Matiye 27

Məkani Zezu aba Pilatu

(Markus 15.1 / Luka 23.1-2 / Zaŋ 18.28-32)

1Adan təki adaŋgə ɗii gugiriɗ net məs dəlveŋge dit ɗii gugiriɗ net Yahudiyenɗe, aslereŋgək aka Zezu vi kawbayni. 2Aɓruknənka, akanənka, apsənənək ava Pilatu governer na Roma.

Wəmta na Zudas

(Wəza net Masləŋɗe 1.18-19)

3Adan Zudas məs dəzəm ki Zezu awlak kita armak Zezu, arbanək an məs agəɗə, amndegetik deleɗ kaklaw hoku nek sit ɗii gugiriɗ net məs dəlveŋge, dit ɗii gugiriɗ na dəlva. 4Amna: Nəgəɗək mbrayen vi nəzəmək ki ɗəf məs tay də mambray ɓa, ha gap ndən zamə. Amma azlan sənənək na: Məsam di? As wən noki. 5Andolik deleɗ nek adəv gəla metiŋ naw zuliya*, agilke, ambatka, alawək zəni.

6Ɗii gugiriɗ net məs dəlveŋge agbeninik deleɗ neki, aɓɗaŋ na: Ma henziŋ nam atakək wəɗiyit adəv gəla metiŋ na zuliya, vi deleɗ net mbelləŋ. 7Yaŋ aslereŋ aka wənnani, kalbəh guli səva mərkə mozgoyɗe, vi kawndək melekeɗ adaka. 8Vi vaski məyan na guli net mbeli ha dəpaŋka. 9Yaŋ agrak an məs kleŋ Zeremi anahə: Amna: Agiminik deleɗ kaklaw hoku məs məsler aketi, deleɗ en ɗii na Israyel aslereŋ nalbəhni. 10Yaŋ albəhən guli na məzərkaŋka, va Ɗəfdaya anahə.

Pilatu tay assohon Zezu

(Markus 15.2-5 / Luka 23.3-5 / Zaŋ 18.33-38)

11Zezu aziwik aba governer, governer assohonəka, amna: Əstə məlĩ net Yahudiyenɗe sa? Zezu azlan sənəka va kənahə. 12Yaŋ ɗii gugiriɗ net məs dəlveŋge awəlinənka dəzlan ko midi ɓa. 13Yaŋ Pilatu anahsən na: Kapprəmən wənəŋ ada peleŋ akok gbaŋkəŋ ɓa sa? 14Zezu dəzlan sən ko wən taka ɓa, ha Pilatu agətək akan sawɓa.

Mətawi kita namta aka Zezu

(Markus 15.6-15 / Luka 23.13-25 / Zaŋ 18.39—19.16)

15Pay wəzləra na Paska*, governer apan ɗəf na daŋgay taka an aŋglaŋ vi wənnet tay vaska. 16Dəpas bo ɗəf maɓɓan taya daŋgay iya nan na Barabbas ɗəf mbrayeni. 17Yaŋ akkalaŋgə, Pilatu apsit na: Naway kəŋglaŋ nəpan sukum gən di? Zezu Barabbas sa? Walla Zezu məs adawyaŋ na Messiya*? 18Vi asənəka ana Zezu ada bayaŋ də kotoroku.

19Adan Pilatu asan aka mazaŋga na kita, yaŋ ɗak nan təslən səni, təpsən na: Kədawgəɗ sən ko mi sən ɗəfəs ɓa vi ɗəf təstəssi vas bo nəzəmək saha diiɗa na dəfəɗ də wəsine aka wənnani.

20Amma ɗii gugiriɗ net məs dəlveŋge dit ɗii gugiriɗ na dələv pak arban sitinik ɗii pak dəssohoŋ gən dəplan sitin gən Barabbas dəbay gən Zezu. 21Govener azlanəka apsit na: Naway suweleŋgit ɗii sulaŋ naway kəŋglaŋ nəpan sukum gən di? Aɓɗaŋ na: Barabbas. 22Pilatu apsit na: Ya mi nədaɗɗa də Zezu an məs adawyaŋ na Messiya* di? Ndəɗɗaŋ pak aɓɗaŋ na: Akpa'a akawəlaŋga məzliwrihe. 23Amna: Vi midi, mambray mi agəɗ di? Amma aɗiyaŋgək geŋgere zani, aɓɗaŋ na: Akpa'a akawəlaŋga məzliwrihe. 24Adan Pilatu awla dəɓap wəɗɗa zəga ɓa, say geŋgere dədaɗɗa dayki laŋka, agimik iŋkile, aɗɗak van abet ɗiiyi. Amna: Salala nan səzet mbel na ɗəffəŋka, nan wən nokumi. 25Ɗii pak azlanənka, aɓɗaŋ na: Mbel nan dəsoŋ gən akam dit kirtəmə. 26Yaŋ apan sit Barabbas, amma aɗiyək wənnani avərənək Zezu, apsitik Zezu aveti, dəkpa' nən gəni aka wəlaŋga məzliwrihe.

Sozeɗ anahaŋgək wən aza Zezu

(Markus 15.16-20 / Zaŋ 19.2-3)

27Yaŋ sozeɗ na Pilatu akanən Zezu adəv gəla na ngomna, sozeɗ pak akalaŋka kani. 28Agbukunək lukut nani, azəɗ sənənək zəga peppreŋge. 29Atroɗənək gedirge va mətər kiya, avaɗ sənənək akani, apsənənək zleŋge aza van dəzəŋ, akdukunək takpret abani, anəhaŋgək wənna zani. Usɗoko məlĩ net Yahudiyenɗe. 30Atəf sənənək mefɗe zani, atafənək zleŋge sə vani vi kaw vərən dəndən aka kiyən. 31Adan agrakən wənəh wənna zani, agbukunək lukut naka, agul sənənək lukut nani, akanənək vi kada kpa'ən aka wəlaŋga məzliwrihe.

Məkpa'ni Zezu aka wəlaŋga məzliwrihe

(Markus 15.21-32 / Luka 23.26-43 / Zaŋ 19.17-27)

32Adan agulyoŋ almaŋ sənənək ɗəf na Sirene, iya nan na Simoŋ, adewlinənka dəslan gən wəlaŋga məzliwrihe na Zezu. 33Adan agapaŋ atəki məs adawyaŋ na Golgata, va wənah na təki na bəbər kiya. 34Apsənənək mbazla məslahan də zəga tatrahã, vi dəsa gəni. Adan a nani, dənger wəsan ɓa.

35Akpanənək aka məzliwrihe, awɗeketinik lukutɗe nani, askaŋgək saasa aka lukut nani. 36Yaŋ asoŋ adak wəgani. 37Averninik mambray an məbayən akani. Aka zəga alawənək adisiŋ kini. Ndəni Zezu məlĩ net Yahudiyenɗe. 38Yaŋ akpe'in məvoŋgoŋ tive sula dəni, taka aka van dəzəŋ taka bo aka van zlaɓay.

39Ɗii məzu toŋgoŋ dədak aɓlanənək kiti, aranənka: 40Aɓɗaŋ na: Is napzlu gəla metiŋ naw zuliya*, karkan pay hoku akoh gən zuk kana. An Wətən Maŋgəlva* kənani aprik səka wəlaŋga məzliwriheŋka. 41Vaski bo ɗii gugiriɗ net məs dəlveŋge dit məsənaŋ zəga na ma henziŋ na Maŋgəlva, gəm ɗii gugiriɗ na dəlva, anahaŋgək wənna zani: Aɓɗaŋ na: 42Akohgitik ɗii meɓɓeti, aɓapna wəkoh gən zən ɓa sa? An ndəni məlĩ net Israyelɗe na, say dəprik səka wəlaŋga məzliwriheŋka, asna mətaf gəni. 43Makran pak aka Maŋgəlvayi, say Maŋgəlva dəkohgənə gən kakaŋka, mula gəni an aŋgluwək kana. Amna: Əntə Wətən Maŋgəlvaŋka. 44Vi vaski bo məvoŋgoŋ tive məs məkpe'it dəndən aranəni.

Wəmta na Zezu

(Markus 15.33-41 / Luka 23.44-49 / Zaŋ 19.28-30)

45Daga pay ziwi guzli titir agəɗək aka dələv pak ha gap ler hoku moskoyo. 46Daga ler hoku, Zezu aɗiyək geŋger diya diya: Eli, Eli, lema sabaktani? Va wənah na: Aw Maŋgəlva nawa, aw Maŋgəlva nawa, vi mi kəpaw di? 47Ɗii en də ziweŋ adaka, adan apprəməni, aɓɗaŋ na: Tay ya Eliyas. 48Go'leŋgə ɗəf taka səmbet anzanəka, agəmək gislete, alɓanək də zəga nawsa an ɓaɓlaka, asləkək aza ngava, apsənək dəwaɗ gəni. 49Amma ɗii meɓɓet aɓɗaŋ na: Apanɗa, mula gən an Eliyas waɓap wəkoho gəni. 50Zezu aɗiyək geŋger diiɗa apanək zeŋgilleni.

51Yaŋ gabaga an məga' gədəv gəla metiŋ naw zuliyəŋ angarka daga sə disiŋ ha afuŋ, dələv aɓəlka, milɓeɗ pak apəɗakaŋka, 52magamasɗe akoloŋko, ɗii na Maŋgəlva diiɗa asilyeŋgik səki əmta. 53Agulyoŋguk sədəvət magamasɗe, dərɓaga Zezu asil səka əmta, atoŋgoŋko awalaŋ gəla an salala*, ɗii diiɗa awlenənke.

54Daya net sozeɗi dit sozeɗ na Roma məgaŋ magamas na Zezu, adan awlanən wəɓla na dələv də an dəgəɗ pakə, ageslne'eŋgək diiɗa, aɓɗaŋ na: Gesiŋ aŋki Wətən Maŋgəlva*. 55Gil tahəŋ adak diiɗa məzulaŋ səka faraɗa, məzəsbanən Zezu daga səka dələv na Galile, vi kagəɗsən wəza. 56Suwaleŋgitə Mari sə Magdala gəm Mari ma Zak gəm Zozef, dət met kirtin Zebede.

Va andəkən Zezu

(Markus 15.42-47 / Luka 23.50-56 / Zaŋ 19.38-42)

57Moskoy ɗii ameŋgle guromə, ɗəf məs arya suwalaŋ gəla na Arimatiya adeke, iya nan na Zozef. Nan bo gawla na Zezuwi. 58Ambatka za Pilatu, assohonək gəbay na Zezu. Yaŋ Pilatu apsən tive nan sən Zozef. 59Zozef aslanək gəbay na Zezu, atərək də boɗoko meleketeni. 60Avoŋ gənək adəv magamas nan meleketeni, an məs aso' adəv milɓe. Akəɗəŋgələk gərəm metiŋgin ama gamasə, ambatka. 61Mari sə Magdala gəm Mari mambərət nakə, asoŋgək adaka heret sek aka magamas naka.

Məgaŋ magamasə

62Vit pumpum nani, dərɓaga wəzaɓan zəga na pay naffete*, ɗii gugiriɗ net məs dəlveŋge, dit Farisiyenɗe*, akkalaŋgək aza Pilatu. 63Anah sənənək məlĩ na məɗumonək wənna məwə wənəŋka, daga adasan makarani amna: Pay hoku dərɓaga wəmta naw wanəsil səzet ɗii məmtiti. 64Vi vaski anah sit na dəganən magamas ha gap pay hoku, vi gewleɗ nan adazoŋ wəhalən dəfɗa, kaw nahsitin ɗii na: Asilik səzet ɗii mimtiti, vasna uwa wənnan an dirɓe waday kiyən an madabəŋ. 65Pilatu amna: Sozeɗ yeŋki dəduwaŋ wəganən va kəŋglaŋ. 66Ambataŋka, atipinik magamasə, aɗɗanənək tampoŋ na ngomna atəki mətipin naka. Aɗiyinik sozeɗ dəganən gəni.

Currently Selected:

Matiye 27: GDRNT85

Highlight

Copy