Matiye 25

Wən məkpaŋga net gorɗeŋge klaw

1Yaŋ məlĩ na Maŋgəlva agilik va gorɗeŋge klaw, agəmənək pitirleɗ neti, adoŋ wəga ɗəf naw gəma. 2Sle meɓɓeti dirweŋge, sle meɓɓet bo məs koketɗe. 3Dirweŋge agiminik pitirleɗ neti, dəziyaŋ mele adivit ɓa. 4Yaŋ net məs koketɗe agiminik bəbirɗe namel evet də pitirleɗ neti. 5Ɗəf nawgəm anzika, ndəɗaŋ pak tahəŋ dikziŋ dikziŋ, aleŋgeŋke.

6Tətaŋ dəfɗa wəɗəla agəɗka: Yaŋ ɗəf naw gimit agili vi kalmaŋ dənɗaŋ. 7Yaŋ gorɗeŋge klaw nek pak asilyoŋko, azeɓetinik pitirleɗ neti. 8Dirweŋge apsitin məs koketɗe na: Məpsəm mel nokuməŋ ɗa, vi pitirleɗ nam tahəŋ wəmtaŋgə. 9Məs koketɗe apsitin na: Kay tay natər səm wəray sap də munokum pak ɓa, mədoŋ məlbah avet məzuvələni. 10Adan adoŋ wəlbah mele, dəpaski ɗəf naw gimit ade. Yaŋ gorɗeŋge məs koketɗe atoŋgoŋgək dəni məmpani madamba. 11Dərɓagan suɗike ni gorɗeŋge meɓɓet nek azoŋko, aɗiyaŋgək genger diiɗa: Ɗəfdaya Ɗəfdaya akol səm madamba. 12Amma məzu gimit azlansitike: Gesiŋ nədawnah sukum nəsənkum ɓa.

13Yaŋ Zezu amna: Məga, vi kəsəŋ nən pay nan ɓa walla wənziya na pay nan ɓa.

Wən məkpaŋga net məɗɗaŋ wəza hoku

(Luka 19.11-27)

14Wagəɗ va ɗəf məmbat malaka, ayek məɗɗaŋ wəza nani, apsitik arya nani. 15Apsənək ɗəf taka, deleɗ na meleŋge səkat sle, ɗəf maɓɓan səkat sula, mohoku'it bo səkat taka, vi ko naway aza sembe nani. Yaŋ ambatə. 16An məs dərah deleɗ na meleŋge səkat sle, ambatka, agəɗək terere dənɗaŋ, awaŋka aket səkat sle. 17Vaski bo an dərah səkat sula agəɗək vanani arahək səkat sula aketi. 18An məs dərah səkat taka ambatka, atəfək təki afuŋgu andikik deleɗ na ɗəfdaya nani.

19Wənziya suɗike dərɓagani, daya net məɗɗaŋ wəza adeke, assohotik dəŋɗan sənən gən wəŋɗa net deleɗ nani. 20An məs dərah deleɗ na meleŋge səkat sle nak adeke, amna: Daya nawa kəvayək deleɗ na meleŋge səkat sle. Yaŋ nərahək aket səkat sle maɓɓani. 21Daya nan apsən na: Lewi, məgəɗ wəza mogok kənani, kəgəɗək wəza mogon də zəga an tay də sləman diiɗa ɓa, wanəpsuk zəga diiɗa an məs də sləman diiɗa. Ade toŋgu, anneken zuk də ina. 22An məs dərah deleɗ na meleŋge səkat sula nak adeke, amna: Daya nawa, kəvayək deleɗ na meleŋge səkat sula. Naha səkat sula riba an duwə aketi. 23Ɗəfdaya nan apsən na: Lew kəɗɗa məgəɗ wəza mogok kənani, matakataka taya zok ɓa. Matakataka taya zok aka zəga suɗike ɓa, wanəɗiko aka zəga an diiɗa. Ade anneken zuk də ina. 24An məs dərah deleɗ na təbəs səkat taka adeke, amna: Aw ɗəfdaya nəsənka əstə ɗəf tattuwãha wakəbəl ko səki an kəslgə ɓa, wakəkalan səki an kəndol zemve ɓa. 25Vini geslne duwa nəmbatə, nəndək deleɗ nok amba dəlva fuŋ, zəga nok yaŋka atafa. 26Daya nan azlan sənək na: Məgəɗ wəza mbrayuk kənani. Kəsənək wanəbəl səki an nəslgə ɓa, wanəkal zəga səki məs nəndol zemve ɓa. 27Aslək kəzeɓet gən deleɗ naw abaŋ an nədek na, wanirih də riba. 28Mətaf an suɗike net deleɗ na təbəs səvani, məpsən ɗəffan dit deleɗ na təbəs səkat sle. 29Vi ɗəffan də zəga vani, kapsəni akan diiɗa. Amma ɗəffan məs avan suɗike, kaw gəmni səvani an məs arah suɗike. 30Məgəɗ wəza ɗarəŋka, məgil gən apaka məsgan ara guzliyo. Dəhəm gən də wəmpəran slayən adaka.

Kita pay wəgrak dəlva

31Pay Wətən Ɗəf* adazan də gakdak nan dit maslayɗe nani, wasan aka mazaŋga na məlĩ nani. 32Ɗii namba dələv pak wakalaŋ abani, waw ɗeket ɗii va məzutaɗa adawɗeket timeŋgiɗ dit gilewi. 33Wazi timeŋgiɗ aka van dəzəŋ, gilew bo aka van zlaɓay. 34Məlĩ wanah sit ɗiiyen naka van dəzəŋ na: Mide munokum məs Affu agəɗ sukum zəzaya, mətoŋ adəv məlĩ an məzaɓan vikum daga wətəŋ na dəlva fuŋ. 35Vi nəsawək də maya, kəzəm guwənka, meme aduwənka, kəvayaŋgək iŋkile, nədek malaka kətafwənka. 36Pay nəsaw zu mekeleŋ, kəvayaŋgək lukutu nəsawək də gbəgba'a kəbahaŋ suwənka, nəsawək a daŋgay kəzoŋguk uluwəni. 37Yaŋ ɗiiyen də goŋga ada sohonəni: Ɗəfdaya na dewɗe muluk də may məzəm guk di? Walla də meme kənani məpsuk iŋkile di? 38Ɗewɗe mətafuk va malaka anamda di? Walla lukut tay azok ɓa məpsuk di? 39Ɗewɗe muluk də gbəgba'a, walla a daŋgay, məmbat uluk di? 40Məlĩ wazlan sit na: Gesiŋ nədawnah sukum, ko mi məs kəɗɗaŋ sən taka nambet milmiŋgiɗu en muzliyeɗi su kəɗɗanəni.

41Asna wanah sit ɗiiyen naka van zlaɓay na: Məzar səzaw faraɗa munokum məs Maŋgəlva araygukum, mədoŋ aka offo məs amta ɓa ha faɗə, məs məzaɓan vi Ibilisa dit maslayɗe nani. 42Yaŋ nəsawək də maya, kəvayaŋ zəga nawzəm ɓa, meme aduwənka, kəvayaŋ iŋkile naw saa ɓa. 43Nədek malaka kətaf wən ɓa, nəsawək zu mekeleŋ kəvayaŋ lukut ɓa, nəsawək də gbəgba'a may a daŋgay kəzoŋ uluwən ɓa. 44Wazlanən na: Ɗəfdaya dewɗe muluk də maya: Walla də meme, walla malaka, walla zuk mekeleŋ, walla də gbəgba'a, walla a daŋgay məbah suk ɓa di? 45Asna wazlan sit na: Gesiŋ va kəɗɗaŋ ɗaah sən taka nambet muzliyeɗiŋ ɓa, kəɗɗaŋ suwən ɓa'a. 46Kawketi aki nawzəm saha an ha faɗə, amma ɗiiyen təstəssə wasoŋ də zeŋgille ha faɗə.

Currently Selected:

Matiye 25: GDRNT85

Highlight

Copy