ǹ, tóò yaànà mɔbú, lɛg ba, kə̀ kpɛŋsɛ́l gbà'á, bít kə̀ Vɛnɛ́b kaŋsɛ́l laa nyɛdkè tá. 31Bít nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, dá malaika oò bəd tuùm kə̀ yaa gà' nwùùkè bəd íìlǹbìá. Bít malaika bəd dá nɛ́b bəraa Vɛnɛ́b sààvúŋ də wálàá. Sɔ̀d lɛg kàd nə́ŋ̀ ba, yaà dá wə́ə̀n ɔ̀d nə́ŋ̀ gɔ̀ŋ bə zé.»
Insánke aa gààm nyìì ì' roó
(Markus 13.28-31; Luka 21.29-33)
32«Ìì kìì insánke aa gààm nyìì ì' sɔ̀d sɛŋ aa nɛɛ̀n oò bəd ɔ̀gì roó. Yɛsə̀ oò bəd pìyì lúdǹmbə̀ gə́, íí dákíìn gabàá, nwan sɛŋ gbad wə́ə́ì kə́d ba. 33Kìínmbə̀ nɛɛ̀n aarə kíinní sɔ̀ŋ, màìgə́ íí bé' in aarəì kóólé gə́, íí dákíìn gabàá, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, sɛŋ oò gbad wə́ə́ì kə́d ba, dáà kíìn yaanàá. 34Mə́ tə́ ii kíìn baanàá, aarə nwɔŋ sɔ̀ɔ̀ná, nɛ́b aa bə́ŋyée rə, val kòd bɛ́d bə̀ gá, in aarə dákíìn wə́ə́nàá. 35Lɛg kə̀ yɛb tá, ìì dákíìn bɔ̀bm̀ dugàá, zá nwɔŋ mə́ bəd gə́, ìì dùg bə gá.»
Nɛ́ŋə̀ nə́ŋ̀má gàb sɛŋ aa yɛ́b dá bɛ́dǹ bərə sé
(Markus 13.32-37; Luka 17.26-30, 34-36)
36«Nyààmá, kə̀ sɛŋ aa roó, kóó nɛ́ŋə̀ nə́ŋ̀má gàb sé. Kóó malaika lɛgú paà bə̀ bərá, kóó nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə máá, gàb sé. Zá Báá Vɛnɛ́b oò nə́ŋ̀ní tə́ŋtə́ŋ, gàb sə̀ní. 37In aa taà Nuhu sɛŋə́ rə, dá taàn tə́ nɛɛ̀n də rú, kə̀ sɛŋ yaaké nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə bìá. 38Sɛŋ bəraa sɔ̀d bə́ŋ̀ nwan gbà'á yaà síndə, nɛ́b bəd tə́ in líínàá, ìì tə́ badn bəd nyəənàá, bə̀ tə́ kɛ́ɛ̀m pa'làá, vɔ̀ɔ̀m pa'làá, bə̀ tə́ yɛb vɔ̀ɔ̀m boò bəd kɛ́ɛ̀m tabm̀ piinàá, yɛb kɛ́ɛ̀m boò bəd piìn vɔ̀ɔ̀m yiilú; yaà wə́ə́ nyàm aa Nuhu pìì bə kə̀ə̀d gbà'á rú rə zé. 39Bə̀ gàb in aa tə́ì yaànnà rə sé, yaà wə́ə́ sɛŋ aa nwan wəl yaà, bít lòd bə̀ boò kóólé bərə zé. Dá kuùm kə̀ nɛɛ̀n aarə kíin sɔ̀ŋ, sɛŋ aa nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, dáà yaànà bəroó. 40Sɛŋ aarə bərə, nɛ́b vɔ̀ɔ̀m bəd iira ìì dá kuùm lɛsú, bə̀ dá nə́ŋ̀ kíìn pa'nàá, bít ɔ̀d nə́ŋ̀ kɔ̀ bə̀ dáù kíìn daanàá. 41Nɛ́b kɛ́ɛ̀m bəd iira, ìì dá yɛd kpeéd naàm nagə̀l tɛ́mú, bə̀ dá nə́ŋ̀ kíìn pa'nàá, bít nə́ŋ̀ ɔ̀d kɔ̀ bə̀ dáù kíìn daanàá. 42Kə̀ taàbìá, yid ìì lɛ́' si' sí. Kàandə, íí gàb nyàm aa Báá íí Tììkpɛ̀ŋ dáà yaànà bərə sé. 43Ìì kìì nwɔŋ aa yóo' Dáà nɛ́d ligə̀ bə̀ gàb sɛŋ aa lííro dáà yaànà bə tígə́lə́ rəì gə́, ləə ləəm gá, kùm dákíìn nwánàá, bít dàà lííro pìì oò yiìl gá. 44Kə̀ taàbìá, aí kɔ̀ kùm ìì nwán kúnú. Kàandə, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, dáà yaànà sɛŋ aa íí sèl síndə ba.»
Yéésù nàà zagəm, nɛ́d tù' bə̀ ma'ǹ sɔ̀ɔ̀n yílú, bít kə̀ nɛ́d tù' ma'ǹ vaksə́ yílú
(Luka 12.41-48)
45«Nɛ́ɛ̀réè kùmsə̀n nɛ́d tù' bə̀ ma'ǹ sɔ̀ɔ̀ná, bít nɛ́d in bə̀ gabm̀ gú? Aarə kùmsə̀n nɛ́d tù' bə̀ ma'ǹ aa nɛ̀n oò sààvúŋ kìínmbə̀ nɛ́d yíl bə̀ kíin, oò yiilú, oò pii nɛ́b tù' bə̀ ma'ǹ kam bəraa yiìl lə inlíìnmbìá, sɛŋ wə́ə́ì gə́ roó. Aarə, sàà pà' nɛ́d tù' bə̀ ma'ǹ aa gàb inì ma'ǹmbìá, bít nɛ̀n oò zíg tɛ́m oò naà rə géè? Èè, kàani. 46Làmkè tə́ nɛ́d tù' bə̀ ma'ǹ aa nɛ̀n oò kidbíd yaà wə́ə́ì yiìl gə́, dáù bɔbm̀ tə́ tùsaa rə ma'ǹ naà rə naú! 47Mə́ tə́ ii kíìn baanàá, aarə nwɔŋ sɔ̀ɔ̀ná, nɛ̀n oò dáù gbaŋə̀ oò bəd piìn kóólé, oò nwán kúnú. 48Zá dáà nɛ́d tù' bə̀ ma'ǹ aarə tə́ nɛ́d vaksə́ bə̀ gə́, dá baàn oò tɛ́mú: ‹Nɛ̀n náŋà tə́ kíìn yaànmbìá›; 49bít dá pí'ǹ nɛ́b tù' bə̀ ma'ǹ kam bəraa zibə̀l bìá. Dá inlíìnmbə̀ líínàá, bít dá barəm kuùm nyəə̀n kə̀ nɛ́b wìdkè bə̀ bəd tá. 50Kàanyée gə́, nɛ̀n dáà bídǹnà nyàm aa nɛ́d tù' bə̀ ma'ǹ nwánə̀ gá rə ba, bít sɛŋ aa gàb gá rə ba. 51Bít nɛ̀n dá nɛ́d tù' bə̀ ma'ǹ búúd val bə̀ í'nàá. Bə̀ dáù búúd í'ǹ, kìínmbə̀ nɛɛ̀n aa mà' nɛ́b gú' bàrə̀b bə bəd də kíin. Zɔ̀ŋ aarə ba, kpə̀ə́ǹ bəd dá taà kuùm kə̀ nə́gə́l fu'ǹmbə̀ tá.»
Currently Selected:
Mata 24: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
