Wəza net Masləŋɗe 16
16
Timote ambatək də Pol gəm Silas
1Pol ambatək a Derbe də Listira. Ɗəf na Maŋgəlva tayadaka, iya nan na, Timote, man bo Yahudiyenəktə ɗak na Maŋgəlvatə ɓa, amma affən na Grekki. 2Milmiŋgiɗim na Listira pak də na Ikoniya pak aɗiyənək ki Timote. 3Yaŋ Pol bo, manakambat də Timote, askələk awra. Aɗɗa vas na viyit Yahudiyenɗe naka dələv məs adadoŋ adak pak asəŋgənək na affən Timote na Grekki. 4Awalaŋ gəla məs agapaŋ pak tahəŋ wənah sitin ɗii na Maŋgəlva wən məs masləŋɗe dit ɗii gugiriɗ net kretiyenɗe aslereŋ akan a Zerusalem an məs anahaŋ na dəsbanən gən wənnani. 5Ndəni kan kretiyenɗe adasɓaŋ də wətaf neti, wəŋɗa net tay mbat abe abe.
Pol awlak ɗəf na Makedoniya də wəsine
6Əmpəs Salala dəpsit tive narban wənna Maŋgəlva aka dələv na Asiya ɓa, vini atoŋgoŋ ki dələv na Firigiya, də Galatiya. 7Adan agapaŋ aket meŋge na dələv na Messiya*, akayaŋgək tive nawtoŋ aka dələv na Bitiniya, amma Əmpəs na Zezu dəpan sit tive ɓa. 8Vini kan atoŋgoŋ ki Messiya, ambataŋ a Torowas təki nawziw net bəlayɗe. 9Dəfəɗ nan na Pol asinik na, awələk ɗəf na Makedoniya tay ziwe tayək kamani: Ade baah səm a Makedoniya. 10Dərɓaga wəsine nanəs ləŋgə, məkayək tive nawmbat a Makedoniya go'ləŋgə vi məsənək na Maŋgəlva də yəmə vi mərban gən labara nenek sit ɗii nadaka.
Lidiya ɗak na walaŋ gəla na Filipi tətafək Ɗəfdaya
11A Torowas na mətoŋguk adəv bəlay, məmbatək a Samotaras, vit pumpum nani, məmbatək a Neyapolis. 12Sədaki kan məmbat a Filipi, ndəni walaŋ gəla an dabəŋ aka dələv na Makedoniya, an məs ɗii na Roma arslaŋ, məsamək adaka, məvoŋguk adak suɗike. 13Pay naffete*, məgilik sə walaŋ gəla, məmbatək aka ma busgum na məlpa azam na adaki Yahudiyenɗe adawzuliyaŋ, məsamək adaka, məpel sitik gil məs dədakalaŋ adaka. 14Ɗak taka səmbeti, məs adawyətən na Lidiya, ɗak nat sə Tiyatira tə. Məgəɗ terere net lukutɗe peppreŋɗe tə, məzu zuli sən Maŋgəlva tə, tatəpprəm wən narba namə, Ɗəfdaya akoluk maɗulata vi tətaf gən an Pol adawpele. 15Ndət dit ɗii neŋgil anatda pak arəhaŋgək baptem. Yaŋ tənah səm na: An kuluwənək va ɗak məs tətaf Ɗəfdaya gesiŋ na, məde məsoŋ anawda. Təgəɗ səmək dewle məsam gən anatda.
Məsgani Pol də Silas a daŋgay
16Pay maɓɓani, mənam tatə mbat atəki na zuliya, waŋ balamək mitemta tədek ələm səmə. Tuya nan akpaŋgatək məskə heligi, ula zəga an dədazani, tatəki deleɗ diiɗa sit migilta. 17Tatəsbamə, tatə ɗi geŋgere də wənah na: Ɗiiyiŋki, məɗɗaŋ wəza na Maŋgəlva na disiŋgiŋ. Warbanən sukumən tive nawkoho. 18Təgəɗək vas təl diiɗa, ha wənnat asanək Pol sawɓa. Yaŋ Pol akpaŋ aza tuya: Də iya na Zezu Krestu nədawnah suko agil səkata. Yas ləŋ tuya nak agili. 19Adan ɗii nat awlanən na tatə tər sit wəray va lahəŋ kəmpa ɓa, armanənək Pol də Silas, akeninik a lumo, abet ɗii gugiriɗe. 20Akeninik abet ɗii gugiriɗ na Roma, aɓɗaŋ na: Ɗiiyeŋki Yahudiyenɗeŋ tahəŋ wəɗɗaŋ wən awalaŋ gəla namə. 21Tahəŋ wərbanən wəsba an nadəv ma henziŋ nami ɓa. Vi nam mənam Romeɗe mənani, məɓap na wəsban an məs adasbaŋ ɓa. 22Ɗii pak akkalaŋgək aketi. Ɗii gugiriɗ aŋgarənək lukut na Pol də Silas, apsitinik tive sit ɗii dərgenen gəni. 23Argeninik diiɗa sawɓa, akeninik a daŋgay. Anah sənənək məgə daŋgay dəge gən lewlewi. 24Adan məgə daŋgay apprəm vaska akek adəv gəla an naddak təki na daŋgay, aguluk tilit adəv totoŋloŋ.
25Tətaŋ dəfəɗa, yaŋ Pol də Silas adawzuliyaŋ, yaŋ adaw gakdakanən Maŋgəlva də gəlya, ɗii na daŋgay meɓɓet tahəŋ wəpprəməni. 26Yas ləŋ dəlva fuŋ atəŋ wəɓla, daga adaɓla gəla na daŋgay aɓələk daga də gabban pakə. Madambeɗe pak akoloŋko, ngiyamɗe pak apəlaŋka. 27Məgə daŋgay afɗaka, adan awla madambeɗe pak akoloŋko, azana mədaŋgayɗe pak anzoŋko. Yas kan akdəh kafahi nan kawbay zəni. 28Amma Pol aslanək wəlan apsən na: Kəbay zuk ɓa. Mənam pak mənam tataŋka. 29Məgə daŋgay atalək offo, anzanək dəndən atoŋguk adaka, asbərək aba Pol də Silas, tayəkkere. 30Yaŋ agil giti, assohetike: Haaya, mi nədaɗɗa ka nəkoh gən di? 31Apsənən na: An kətafək Ɗəfdaya nam Zezu na, wakukohu is dit ɗii naŋgil anokda pakə. 32Yaŋ anah sənən wənna Ɗəfdaya dit ɗii naŋgil ananda pakə. 33Dəpaska, məgə daŋgay agil gitike, askoɓuk huweɗ neti. Yaskan arah baptem dit ɗii naŋgil ananda pakə. 34Akak Pol də Silas eŋgil ananda, azəm gitike. Ndən də gəla nan pak zit annekək sawɓa, vi atafənək Maŋgəlva.
35Adan təki adaŋgə, ɗii gugiriɗ net ɗii na Roma, asliŋninik ɗii gugiriɗ net sozeɗi aza məgə daŋgay, apsənən na dəppet ɗii məzu sil gənən wənnəski. 36Yaŋ məgə daŋgay anah sən Pol na, ɗii gugiriɗ aslənaŋgək azaw na, nəppokum gəni. Məgil kana, mədoŋ haɗamma. 37Amma Pol apsit ɗii gugiriɗ net sozeɗ na: Mbrayen mi məgəɗ di, ya avərmənək karet ɗii pak məza wətaw kita akam ɓa. Mənam bo ɗii na Roma mənani! Məsgami a daŋgay, yaŋ kan adaŋglaŋ wəgil gəmən na, məmbat gən haɗamma sa? Agəɗna vas ɓa! Say ɗii gugiriɗ net ɗii na Roma vet dəzoŋ wəgil gəmən dəveti. 38Ɗii gugiriɗ net sozeɗ adoŋguk wənah sit ɗii gugiriɗ net ɗii na Roma, an məs Pol də Silas anahaŋ. Adan apprəmən na, Pol də Silas na ɗii na Roma həŋ, ageslne'eŋke. 39Vini ambataŋ azet dəveti, akkametinni dəviyan sitin gən an məs aɗɗaŋ sitini. Yaŋ agil gitin sə daŋgay, akkametinke dəzaraŋ gən sə walaŋ gəla neti. 40Yaŋ Pol də Silas agulyoŋ sə daŋgay, amzləhaŋgək anat Lidiya da. Adaki arihin milmiŋgiɗti, asɓetinke. Ambataŋgək abe əmpa.
Currently Selected:
Wəza net Masləŋɗe 16: GDRNT85
Highlight
Share
Copy
Want to have your highlights saved across all your devices? Sign up or sign in
Gidar New Testament © Bible Society of Cameroon, 1985.
Wəza net Masləŋɗe 16
16
Timote ambatək də Pol gəm Silas
1Pol ambatək a Derbe də Listira. Ɗəf na Maŋgəlva tayadaka, iya nan na, Timote, man bo Yahudiyenəktə ɗak na Maŋgəlvatə ɓa, amma affən na Grekki. 2Milmiŋgiɗim na Listira pak də na Ikoniya pak aɗiyənək ki Timote. 3Yaŋ Pol bo, manakambat də Timote, askələk awra. Aɗɗa vas na viyit Yahudiyenɗe naka dələv məs adadoŋ adak pak asəŋgənək na affən Timote na Grekki. 4Awalaŋ gəla məs agapaŋ pak tahəŋ wənah sitin ɗii na Maŋgəlva wən məs masləŋɗe dit ɗii gugiriɗ net kretiyenɗe aslereŋ akan a Zerusalem an məs anahaŋ na dəsbanən gən wənnani. 5Ndəni kan kretiyenɗe adasɓaŋ də wətaf neti, wəŋɗa net tay mbat abe abe.
Pol awlak ɗəf na Makedoniya də wəsine
6Əmpəs Salala dəpsit tive narban wənna Maŋgəlva aka dələv na Asiya ɓa, vini atoŋgoŋ ki dələv na Firigiya, də Galatiya. 7Adan agapaŋ aket meŋge na dələv na Messiya*, akayaŋgək tive nawtoŋ aka dələv na Bitiniya, amma Əmpəs na Zezu dəpan sit tive ɓa. 8Vini kan atoŋgoŋ ki Messiya, ambataŋ a Torowas təki nawziw net bəlayɗe. 9Dəfəɗ nan na Pol asinik na, awələk ɗəf na Makedoniya tay ziwe tayək kamani: Ade baah səm a Makedoniya. 10Dərɓaga wəsine nanəs ləŋgə, məkayək tive nawmbat a Makedoniya go'ləŋgə vi məsənək na Maŋgəlva də yəmə vi mərban gən labara nenek sit ɗii nadaka.
Lidiya ɗak na walaŋ gəla na Filipi tətafək Ɗəfdaya
11A Torowas na mətoŋguk adəv bəlay, məmbatək a Samotaras, vit pumpum nani, məmbatək a Neyapolis. 12Sədaki kan məmbat a Filipi, ndəni walaŋ gəla an dabəŋ aka dələv na Makedoniya, an məs ɗii na Roma arslaŋ, məsamək adaka, məvoŋguk adak suɗike. 13Pay naffete*, məgilik sə walaŋ gəla, məmbatək aka ma busgum na məlpa azam na adaki Yahudiyenɗe adawzuliyaŋ, məsamək adaka, məpel sitik gil məs dədakalaŋ adaka. 14Ɗak taka səmbeti, məs adawyətən na Lidiya, ɗak nat sə Tiyatira tə. Məgəɗ terere net lukutɗe peppreŋɗe tə, məzu zuli sən Maŋgəlva tə, tatəpprəm wən narba namə, Ɗəfdaya akoluk maɗulata vi tətaf gən an Pol adawpele. 15Ndət dit ɗii neŋgil anatda pak arəhaŋgək baptem. Yaŋ tənah səm na: An kuluwənək va ɗak məs tətaf Ɗəfdaya gesiŋ na, məde məsoŋ anawda. Təgəɗ səmək dewle məsam gən anatda.
Məsgani Pol də Silas a daŋgay
16Pay maɓɓani, mənam tatə mbat atəki na zuliya, waŋ balamək mitemta tədek ələm səmə. Tuya nan akpaŋgatək məskə heligi, ula zəga an dədazani, tatəki deleɗ diiɗa sit migilta. 17Tatəsbamə, tatə ɗi geŋgere də wənah na: Ɗiiyiŋki, məɗɗaŋ wəza na Maŋgəlva na disiŋgiŋ. Warbanən sukumən tive nawkoho. 18Təgəɗək vas təl diiɗa, ha wənnat asanək Pol sawɓa. Yaŋ Pol akpaŋ aza tuya: Də iya na Zezu Krestu nədawnah suko agil səkata. Yas ləŋ tuya nak agili. 19Adan ɗii nat awlanən na tatə tər sit wəray va lahəŋ kəmpa ɓa, armanənək Pol də Silas, akeninik a lumo, abet ɗii gugiriɗe. 20Akeninik abet ɗii gugiriɗ na Roma, aɓɗaŋ na: Ɗiiyeŋki Yahudiyenɗeŋ tahəŋ wəɗɗaŋ wən awalaŋ gəla namə. 21Tahəŋ wərbanən wəsba an nadəv ma henziŋ nami ɓa. Vi nam mənam Romeɗe mənani, məɓap na wəsban an məs adasbaŋ ɓa. 22Ɗii pak akkalaŋgək aketi. Ɗii gugiriɗ aŋgarənək lukut na Pol də Silas, apsitinik tive sit ɗii dərgenen gəni. 23Argeninik diiɗa sawɓa, akeninik a daŋgay. Anah sənənək məgə daŋgay dəge gən lewlewi. 24Adan məgə daŋgay apprəm vaska akek adəv gəla an naddak təki na daŋgay, aguluk tilit adəv totoŋloŋ.
25Tətaŋ dəfəɗa, yaŋ Pol də Silas adawzuliyaŋ, yaŋ adaw gakdakanən Maŋgəlva də gəlya, ɗii na daŋgay meɓɓet tahəŋ wəpprəməni. 26Yas ləŋ dəlva fuŋ atəŋ wəɓla, daga adaɓla gəla na daŋgay aɓələk daga də gabban pakə. Madambeɗe pak akoloŋko, ngiyamɗe pak apəlaŋka. 27Məgə daŋgay afɗaka, adan awla madambeɗe pak akoloŋko, azana mədaŋgayɗe pak anzoŋko. Yas kan akdəh kafahi nan kawbay zəni. 28Amma Pol aslanək wəlan apsən na: Kəbay zuk ɓa. Mənam pak mənam tataŋka. 29Məgə daŋgay atalək offo, anzanək dəndən atoŋguk adaka, asbərək aba Pol də Silas, tayəkkere. 30Yaŋ agil giti, assohetike: Haaya, mi nədaɗɗa ka nəkoh gən di? 31Apsənən na: An kətafək Ɗəfdaya nam Zezu na, wakukohu is dit ɗii naŋgil anokda pakə. 32Yaŋ anah sənən wənna Ɗəfdaya dit ɗii naŋgil ananda pakə. 33Dəpaska, məgə daŋgay agil gitike, askoɓuk huweɗ neti. Yaskan arah baptem dit ɗii naŋgil ananda pakə. 34Akak Pol də Silas eŋgil ananda, azəm gitike. Ndən də gəla nan pak zit annekək sawɓa, vi atafənək Maŋgəlva.
35Adan təki adaŋgə, ɗii gugiriɗ net ɗii na Roma, asliŋninik ɗii gugiriɗ net sozeɗi aza məgə daŋgay, apsənən na dəppet ɗii məzu sil gənən wənnəski. 36Yaŋ məgə daŋgay anah sən Pol na, ɗii gugiriɗ aslənaŋgək azaw na, nəppokum gəni. Məgil kana, mədoŋ haɗamma. 37Amma Pol apsit ɗii gugiriɗ net sozeɗ na: Mbrayen mi məgəɗ di, ya avərmənək karet ɗii pak məza wətaw kita akam ɓa. Mənam bo ɗii na Roma mənani! Məsgami a daŋgay, yaŋ kan adaŋglaŋ wəgil gəmən na, məmbat gən haɗamma sa? Agəɗna vas ɓa! Say ɗii gugiriɗ net ɗii na Roma vet dəzoŋ wəgil gəmən dəveti. 38Ɗii gugiriɗ net sozeɗ adoŋguk wənah sit ɗii gugiriɗ net ɗii na Roma, an məs Pol də Silas anahaŋ. Adan apprəmən na, Pol də Silas na ɗii na Roma həŋ, ageslne'eŋke. 39Vini ambataŋ azet dəveti, akkametinni dəviyan sitin gən an məs aɗɗaŋ sitini. Yaŋ agil gitin sə daŋgay, akkametinke dəzaraŋ gən sə walaŋ gəla neti. 40Yaŋ Pol də Silas agulyoŋ sə daŋgay, amzləhaŋgək anat Lidiya da. Adaki arihin milmiŋgiɗti, asɓetinke. Ambataŋgək abe əmpa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Gidar New Testament © Bible Society of Cameroon, 1985.