Lok 9

Ciisahs kiimaacinisha'waatc mitaahshiniishin okihkino'amawaakana'

1Ciisahs tahsh okii'-antomaa' mitaahshiniishin (12) okihkino'amawaakana' ekii'-miinaatc mashkawisiiwin, kashki'ewisiwin kaye cisaakicinisha'waanitc maciahcaahkwa', cikashkihtoonitc kaye ciminoayaa'iwenitc. 2Miitahsh kaakii'ishi maacinisha'waatc cipapaawiintamaakenitc i'i Kishemanitoon ewii'oshihsitoonitc oTipencikewinini, kaye tahsh ciminwaaci'aanitc kaa‑aahkosinitc. 3#Luk 10.4-11. Miitahsh Ciisahs kaa'inaatc: “Keko kekoon maaciitoohkek ahpii ani maacaayek, sahka'onaahtik, pashkwewash, kemiiciyek, shooniyaa, kekoon kaye kemeshkocishkamek. 4Piko aanti keshi antomikooyek cipiintikeyek, mii 'imaa ishi kapehshik, miihsh i'imaa kenionci maacaayek. 5#Act 13.51. Aaniinti tahsh iko keshi piintike antomikoohsiwek, ahpii tahsh ani nakatamek i'i ootena, miihsh ishi paahpawisitehshimoonok cionci kihkentamowaatc e'⁠wanitootamowaatc.”

6Miitahsh okihkino'amawaakana' kaaishi maacaanitc ekii'-ishaanitc misiwe eshi ayishitaaniwaninik ewiintamaakenitc minwaacimowin, kaye tahsh eminwaaci'aanitc awiya' piko aanti eyaanitc.

Herat kiihkakwekihkenimaatc aweneniwinitc Ciisahsoon

(Matthew 14.1-12; Mark 6.14-29)

7 # Mat 16.14; Mrk 8.28; Luk 9.19. Ahpii Herat#9.7 Herat: amii 'awe Herat Entihpahs (Herod Antipas) kaaishinihkaasotc. Waapantan 3.1. (Herod) kaakihci okimaawitc Kaalaliink (Galilee) enoontank kahkina kekoon kaa'ayishihsenik kii'onci wawaanentam i'iwe aaninta awiya' kaakii'-ihkitonitc. Ekii'ihkitonaaniwaninik iinsan Cwaanan (John) Siika'antaakewininiwan ekiih pikiiwe pimaatisinitc. 8Kotak tahsh ekii'-ihkitonitc: “Ilaaica (Elijah) kii'naakosi,”#9.8 Ilaaica kii'naakosi: waapantan John 1.21. aaninta tahsh ekii'-ihkitonitc mii hsa 'awe peshik ekiihkiiwe pimaatisitc mewisha kaakiih kanootamawaatc Kishemanitoon. 9Miitahsh Herat kaa'ihkitotc: “Cwaan wiin ninkiih kiishkikweta'waa, awenen tahsh a'a tino inini kaanaanoontamaan.” Miitahsh mooshak kaakiihkakwe waapamaatc Ciisahsoon.

Ciisahs kiiahshamaatc naanink mitaahswaahk pemaatisinitc

(Matthew 14.13-21; Mark 6.30-44; John 6.1-14)

10Ishinisha'waakanak tahsh ekiih pikiiwewaatc, okii'-wiintamawaawaan Ciisahsoon kahkina kekoon kaakii'-ayishihcikewaatc. Miitahsh kaa'ishi maacii wiiciiwaatc otishinisha'waakana' wiinehtawaa ko ekii'-ishaawaatc ootenaank Pehseta (Bethsaida) eshinihkaatenik. 11Okiih kihkenimikoo' tahsh kaapaahtiinonitc pemaatisinitc weti ekii'-ishaatc, miihsh kaa'ishi piminisha'okotc. Miitahsh Ciisahs kaakii'inaatc e'⁠minwentank ehpiishaanitc, ekiih tashintamawaatc kaye Kishemanitoon oTipencikewinini, kaye tahsh ekii'-minwaaci'aatc iniweniwa' kaakiih kakwecimikotc ciminoayaanitc.

12Ahpii tahsh e'⁠ani onaakohshininik, okiihpi naasihkaakoo' i'i kaamitaahshiniishinitc (12) okihkino'amawaakana' ekii'ikotc: “Kanoosh pemaatisiwaatc cimaacaawaatc ci‑ishaawaatc eshi ootenaahsiwaninik, kaashi ayaaniwaninik kaye, ciawi nanaanta waapantamowaatc miicim, aaniinti kaye keshi nipaawaatc. Pikwacaya'ii iitok kitayaamin,” ekii'ikotc.

13Miihsh Ciisahs kaa'inaatc: “Kiinawaa miinihkwak kekoonini kemiiciwaatc.”

Miihsh kaa'ikotc: “Naanan ehta pahkweshikanihkaanenhsak nintayaawaanaanik, niishin kiikoyak. Kinantawenimihshinaam ina ciawi ataaweyaank miicim citepihsek kahkina oko ciwiihsiniwaatc?” 14Ninkociko naanan mitaahswaahk (5,000) kiihtahshiwa' ininiwa' i'imaa.

Miihsh Ciisahs kaa'inaatc okihkino'amawaakana': “Nenaanimitana (50) ishi ayoohkwapi'ihkwak,” okii'inaa'.

15Miitahsh o'o kaahtootaminitc. Kahkina tahsh kii'onapiwa' i'imaa kaakii'-ayaanitc. 16Miitahsh Ciisahs kaakii'-otaahpinaatc ini naanan pahkweshikanihkaanenhsa', ini kaye niishin kiikooya' kihcikiishikonk ekii'-inaapitc ekii'-nanaahkomaatc Kishemanitoon iniweniwa' onci. Miihsh kaa'ishi pahkwepinaatc, ekii'-miinaatc okihkino'amawaakana', cimaamaata'oonaanitc ini i'imaa kaakii'-ayaanitc. 17Kahkina hsa kiihtewiihsiniwak. Kihkino'amawaakanak tahsh okii'-maawantoonaanaawaa i'i miicim kaakii'-ishkohsenik mitaahshiniishin (12) mashkohsiiwi miicimiwashan, ekii'-mooshkinekin.

Awenen entinowitc Ciisahs

(Matthew 16.13-19; Mark 8.27-29)

18Aapintink itahsh Ciisahs wiin ehta e'⁠anami'aatc, ewiiciiwikotc okihkino'amawaakana', miihsh kaa'ishikakwecimaatc: “Awenenan ehkitowaatc awiyak ehtinowiwak?”

19 # Mat 14.1-2; Mrk 6.14-15; Luk 9.7-8. Miihsh o'o tahsh kaa'ikotc: “Aaninta kitikook, Cwaan (John) Siika'antaakewinini. Kotak kitikook Ilaaica (Elijah). Kotak kitikook Cerimaaya (Jeremiah), komaa kaye peshik kiihkiiwe pimaatisiwitok kaakiih kanootamawaakopanen Kishemanitoon kitikoo,” okii'ikoo'.

20 # Jhn 6.68-69. Ciisahs itahsh okii'inaa': “Awenen tahsh kiinawaa ehkitoyek ehtinowiyaan?”

Saaiman Piitar (Simon Peter) tahsh okii'inaan: “Kiin ihsa a'a Kishemanitoon kaakiih kiishaaci onenimikotc ciPimaaci'iwetc.”

Kiiniikaaniwiintamawaatc aaniin keishinihsintc

(Matthew 16.20-28; Mark 8.30-9.1)

21Ciisahs tahsh okiih kanoonaa' okii'-aayicikanoonaa' ciwiintamawaahsinik o'oweni awiyan. 22Miitahsh kaye kaa'inaatc: “Oncita piko Inini oKosihsan takihcikakwaatakihtoowan, oka aanawenimikoo' kaye kaaniikaanisinitc, i'i kaye anami'ewikimaa', i'i kaye onahshowewiniwaa' kaakihkino'amaakenitc onahshowewin. Miihsh cinihsimintc. Nihsokiishik tahsh ishihsenik takiiwe pimaatisii'aawan.”

23 # Mat 10.38; Luk 14.27. Miitahsh o'o kahkina kaa'inaatc: “Kiishpin awiya wiihpiminisha'otc, taka ta‑aanawenintiso, oka otaahpinaan otaashiteyaahtikoman kepimiwinaatc entahsokiishik cipiminisha'otc. 24#Mat 10.39; Luk 17.33; Jhn 12.25. A'a tahsh kemanaa wanihtootc opimaatisiwin, aanciko kaawiin tatepinamaasohsii tepwe keonci pimaatisitc. A'a tahsh kepakitinank opimaatisiwin niin onci, tatepinamaaso tepwe keonci pimaatisitc. 25Wekonen kekashkihtamaasohpan awiya kiishpin aanatepinamaasotc kahkina kekoon o'omaa ahkiink, wiin itahsh iko nihshiwanaaci'itisotc, kaye tahsh onci kakwaatakihtootc? 26Awenen hsa piko keonci akacitc niin onci, ini kaye nikihkino'amaakewinan, miihsa'we keakaciihtaakotc kehci inentaakosinitc Inini oKosihsini ahpii pitakohshininitc, kaye tahsh okihci inentaakosiwininiink Weyoohsimimintc, i'i kaye kehtentaakosinitc encala'. 27Tepwe tahsh o'o kaaininakook. Aaninta hsa o'omaa kaaniipawiwaatc kaawiin tanipohsiiwak paanimaa kii'waapantamowaatc i'i Kishemanitoon otookimaawinini.”

Ciisahs kiinaakohtootc okihci inentaakosiwin

(Matthew 17.1-8; Mark 9.2-8)

28 # 2Pe 1.17-18. Nihshwaahsokiishik (8) tahsh e'⁠ishihsenik Ciisahs okii'maaciinaan Piitaroon (Peter), Ciimisan (James), ini kaye Cwaanan (John). Kii'ishaawak eshi ishpatinaanik ekii'awi anami'aawaatc. 29Mekwaa tahsh e'⁠anami'aatc pahkaan kii'ani ishinaakosi owiikwaank, okikishkikanan wiinke kii'waapishkiwaahsenaakwaniniwan. 30Miitahsh kihkino'amawaakanak kaakii'-waapamaawaatc niishin ininiwa' ehkakanoonikonitc. Moosihsoon (Moses) ini kaye Ilaaicawan (Elijah). 31Wiinke kiikihci waahsenaakosiwa', ekiih tashintaminitc aaniin keshi nihsimintc Ciisahsoon aasha kekaa kaawii'-ishihsenik i'imaa Ceroosalamink (Jerusalem). 32Piitar tahsh i'i kaye kaakii'-wiiciiwikotc kiikihpakikwashiwak. Ahpii tahsh ekoshkosiwaatc okii'-waapamaawaan Ciisahsoon eshikihci inentaakosinitc, i'i kaye niishin kaakii'wiici kapawihtaakonitc. 33Aasha tahsh kekaa ewii'ani nakanikonitc, Piitar o'o okii'inaan Ciisahsoon: “Tepencikeyan, aahpici hsa mii 'i kwayahk o'omaa kaa‑ayaayank, kiishpin ishimihsawentaman, nihsin akawaahte'ikanan ninka patahkitoomin, kiin peshik ciayaayan, Moosihs kaye peshik, Ilaaica kaye peshik,” kii'ihkito. (Kaawiin iitok okii kihkentansiin aaniin kaa'ihkitotc.)

34Mekwaa tahsh ehkakitotc, wahkwiini okii'-akawaahteshkaakonaawaa. Kihkino'amawaakanak itahsh kiihsekisiwak ekii'-aakawishkaakowaatc wahkwiini. 35#Isa 42.1; Mat 3.17; 12.18; Mrk 1.11; Luk 3.22. Miitahsh kaakii'-noontawaawaatc awiyan wahkwiink e'⁠onci kiikitonitc: “Mii ohsha wa'a Ninkosihs, kaakii'-onaapamak; pisintawihk.”

36Ahpii tahsh awiyan kaa'ishkwaa kiikitonitc, Ciisahsoon ehta i'maa kii'ayaawan. Kihkino'amawaakanak kaawiin kii'noontaatihsiiwak. Kaawiin kaye awiyan okii'-wiintamawaahsiwaawaan o'o kaakii'-inaapihshinowaatc.

Ciisahs kiiminwaaci'aatc kwiiwisenhsan kekishkaakonitc maciahcaahkwan

(Matthew 17.14-18; Mark 9.14-27)

37Miitahsh o'o kaa'ishihsenik e'⁠aniwaapaninik ahpii Ciisahs, i'i kaye nihsin okihkino'amawaakana' ishpatinaank ehpionci niihsaciwewaatc. Kiihpaahtiinowa' pemaatisinitc kaakii'-nakishkaakowaatc. 38Peshik tahsh ininiwan i'imaa mekweya'ii eshi paahtiinonaaniwaninik kii'onci kishiiwe kiikitowan ekii'-ihkitonitc: “Okihkino'amaake, kipakohsenimin cikanawaapamatc ninkosihs, miiehta'awe niniicaanihs. 39Ketahto onihtaa otihtinikoon ini maciahcaahkwan, miihsh eshishaakowetc. Ocipiniko kaye piinihsh ehpiihtewaninik otoon. Owiihsakentami'ikoon kaye, kaawiin nanaash cipooni'ikotc. 40Nintaanakiihpakohsenimaak kikihkino'amawaakanak cisaakicinisha'waawaatc ini maciahcaahkwan, kaawiin tahsh okiih kashki'aahsiwaawaan,” okii'ikoon.

41Ciisahs tahsh kii'ihkito: “Etatawe kaawiin kitepwehtansiim, kaawiin kaye kwayahk kitishiayaahsiim! Kaanaka naa minihk kewiiciiwinakookipan? Kaanaka naa miina kitaashashiipenimininim?” Miitahsh Ciisahs kaa'inaatc ini ininiwan: “Piitamawihshin o'omaa a'a kwiiwisenhs.” 42Miitahsh kaakiih piishaanitc ini kwiiwisenhsan. Miihsh kaakii'-otihtinikonitc maciahcaahkwan mitahkamik ekii'ishi kawiwepinikonitc, tako kaye ekii'-oncipinikonitc. Ciisahs tahsh okiih kanoonaan ini maciahcaahkwan. Miitahsh shemaak kaa'ishi saaka'aminitc. Shemaak tahsh kii'minoayaawan ini kwiiwisenhsan. Miihsh kaa'ishimiinaanitc ini oteteni. 43Kahkina tahsh i'imaa kaakii'-ayaawaatc kii'maamahkaatentamook aaniin ehpiihci kihci inentaakosinitc Kishemanitoon.

Ciisahs miinawaa kiihtipaatotank ewii'nipotc

(Matthew 17.22-23; Mark 9.30-32)

Mekwaa tahsh awiya' emaamahkaatentaminitc o'o kahkina Ciisahs kaakii'-ishihciketc, miihsh o'o kaa'inaatc okihkino'amawaakana'. 44Weweni pisintawihshik o'o kaawii'-ininakook, Inini oKosihsan ohsha tashi pakitinikaasowan ininiihkaank. 45Kihkino'amawaakanak itahsh kaawiin okii'-nihsitohtansiinaawaa o'o ihkitowin, kaawiin aaniihsh o'o kii'ishi miinikoowisihsiiwak cinihsitohtamowaatc o'oweni. Kiihshaakwenimowak kaye cikakwecimaawaatc o'oweni.

Ciisahs kiiwiintamaaketc awenenan kekihci inentaakosinitc

(Matthew 18.1-5; Mark 9.33-37)

46 # Luk 22.24. Kihkino'amawaanak itahsh kii'maacii kihcikakanoonitiwak awenen a'a mayaa kehci inentaakositc. 47Ciisahs tahsh okiih kihkentaan aaniin enentaminitc. Miitahsh kaakii'-otaahpinaatc apinoonciishan ekii'-niipawi'aatc ciwiicikaapawihtaakotc. 48#Mat 10.40; Luk 10.16; Jhn 13.20. Miitahsh o'o kaa'inaatc: “Awenen iko kewiici'aatc peshik o'o apinoonciisha', niin onci e'⁠onci ishihciketc, mii peshikwan keniin e'⁠ishiwiici'itc. Awenen ihsa waaci'ikwen, kaawiin niinehta niwiici'ikohsii, iniweniwan ihsa owiici'aan Kishemanitoon, miiwan ini kaapi ishinisha'omitc. Awenen hsako maawac pankii enentaakosikwen kaatahshiyek, mii hsa 'awe kehci inentaakositc,” okii'inaa'.

Awenen iko kaanakaashkawihsinowinek kiwiiciiwikowaa

(Mark 9.38-40)

49Miitahsh kaa'ishi kanoonikotc ini Cwaanan (John): “Okihkino'amaake, ninkii'waapamaanaan peshik inini ehsaakicinisha'amawaatc maciahcaahkwa' e'⁠ahpimotc kitishinihkaasowin. Intawaa tahsh ninkii'onci'aanaan, aaniihsh kaawiin kipapaawiiciiwikohsiinaan,” okii'ikoon.

50Ciisahs itahsh o'owe okii'inaan: “Keko onci'aahkek. Awiya kaanakaashkawihsonowinankitc ohsha kiwiici'ikonaan,” okii'inaan.

Ciisahs kiipiitikanaahsiwintc Sameriya ayaawinink

51Aasha tahsh kekaa e'⁠ocihcihsenik Ciisahs ci ishiwinintc kihcikiishikonk, kii'inentam ewii'ishaatc Ceroosalamink (Jerusalem). 52Okii'niikaaninisha'waa' tahsh keniniikaanaacimonitc kaawii'ani ishaatc ci‑ishaanitc Sameriya (Samaria) ahkiink cikwayaancihtamaakotc kahkina kekoon. 53I'i tahsh pemaatisinitc i'imaa eyaanitc kaawiin okii'minwaapamikohsii', aaniihsh kii'mihci pimiayaa i'imaa ekii'-ishaatc Ceroosalamink. 54Ahpii tahsh kihkino'amawaakanak Ciimis (James) a'a kaye Cwaan (John) ewaawaapantamowaatc o'o mii 'i kaa'ihkitowaatc: “Tepencikeyan, kinantawenimihshinaam ina cikanootamaank ishkote cipionci naashiishmakahk kihcikiishikonk kenihshiwanaaci'ikowaatc?”#9.54 Aaninta kehte oshipii'ikanink o'owe kaye kii‑ishipii'ikaate: taapishkoo Ilaaica (Elijah) kaakiih tootank. 55Ciisahs tahsh kiihkwehkihtaa ekiihkishii kanoonaatc, [ekii'inaatc: “Kaawiin kikihkenimaahsiwaawaa eshiayaanitc Kishemanitoo otAhcaahkwan wenci tipentaakosiyek, aaniihsh niin Inini oKosihsan kiihpiishaawan cipi pimaaci'iwenitc, kaawiin wiin cinihshiwanaaci'iwenitc,” okii'inaa'.]#9.55 O'owe kaaishi kihkinawaacipii'ikaatek [ ] 55 oshipii'ikanenhs, kaawiin kiihahshicipii'ikaatesinoon aaninta kehte oshipii'ikewinink. 56Miitahsh pahkaan eyaawinik kaakii'-ishaawaatc.

Iki waahpiminisha'waawaatc Ciisahsoon

(Matthew 8.19-22)

57E'anipimiayaawaatc itahsh miihkanaank, peshik ininiwan okii'ikoon: “Kihkino'amaake, kika wiiciiwin aanti piko keishaayan.” 58Miitahsh o'o Ciisahs kaa'ishinahkwehtawaatc: “Iki waakohshak owaashiwak, iki kaye pinehshiinshak owasihswaniwak. Niin tahsh Inini oKosihsan kaawiin nintayaahsiin aanti keshi pimihshinaan cianwehshinaan,” kii'ihkito. 59Ciisahs tahsh kotak ininiwan okii'inaan: “Piminisha'ohshin.”

Miihsh kaa'ishi nahkwehtaakotc: “Pakitinihshin pinamaa cikiiweyaan ciantawi na'inak nintete.” 60Miihsh o'o Ciisahs kaa'ishi nahkwehtawaatc: “Taka wiinawaa piko okatashiihkaanaawaa cina'inaawaatc otinawemaakaniwaa' kaawii'niponitc, kiin itahsh wiin maacaan cipapaawiintamaakewatc Kishemanitoo otookimaawiwin,” okii'inaan. 61#1Ki 19.20. Miinawaa tahsh awiyan okii'ikoon: “Tepencikeyan, kika piminisha'on. Pinamaa tahsh nihtam pakitinihshin cikiiweyaan ciawi pooshoo'akwaa nintaawinink eyaawaatc,” okii'ikoon. 62Miihsh Ciisahs kaa'ihkitotc: “Piko awiya kaamaacii ompwehkamikipiciketc kiishpin itahsh ishi aapanaapitc kaawiin tateahpiihtentaakosihsii Kishemanitoon oTipencikewininiink cishi aapatisitc.”

Currently Selected:

Lok 9: OJBR

Highlight

Copy