Lok 7

Kiiminwaaci'imintc Shimaakanihshiiwikimaa otanohkii'aakanan

(Matthew 8.5-13)

1Ahpii Ciisahs kaakii'ishkwaa wiintamawaatc kahkina onoweniwa' pemaatisinitc kii'ishaa Kaparniyamink (Capernaum) ootenaank. 2Kii'ayaakopan peshik shimaakanihshiiwikimaa#7.2 shimaakanihshiiwikimaa: mii 'awe shimaakanihshiiwikimaa kaakiih kanawenimaatc shimaakanihsha' Oroomink (Rome) kaaonciinitc. Miiwak iki kaakiih kanawentamowaatc Paalastaayan (Palestine) ahkiini. ekii'-ayaawaatc anohkii'aakanan wiinke ekiihkihci saaki'aatc, wiinke tahsh ekii'-aahkosinitc aasha kekaa ciniponitc. 3Ahpii shimaakanihshiiwikimaa enoontank pehsho ehtanaacimimintc Ciisahsoon okii'-ishinisha'waa' aaninta kaaniikaanentaakosinitc Coowa' cikakwecimaanitc Ciisahsoon cipiishaanitc cipiminwaaci'aanitc otanohkii'aakanan. 4Ekiihpi naasihkawaawaatc Ciisahsoon enikohk okiih pakohsenimaawaan: “Tepwe teahpiihtentaakosi o'o ci'ishihcikehtamawatc. 5Aaniihsh wiin nisaaki'ikonaan kaaCoowiwiyaank, wiin kaye kaakii'-oshihtamawiyamintc anami'ewikamikoni,” okii'inaawaan.

6Miitahsh Ciisahs kaakii'ani wiiciiwaatc aasha pehsho e'⁠ani otihtaminitc waahkaa'ikanini. Miihsh shimaakanihshiiwikimaa kaakii'-ishinisha'waatc seyaaki wiiciiwaatc o'o ci'awi inaanitc: “Tepencikeyan, keko wiin keyaapi mikoshkaaci'itisohken. Kaawiin iitok nintepakentaakosihsii cikii piintikeyan o'omaa niwaahkaa'ikanink. 7Kaawiin kaye nintinenitisohsii ehtepakentaakosiyaan cikiihpi naasihkawinaan. Mihci ihkiton ehta, miihsh ciminoayaatc nintanohkii'aakan. 8Mii 'i keniin eshinaakosiyaan inini ekii'-miinshitc tipencikewin nintookimaamak itahsh ninkanawaapamikook. Nintayaawak kaye shimaakanihshak kaakanawaapamakwaa. O'o peshik kii'inak: ‘Maacaan,’ mii 'i eshimaacaatc. Miinawaa kotak kii'inak: ‘Piishaan,’ mii 'i eshi piishaatc. Nintanohkii'aakan kaye kii'inak: ‘O'o ishihciken,’ mii piko 'i entootank.”

9Ciisahs tahsh kii'maamahkaatentam ahpii kaa'noontank o'oweni. Okiih kwehkikaapawihtawaa' ekii'inaatc kaapaahtiinonitc kaapiminisha'okotc: “Kiwiintamawininim, kaawiin wiihkaa awiya nimpimihkawaahsii o'o nahke cishi tepweyentank o'omaa Isriyal ahkiink.”

10I'i tahsh kaakiih piicinisha'ontwaapan ahpii ehkiiwewaatc owaahkaa'ikaniniink shimaakanihshiiwikimaan, miihsh kaakii'-mihkawaawaatc ini anohkii'aakanan eminoayaanitc.

Ciisahs kiihpimaaci'aatc kaakii'niponihpan okosihsimaan

11Wiipa naake Ciisahs kii'ishaa ootenaank Nen (Nain) eshinihkaatenik ewiiciiwikotc okihkino'amawaakana' i'i kaye kaapaahtiinonitc pemaatisinitc. 12Aasha tahsh e'⁠ani otihtank eshi ishkwaantemiwaninik i'i ootena, na'itaak okii'-mekwaashkaan ena'inikewintc. A'a hsa tahsh inini kaakii'-nipotc iinsan kii'mihci peshiko e'⁠okosihsimikotc kiiwaacihkwewan. Kiihpaahtiinowa' awiya' e'⁠wiiciiwikonitc ootenaank wenciinitc. 13Ahpii tahsh kaaTipenciketc ewaapamaatc ini ihkwewan aahpici okiih koohpaasinawaan, miihsh kaa'inaatc: “Keko mawihken.” 14Miitahsh pehsho kaakii'-ishaatc, ekiih saaminank pimaahkwa'ikan. Miihsh kaakiih kipihciinitc i'i kaapimiwitoonitc pimaahkwa'ikan. Ciisahs tahsh kii'ihkito: “Oshkiniiki, wanishkaan kitinin.” 15Miitahsh ini kaakii'-niponihpan kiionci mayaawapiwan, kaye tahsh ekii'maacii kakitonitc. Ciisahs tahsh okii'ishi pakitinaan ini ininiwan eshi ayaanitc omaamaani.

16Kahkina tahsh okii'-mooshkineshkaakonaawaa kohtaanentamowin, ekii'-nanaahkomaawaatc Kishemanitoon ekii ihkitowaatc: “Kishemanitoo kimiinikonaan kehci inentaakosintc kenootamaakotc eshi ayaawank,” miihsh kaye kaaihkitowaatc: “Kishemanitoo kiihpiishaa ewiih pimaaci'aatc opimaatisiima'.”

17I'i hsa tahsh Ciisahs enaacimintc kii'noontaakaaniwanini misiwe Cootiiya (Judea) ahkiink, misiwe kaye waahkaaya'ii i'imaa ahkiink.

Cwaan okihkino'amawaakana' kiipikakwecimaanitc Ciisahsoon

(Matthew 11.2-19)

18Okihkino'amawaakana' itahsh Cwaan (John) okii'-wiintamaakoo' kahkina onoweniwan. 19Miihsh kaakii'-antomaatc niishin (2) okihkino'amawaakana' ekii'-ishinisha'waatc ciawi kakwecimaanitc kaaTipencikenitc: “Kiin ina a'a kaaikooyan kaawiihpi takohshink, komaa kaye kotak awiya cipii'intipan?”

20Ahpii ehpi naasihkawaawaatc Ciisahsoon kii'ihkitowak: “Cwaan Siika'antaakewinini ninkiih piicinisha'okonaan cikakwecimikooyan kiishpin kiin a'a kaaikooyan kaawiihpi takohshink komaa kaye kotak awiya cipii'intipan?”

21Mii'iwe ahpii Ciisahs kaakii'-minwaaci'aatc niipiwa' pemaatisinitc entahso inaahpinenitc, aaniin kaye eshi aahkosinitc. I'i kaye kekishkaakonitc maciahcaahkwa'. Kaye tahsh ekii'-waapi'aatc niipiwa' awiya' kaawaapihsinik. 22#Isa 35.5-6; 61.1. Okii'aashitemaa' Cwaanan kaakiih piicinisha'waanitc: “Kiiwek, wiintamawihk Cwaan wekonen kaakii'-waapantamek, kaakii'-noontamek kaye. Ewaapi'intwaa iki kaawaapihsikwaa, iki kaye ehpimohse'intwaa kaapimohsehsikwaa, iki tahsh kaye wemikiiwaahpinewaatc epehki'intwaa. Ehkiiwe pimaatisii'intwaa kaye kaanipowaatc, iki kaye ketimaakisiwaatc e'⁠wiintamawintwaa minwaacimowin. 23Aaniin keahpiihci minwentamowaatc ikiweniwak kaa aanwehtansikwaa ehtashimikoowak.”

24Ahpii tahsh Cwaanan kaakiih piicinisha'waatc ekii'-maacaanitc Ciisahs okii'maacii wiintamawaa' kaapaahtiinonitc awiya' ehtashimaatc Cwaanan: “Ahpii kaakii'-ishaayek Cwaan kaashi ayaatc pikwatahkiink wekonen kaa'inentamek ciwaapantamek, cipeshikwahkitek ina mashkohsi ewahkawaahsink? 25Wekonen tahsh kaa'anta waapantamek kii ishaayek? A'a ina inini wenishihshininikin okikishkikanan? Miiwak iitok iki tino kaakihci minohkonayewaatc kaawenooci pimaatisiwaatc eshitaawaatc okimaawikamikonk. 26Wiintamawihshik, wekonen kaa'anta waapantamek weti kii‑ishaayek? Awiya na kaakanootamawaatc Kishemanitoon? Miitahsh eshi wiintamawinakook, kikii'-waapamaawaa iitok awiya nawac kehci inentaakositc ahpiihc wiin iki kenootamawaawaatc Kishemanitoon. 27#Mal 3.1. Cwaan ohsha kaatashimintc aaniin Kihcimasina'ikan kaaihkitoomakahk: ‘Kishemanitoo ihkito, ninka ishinisha'waa ninka noocikehtamaake ciniikaaniitc ciahpiihci oshihtamawihk keani ishaawatc,’ ihkitoomakan. 28Kiwiintamawininim tahsh Cwaan maawac kihci inentaakosi ahpiihc kotak ininiwak kaakiihpi pimaatisiwaatc. Shaakooc tahsh a'a maawac pankii kaainentaakositc Kishemanitoo otipencikewinink nawac kihci inentaakosi ahpiihc wiin ini Cwaanan,” kii'ihkito.

29 # Mat 21.32; Luk 3.12. Ahpii tahsh iki pemaatisiwaatc, iki kaye kaamaawantoonaawaatc tipa'ikewishooniyaan (tax) o'o enoontamowaatc, mii 'i kaakiih kihkentamowaatc Kishemanitoon kwayahk e'⁠inaahkoniwenitc, ekiih siika'antaakowaatc Cwaanan. 30Iki tahsh Perahsiik (Pharisees) iki kaye kaamisiwe kihkentamowaatc Onahshowewin okii'-aanwehtawaawaan Kishemanitoon eshi antawentaminitc, kaawiin kaye kii'inentansiiwak cisiika'antaakowaatc Cwaanan.

31Ciisahs kii'ani-'ihkito: “Aaniin itahsh keihkitoyaampaan iinsan e'⁠ishinaakosiwaatc oko ininiwak noonkom kaapimaatisiwaatc? Aaniin tahsh enentaakosiwaatc? 32Miihsh enentaakosiwaatc taapishkoo apinoonciishak kaa‑apiwaatc kaashi ataawaaniwaninik. Miihsh o'o eshi shaahshaakowaanitiwaatc: ‘Kikiih kitohcikehtamaakoom wiitikewi kitohcikewin kaawiin cikii'onci niimiyek, kaye tahsh ninkii'-nikamomin na'inikewi nikamowinan kaawiin tahsh cikiiwii'-mawiyek,’ ihkitowak. 33Inashke Cwaan Siika'antaakewinini kiihpiishaatc kaawiin kii'onci wiihsinihsii, kaawiin kaye kii'onci minihkwehsii shoominaapo. Miitahsh kaakii'inek: ‘Okikishkaakoon maciahcaahkwan.’#7.33 Okikishkaakoon maciahcaahkwan: waapantan John 7.20. 34Ini tahsh wiin Inini oKosihsan kiihpiishaawan ehpi wiihsininitc, kaye tahsh ehpi minihkwenitc. Miihsh enimek: ‘Kanawaapamihk a'a maawac enihtaa wiihsinitc, kaye enihtaa minihkwetc, ehsaaki wiiciiwaatc kaamaawantoonaanitc tipa'ikewishooniyaan, i'i kaye omacitootamoo',’ mii'i enek. 35Ikiweniwak tahsh kaaotaahpinamowaatc Kishemanitoon okakiihtaawentamowinini, miiwak iki kaanaakohtoowaatc ehkwayahkwaanik,” okii'inaa'.

Kiiantomikotc Perahsiin ciwiiciwiihsiniimikotc

36Peshik tahsh Perahsiin (Pharisee) okii'-antomikoon ci'antawi wiici wiihsiniimaatc. Miihsh Ciisahs kaakiih piintiketc Perahsiin owaahkaa'ikaniniink ekii'wiici wiihsiniimaatc, ekii'-ohpimehshink tapahsi toopowinaakonk.#7.36 ekii'-ohpimehshink tapahsi toopowinaahkonk: mii 'owe kaaishihcikewaatc ewiici wiihsiniintiwaatc, kiiohpimehshinook i'imaa noohsoohkapiwinink ekii inihkwehshinowaatc wiihsiniwinaahtikonk. 37#Mat 26.7; Mrk 14.3; Jhn 12.3. I'imaa tahsh ootenaank kii'ayaa ihkwe maci ishiwepisiwinink eshi pimaatisitc. Kii'noontam iinsan a'a ihkwe Ciisahsoon ewiihsininitc i'imaa Perahsiin owaahka'ikaniniink. Miihsh kaakiih piitootc minaako'on ahsiniiwi waapaapihko omootayaapihkonk emoshkinenik. 38Kiihpiishaa, otaanaank inahke ekii'ishi niipawitc Ciisahsoon eshi sitehshininitc. Kii'mawi, otooncikawaapiwinan ekii'-aapacihtootc ehkisiipiikisitenaatc. Wiinisihsan itahsh okii'-aapacihtoonan ehpaankwa'ank ositini. Miihsh kaa'ishi ociimaatc ositiniink, ekiih siikinank kaye minaako'on ositiniink.

39Iniweniwan itahsh Perahsiin Ciisahs kaakii'-antomikotc ciwiici wiihsiniimaatc ahpii ewaapamaanitc ihkwewan eshihcikenitc kii'inentamoon: “Kiishpin wa'a inini tinowihpan Kishemanitoon kaakanootamawaatc otaa kihkenimaan aweneniwinitc ini ihkwewan kaasaaminikotc. Otaa kihkenimaan iitok e'⁠maci ishi wepisinitc.”

40Miitahsh Ciisahs o'o kaa'inaatc: “Saaiman (Simon) kekoon kiwii'inin,” okii'inaan.

“Haw, wiintamawihshin waa'ishiyan,” okii'ikoon.

41Miihsh kaa'inaatc: “Kii'ayaawak iinsan niishin (2) ininiwak ekii'-masina'amawaawaatc kaamasina'ike'iwenitc shooniyaan. A'a peshik okii'-masina'amawaan minihk naanwaahk (500) waapaapihko shooniyaanhsa', a'a tahsh kotak naanimitana (50) ehta. 42Kaawiin tahsh okiih kashkihtoohsiinaawaa cikiiwe tipa'amawaawaatc. Miihsh kaamasina'ike'iwenitc kaakiih kisii'amaakowaatc ehpoonentamaakowaatc omasina'ikewiniwaan. Awenen itahsh enentaman maawac kesaaki'aatc,” okii'inaan.

43Miitahsh kaa'ikotc: “Mii 'i enentamaan, a'a maawiin peshik niipiwa' kaakiih poonentamawintc.”

“Kitepwe,” kii'ihkito Ciisahs. 44Miitahsh kaa'ishi kwehkihkwenitc ekiih kanawaapamaatc ini ihkwewan. Miihsh kaa'inaatc Saaimanoon: “Kiwaapamaa na wa'a ihkwe? Ninkiihpi piintike kiwaahkaa'ikanink kaawiin tahsh kitoonci miinshihsii nipi cikisiipiikisiteyaan.#7.44 cikisiipiikisiteyaan: mii 'owe kaatootamowaatc ahpii awiya ehmawatihshiwetc: kaamawatihsintc okiih pooshoo'aan ekii ociimaatc kaye. Okii'ahtamawaan nipiini, kiisiinkwaaninaakanini kaye ketashi kisiihyaapaawatoonitc ositini. Eshkam a'awe kaamawatihsintc okiih kisiihyaapaawatamawaan iniweniwan kaamawatihsikotc ositiini. Eshkam kaye pankii okiih siikinaan i'imaa ohtikwaaniniink minomaakwa'on. Wa'a tahsh wiin ihkwe okisiihsipatoonan ninsitan osipiinkwaanan eaapacihtootc, wiinisihsan kaye ehpaakwa'ikaaketc. 45Kaawiin kaye kikii'onci ociimihsii ahpii kaapiintikeyaan. Wa'a tahsh wiin ihkwe kaawiin onci kipihciihsii e'⁠ayociintank nisitinan ahpii kaahpiintikewak. 46Kaawiin kanake kikiihsiikinansiin Aalip (Olive) tino pimite nihtikwaanink. Wa'a tahsh wiin ihkwe okiih siikinaan minaako'on nisitink. 47Kiwiintamawin tahsh i'iweni okihci saaki'iwewin mii 'imaa wenci kihkentaakwaninik ekiih poonentamawintc niipiwa' omacitootamowinan. Awiya tahsh wiin pankii ehta kaapoonentamawintc, pankii ehta onaakohtoon saaki'iwewin,” kii'ihkito.

48Miihsh kaa'inaatc ini ihkwewan: “Kimacitootamowinan kipoonentamaakoo.” 49Kotak tahsh iki kaakii'-apiwaatc toohpowinaahkonk kii'ayitiwak: “Awenen itahsh wa'a kaapoonentamaaketc macitootamowinan?” kii'ihkitowak.

50Miitahsh Ciisahs kaa'inaatc ini ihkwewan: “Kitepwewakentamowin kipimaaci'ikoon. Mii 'i pisaan anishi maacaan,” okii'inaan.

Currently Selected:

Lok 7: OJBR

Highlight

Copy