Mata 26
26
Gààd bəd wúú nwɔŋ, bɔ̀b Yéésù ko'ǹmbìá
(Markus 14.1-2; Luka 22.1-2; Yohana 11.45-53)
1Zɔ̀ŋ aa Yéésù gám bɛ́' nwɔŋ bəraa kóólé gə́, bàà nɛ́b sáànmbə̀ oò bəd: 2«Íí gàb yàá, Paska dákíìn ma'míìn sɛŋ bəraa iirə yóo. Sɛŋ aarə bərə, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə gə́, kò' bə̀ dáù piìn ɔ̀dmáàn oò bəd nɛɛ̀n tɛ́mú. Bág bə̀ dáù lo'ǹ téélɛŋké ba.
3«Kàanyée gə́, láŋsə́ gààd bəd kə̀ Yahudu bəd dam bəd tá, bə̀ wál láŋsə́ gààd gbà'á aa bə̀ dɛ̀rə̀ Kaifa rə walú.» 4Bít wálì páá pìrə̀ aa mə́' ìì dá kə̀ Yéésù ko'ǹ, bít ìì dáù lo'ǹ kə̀ kùrú roó. 5Gám ìì bàà: «Báà ko'ǹnə̀ wálke nyàmú sí, síngə́, nɛ́b zùúm dá nə́gə̀d kíìn zá'ǹ kə̀ obə́n da.»
Nɛ́ŋ kéèndo nə́ŋ̀ yaà zà' Yéésù kílə́m solbə̀ yíləsú
(Markus 14.3-9; Yohana 12.1-8)
6Zɔ̀ŋ aa Yéésù tə́ kuùm Betaniya, Simon gərə́ váàn yiìl yée gə́, 7sɛŋ aa tə́ in líìn dú rə, nɛ́ŋ kéèndo nə́ŋ̀ gbad yaà oò sunú, kò'à bùn aa bə̀ kùd kə̀ Albatre bəŋ də naú, pɛ́nà urdi dùm nwuukè bə̀ rú wərà, yaà zà' urdi rə Yéésù yíləsú. 8Zɔ̀ŋ aa nɛ́b sáànmbə̀ bərì bé' in aa kàangə́, tɛ́m nwuu bə̀ kúnú, bít ìì bàà: «Kə̀ níìbə̀ tə́ taà kílə́m aa yée za'ǹ yɛɛ̀l tɛdńní gú? 9Bə̀ dàà urdi aa gə́ə̀l lɛ́bǹmbə̀ dùm nwuukèá, bít piìnmbə̀ ba' rə nɛ́b búúd bə̀ bərá!»
10Zɔ̀ŋ aa Yéésù gàb nwɔŋ aa ìì tə́ gáàm də kàanyée gə́, bít bàà bə̀: «Kə̀ níìbə̀ íí tə́ taà nɛ́ŋ kéèndo aa yée vɔgə̀l kə̀ nwɔŋ gú? In aa yaà mà' yée, máá naà gə́, mà' tù' sɔ̀ɔ̀nkèá. 11Kə̀ aakíin də, íí dá nɛ́b búúd bə̀ bəd kíìn bɔbm̀ sɛŋ gə́ kóólé. Zá máá gə́, mə́ kùm kə̀ aí tə́ sɛŋ gə́ kóólé gá. 12Zà' mə́ urdiì sisú, mà' kàandə, bɔ̀b máá bə̀ si' kudǹmbə̀ sààrú bìá. 13Mə́ tə́ ii kíìn baanàá, aarə nwɔŋ sɔ̀ɔ̀ná, zɔ̀ŋ aa bə̀ dá Nwɔŋ Puu Sɔ̀ɔ̀nkè aa baàn bə zɔ̀ŋə yɛ́b bərə gə́ kóólé, bə̀ dá in aa nɛ́ŋ kéèndo aa mà' yée uràá, bɔ̀b oò bə̀ seèl zá'ǹmbìá.»
Yudas í' Yéésù ko'ǹ piìnmbə̀ láŋsə́ gààd bəd nɛɛ̀n tɛ́mú
(Markus 14.10-11; Luka 22.3-6)
14Kàanyée gə́, nɛ́ŋə̀ nə́ŋ̀, nɛ́b sáànmbə̀ bəraa kób zè iirə rə tə́ŋú, bə̀ dɛ̀rə̀ Yudas Iskariyot. Ɛ̀m dá bɔ̀b láŋsə́ gààd gbàád bərá, 15bít bàà bə̀: «Kò' mə́ pii ii Yéésùì nɛɛ̀n tɛ́mú gə́, íí dá mə́ káàn leè?»
Bít gád bə̀ piiù ba' yáàm lɛ̀ɛ́ŋə̀ laa nə́ŋ̀ zè kób. 16Sɔ̀d sɛŋ aarə ba, Yudas sàà taà nɛɛ̀n aa dá Yéésù ko'ǹ lɛ́bm̀ dú roó.
Yéésù líí Paska gbèd kə̀ nɛ́b sáànmbə̀ oò bəd tá
(Markus 14.12-21; Luka 22.7-14, 21-23; Yohana 13.21-30)
17Nyàm éèn də̀gə̀ də̀gə̀ bə̀ aa líí ìì sáá bə̀rɛ́d aa inváàndo rú gá rə ba, nɛ́b sáànmbə̀ bəd yaà ìì dɛ̀d Yéésù: «Ń í' dá báà wúú n Paska gbèd də bínì gú?»
18Kàanyée gə́, Yéésù bàà bə̀ taá: «Ìì ɛ̀m bìlú, nɛ́ŋ váàndo nə́ŋ̀ yiilú, bít ìì bààù: ‹Nɛ̀n bàà' Sɛŋ mə́ wə́ə́ì kə́d ba. Ám kàrú, má taà Paska gbèd líìn kə̀ nɛ́b sáànmbə̀ mə́ bəd tá.› »
19 Nɛ́b sáànmbə̀ bərì mà' in aa Yéésù bàà bə̀ roó, bít ìì wúú Paska gbèrá.
20Nyàm yaà mà' gə́, Yéésù kùm gbèd magə̀ bə kə̀ nɛ́b sáànmbə̀ oò bəraa kób zè iirə rə tá. 21Sɛŋ aa bə̀ tə́ inlíìnmbə̀ líìn də, Yéésù bàà: «Mə́ tə́ ii kíìn baanàá, aarə nwɔŋ sɔ̀ɔ̀ná, nɛ́ŋə̀ nə́ŋ̀ aí tə́ŋú, dá mə́ sə̀n lɛ́bàá.»
22Bít nɛ́b sáànmbə̀ bəd gə́ kóólé, nwɔŋ aarə nwuu bə̀ tɛ́m yàá, bít ìì bàà: «Máàn máá géè, Báátììkpɛ̀ŋá?»
23Yéésù kè' í' bə̀: «Màn aa tìm bə̀rɛ́d oò kə̀ máá tá, gbèd magə̀ rú rə, oòra kùmsə̀n màn aa dá mə́ lɛ́bm̀ doó. 24Nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, val dáù kíìn ko'nàá, kìínmbə̀ bád bə̀ dàà Núúboòd Gìdńnú oò yílə́ rə kíni. Zá níì búúd luùm dá sə̀n wə́ə̀n, màn aa dá nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə lɛ́bm̀ də yílə́ gú! Aa dá sɔɔ̀n də gə́, dáà boò lɛ̀bə̀ sí má!»
25Yudas, màn aa dáù lɛ́bm̀ də, kè' í', bààù: «Máàn máá géè, Nɛ̀ná?»
Yéésù kè' í'ù: «Bàà ń kà' tə́ sìní kə̀ yíl ń da.»
Sɛŋ aa Yéésù sɔ̀d gbèd Gìdń piìnmbə̀ roó
(Markus 14.22-26; Luka 22.15-20; 1 Korintu 11.23-25)
26Sɛŋ aa ìì tə́ gbèd líìn də, Yéésù pà' bə̀rɛ́d, bít bòórú mɔ̀' Vɛnɛ́b gə́, wèè kúnú, bít pii nɛ́b sáànmbə̀ oò bərá, bàà bə̀: «Ìì kè' kúnú, bít ìì líí kúnú, aarə si' mə́ra.»
27Bòórú gə́, pà' badn magə̀wàá, bít mɔ̀' Vɛnɛ́b gə́, pii bə̀ gə́, bàà: «Ìì nyəə kúnú, íí kóólé. 28Kə̀ aakíin də, aarə nyɛ̀lə́m mə́ra, nyɛ̀lə́m aa Vɛnɛ́b mà' gú'dúgke puu kə̀ kùrú bít zà' nɛ́b zùúm bòórú, daaké invaksə́ boò bəd bə̀ roó. 29Mə́ tə́ ii kíìn baanàá, mə́ nyəə badn aa yée kə̀ aí tə́ sɔ̀ŋ gá, yaà dá wə́ə̀n nyàm aa yaà má badn puu nyəə̀n kə̀ aí tə́, Báá mə́ gààrə́ rə zé.»
30Bòórú bə̀ nàà bəd Dauda náb káŋke bə̀ gə́, bít zá' vúg bə̀ ɛ̀m bəd kɔ̀l aa Oliva nyìì bəd dìì bərə ba.
Yéésù bàà gə́, Piyɛr dá bəǹ kíìn məə̀n daanàá
(Markus 14.27-31; Luka 22.31-34; Yohana 13.36-38)
31Zɔ̀ŋ aa dá bə̀ wə́ə́ kɔ̀l aa Oliva nyìì bəd dìì bərə gə́, Yéésù bàà nɛ́b sáànmbə̀ oò bəd: «Tígə́l aa yée rú ní, íí kóólé, íí dá mə́ kíìn məə̀n daanàá, in aa dá wə́ə̀n máá yílə́ rə bòórú. Kàandə, Vɛnɛ́b bàà dàà oò núúboòrú: ‹Má bɛ̀rə̀ yibə̀ kíìn zibàá, bít bɛ̀rə̀ gə̀b bəd kɔ̀, nùù bə̀ dá sa'ǹ zɔ̀ŋ gə́ kóólé.› 32Zá bòórú mə́ díímì valə́ gə́, éèn má sə̀n dáàn wə́ə̀n Galili yɛ́b bə kə̀ aíra.»
33Piyɛr bààù: «Kóó dáà nɛ́b kambəd kóólé ìì bɔ̀' tɛ́mbagké boòì máá, máá gə́, mə́ bɔ̀' tɛ́mbagké mə́ gá.»
34Yéésù bààù: «Mə́ tə́ən kíìn baanàá, aarə nwɔŋ sɔ̀ɔ̀ná, nyà'aa tígə́l aa yée rú, bə́ŋ̀ kòòváàn dá sɔ̀dǹ nwɔɔ̀mbə̀ gə́, ám ní, ń dá baàn sɛŋ toora, bəǹ gàb mə́ sé.»
35Piyɛr bààù: «Kóó dáà val dá ko'ǹ tə́ kə̀ ám tə́ máá, baànmbə̀ mə́ gàbm̀ sín gə́, mə́ bàà gá.»
Bít nɛ́b sáànmbə̀ oò bəd kóólé, ìì bàà bəd nwɔŋ luùm nə́ŋ̀ní rə ní.
Yéésù tə́ Vɛnɛ́b nyɛɛ̀m zɔ̀ŋ aa bə̀ dɛ̀d Getsemane rə ba
(Markus 14.32-42; Luka 22.39-46)
36Kàanyée gə́, Yéésù ɛ̀m kə̀ nɛ́b sáànmbə̀ oò bəd tá, zɔ̀ŋ aa bə̀ dɛ̀d Getsemane rə ba, bít bàà bə̀: «Ìì kùm zɔ̀ŋə, bɔ̀b mə́ tə́ Vɛnɛ́b dáàn nyɛɛ̀m dú zɔ̀ŋə géú!»
37Bít pà' Piyɛr, kə̀ Zebede yɛb vɔ̀ɔ̀m bəraa iirə rə tá; pìì tɛ́m nwuukè kiìnmbə̀ kə̀ tɛ́m nyágə́lke tá. 38Yéésù bàà bə̀ kə̀ aakíin: «Tɛ́m dìg mə́ tə́ val bìá; ìì kùm zɔ̀ŋə ní kə̀ máá tá, ìì ləə ləəm sí.»
39Zá' ɛ̀m gbad númú zɔ̀gɔ̀ gə́, dá pí' wúb núù yɛ́b ba, bít nyɛ̀m Vɛnɛ́b kə̀ aakíin: «Báá mə́ra, dáà dákíìn ma'míìn gə́, pà' ǹ àà búúd magə̀wà nwuukè aa yée zɔ̀ŋ bùúd kə̀ máára. Sɛŋ gə́ kóólé, oò ma'míìn kìínmbə̀ aa mə́ í' rə kíin sí, zá kə̀ aa tɛ́m ámbə̀ í' rə kíin.»
40Bít kidbírà nɛ́b sáànmbə̀ oò bəd sunú, yaà bɔ̀b bə̀ ləəmú. Dɛ̀d Piyɛr: «Kə̀ aakíin də, íí bán kuùm nwáànmbə̀ kə̀ máá tə́ ba'wà nə́ŋ̀ní gá wa? 41Yid ìì lɛ́' si' sí, bít ìì nyɛ̀m Vɛnɛ́b, bɔ̀b ìì pìì inzááke rú sí. Nɛ́ŋə̀ nwul gə́, nyìì tə́ kə̀ insɔ̀ɔ̀n ma'ǹmbìá, zá si' oò gə́, kə̀ kpɛŋsɛ́l naà sé.»
42Zá' gbad zɔ̀ŋ bùúd kə̀ boò sɛŋ iirúb də sɔ̀ŋ gə́, bít dáá nyɛ̀m Vɛnɛ́b kə̀ aakíin: «Báá mə́ra, dáà búúd magə̀wà nwuukè aa pà' bə̀ dákíìn zá'nàá, máà nyəəù sí gə́, m̀ mà' kə̀ nɛɛ̀n aa tɛ́m ámbə̀ í' rə kíin.»
43Kidbírà sɔ̀ŋ, yaà bɔ̀b bə̀ ləəmú. Kə̀ aakíin də, ləəm núù kò' bə̀ yàá. 44Yéésù zá' dàà bə̀ sɔ̀ŋ, bít ɛ̀m gbad dá nyɛ̀m Vɛnɛ́b sɛŋ toorə oò roó, bàà nwɔŋ luùm nə́ŋ̀ní rə ní. 45Bítsɔ̀ŋ, zá' kidbírà nɛ́b sáànmbə̀ oò bəd sunú, bàà bə̀: «Bə́ŋyée gə́, íí nɛ́b ləəm bə̀ ləə̀n bərá, ləə íí tə́ kíìn nyi'nì? Ìì ɛ̀ga, sɛŋ wə́ə́ yàá, bít bə̀ dá nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə kíìn ko'ǹ lɛ́bm̀ nɛ́b vaksə́ bəd naú. 46Ìì zá' lɛgú, báà ɛɛ̀m kúnú! Ìì ɛ̀g núùá, màn aa lɛ́b mə́ rə, wə́ə́ yàá!»
Nɛɛ̀n aa bə̀ kò' Yéésù rú roó
(Markus 14.43-50; Luka 22.47-53; Yohana 18.3-12)
47Zɔ̀ŋ aa bə́ŋ̀ Yéésù tə́ nwɔŋ gáàm kàangə́, nɛ́ŋə̀ nə́ŋ̀ nɛ́b sáànmbə̀ oò bəraa kób zè iirə rə tə́ŋú, bə̀ dɛ̀rə̀ Yudas, yaà wə́ə́ kə̀ nɛ́b zùúm bəd tá, bə̀ kò'à yɛ́rə̀ bùúd bəd naú, kə̀ gbà' bəd tá. Láŋsə́ gààd bəd tùm bà sə̀n kə̀ Yahudu bəd dam bəd tá. 48Yudas, màn aa dá lɛ́bà Yéésù rə, ì'à nɛ́b zùúm bəd, nɛɛ̀n aa bə̀ dá ma'ǹ dú, bə̀ dá kə̀ Yéésù gabm̀ doó. Bàà bə̀: «Màn aa yaà mə́ kú'ù naà rə, oòra kùmsə̀n màn aa íí í' roó. Ìì kò'ù kúnú!» 49Kə̀ nwɔŋ aa nuù yée kíinní, Yudas gbad yaà wə́ə́ Yéésù sunú, bít bààù: «Mə́ dɔ̀m m nwɔŋá, Nɛ̀ná!»
Bít kú'ù naú. 50Yéésù kè' í', bààù: «Ɔ̀dzéd mə́ra, in aa ń yaà ma'ǹmbə̀ rə, m̀ mà' taà ní, kə̀ báŋ báŋ.»
Kàanyée gə́, nɛ́b kambəd ɛ̀m bə̀ gbara taà Yéésù sunú, yaà bə̀ pigə̀ taà nɛɛ̀n ba, bə̀ kò'ù taá. 51Nɛ́ŋə̀ nə́ŋ̀, nɛ́b aa kə̀ Yéésù tə́ rə tə́ŋú, sɔ̀m yɛ́rə̀ bùúd oòra, dùb və̀d láŋsə́ gààd gbà'á nɛ́d tù' bə̀ ma'ǹ túŋá. 52Yéésù bààù: «Bídǹ páá yɛ́rə̀ bùúd ń də sɔ̀gú. Kə̀ aakíin də, nɛ́ŋə̀ aa nə́' nə́gə̀d kə̀ yɛ́rə̀ bùúd də, oò kɔ̀ bə̀ dáù lo'ǹ kə̀ yɛ́rə̀ bùúrá. 53Gabm̀bə̀ má kíìn báàn Báá mə́ dɛdǹmbə̀, yaà oò láŋ mə́ bə kə̀ nə́gə̀rá, bít kə̀ nwɔŋ aa nuù yée kíinní, dá máà malaika sóózè bəd tuùmmà gə̀b kób zè iirə rə, íí gàb sínì? 54Zá ééleè nwɔŋ bəraa Vɛnɛ́b bàà dàà Núúboòd Gìdń bərú, in aarə oò taà kə̀ aakíin də, dá taà ma'míìn gú?»
55Sɛŋ də bərə, Yéésù bàà nɛ́b zùúm bəd: «Íí ɛ̀mà kə̀ yɛ́rə̀ bùúd bərá, bít kə̀ gbà' bərá, máá bə̀ yaàn ko'ǹmbə̀ kìínmbə̀ lííro nə́ŋ̀ kíniì? Sɛŋ gə́ kóólé, mə́ kùm láŋsə́ wúuú, mə́ tə́ nɛ́b bəd in sánàá, bít íí kò' mə́ sé. 56Zá in aarə kóólé, wə́ə́ ma'ǹmbə̀ kə̀ aakíin də, bɔ̀b nwɔŋ aa Vɛnɛ́b gbantumsə̀ bəd, bád ìì dàà núúboòd bərú rə, oò ma'míìn kúnú.»
Kàanyée gə́, nɛ́b sáànmbə̀ bəd kóólé lɛ́' ìì dààù, bít nùù bə̀ ɛ̀m kúnú.
Yéésù tə́ wálke nɛ́b gbàád Yahudu bəd bə̀ númú
(Markus 14.53-65; Luka 22.54-55, 63-71; Yohana 18.13-14, 19-24)
57Nɛ́b aa ìì kò'à Yéésù rə, ìì ààù láŋsə́ gààd gbà'á Kaifa kàrú, zɔ̀ŋ aa nɛ̀n indaŋ̀mbə̀ bəd kə̀ Yahudu bəd dam bəd tá, ìì wál bəroó. 58Piyɛr dìì zɔ̀ŋ bùúd ba, bàg taà Yéésù ra, yaà wə́ə́ láŋsə́ gààd gbà'á walə́ zé; bít pìì yaà kùm nɛ́b tù' bə̀ ma'ǹ bəraa wərə̀ rə tə́ŋú. Bəǹ dá nɛɛ̀n aa in bəd dá taàn bɛ́dǹ dú rə bé'ǹ sína.
59 Láŋsə́ gààd gbàád bəd, kə̀ dam bəd wálke gbà'á tə́ kóólé, bə̀ sàà nɛ́ŋə̀ aa dá sedako gúsuúm bə̀ ma'ǹ Yéésù yílú, dá də́ŋ̀ oò bə̀ ko'ǹ lo'ǹmbə̀ roó. 60Zá kóó kə̀ sedako gúsuúm bə̀ zùúm bəraa bə̀ yaà rə tə́ kóólé, ìì bɔ̀b gúsuúm nwɔŋ aa dáù də́ŋ̀ ko'ǹ lo'ǹmbə̀ rə sé. Bɛ́dke oòrə, sedako gúsuúm bə̀ bəd boò iira, bə̀ bàà: 61«Màn aa yée bàà: ‹Má kíìn báàn láŋsə́ wúl zibm̀ wɔbm̀bìá, bít wə̀' máù dí'ǹ lɛgú, sɛŋ toorə ní.› »
62 Láŋsə́ gààd gbà'á zá' dìì lɛgú, bít dɛ̀d Yéésù: «Ń kə̀ nwɔŋ nə́ŋ̀má ke'ǹ í'ǹmbə̀ nwɔŋ bəraa bə̀ gám ám yílə́ yée bə sínì?»
63Zá Yéésù kè' í' nwɔŋ naà sé, kùm dìímsə̀ní. Bít láŋsə́ gààd gbà'á kè' í' bààù: «Mə́ tə́ən kíìn dɛràá, Vɛnɛ́b galə̀ nə́gə́lú, m̀ bàà bə́ kúnú, ń tə́ sə̀n Vɛnɛ́b Wàá, Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə gə́ roó.»
64Yéésù kè' í'ù, bàà: «Ámda ń bàà sìní. Zá mə́ tə́ ii kíìn baanàá' Sɔ̀d bə́ŋyóo, íí dá nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə bé'ǹ, dá kuùm Vɛnɛ́b kpɛŋsɛ́l bə̀ nɛɛ̀n váànú, bít dáà ɛɛ̀mmà kə̀ zààmú, lɛg ba.»
65Kàanyée gə́, láŋsə́ gààd gbà'á kò' sèl gɔ̀' oò bərá, bít bàà: «Gám nwɔŋ vaksə́ tə́ Vɛnɛ́b yílú' Bə́ í' sedako ɔ̀d sɔ̀ŋ sé! Ìì ɛ̀ga, bə́ŋyée íí kìì nwɔŋ vaksə́ aa gám Vɛnɛ́b yílə́ rə yàá. 66Íí sèl tə́ leè gú?»
Kè' bə̀ í' bəd, ìì bàà: «Ogə́, mà' invaksə́ yàá, bít də́ŋì oò bə̀ lo'ǹmbìá.»
67Bítsɔ̀ŋ, bə̀ tólə̀ sudn bəd núùrú, bə̀ də̀'ù kə̀ nɛɛ̀n gíìná, bít bə̀ tàŋ̀ nɛɛ̀n kàd bərá, 68ìì bàà: «Nɛ́ŋə̀ aa Vɛnɛ́b tɔ̀bmmà gààd kílə́m yílə́ roó, nɛ́ɛ̀réè zìb m sə̀n gú? Sèl ǹ gàb kúnú!»
Piyɛr bàà bəǹ gàb Yéésù sé
(Markus 14.66-72; Luka 22.56-62; Yohana 18.15-18, 25-27)
69Piyɛr kùm gbaarú, walú. Láŋsə́ gààd gbà'á nɛ́d tù' bə̀ ma'ǹ kéèndo nə́ŋ̀ ɛ̀m gbarà oò sunú, bààù: «Ám kɔ̀ ń kùmà kə̀ Yéésù nɛ́d Galili bə̀ tá.»
70Zá Piyɛr gə́, sɔ̀ɔ̀n bée nɛ́b zùúm númú kóólé, bít bàà: «Mə́ gàb nwɔŋ aa ń í' baànmbə̀ rú wərə̀ rə sé.»
71Zɔ̀ŋ aa ɛ̀m tə́ bidǹ ligə̀ waàl bə yéení, nɛ́d tù' bə̀ ma'ǹ kéèndo ɔ̀d nə́ŋ̀ yaà bé'ù yàá, bít bàà nɛ́b bəraa kùm wərə̀ rə: «Màn aa yée, oò kɔ̀ kùmà kə̀ Yéésù Nazaratu bə̀ tá.»
72Piyɛr dìì sɔ̀ɔ̀nmbə̀ ní, bàà: «Mə́ nwɔ̀m in yàá, mə́ gàb nɛ́ŋ váàndo aa yée sé.»
73Sɛŋ zɔ̀gɔ̀ gə́, nɛ́b aa ìì kùm wərə̀ rə, ɛ̀m ìì gbarà Piyɛr səǹ gə́, ìì bààù: «Vɛ́nà, ám kɔ̀ ń tə́ nɛ́b aa yée tə́ŋú' kə̀ aakíin də, nɛɛ̀n aa ń tə́ nwɔŋ gáàm dú yérə, bə́ gàb taà zɔ̀ŋ aa ń vúgà bəroó.»
74Kàanyée gə́, Piyɛr zá' pìì sɔ̀ɔ̀nmbìá, bàà: «Vɛnɛ́b oò dú' mə́ laarú, mə́ gám tə́ gúsuúm gə́ roó! Mə́ nwɔ̀m in yàá, mə́ gàb Nɛ́ŋ Váàndo aa yée sé!» Kə̀ nwɔŋ aa nuù yée kíinní, kòòváàn nə́ŋ̀ nwɔ̀m yàá. 75Bít zɔ̀ŋ aarə ba, Piyɛr sèlzá' taà nwɔŋ aa Yéésù bààùwà roó: «Bə́ŋ̀ kòòváàn dá nwɔɔ̀m gə́, ń dá sɔ̀ɔ̀n sɛŋ toora, bəǹ gàb mə́ sé.» Bít vúgà wərə̀ gə́, ɛ̀m dá kpə̀ə̀ kpə̀ə́ǹ tɛ́m yɛ̀ɛ́l bìá.
Currently Selected:
Mata 26: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
