Cwaan 14

Ciisahs cioncinaasihkawimintc ini Weyoohsimimintc

1“Keko wiin mikoshkaatentankek. Nashke tepweyenimihk Kishemanitoo. Kaye niin itahsh tepweyenimihshik. 2NinTete kaashiayaatc paahtiinatinoon ayaawinan. Amii ohsha e'animaacaayaan e'antakwayaancihtooyaan i'imaa keshiayaayek. Kaawiin ohsha kitaaishiwiintamawihsinooninim kiishpin o'owe ishinaakwahsinokipan. 3Paamaa kiimaacaayaan kiiawikwayaancihtooyaan keshiayaayek, ninkapikiiwe miinawaa cipiotaahpininakook. 'Imaa tahsh niin kaawii'ishiayaayaan, amii 'imaa kaye kiinawaa ciayaayek. 4Kikihkentaam iitok i'iwe keni‑ishaayek keni‑ishitakwihshinek weti niin kaawii'ishaayaan,” okii'inaa'.

5Twaamahsoon (Thomas) itahsh okii'ikoon: “Tepencikeyan, kaawiin ohsha ninkihkentansiimin kaawii'ishaayan. Aaniinti tahsh keoncikihkentamaank 'imaa keshitakwihshinaank?” okii'ikoon.

6Ciisahs itahsh okii'nahkwehtawaan: “Niin ohsha ishaawin. Niin tepwewin. Niin kaye pimaatisiwin. Niinehta awiya okaoncikashkihtoon ci‑ishaatc ini Weyoohsimimintc. 7Niin aasha ehkihkenimiyek, miitahsh i'imaa keoncikihkenimek a'a ninTete. Noonkom itahsh tepwe kimaaciikihkenimaawaa, aasha tahsh kikii'waapamaawaa.”

8Okii'ikoon itahsh Pilapoon (Philip): “Taka hsa waapanta'ihshinaam 'awe Weyoohsimintc, mii ehta 'i eshiantawentamaank.”

9'Owe tahsh okii'inaan: “Pilap, aasha ohsha mewisha kipionciwiiciiwininim. Keyaapi nahsh kaawiin kikihkenimihsii aweneniwiyaan? Awenen ihsa 'awe kaawaapamitc, owaapamaan Weyoohsimimintc. Aaniihshwiin wenci‑ihkitoyan, ‘Waapanta'ihshinaam Weyoohsimintc’? 10Kaawiin ina mahshi kitepwehtansii, maawac pehsho e'wiiciiwak a'a Weyoohsimintc, kaye wiin itahsh pehsho e'wiiciiwitc? Ini ihkitowinan kaakiihpi‑ishikanooninakook, kaawiin niin ini nintihkitowinan. A'awe ohsha Weyoohsimintc kaawiiciiwitc, wiin ohsha otootaanan tipinawe otanohkiiwinan. 11Tepwehtawihshik maawac pehsho e'wiiciiwak a'a Weyoohsimintc, kaye wiin peshikwan e'ishiwiiciiwitc. Kiishpin o'o ishitepwehtansiwek, taka kanake tepwehtamohk ono anohkiiwinan kaatootamowak. 12Tepwemakan o'o noonkom kaawiintamawinakook: awenen ketepweyenimitc, kewiin okatootaanan ini tino anohkiiwinan niin kaatootamaan. Ampooshke nawac wiin kehci‑inentaakwahkin okatootaanan, aaniihsh nintishaa 'iweti Weyoohsimintc kaaishiayaatc. 13Shikwa wekonen iko keshikakwetweyek niin niwiinsowinink, mii hsa ko 'iwe ketootamaan. Shikwa tahsh Weyoohsimintc taoncikihci‑inentaako'aa niin Kishemanitoo oKosihsan i'i ehtootamowak. 14Kiishpin kekoon iko ishikakwecimiyek niwiinsowinink, mii 'iwe ketootamaan.”

NinTete kikamiinikowaa otAhcaahkwan e'ihkitotc

15“Kiishpin saaki'iyek, kikakanawentaanaawaa kaaininakook,” okii'inaa'. 16“Niin tahsh ninkakanoonaa 'awe Weyoohsimintc, kikamiinikowaa tahsh kotak kepiwiici'inek, ahpan iko kewiiciiwinek wiihkaa kenakanihsinowek. 17Mii 'awe Ahcaahk kaawaapanta'iwetc i'i tepwewin eshikihkenimintc Kishemanitoo. Iki tahsh ahkiink kaa‑ayaawaatc kaawiin okakashkihtoohsiinaawaa ciotaahpinaawaatc ini Ahcaahkwan, kaawiin aaniihsh owaapamaahsiwaawaan kaye kaawiin okihkenimaahsiwaawaan. Kiinawaa tahsh wiin aasha kikihkenimimaawaan, aaniihsh mooshak iko kiwiiciiwikowaa kaye kikikishkaakowaa.

18“Ahpii maacaayaan kaawiin cikiiwahshishaaniwiyek inahke kikashinakanihsinooninim. Miinawaa ohsha kikapikiiwenotawininim. 19Acina piko keyaapi 'omaa ninka/⁠ayaa, miitahsh kaawiin miinawaa wiihkaa ninkawaapamikohsiik iki ahkiink kaa‑ayaawaatc. Kikawaapamim itahsh kiinawaa. Niin onci ehpimaatisiyaan, kekiinawaa kikapimaatisim. 20Paanimaa 'iwe ahpii kiishikahk kikakihkenimim pehsho e'wiiciiwak a'a ninTete, kaye kikakihkenintisom pehsho e'wiiciiwiyek, taapishkoo kaye niin pehsho e'wiiciiwinakook.

21“'Awe kaaotaahpinank kaaihkitoyaan kaye kaakanawentank ehtootank, amii ohsha 'awe siyaaki'itc. A'a tahsh siyaaki'itc osaaki'ikoon ninTeten, kaye niin itahsh ninkasaaki'aa, ninkakihkentamoonaa e'wiiciiwak,” okii'inaa'.

22Okiihkanoonikoon itahsh peshik ini Cootahsan (Judas). Kaawiin wiin a'a Iskeriyat (Iscariot) kaaishi‑ishkwenihkaasonitc. “Tepencikeyan,” okii'ikoon, “aaniin tahsh i'i kekii'ishikihkentamooshiyaank e'wiiciiwiyaank, iki tahsh ahkiink kaa‑ayaawaatc ciwaapamihsinohkwaa?” okii'ikoon.

23Ciisahs okii'nahkwehtawaan: “Awiya piko saaki'itc okakanawentaan ninkihkino'ikewinan citootank. NinTeten itahsh okasaaki'ikoon. Ninkapinaasihkawaanaan itahsh a'a kaasaaki'itc, ciwiiciayaamankitc kaye. 24A'a tahsh ekaa kaasaaki'ihsik kaawiin otootansiin eshikihkino'ikeyaan. Ono tahsh ninkihkino'ikewinan kaashinoontawiyek kaawiin niin ini nintihkitowinan; a'awe hsa ninTete kaakiihpiicinisha'otc, mii 'awe otihkitowinan kaa/⁠aapacihtaawak.

25“Amii 'owe kaawaawiintamawinakook mekwaa e'wiiciiwinakook. 26'Awe tahsh Owiici'iwe kahkina kekoon kikakihkino'amaakowaa. Kahkina kaye kekoon kikamaamihkawaasomikowaa kaakii'ishikakanooninakook. Mii 'awe Owiici'iwe, Kishemanitoo otAhcaahkwan, kepi‑ishinisha'waatc a'a ninTete, niwiinsowinink kepi‑ishinisha'amawinek.

27“Pisaanentamowin kinakatamawininim. Niin i'i nimpisaanentamowin kaamiininakook. Kaawiin wiin i'i kaashimiininakook kaashipisaani'itiwaatc o'omaa ahkiink. Keko tahsh mikoshkaatentankek, keko kaye sekisihkek. 28Kikii'noontawim kaakii'ininakook: ‘Nimaacaa, miinawaa tahsh kikapikiiwenotawininim,’ kikii'inininim. Kiishpin saaki'iyekipan, kitaakii'minwentaam e'ishaayaan a'a Weyoohsimintc. Wiin aaniihsh a'a Weyoohsimintc awahshime kihci‑inentaakosi ahpiihc niin. 29Aasha ohsha noonkom kikii'wiintamawininim cipwaa ocihcihsek, ahpii tahsh iko ocihcihsek, citepwehtamek. 30Kaawiin aahpici kinwesh keyaapi kikakanoonihsinooninim. Aaniihsh pitakwihshin a'a kaaokimaahkantank o'o ahkiini.#14.30 kaaokimaahkantank o'o ahkiini: waapantan 12.31. Kaawiin kekoon otayaahsiin niin i'imaa cioncitipenimitc. 31Ishinaakwan itahsh ahkiink cikihkentaakwahk ehsaaki'ak a'a Weyoohsimintc. Mii 'iwe wencitootamaan kahkina kekoon kaashikihkino'amawitc a'a Weyoohsimintc.

“Hawiyohk, mii 'i ishisaaka'antaa, ishimaacaataa!” kii'ihkito.

Currently Selected:

Cwaan 14: OJBR

Highlight

Copy