Cenisihs 21
21
Aaisik Kiinihtaawikitc
1KaaTipenciketc tepwe okii shawenimaan Serawan (Sarah), ekii ishihciketc kaakii ishi ahshotamawaatc. 2#Heb 11.11. Tepwe tahsh Sera kiihkikishkawaawahso, ekii nihtaawiki'aatc keokosihsinitc Eparahaaman (Abraham) aanawiin ekiih kihci aya'aawinitc. A'a tahsh kwiiwisenhs mayaa kiinihtaawiki ahpii Kishemanitoon kaakii ihkitonitc. 3Eparahaam tahsh Aaisik (Isaac) okii ishinihkaanaan ini okosihsan kaakii nihtaawikihtamaakotc wiiwan Serawan. 4#Gen 17.12; Act 7.8. Miitahsh kaaishi kihkinawaatashakeshwaatc ini okosihsan Aaisikoon ahpii kaanihshwaahsokonakisinitc (8), ekii ishihciketc Kishemanitoon kaakii'ikotc. 5Eparahaam tahsh ninkotwaahk kiihtahso pipoonwe ahpii Aaisikoon kiinihtaawikinitc. 6Sera tahsh kii‑ihkito, “Kishemanitoo hsa ninkiih piitamaak keonci minwentamowak, keonci paahpiwak kaye. Kahkina hsa awiya kenoontank kaakii ishihsewak ninka wiici paahpiimik.” 7Miitahsh kaye kaa‑ani ihkitotc, “Kaanika awekwen kekii'inaakopanen Eparahaaman, ‘Sera cinooni'aatc apinoonciisha'.’ Shaakooc itahsh tepwe nintayaawimaan keokosihsitc aanawiin eahkiwensiiwitc,” kii‑ihkito.
8A'a tahsh kwiiwisenhs kiiani maaciiki, kaye ekiih pooni noonitc, miihsh i'i ahpii Eparahaam kaakii kihci wiihkwanketc.
Hekaar, Ishmeyal Kaye Ninkoci Kii'ishinisha'ontwaa
9Sera (Sarah) tahsh okii waapamaan ini kwiiwisenhsan Ishmeyalwan (Ishmael) emihkincii'aanitc okosihsan Aaisikoon (Isaac). Ishmeyalwan iitok kiiomaamaawan Iicipiiwihkwen Hekaaroon (Hagar), Eparahaamink (Abraham) kaakii ontinaanitc. 10#Gal 4.29,30. Miihsh o'o kaa'inaatc Eparahaaman, “Taka inkoci ishinisha'o wa'a pemiihtaaketc ihkwe, ini kaye okosihsan. Wa'a hsa pemiihtaaketc ihkwe okosihsan kaawiin wiihkaa ninantawenimimaahsiin ciwiitoohkaasonitc kiwenootisiwinink Aaisik keni tepinank,” okii'inaan. 11Eparahaam tahsh kaawiin aahpici o'o okii minwaapantansiin aaniihsh Ishmeyalwan kaye kiiokosihsi. 12#Rom 9.7; Heb 11.18. Kishemanitoon tahsh Eparahaam okii'ikoon, “Keko onci mikoshkaatentanken a'a onci kwiiwisenhs, a'a kaye kipamiihtaakanihkwem. Ishihcikew Sera aaniin iko enihk. Aaisikonk ohsha taonciiwak kipiiwesiimak kaakii ahshotamawinaan. 13A'a tahsh kaye kipamiihtaakanihkwem okosihsan ninka ishi'imaan ciani paahtiinonitc opiiwesiima', aaniihsh kiin a'a kikosihs,” okii'ikoon.
14Wiipa tahsh kikishep Eparahaam okii miinaan Hekaaroon miicim, pashkwekino nipiiwash emooshkinepiinik kaye. Miihsh kaaishi pihciwane'aatc ekii maacinisha'waatc ini kaye okosihsini. Miitahsh kaaishi maacaanitc ekiih papaami ayaanitc pikwatahkamik Piiarshiipa (Beersheba) kaa'icikaatenik. 15Ahpii tahsh kaahcaakihsenik nipi i'imaa pashkwekino nipiiwashink, Hekaar shekopakaank okii ishi nakanaan ini oshkiniikiinhsan. 16Miitahsh kaaishi nakanaatc ekii awi namatapitc pehsho kaakii ina'enk minihk ehpimocikenk. O'o tahsh kii‑ihkito, “Kaawiin nintaa kashkihtoohsiin cikanawaapamak ninkosihs cinipotc.” Enamatapitc tahsh pehsho, mii 'i kaaishi maacii mawitc.
17Kishemanitoon tahsh okii noontawaani oshkiniikiinhsan emawinitc. Kishemanitoon otencalimini tahsh kihci kiishikonk Hekaar okii onci kanoonikoon ekii'ikotc, “Hekaar aaniin eshiwepisiyan? Keko kohtaacihken, kaaTipenciketc ohsha onoontawaan emawinitc ini oshkiniikiinhsan. 18Wanishkaan, otaahpin a'a oshkiniikiinhs, sakinihken, ninka ishi'aa hsa cini kihci inentaakositc ciani paahtiinonitc opiiwesiima',” okii'ikoon. 19Kishemanitoon okii ishi'ikoon ciwaapantank onta'ipaan. Miitahsh kaaishi mooshkinepatootc pashkwekino nipiiwash ekii mina'aatc ini oshkiniikiinhsan. 20Kishemanitoon tahsh pehsho okii wiiciiwikoon a'a oshkiniikiinhs eompikitc. Pikwatahkamik tahsh kiiayintaa, pimocikewinini tahsh kiihtinowi. 21Mekwaa tahsh pikwatahkamik Peran (Paran) kaa'icikaatenik eayaatc, omaamaan Iicipahkiink (Egypt) okii ontinaani kewiiwitc.
Eparahaam, Apimelehkoon Kii'ahshotamaatiwaatc
22 #
Gen 26.26. Eani ayishihsenik tahsh Apimelehkoon (Abimelech) okiih pi naasihkaakoon Eparahaam (Abraham) ekiih pi wiiciiwaanitc kaatipenimaanitc oshimaakanihshiima' Paaihkol (Phicol) eishinihkaasonitc ekii'ikotc, “Kishemanitoo kiwiiciiwik kahkina kekoon kaaishihcikeyan. 23Ahpimon tahsh noonkom o'omaa enaahsamiitc Kishemanitoo cikii wayeshimihsiwan, niniicaanihsak kaye iki nimpiiwesiimak. Waapanta'ihshin itahsh, naakohtoon kaye o'omaa ahkiink noonkom kaashi piiwitewentaakosiyan ciminotootawiyan taapishkoo kaashi minotootawinaan,” okii'ikoon.
24Eparahaam tahsh okii'inaan, “Mii 'iwe eshi ahpimoyaan.”
25Eparahaam okii onci kihci kakanoonaan Apimelehkoon i'i onta'ipaan kaakii mahkantwenitc otanohkii'aakanini. 26O'o tahsh Apimelehkoon okii'ikoon, “Kaawiin ninkihkenimaahsii awenen o'o kaaishihcikekwen! Kaawiin kikii wiintamawihsii, miitahsh i'i payesh noonkom kaakiishikahk o'o enoontamaan,” okii'ikoon. 27Eparahaam tahsh okiih piinaa' maanahcaanihsha', pishihkiwa' kaye ekii miinaatc Apimelehkoon. Miitahsh i'i iki niishin ininiwak kaakii ahshotamaatiwaatc. 28Pahkaan tahsh niishwaahso (7) noonshe maanahcaanihshenhsa' okii oshi pakitinaa'. 29Apimelehkoon tahsh okii'ikoon, “Aaniin tahsh enwaanatwaa iki niishwaahso (7) noonshe maanahcaanihshenhsak pahkaan kaapakitinatwaa cinishihke ayaawaatc,” okii'ikoon.
30Eparahaam tahsh o'o okii'inaan, “Otaahpin oko niishwaahso (7) noonshe maanahcaanihshenhsak kaamiininaan, miitahsh kiin eihkitoyan niin ekii waanihkaatamaan o'o onta'ipaan,” okii'inaan. 31Piiarshiipa (Beersheba)#21.31 Piiarshiipa (Beersheba): I'iwe Piiarshiipa kaa'icikaatek ahshotamaatiwi onta'ipaan, mii 'iwe enihtaakwaninik kaaishikiishwewaatc. tahsh okii ishinihkaataan i'imaa, aaniihsh mii 'imaa minciniish kaakii ishi ahpimowaatc.
32Kaaishkwaa ahshotamaatiwaatc itahsh i'imaa Piiarshiipa (Beersheba); Apimelehkoon, ini kaye Paaihkolwan kaatipenimaanitc oshimaakanihshiimini kiiani maacaawa' ekii ishi kiiwenitc Pilistiyawahkiink (Philistine). 33Eparahaam tahsh okii kihtikaanaan mihtikoon taamarisk (tamarisk) eshinihkaasonitc i'imaa Piiarshiipa ecikaatenik. Miitahsh i'imaa kaaishi anami'ehtawaatc kaaTipencikenitc, Kaanehpici Kishemanitoowinitc. 34Eparahaam tahsh kinwesh kiiayaa i'imaa Pilistiyawahkiink.
Currently Selected:
Cenisihs 21: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
