Cenisihs 4
4
Ken, Epal Ehtashimintwaa
1Aatam (Adam) tahsh okii wiihpemaan wiiwan Iip (Eve) eshinihkaasonitc. Miitahsh kaakii oniicaanihsinitc, kwiiwisenhsan ekii ayaawaanitc. Miitahsh Iip kaaihkitotc, “KaaTipenciketc hsa ninkii wiici'ik ciayaawimak kwiiwisenhsan.” Ken (Cain) tahsh okii ishinihkaanaan. 2Naanaake tahsh miinawaa kotak kwiiwisenhsan kiinihtaawikiwan wiicihkiweni, Epal (Abel) ekii ishinihkaanaatc. Epal okii naanaakaci'aa' maanahcaanihsha'. A'a tahsh wiin Ken kiikihtikewininiiwi. 3Naanaake tahsh eani ishihsenik Ken okiih piitoon kaakii nihtaawikihtootc okihtikewahkamikonk, ekiih pakitinamawaatc kaaTipencikenitc. 4#Heb 11.4. Epal tahsh kaye okiih pakitinamawaan kaaTipencikenitc, ekiih piinaatc maawac iko nihtam kaakii nihtaawikinitc maanahcaanihshenhsa' kaakii onciinitc omaanahcaanihshimink. Ekiih pakitinaatc maawac hsa piko eshi pimitewinitc. KaaTipenciketc hsa okii minwaapamaan Epalwan, okii minwaapantamawaan kaye kaakiih pakitinaminitc. 5KaaTipenciketc tahsh kaawiin okii minwaapamaahsiin Kenan, i'i kaye kaakiih pakitinamaakotc. Ken tahsh wiinke kiinishkaatisi, kiinihsitawinaakosi kaye ekii maanaapantank. 6KaaTipenciketc tahsh okii'inaan Kenan, “Wekonen wenci nishkaatisiyan, wekonen kaye wenci nishkinaakosiyan? 7Kiishpin kwayahk ishihcikeyan kitaa nakanikoon i'i kaashi maanaapantaman. Kiishpin tahsh kwayahk ishihcikehsiwan, macitootamowin ohsha ciikaya'ii kitahkamaakoon ciotihtinikoyan. Keko pakitinanken macitootamowin citipenimikoyan.”
8 #
Mat 23.35; Luk 11.51; 1Jn 3.12. Ken tahsh okii'inaan Epalwan wiicihkiweyan, “Taka weti ishaataa kihtikewinink.” Ahpii tahsh ekii ani ayaawaatc weti kihtikewinink, Ken okii otihtinaan Epalwan wiicihkiweyan ekii nihsaatc.
9KaaTipenciketc tahsh okii'inaan Kenan, “Aaniinti tahsh a'a Epal kiicihkiwensi?” Ken tahsh kii‑ishi nahkwehtam, “Kaawiin ninkihkenimaahsii aaniinti eyaakwen. Niin ina kekanawenimakipan niicihkiwensi?”
10 #
Heb 12.24. Miitahsh kaa'ikotc, “Aaniin tahsh kaaonci ishihcikeyan? Kiicihkiwensi ohsha omiskwiim kaakii oncikawininik, mihtahkamik ohsha nintonci kanoonikowaan. 11Noonkom tahsh ahkiink kitonci macakins, aaniihsh mii 'i eshinaakwahk i'i taapishkoo mihtahkamik ekii minihkwaatank kiicihkiwensi omiskwiim kaakii oncikawininik: kiin tahsh i'i kitishihcikewin. 12Ahpii tahsh kihtikeyan i'imaa kihtikewahkamikonk, kaawiin kekoon kika kashkihtoohsiin cinihtaawikihtooyan. Kiin kaye kika tinow awiya ninkoci kaaishitaahsik, misiwe ahkiink kika papaawawaanentam.”
13Ken tahsh okii'inaan kaaTipencikenitc, “O'owe kaashi nana'ahshiyan, wawiinke nisanakentaan cipimiwitooyaan. 14Inashke kaye noonkom kaakiishikahk ninkoci kitinaamohka'ish o'omaa kihtikewahkamikonk, ninkoci kaye kitinaamohka'ish o'omaa enaahsamiiyan. Niin tahsh kaawiin ninkoci ninka ishitaahsii, misiwe kaye ahkiink ninka papaawawaanentam. Awiyak hsa kaye kemihkawiwaatc pisaaniko ninka nihsikook.”
15KaaTipenciketc tahsh okii'inaan Kenan, “Kiishpin hsa awiya nihsihk, niishwaahcink minihk ninka ishi kiiwenamawaa ketootawihk.” KaaTipenciketc tahsh okii kihkinawaaci'aan Kenan keonci nihsaahsiwimintc awiyan nakishkaakonitc. 16Ken tahsh anoociko kiionci ishaa eshi'ayaanitc kaaTipencikenitc. Weti tahsh Naat (Nod) ahkiink kii‑ishi kapehshi, waapanonk inahke Iitin (Eden) kihtikewahkamikonk.
Ken Opiiwesiima' Ehtashimimintc
17Ken (Cain) tahsh okii wiihpemaan wiiwan, miihsh kaakii nihtaawiki'aanitc kwiiwisenhsan. Iinaahk (Enoch) tahsh okii ishinihkaanaawaan. Ken tahsh okii oshihtoon kihci ootena Iinaahk ekii ishinihkaatank eshinihkaasonitc okosihsan. 18Iinaahk (Enoch) tahsh kiiokosihsi Aairaatan (Irad); Aairaat tahsh kiiokosihsi Mehyoocelan (Mehujael); Mehyoocel tahsh kiiokosihsi Metooshaelwan (Methushael); Metooshael tahsh kiiokosihsi Lemehkoon (Lamech). 19Lemehk tahsh kiiniishiwa' (2) wiiwa'. Etah (Adah) peshik kii‑ishinihkaasowan, kotak tahsh Silah (Zillah). 20A'a tahsh ihkwe Etah okii nihtaawiki'aan Cepalwan (Jabal). Miiwan tahsh ini kaakii opiiwesiiminitc i'i pakwaanekamikonk kaakii ishitaanitc, kaakii ayaawaanitc kaye awahkaana'. 21Kaakii owiicihkiwenitc tahsh Coopal (Jubal) kii‑ishinihkaasowan. Miitahsh wiin ini opiiwesiimini kaakii nihtaa kitohcikenitc pootaacikanenhs, kihci metweyaapiikipicikaatenik kaye eaapacihtoonitc. 22A'a tahsh kewiin kotak ihkwe Silah okii nihtaawiki'aan kwiiwisenhsan Toopal Ken (Tubal Cain) eishinihkaasonitc. Miiwan tahsh ini osaawaapihkonk, piiwaapihkonk kaye kaakii onci oshihtoonitc aapacihcikanan. Otawemaan tahsh Neamah (Naamah) kii‑ishinihkaasowan. 23Lemehk tahsh o'o okii'inaa' wiiwa',
“Etah (Adah) kekiin tahsh Silah
kaawiiwiminakook, taka pisintawihshik!
Ninkii nihsaa inini aaniihsh ninkii maahki'ik,
kiioshkaatisi ninkii pahkite'ok.
24Kiishpin niishwaahso (7) awiyak cinihsintwaapan
enakintekwen Ken onci,
niishwaahsimitanashiniishwaahso (77) tahsh niin Lemehk
awiyak tanihsaawak kiishpin nihsikooyaan,”
kii‑ihkito.
Seht A'a Kaye Iinos Kiinihtaawikiwaatc
25Aatam (Adam) tahsh okii wiihpemaan wiiwan Iipan (Eve), miitahsh kaakii nihtaawiki'aanitc kwiiwisenhsan. Seht (Seth) tahsh okii ishinihkaanaawaan. Iip tahsh kii‑ihkito, “Kishemanitoo hsa nimiinik kotak kwiiwisenhsan cinaapi ayaanitc Epalwan (Abel) kaakii nihsikonitc Kenan (Cain),” kii‑ihkito. 26Seht tahsh kewiin kiiani okosihsi, Iinaash (Enosh) okii ishinihkaanaan. Miitahsh i'i ahpii awiyak pemaatisiwaatc kaakii maacihtaawaatc eaapacihtoowaatc kaaTipencikenitc owiinsowinini eanami'ehtawaawaatc.
Currently Selected:
Cenisihs 4: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
