Wəza net Masləŋɗe 17

Pol də Silas agapaŋgək a Tesalonika

1Agəmənək tive na Amfipolis də Apolloniya, agapaŋgək a Tesalonika. Gəla nawpel wənnet Yahudiyenɗe tayadaka. 2Pol ambatək adəv gəla vani, va məs adaɗɗa ɗayɗay. Agəɗək vas ha gap pay naffet* hoku, tahəŋ wəbayaŋ ma aka wənna ɗerewel na Maŋgəlva. 3Tay boton sit də wərban sit na, say Messiya* dəzəm gən saha, dəsil gən sətəki əmta. Pol amna: Zezu məs nədawnah sukum wənnan kakaŋkəŋka, ndeni Messiya. 4Ɗii meɓɓet sə walaŋgit aŋgluwənək wənnani, asbanənək Pol də Silas. Daga ɗii diiɗa sə waleŋgit Grekɗe məzu zuliyaŋ sənən Maŋgəlva dit gil məs nadəv əlfa an gakdaka.

5Amma Yahudiyenɗe aɗɗaŋgək kotoroku, akkeletinik ɗii ɗəɗerɗe sə gəla lumo, yaŋ ɗii net asil gənən geŋgere awalaŋ gəla pakə. Yaŋ akaraŋ ki gəla na Zason, vi kaw keyet may Pol də Silas, vi kawgil git appaka. 6Amma adan də rihin ɓa, yaŋ akdəhən Zason dit milmiŋgiɗin meɓɓet abet ɗii gugiriɗ na walaŋ gəla nani, yaŋ aɗɗaŋ geŋgere aɓɗaŋ na: Ɗiiyiŋki, ndəɗaŋ dədaw sil gənən wən ko aŋga pakə! Kakaŋ bo azoŋguk awalaŋ gəla anamda. 7Zason bo atefik eŋgil ananda. Net misset ɗaah dədawka na məlĩ na Roma di, tahəŋ wənahaŋ na məlĩ maɓɓan tay, ndəni iya nan na Zezu. 8Də wənnəski asil gənən makret ɗiiyi, dit ɗii gugiriɗ na walaŋ gəla nan pakə. 9Ɗii gugiriɗ aɗɗaŋ sənənək dewle sən Zason dit ɗii meɓɓeti də faɗin gin deleɗ naw man kiyit sə vet pay kita adaɗɗa.

Pol də Silas ambataŋgək a Bereya

10Adan dəfəɗ agəɗə, milmiŋgiɗin aslənənək Pol də Silas a Bereya. Adan agapaŋ adaka, ambataŋgək adəv gəla nawpel wənnet Yahudiyenɗe. 11Ɗii na Bereya aŋglaŋgək wəpprəm wən meleketeni, net tahəŋ va ɗii na Tesalonika ɓa. Tahəŋ wəsokən zit aza wəpprəm wənnani. Pay pak tahəŋ wəkayanən wənna ɗerewel na Maŋgəlva. Vi kawsən an məs Pol adawpel na gesiŋgi sa. 12Ɗii diiɗa atafənək wənnani, daga gil net Grekɗe məs əlfa gakdaka dit Grekɗe vet pak atafənək wənnani. 13Amma adan Yahudiyenɗe na Tesalonika apprəmən na, Pol tayərban wənna Maŋgəlva a Bereya, azoŋko atəŋgaŋgək wəsil gən makret ɗiiyi. 14Go'ləŋ milmiŋgiɗin alhanənək Pol kawmbat aba məlpa metiŋ, amma Silas də Timote asoŋguk a Bereya. 15Ɗii məzəlhanən Pol agapaŋgək a Ateena, yas amilyoŋ a Bereya, yaŋ Pol anah sit na, dənahsənən gən Silas də Timote dəzoŋ gən wərəhən go'u.

Pol arbanək wən awalaŋ gəla na Ateena

16Pol tay ga Silas də Timote a Ateena. Adan awla walaŋ gəla nan aknahək də matuya, gədəvən adək sawɓa. 17Vini adawbay ma dit Yahudiyenɗe, gəm dit ɗii məs Yahudiyenɗeŋ ɓa, məzu zuliyaŋ sənən Maŋgəlva, adəv gəla nawpel wənnet Yahudiyenɗe. Tay bay ma ko dit ɗiiyen məs arah a lumo. 18Ɗii məzərbaŋ zəga sit ɗii məs adawyaŋ na Epikuriyenɗe dit Sitoykoyenɗe bo, abayaŋgək ma dəndən. Ɗii meɓɓet aɓɗaŋ na: Mi məs wənnəŋ adaŋgla wənah di? Ɗii meɓɓet aɓɗaŋ na: Kuzuŋ matuya maɓɓan adaŋgla wərban soko. Adawnahaŋ vas na vi Pol adawnah wənna Zezu də wənna əsilyo net ɗii mimtiti. 19Vini akanən Pol abet ɗii məkkelit atəki məs adawyaŋ na Areyopagus, aɓɗaŋ na: Mamaka sən wən məs kədawpel meleketenəŋka. 20Wən maɓɓan taya walaŋ wənnani məs məpprəm ɗaah ɓa, məŋgələk kaw sənən. 21Ɗii na Ateena dit melekeɗ məs dədasoŋ adak pakə, maɗulet pak say wəpprəm wən meleketeni, də wətawan wənnani.

22Yaskan Pol aziw abet ɗii məkkelit a Areyopagus, apsit na: Haaya! Munokum ɗii na Ateena! Nulak na munokum tatə gayaŋ sənən wənna wəsban matuya nokum. 23Daga nədabal awalaŋ gəla nokum, nulak təki nawtaw wəla zəga na matuya nokum də an məverin pakə: Maŋgəlva məza məsəni ɓa. Yo də məs kədawzuliyaŋ sənən məza kəsənən ɓa, ndəni kan məs nədawnah sukum wənnani. 24Maŋgəlva məs dəzəməɗ dəlva fuŋ də zəga nadəvən pakə. Ndəni Ɗəfdaya na disiŋ də dəlva fuŋ, awsan adəv gəla mərkan də vet ɗii ɓa. 25Nan dəŋgəl ɗii dəɗɗaŋ sənən gən zəga maɓɓan ɓa, vi ndəni dədapsən zeŋgille sən ko nawa pak də əmpəsa, də zəga pakə. 26Səza ɗəf takayi azimiɗ ɗii pakə, aɗɗak dəsoŋ gən aka dələv pakə. Daga dəɓəl wəɗɗan tagay ɓa, aslak pay nani də meŋge nanziya net aka dələv pakə. 27Aɗɗe na vi dəkayanən gəni. Kuzuŋ warəhən naw rəŋgən soko. Amma Maŋgəlva tay faraɗa də ko nawa səzan ɓa. 28Vi anahək na:

Mənam tat də zeŋgillemə, də wəɓla namə,

də va mədaw samə, pak səzan ade.

Va ɗii meɓɓet suweleŋgit məyaŋ gəlya nokum anahaŋ na:

Nam bo kirtin mənani.

29Adan məkpaŋgək kirtini, məda ɗum na Maŋgəlva agilik va fotoɗe məs ɗii adaɗɗaŋ də maɗulet də meleŋge də təbəs net deleɗ ɓa, walla də gərəm məkkahən ɓa. 30Maŋgəlva aɓəsəka adan ɗii dəsənən wənnan an məs adaɗɗaŋ ɓa, amma kakaŋ na tay iye ɗii ko səŋga pakə, də tubiyoŋ gəni. 31Vi aɗiyək pay nawtaw kita aka dələv pak də goŋga, də ɗəf məs aweli. Arbanək wən də wəsil gən sətəki əmta.

32Adan apprəmən Pol adawpel wənna əsilyo sətəki əmta, ɗii meɓɓet amasaŋgək akani, amma ɗii meɓɓet apsənən na: Mamaka kəpelsəm gən wənnan pay maɓɓan əmpa. 33Yaŋ Pol agil suweleŋti. 34Ɗii meɓɓet atafənka asbanənka, suweleŋgit bo, Diyonisiyus ɗəf na Areyopagus dət ɗak məs adawyaŋ na Damaris, dit ɗii meɓɓet tahəŋ.

Currently Selected:

Wəza net Masləŋɗe 17: GDRNT85

Highlight

Copy