Cenisihs 26
26
Aaisik Kii'ishitaatc Kiiraar
1Miinawaa hsa kaawiin kiiayaahsinoon miicim i'imaa ahkiink kaakii ishiwepahkipan otaanaank mekwaa Eparahaam kiipimaatisitc. Mii hsa Aaisik (Isaac) kaakii ishaatc Pilistiya (Philistine) kaaonciinitc okihciokimaamini Apimelehk eshinihkaasonitc eshi'ayaanitc ootenaank Kiiraar (Gerar). 2KaaTipencikenitc hsa okii naakosiihtaakoon Aaisik ekii'ikotc, “Keko weti Iicipahkiink (Egypt) ishaahken. Aanti hsa piko ke'ininaan keishi'ayaayan, mii 'imaa keishitaayan. 3#Gen 22.16-18. O'omaa hsa ahkiink kika ayaa. Kika wiiciiwin, kaye tahsh kika shawenimin. O'ohsa ahki kika miinin kahkina kaye iki kipiiwesiimak nimiinaak. Taapishkoo hsa kaakii ishi kanawentamowak Eparahaam kaakii inahshotamawakipan, mii hsa peshikwan keishihcikehtamawinaan. 4Kaye tahsh kika tootawin ciani paahtiinowaatc kipiiwesiimak citahshiwaatc taapishkoo kaatahshiwaatc wanankohshak kiishikonk eyaawaatc. Ninka miinaak hsa o'o misiwehkamik iki kipiiwesiimak. Kahkina hsa pemaatisiwaatc o'omaa ahkiink ninka kakwecimikook ci‑ishi shawenimakwaa taapishkoo keshi shawenimakwaa kipiiwesiimak. 5Kika shawenimin hsa kekiin aaniihsh Eparahaam ninkii na'ihtaak ekiih tootank kaakii ishi antawenimak, kaye tahsh ekiih kanawentank kahkina nintinaahkonikewinan,” okii'ikoon.
6Miihsh i'imaa Aaisik ootenaank Kiiraar kaa‑ayaatc. 7#Gen 12.13; 20.2. Ahpii hsa ininiwa' ehkakwecimikotc onci wiiwan mii hsa kaa'inaatc eotawemaatc. Aaniihsh kiinaniisaanentam cinihsintc kiishpin ihkitotc Oripehkawan (Rebekah) iinsan ewiiwitc. Wiinke iitok kiihtetako minonaakosi a'a Oripehka. 8Naanaake hsa tahsh eani ayishihsenik kinweshiihsh iko i'imaa kaa‑ayaanitc Aaisikoon, Pilistiya onci kihciokimaa kiipahpaapi waahsehcikanink. Miihsh kaakii waapamaatc Aaisikoon, ini kaye wiiwini Oripehkawan eminwenintinitc. 9Shemaak itahsh Apimelehk okiih kanoonaan Aaisikoon ekii'inaatc, “Tepwe iinsan kiwiiw a'a ihkwe. Wekonen itahsh kaaonci ihkitoyan eotawemaayan a'a ihkwe?”
Miihsh o'o Aaisik kaaishi nahkwehtank, “Mii hsa 'i kaainentamaan cionci nihsikooyaan a'a ihkwe.”
10Apimelehk hsa tahsh o'o kii‑ihkito, “Aaniin itahsh inaa kaaishihcikeyan. Inashke peshik nintininiim pisaan kaawiihpemaakwen kiwiiwan, kiin itahsh iinsan kitaa anaamentaakosi'inaam.” 11Miihsh Apimelehk kaa'inaatc kahkina opimaatisiima', “Awenen hsa ko kemaanshi tootawaatc ono ininiwan, ini kaye wiiwini, mii hsa awe kenihsintc.”
12Aaisik hsa kiikihtike i'imaa ahkiink. Peshikwan itahsh eniipininik ninkotwaahk (100) awahshime kaakiih kihtikehpan minihk kiimanishike, aaniihsh kaaTipencikenitc i'i nahke okii ishi shawenimikoon. 13Wiinke hsa ko kiiani minohse, kaye tahsh wiinke kiiani wiinke wenootisi. 14Aahpici hsa ehpaahtiino'aatc maanahcaanihsha', pahkaan kaye awahkaana', kaye tahsh anohkii'aakana', mii hsa 'i kaakii onci ayaashenimikotc i'i Pilistiya ahkiink kaaonciinitc. 15Miihsh kaahtootaakotc ekii mooshkinahtoonitc onta'ipaanan otetepaniin Eparahaaman otanohkii'aakanini kaakii waanihkaanotaminikopanen mekwaa otetepaniin kiipimaatisinitc.
16Miitahsh Apimelehk kaa'inaatc Aaisikoon, “Taka o'omaa nintahkiiminaanink onci maacaan. Onsaam kiin nawac kimashkawentaakos ahpiihc niinawint ehpiihtentaakosiyaank,” okii'ikoon. 17Miitahsh Aaisik kaaishi maacii kositc ekii ishi kapehshitc pahsatinaank Kiiraar (Gerar) eshinihkaatenik. Kinwesh itahsh i'imaa kii‑ishitaa. 18Miihsh kaakiih kiiwe waanihkaatank ini onta'ipaanan otetepaniin Eparahaaman kaakii waanihkaataminikopanen. Miiwan iitok ini Pilistiya kaaonciinitc kaakii mooshkinahtoonitc kii‑ishkwaa pimaatisinitc Eparahaaman, ahkamik hsa ekii aapacihtoonitc. Peshikwan hsa okii ishinihkaataanan ini onta'ipaanan kaakii ishinihkaataminitc otetepaniin.
19Aaisik hsa tahsh otanohkii'aakana' kiiwaanihkewa'. Miihsh kaakii mihkwaanihkaataminitc niipiwa' nipi. 20I'i hsa tahsh ininiwa' Kiiraar wenciinitc neyaakaci'aanitc awahkaana' kiionci kihci kaakiikitowa' ekii kiihkaamaanitc Aaisik otooshkiniikiima', ekii ihkitonitc, “Niinawint iitok i'i ninipiiminaan.” Miihsh Aaisik kaakii ishi wiintak i'i onta'ipaanini, “Kiihkaantiwin,” ekii ishinihkaantank aaniihsh kiionci kiihkaamaawak i'i nipiini.
21Miinawaa tahsh Aaisik otanohkii'aakana' kiiwaanihkewa'. Miihsh kaaishi mihkaminitc nipiini. Miitahsh peshikwan kaahtootawimintc otininiima'. “Miikaanikoowin,” itahsh okii ishinihkaatan i'i onta'ipaan. 22Kiionci kosi tahsh i'imaa miinawaa ekii waanihketc ekii mihkank nipiini. Kaawiin itahsh awiyan okii onci kiihkaamikohsiin. “Tawihshkaakoowin,” hsa okii ishinihkaataan i'i onta'ipaan. Miihsh kaaihkitotc, “Mii hsa 'i kaaTipenciketc ehtawinamawinank ciminohsewankitc o'omaa ahkiink.”
23Piiarshiipa (Beersheba) hsa tahsh inahke kii‑ishi kosi. 24I'i ehtipihkaninik itahsh okii naakosiihtaakoon kaaTipencikenitc ekii'ikotc, “Niin hsa kitete Eparahaam oKishemanitooman. Keko sekisihken, kiwiiciiwin iitok. Kika shawenimin kaye ciani paahtiinowaatc kipiiwesiimak aaniihsh i'inahke kaaishi ahshotamawakipan Eparahaam,” okii'ikoon. 25Miitahsh Aaisik kaaishi onaapihkiniketc ekii anami'ehtawaatc kaaTipencikenitc. Miihsh i'i kaaishi kapehshitc. Otanohkii'aakana' kaye i'imaa okii antwaanihkaatamini nipiini.
Kaashi'ahshotamaatiwaatc Aaisik Shikwa Apimelehk
26 #
Gen 21.22. A'a hsa Apimelehk kiihpiishaa, ekiih pi wiiciiwikotc Ahaasaht (Ahuzzath) eshinihkaasonitc kaawiintamaakotc keni ishihciketc, ini kaye Paaihkol (Phicol) eshinihkaasonitc oshimaakanihshiiwikimaan ekiih pi anta waapamaatc Aaisikoon 27Miitahsh Aaisik kaaishi kakwecimaatc, “Wekonen itahsh wenci piishaayek ehpi waapamiyek? Kimaanshi wiiciiwim iitok, ninkoci ekii ishinisha'oyek?”
28Miihsh o'o kaaishi nahkwehtaakotc, “Ninkihkentaamin iitok kaaTipenciketc ewiiciiwihk, miitahsh kaainentamaank cikii ahshotamaatiyankipan ciwiiciintiyank, niinawint kekiin itahsh. Taka hsa ishi ahshotamaawishinaam 29cimiikaashihsiwaank, taapishkoo kaakiih tootaakooyan ekiih papaamenimikoohsiwan, weweni mooshak ekiih tootaakooyan, pisaan kaye weweni ekiih pakitinikooyan cini maacaayan. Tepwe hsa naakwan kaaTipenciketc ekiih shawenimihk,” okii'ikoo'. 30Miihsh Aaisik ekiih kwayaancihtootc miicim ekii ahshamaatc, ekii wiihsiniwaatc, ekii minihkwewaatc kaye. 31Wiipa hsa tahsh kikishep memeshkwac kiiaayiici ahshotamaatiwak i'i kaakii inentamowaatc aaniin inahke waaishi wiiciintiwaatc. Miihsh kaakiih pooshoo'aatc cini maacaanitc. Pisaan itahsh kiiani maacaawa'.
32I'i tahsh ehkiishikaninik Aaisik otanohkii'aakana' okiih pi wiintamaakoo' ekii antwaanihkaataminitc nipiini. Miihsh kaa'ikotc, “Nipi hsa ninkii mihkaamin,” okii'ikoo'. 33“Ahshotamaatiwin” hsa okii ishinihkaataan i'i onta'ipaan. Miitahsh Piiarshiipa (Beersheba) wenci ishinihkaatek i'i ootena keyaapi o'o ishi ahpii noonkom kaakiishikahk.
Iihswaa Wiiwa' Ehtashinsonitc
34Ahpii hsa Iihswaa (Esau) niimitana (40) ehtahso pipoonwetc kiiwiiwi niishin Heht (Heth) kaatinowinitc ihkwewa'. Cootaht (Judith) kii‑ishinihkaasowan ini peshik wetetenitc Pii'erii (Beeri). Ini tahsh kotak ihkwewan Paashimaht (Basemath) kii‑ishinihkaasowan wetetenitc Iilan (Elon). 35Miiwa' itahsh o'o Aaisik a'a kaye Oripehka (Rebekah) wiinke kaakii mikoshkaatentami'ikowaatc.
Currently Selected:
Cenisihs 26: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
