Luka 5

Gewleɗ məs Zezu ayə dabəŋ

(Matiye 4.18-22 / Markus 1.16-20)

1Pay maɓɓani Zezu tay ziwe ama busgum na pe'e na Galile, ɗii bo tahəŋ wə haslanən ziti vi kapprəm wəpel na Maŋgəlva. 2Awlek bəlayɗe sula ama busgum net mərmaŋ kilif agulyoŋ sidivti, tahəŋ wəskoɓɓin zəveɗe neti. 3Zezu atoŋguk adəv bəlay an taka bəlay na Simoŋgi. Akkamanək dəzar gənə gən bəlay van suɗike səza ma busgum. Zezu asanək adəv bəlay, atəŋgək wəpel sit ɗiiyi.

4Adan agrak wəpel nani, apsən Simoŋ na: Aka bəlay aret iŋkile kpukpumɗe, asna is dit məɗɗaŋ wəza noko, kəsgetin gən zəveɗe nokum, wa kərmaŋ kilfi. 5Simoŋ azlan sənək na: Məsən zəga, kim məvoŋ na dəfɗəŋ akaɗɗa wəza aret iŋkile mərah zəga ɓa, amma adan əstə kənahə, wanəsget zəveɗe.

6Asgetinik zəveɗe, armaŋgək kilif diiɗa, ha zəveɗe atəŋgaŋgək wəŋgaraŋ. 7Ayeninik bayneŋgiɗit nadəv bəlay maɓɓan vi dəzoŋ gən wəbaahsiti. Azoŋko, aknahənək bəlay sulegit pak dit kilfi, ha bəlayɗe atəŋgaŋgək wətəpa aret iŋkile. 8Adan Simoŋ Piyer awla vaska, akdukuk takpran aba Zezu, azuli sənəka, amna: Ader səzawa, Ɗəfdaya, naw də mambray nani. 9Simoŋ agətka, ɗiiyen dədaɗɗaŋ wəza dəndən pak agətaŋka vi kilfiŋ armaŋ diiɗeŋki. 10Vaski bo may Zak də Zaŋ kirtin Zebede məzə ɗaŋ wəza də Simoŋ agətaŋgə. Amma Zezu apsən Simoŋ na kədaw geslne ɓa wakəsok məkay ɗiiyi. 11Akeninik bəlayɗe net ama busgum, apetinik zigeɗ pak asbanənək Zezu.

Zezu ambəl gənək məs kokolo

(Matiye 8.1-4 / Markus 1.40-45)

12Daga Zezu adawsan awalaŋ gəla maɓɓani, məs kokolo adeke. Adan awla Zezu, azuli sənəka, akkamanəka, amna: Məsən zəga, an kəŋgəlka akəɓap əmbəl guwa, 13Zezu atələk vani, arəŋ gənəka, apsən na: Nəŋgəlka, say ambələ. Go'ləŋ kokolo apanək ɗəf vani. 14Zezu abayək mani: Kədawnah sən ɗəf ɓa, amma dok kərban zuk aza məs dələv* na Maŋgəlva, vasna wapsən zəga sən Maŋgəlva va Moyis aɗɗi wənnani, vi wərban sit ɗii pak na kəmbəlka. 15Də as pak wənna Zezu tay ɓaya, atrayək aweleŋgit ɗiiyi də wəmbat abe abe. Ɗii diiɗa azoŋko zani vi kapprəm wəpel nani, də wəmbəl git səka gbəgba' neti. 16Amma Zezu agilke, ambatək awra katər gəni vi kawzuliya.

Zezu ambəl gənək məs gbəgba' məɗeŋgreŋ

(Matiye 9.1-8 / Markus 2.1-12)

17Yaŋ pay mbərən Zezu tay pel wənna. Farisiyenɗe* dit məsənaŋ zəga na ma henziŋ tahəŋ gurom gurom amaŋgavani, daga suweleŋgit gileɗe naka dələv na Galile azoŋgu, daga sə Zude may sə Zerusalem. Sembe na Ɗəfdaya tay də Zezu na mbəl git məs gbəgbaɗe. 18Ɗii akinənək ɗəf maɓɓan də gbəgba' məɗəŋgreŋ, aslanənək də zəga naw voŋ nani, akayaŋgək tive nawtoŋ gən aza Zezu, vi kaw voŋ gən abani. 19Amma adan awlenin ɗii diiɗa awsənən təki nawtoŋ gən ɓa. Vi vaski apeŋgeŋ dəndən aka gəla, abətən ki gəla, aprik gənən dədak də hargaŋgu neki duwaleŋgit ɗii ha atəki Zezu asani. 20Adan Zezu awla wətaf neti, apsən məs gbəgba' na: Baynawa mambray nok avika.

21Məsənaŋ zəga na ma henziŋ dit Farisiyenɗe* atəŋgaŋgək wəɗumoŋ: Aŋ ɗəf naŋgay yaŋ di, məpel mbrayen aka Maŋgəlva vaŋkəŋ di? Naway məviyan mambray an Maŋgəlvayi ɓa di? 22Zezu asənək wəɗum neti apsit na: Vi mi kədaw yanən zukum də wəɗum vas kəŋ di? 23Awani məza tay tuwãh ɓa di? Wə nah na mambray nok avika sa, walla wənah na: Asili, doko sa? 24Amma nəŋgəl vi kəsənən gən na Wətən Ɗəf* tay də sembe aka dələv na viyan mambraya. Yaŋ apel sən məs gbəgba' məɗeŋgreŋ naka: Intatə nah suko: Asili, agəm zəga naw voŋ noko, doko ŋgil anok da. 25Məs gbəgba' nak asilik go'ləŋ keret ɗii pakə, agəmək zəga naw voŋ məs avoŋ akan naka ambatək eŋgil annanda tay ɗi ki Maŋgəlva. 26Ɗii agətaŋka, agakdakanənək Maŋgəlva, geslne edeke, aɓɗaŋ na: Dəpaŋ məwələk sokeneɗi.

Va Zezu aya Lewi

(Matiye 9.9-13 / Markus 2.13-17)

27Yaŋ dərɓaga aska, Zezu agilke, awlak duwan mətaf zəga, iya nan na Lewi, tay tuŋgo adəv gəla nawtaf zəga. Zezu apsən na: Asbawa. 28Lewi asilke apetik zigeɗ pak asbanəka.

29Lewi aɗɗak zəga nawzəm diiɗa ayak Zezu, eŋgil annanda. Mətafaŋ zəga meɓɓet diiɗa azəmaŋgək dənɗaŋ. 30Dətaf makret Farisiyenɗe* dit məsənaŋ zəga na ma henziŋ ɓa, vini anah sitin gewleɗ nan na: Vi mi kədawzəmaŋ dit mətafaŋ zəga may məɗɗaŋ mambray pakəŋ di? 31Zezu apsit na: Ɗiiyen də zam wəray tay naŋglu zloktor ɓa, say məs gbəgbaɗe. 32Nəde vi kaw keyet ɗiiyen təstəssi ɓa, amma vi kawye ɗiiyen də mambray də tubiyaŋ gəni.

Wəssoh aka wənna see' meme

(Matiye 9.14-17 / Markus 2.18-22)

33Yaŋ ɗii azoŋ wənah sənən Zezu na: Gewleɗ na Zaŋ tahəŋ wə see'eŋ meme dit gewleɗ net Farisiyen paku, amma ya vi mi gewleɗ nok ada zəmaŋ adawsaaŋ asbanən wənnan ndən ɓadi? 34Zezu apsit na: Muɗumon ɗa, munokum tat də sembe nawtak ɗii miyet atəki wəɓel dawzəm sa? Agəɗ na ɓa sam. 35Amma pay maɓɓan wade məzu ɓelit waŋ kaw gəmni sə waleŋti, asna pay nani adawsee'eŋ meme. 36Zezu anah sitik wən məkpaŋga əmpa, amna: Ɗəf tay naw ngar gabaga meleketen kaw ɗisən məsvan dəndən ɓa, vasna waŋgar gabaga meleketeni, vi gabaga meleketen asapna də gabaga məsvan ɓa. 37Ɗəf tay naw zi mbazla məza məhəsən ɓa adəv kenekene məsvan ɓa, vasna mbazla waŋgar kenekene məsvan daw həsa wambat afuŋ kenekene bo warayə. 38Amma aslək na, wəzi mbazla məza dəhəs ɓa adəv kenekene meleketeni. 39Ya an ɗəf asək mbazla məhəsən, yaŋ aŋgəl wəsa məza məhəsən ɓa, wanah na an məhəsən nek dayki məza məhəsən ɓa.

Currently Selected:

Luka 5: GDRNT85

Highlight

Copy