Wəza net Masləŋɗe 5

Ananiyas dət Safira

1Ɗəf tay na, iya nan na Ananiyas, dət ɗak nan Safira, aslerinik meti avələnək guli neti. 2Awɗeketik deleɗ nani, azeɓetik meɓɓeti, meɓɓet bo akek azet masləŋɗe. Ɗak nan bo təsənək wənneti. 3Piyer apsəna: Ananiyas, vimi kəppan Satan atoŋ amakrok di? Kəwək tepelke sən Əmpəs Salala*, kəɗɗametik deleɗ meɓɓet na guli noko. 4Daga kəɓəl wəvəl guli nan ɓa noki, səza kəvəl bo noki. Ya vimi kərma makrok kaɗɗa wəza zevin aŋkəŋ di? Sən Maŋgəlvayi kəwəsən tepelke, sit ɗiiyi ɓa. 5Adan Ananiyas apprəm wənnəska, asbərka, amtəka. Ɗii məs dəpprəmən wənnəs pak makret azlaka. 6Gewleɗ azoŋko, atərnənka agil gənənka, andəknənka.

7Dərɓagani təbəs hoku, ɗak nan tədeke, amma təsən an məs dəgəɗ aka zilit ɓa. 8Piyer apsət na: Anah su wənnet deleɗ nokum va kəvələn guli nokum da? Safira təzlanəka, təmna: Vaski deleɗ nani. 9Piyer apsət na: Vimi kəslerin mokum də ziluk kaw rakan Əmpəs na Ɗəfdaya di? Gewleɗ məs də ndəkən ziluk tahəŋ ameŋgle kakaŋka, nok bo waslokuni. 10Vaski ləŋgə təsbərka təmtəka. Gewleɗ atoŋgoŋko, arəh tənək məmtəta, aslatənka, andək tənək amaŋgava magamas na zilta. 11Makret kretiyenɗe məs dəpprəmən wənnəs pak azlaka.

Masləŋɗe aɗɗaŋgək sokeneɗ diiɗa

12Masləŋɗe aɗɗaŋgək sokoneɗ diiɗa aweleŋgit ɗiiyi. Ɗii məs dətafaŋ pak akkalaŋgək amba genzek na Salmoŋ. 13Ɗəf nawalaŋ gəla tay dədadan azet ko taka ɓa vi geslne, ko də ɗii adawnahaŋ na ɗii mogetiŋ zlaŋ. 14Pay pak zel dit gil tahəŋ wənzləraŋ aket də wətaf Ɗəfdaya. 15Yaŋ kan ɗii adaw kinin məs gbəgbaɗe aket tiveɗi, məvoŋgit aket hargaŋguɗe dit buseɗe, vi an Piyer tay toŋ dədaka, kuzuŋ zeŋgilhen wambat aketi. 16Ɗii diiɗa dəzoŋ sə walaŋ gəla məs tuwəɗ ki Zerusalem pakə, akiyənik məs gbəgbaɗe neti, dit ɗii mitemti, pakəs ambəlaŋka.

Masləŋɗe azəmaŋgək saha avet ɗiiyi

17Məs dələv* metiŋgin dit ɗii məs dədasoŋ dəndən pak dit ɗii məs dədasbetin Sadusiyenɗe, aɗɗaŋgək kotorok net masləŋɗe diiɗa sawɓa. Aɓɗaŋ na, say wəzəm git saha. 18Armeninke, asgetinik a daŋgay. 19Amma yaŋ dəfəɗ nani maslay na Ɗəfdaya ade, akoluk madambeɗe na daŋgay, agil gitik masləŋɗe apsit na: 20Mədoŋ adəv gəla metiŋ naw zuliya*, mənah sit ɗii pak wənna zeŋgille meleketeni. 21Masləŋɗe aɗɗanənək vaska, də mompum pum atoŋgoŋguk adəv gəla metiŋ naw zuliya, adaki atəŋgaŋ wərban wənnan sit ɗiiyi.

Yaŋ məs dələv metiŋgin dit ɗii məs dədasbanən pakə, ayeninik ɗii gugiriɗ net Yahudiyenɗe pakə dit məzu səɓaŋ net Yahudiyenɗe pak akkalaŋka, yaŋ kan aslinin sozeɗ dədoŋ gən wəkayetin masləŋɗe sə daŋgay də kiyən gini. 22Sozeɗ agapaŋgək a daŋgay, dirihin masləŋɗe ɓa, yaŋ amilyoŋ anah sitin wənnan sit məzu səɓaŋ. 23Aɓɗaŋ na: Mərəhək madamba pak məmpani, məzu ganən pak tahəŋ wəganəni, amma yaŋ mukol madamba na, mərah ko ɗəf taka adak ɓa. 24Adan daya net məgaŋ gəla metiŋ na zuli dit ɗii gugiriɗ net məs dəlveŋge apprəmən vaska, wənnan atapetike, dəsənən an məs dəgəɗ azet masləŋɗe ɓa. 25Yaŋ ɗəf ade nah sit na, yaŋ ɗii məs kərmaŋ a daŋgay nek tahəŋ adəv gəla metiŋ naw zuliya, tahəŋ wərbanən wən sit ɗii adaka. 26Yaŋ daya net məgaŋ gəla metiŋ na zuli ambat adak dit ɗii nani vi kaw keti, akininik masləŋɗe neki, amma də gagayi ɓa, ageslne'eŋke vi ɗii adaskenin dit kuneŋge ɓa.

27Adan akiyən masləŋɗe, aziw gitinik abet məzu səɓaŋ sitin ɗiiyi. Yaŋ daya net məs dəlveŋge asgesiti. 28Apsit na: Mətakuməka, kədarbanən wən sit ɗii də iya na Zezu ɓa, amma mula kan va məs kədaɗɗaŋ, kərbanənək wənnəŋka, atrayək a Zerusalem pakə. Mokum aka wəki əmta na ɗəffəŋ akam sa? 29Piyer dit masləŋɗe azlansənənka: Nam ma Maŋgəlva mədapprəm ɓana, met ɗiiyi ɓa. 30Maŋgəlva net dəhiŋgiɗmə məs dəsil gən Zezu səkəti əmta, an məs kəbayaŋ də wəkpa'ən aka wəlaŋga məzliwrihe. 31Maŋgəlva bo agakdakanəka, aɗiyək aka van dəzən dəsan gən daya, məzu koh git ɗiiyi, dərban gən wənna tubiya də wənna viyan mambray net ɗii na Israyel. 32Mənam də Əmpəs Salala məs Maŋgəlva adapsit ɗii nan məs dətafaŋ, mənamtə mədaɗɗa saydawa na wənnəŋka.

33Adan məzu səɓaŋ apprəmən wənnəs vaska, gidivit adəka, aynanənək makret nawbay masləŋɗe. 34Amma ɗəf maɓɓan tay taka ambeti, Farisiyenni iya nan Gamaliyel. Məsən zəga na ma henziŋgi, ɗəf gakdaki azet ɗii pakə. Asilke, aziwik aweleŋgit ɗii məzu səɓaŋ. Anah sitik sozeɗ də gilgitin gən masləŋɗe. 35Yaŋ apsit məzu səɓaŋ sitin ɗii na: Munokum Israyelɗe, məzi zukum aza an məs kədaŋglaŋ wəɗɗaŋ sitin ɗiiyiŋki. 36Dabəŋ nani Tewdas dəde, amna ɗəfdayayi. Ɗii gap səkat poɗo dəsbanənni, amma məbayni, məzəsbanən bo atrayaŋka, wənnan agraka. 37Dərɓagani, Zudas ɗəf na Galile ade, pay ɗii adawvereŋ na dəlva. Nan bo asbanənka, amma adan məbayən, məzəsbanən atrayaŋka. 38Ndəni kan nədawnah sukum məzar səzet ɗiiyiŋki. Məppeti, an wənneti də wəza net pak səza ɗəf ade, asna wazə. 39Amma an səza Maŋgəlva ade, kəɓapənna wətak wəlet ɓa. Məzi zukum kədawgayaŋ də Maŋgəlva. Məzu səɓaŋ atafənək wənnani. 40Yaŋ aməsaŋ wəyenin masləŋɗe, avirninke, apsitin na kədawpeleŋ ɗaah də iya na Zezu ɓa. Yaŋ apetini. 41Masləŋɗe agilyoŋguk suweleŋgit məzu səɓaŋ, ambataŋka, zit annekik diiɗa vi Maŋgəlva aɗiyik ka ɗii məs dəgapaŋ nawzəm saha vi iya na Zezu. 42Pay pak tahəŋ wəpeleŋ wənna Maŋgəlva, tahəŋ wərbanən labara nenek na Zezu Messiya* adəv gəla metiŋ naw zuliya*, ko eŋgili.

Currently Selected:

Wəza net Masləŋɗe 5: GDRNT85

Highlight

Copy