Cenisihs 37
37
Coosap, I'i Kaye Tipinawe Owiicihkiweya' Ehtashimintwaa
1Cekap (Jacob) tahsh kiiayintaa Kenan (Canaan) ahkiink kaakii nihtaa ishitaanitc otetepaniin. 2Miitahsh o'o enaacimimintc Cekap oniicaanihsa'. Coosap (Joseph) hsa kiimitaahshiniishwaahsopipoonwe i'i ahpii kiihkanawenimaatc maanahcaanihsha', i'i kaye maanatihkwa'. Wiicihkiweya' tahsh okii wiici'aa', kaakii okosihsimikonitc Silpawan (Zilpah), ini kaye Pilhawan (Bilhah) oteten otaanihke wiiwini. Coosap tahsh okii maanaacimaa' wiicihkiweya' ekii wiintamawaatc oteten aaniin kaaishihcikenitc
3Isriyal (Israel) tahsh nawac okiih shawenimaan Coosapoon ahpiihc wiin i'i kotak okosihsa' aaniihsh miiwanini kaakii ayaawaatc kiihkihci aya'aawitc. Okii oshihtamawaan tahsh kaye kashkiikiiwin pepahkaan kaakii ishinaakwaninik. 4Ahpii tahsh iki kotak wiicihkiweyimaak ekii waapamaawaatc Coosapoon nawac eshawenimikonitc otetewaan, miihsh kaaishi shiinkenimaawaatc, kaawiin kaye wiihkaa pisaan okiih kanoonaahsiwaawaan.
5Coosap tahsh kiihpawaacike. Ahpii tahsh kaawiintamawaatc wiicihkiweya' aaniin kaainaapantank, miihsh aanciihke kaaishi nishkenimikotc. 6Miitahsh kaa'inaatc wiicihkiweya', “Taka pisintamok kaawiintamawinakook aaniin kaainaapantamaan. 7Kiinawint iinsan kikii ayaamin mihshawahkamik ekii ohkwahpitooyank pahkweshikani mashkohsiin. Inashke tahsh niin kaakii ohkwahpitooyaan kiihpasikwiimakanoon, ekiih kwayahkokaapawiimakahkin iinsan. Ini tahsh wiin kiinawaa kaakii ohkwahpitooyek iinsan okii waakaashkaanaawaa kaakii ohkwahpitaawak ekii animihkohtaamakahkin.”
8Miitahsh kaa'ikotc wiicihkiweya', “Kitinentam ina tepwe ciokimaahkantawiyaank, citipenimiyaank kaye?” Miihsh aanciko kaakii ishi shiinkenimikotc opawaacikanink onci, aaniin kaakii inaacimotc.
9Inashke tahsh miinawaa Coosap kiihpawaacike. Miihsh miinawaa kaaishi wiintamawaatc wiicihkiweya' ekii'inaatc, “Ninkii ishi pawaacike, ekii waapamak kiisihs, tipihkikiisihs, mitaahshipeshik wanankohshak kaye ekiih pawaanakwaa ekii animihkohtaawaatc enaahsamiiwak,” okii'inaa'.
10Oteten tahsh kaye okii wiintamawaan aaniin kaainaapantank. Miitahsh kaaishi kihci nooci'ikotc ekii'ikotc, “Aaniin tahsh inaa piko 'i wenci inaapantaman, niinawint ina kimaamaa, kiicihkiweyak kaye kika pi naasihkaakoo cianimihkohtaayaank mihtahkamik enaahsamiiyan?” okii'ikoon. 11#Act 7.9. Wiicihkiweya' tahsh Coosap okii ayaashenimikoo'. Oteten tahsh okiih kihciwentamini kaakii ihkitotc.
Coosap Kiishi'ataawaakaasotc Iicipahkiink
12Aapitink ehkiishikaninik Coosap (Joseph) wiicihkiweya' kii‑ishaawa' Shiihkam (Shechem) ootenaank, ekii ishiwinaanitc oteteni otawahkaanini cianta wiihsininitc, 13Isriyal (Israel) tahsh okii'inaan Coosapoon, “Kinantawenimin hsa ci‑ishaayan Shiihkam kiicihkiweyak kaatashi naanaakaci'aawaatc awahkaana'.” Coosap tahsh kii‑ihkito, “Haw, ninka ishaa,” kii‑ihkito.
14Oteten tahsh okii'ikoon, “Maacaan anta waapam kiicihkiweyak, awahkaanak kaye taka eshihsewaakwen. Pikiiwehkan itahsh ciwiintamawiyan aaniin eshihsewaakwen.” I'imaa tahsh kaakii ishi pahsatinaanik Hiiparan (Hebron) kaakii ishinihkaatenik, okii onci maacinisha'okoon oteten.
Kiiani takohshink weti Shiihkam ootenaank, 15misiwe tahsh kiihpapaamohse i'imaa mihshawahkamik kekahpii ininiwan kiiwaapamaatc. Miihsh kaa'ikotc, “Wekonen nenaantawaapantaman?” ekii'ikotc.
16Coosap itahsh kii‑ihkito, “Niicihkiwensiwak hsa kaananaantawaapamakwaa. Taka wiintamawihshin aanti entashi ahshamaawaatc awahkaana',” okii'inaan. 17Ininiwan tahsh okii'ikoon, “Aasha ohsha omaa kiionci maacaawak, shaakooc tahsh ninkii noontawaak eihkitowaatc, ‘Taka Toohtan (Dothan) ootenaank ishaataa.’ ” Tepwe hsa mii weti kaaishi mihkawaatc.
18Niiyaak tahsh okii waapamikoo' wiicihkiweya' ehpinaakositc. Cipwaa tahsh otihsaatc aasha okii onenimikoo' ewii nihsikotc. 19Miitahsh kaaihkitonitc ehkakanoonitinitc, “Ina'awe kaanihtaa pawaaciketc kaapinaakositc! 20Taka tahsh ampeyohk, nihsaataa, kika piinciwepinaanaan itahsh i'imaa onta'ipaanink kaapaankwaninik, miitahsh keihkitoyank, ‘Aya'aawihshan okiih kiihkamikoon.’ Kika waapantamowaamin itahsh kaye aanti naa kaaishihsenikwenan opawaacikanan,” kii‑ihkitowa'.
21Oroopan (Reuben) itahsh okii noontawaa' ehkitonitc, ehkakwe naatamawaatc Coosapoon ekii ihkitotc, “Kaawiin iitok taishinaakwahsinoon cinihsahkipan.” 22Miihsh kaa‑ani ihkitotc, “Taka kaawiin kika nihsaahsiwaanaan, taka i'imaa ishi piinciwepinaataa onta'ipaanink kaashi paankwaninik o'omaa pikwacaya'ii, keko papaamenimaahkek,” kii‑ihkito. Kiihkiishaaci onentam iitok ewii wiici'aatc Coosapoon ewiih kiiwewinaakopanen kaye kaashi ayaanitc oteteni. 23Ahpii tahsh Coosapoon kaapi otihsikowaatc kaakii ishi'ayaawaatc, miihsh kaaishi kiihcihkonayepinaawaatc, ekii mahkamaawaatc kaye i'i okashkiikiiwinini pepahkaan kaakii ishinaakwaninik. 24Okii ishiwinaawaan tahsh onta'ipaanink kaakii ishi paankwaninik ekiih piinciwepinaawaatc.
25Mekwaa tahsh ewiihsiniwaatc kii‑inaapiwak. Miihsh kaakii waapamaawaatc Iishmeyal kaatinowinitc (Ishmaelites) ekii matwe ohko pimi ayaanitc ewiiciiwaanitc opihkwaawikane mihtatimoomini. Kiliyat (Gilead) ahkiink ekii onciinitc eishaanitc Iicipahkiink (Egypt), ekii anta ataawaakenitc takosehkwaanan (spices), shishopikiiwinan (balm), pikiwi minaako'onan (myrrh) kaye. 26Coota (Judah) tahsh okii'inaa' wiicihkiweya', “Kekoon ina kitaa ontisimin nihsank kishiimeshinaan, mihsawaa ko aana kaatooyank kitishihcikewininaan? 27Taka miinaataanik Iishmeyal kaatinowiwaatc ciayaawaawaatc ini kishiimeshinaanin, kaawiin iitok tahsh memwehc kiinawint kekoon kika tootawaahsiwaanaan. Tipinawe iitok a'a kiicihkiwenaan, kaashi owiiyawiyank, kaaishi miskwiiyank kaye kewiin ehtinowitc,” kii‑ihkito. I'i tahsh wiicihkiweya' Coota okiih pisintaakoo'. 28#Act 7.9. Miitahsh ahpii kaakiih pi takohshininitc Mitiyan (Midian) ahkiink onci ininiwa' kaakii onciinitc kaakiih papaamataawenitc. Iki tahsh wiicihkiweyimaak okiih kitaanihkaanenaawaan Coosapoon kaakii ishi'ayaanitc onta'ipaanink ekii ataawaakewaatc, niishtana waapaapihko shooniyaan ekii inakimaawaatc. Iishmeyal kaatinowiwaatc tahsh kiiataawewak Coosapoon ekii ishiwinaawaatc Iicipahkiink.
29Oroopan tahsh ahpii kaapi takohshink onta'ipaanink kaakii ishi'ayaanihpan Coosapoon, kaawiin i'imaa kiiayaahsiiwan. Miihsh kaaishi piikopitotc okikishkikanan ekii mincinawesitc. 30Miitahsh kaaishi kiiwe anta waapamaatc wiicihkiweya' ekii'inaatc, “Kaawiin hsa kishiimeshinaan weti ayaahsii. Aaniin tahsh niin keishihcikeyaan?” okii'inaa'.
31Iki tahsh wiicihkiweyimaak okii nihsaawaan ayaape maanatihkoonsan, omiskwiiminiink itahsh okii ishi cehkipiinaanaawaa Coosapoon okashkiikiiwinini pepahkaan kaakii ishinaakwaninik. 32Miitahsh kaaishi ishiwitamawaawaatc otetewaan i'i kashkiikiiwin ekii'inaawaatc, “Ninkii mihkaamin o'o, taka waapantan ciaawaninikwen kikosihs okashkiikiiwin, komaa kaye kaawiin aawansininiwitok,” ekii'inaawaatc. 33Isriyal (Israel) tahsh okii waapantaan, miihsh kaaihkitotc, “Eya', ninkosihs hsa o'o okashkiikiiwin, pikwaci aya'aawihshan okii amokotokenan, Coosap hsa kehcinaac kiihpiisipicikaniwi,” kii‑ihkito. 34Isriyal tahsh okiih taashkiikipitoonan kaakiih kikishkank ekii mincinawesitc, miihsh kaaishi pihsihkank ahsapiiwekinowayaan. Aahpici tahsh kinwesh okii mawimaan okosihsan. 35Kahkina tahsh okosihsa', kahkina kaye otaanihsa' okiih pi naasihkaakoo' ekiih kakwe minwentamo'ikotc, kaawiin tahsh okii antawentansiin cikakwe minwentamo'ikotc. Miitahsh kaaihkitotc, “Kehcinaac piinihsh ciotihtamaan keniin cinipoyaan ninka mawimaa ninkosihs.” Mii 'i tahsh aanciko kaaishi mawimaatc okosihsan Coosapoon.
36Miitahsh kaaishihsek, iki Mitiyan kaaonciiwaatc (Midianites) kii‑ishi ataawaakewak Coosapoon weti Iicipahkiink. A'a tahsh Paatiparan (Potiphar), kihciokimaa otaanihke shimaakanihshiiwikimaan kiiataawewan Coosapoon. Mii iitok a'a kaakii naanaakaci'aatc okanawencike'.
Currently Selected:
Cenisihs 37: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
