Luka 11

Te 'āpi'i'anga a Iēsū nō runga i te pure

(Mātaio 6.9-13; 7.7-11)

1Tē pure ra a Iēsū i tēta'i ngā'i, e oti akera, kua tuatua maira ki aia tēta'i pipi āna, “E te 'Atu, e 'āpi'i mai i a mātou nei i te pure, mei a Ioane i 'āpi'i katoa atu i tāna au pipi.”

2Kua karanga atura a Iēsū ki a rātou, “E nā kō kōtou kia pure:

‘E te Metua,

kia 'akatapu'ia tō'ou ingoa, kia tae tō'ou bāsileia.

3'Ō mai i te kai e tau i a mātou i tērā rā, i tērā rā.

4E 'akakore mai i tā mātou au 'ara;

tē 'akakore katoa nei 'oki mātou i tā tei 'ara i a mātou nei.

Auraka e arataki i a mātou ki roto i te tīmata'anga.’ ”

5Kua karanga atura 'oki a Iēsū ki a rātou, “'E 'oa tō tēta'i o kōtou na, ka 'aere atu ei aia ki aia i te tūruā'ipō, ka karanga atu ei ki aia ra ē, ‘E taku 'oa, 'ō mai ana e toru taupūpū varāoa, 6nō te mea, kua tāpae mai nei tēta'i 'oa ōku nei i tōna 'aerenga, ē kāre āku kia tuku atu ki mua i tōna aroaro.’ 7Ē kia pa'u mai aia mei roto maira, i te nā kō'anga mai, ‘Auraka e 'akapekapeka mai i āku. Kua tāmou'ia te pā, tei runga au i te ro'i ē taku au tamariki katoa. Kāre 'e tika i āku kia tū ki runga e 'ō atu nā'au.’ 8E 'akakite atu au ki a kōtou, kore 'ua atu aia e tū ki runga e 'ōronga atu nō te mea 'e 'oa aia nōna, e tū rā aia nō te pati 'akatenga, ka 'ōronga atu ei i tāna i 'inangaro ra.

9“E karanga atu 'oki au ki a kōtou, e pati ē e 'ōronga'ia mai tā kōtou. E kimi, e kitea'ia i a kōtou. E tōpāpā atu, e kiriti'ia mai te pā i a kōtou. 10Nō te mea, ko te aronga katoa i pati ra, kua rauka ia. Ē ko tei kimi ra, kua kitea ia. Ē tei tōpāpā ra, e kiriti'ia mai ia te pā i aia. 11Ko 'ai ia metua i ō kōtou nei, kia pati mai tāna tamaiti i tēta'i ika e 'apai atura i tēta'i 'ōvī nāna? 12Ē kia pati mai aia i tēta'i 'ua moa, e 'apai atu āina i tēta'i tēkōpio? 13Ē tē tika na i a kōtou, noa atu tō kōtou tū kino, kia 'ōronga i te au mea meitaki nā tā kōtou tamariki, ka tanga ai 'oki i tō kōtou Metua i te ao ra i te 'ōronga mai i te Vaerua Tapu ki te aronga e pati atu ki aia ra.”

Ko Iēsū ē Bēlezebūba

(Mātaio 12.22-30; Māreko 3.20-27)

14Tē tuaru ra a Iēsū i tēta'i dēmoni mūrare ki va'o. Ē kia 'aere atura taua dēmoni ra ki va'o, kua tuatua maira taua mūrare ra. Vā 'ua i'ora te tangata. 15#Māt 9.34; 10.25Kua tuatua akera tēta'i pāpāki ra, “Tē tuaru nei aia i te dēmoni ki te mana o te dēmoni ma'ata ko Bēlezebūba.”

16 # Māt 12.38; 16.1; Mār 8.11 Ko tēta'i pāpāki rā i te tīmata'anga i aia, kua pati maira i tēta'i 'akairo ki aia mei runga mai i te rangi ra. 17Kua nakiro rā a Iēsū i tō rātou manako, ē kua tuatua atura ki a rātou, “Ko te au bāsileia e mavete e pou ia, ē ka 'inga tēta'i ngutu'are ki runga i tēta'i. 18Ē kia mavete'ia a Sātani, 'e a'a 'oki tōna bāsileia e mou ei? Ē tē 'akakite nei kōtou ē, tē tuaru nei au i te dēmoni ki te mana o Bēlezebūba. 19Mei te mea ē, tē tuaru nei au i te dēmoni ki te mana o Bēlezebūba, ki te mana nō 'ai ra i tuaru ei tā kōtou tamariki i a rātou? Ē tēianei ko rātou tō kōtou au 'akavā! 20Mei te mea rā ē, tē tuaru nei au i te dēmoni ki te rima o te Atua, kua roko'ia tika'ia kōtou e te bāsileia o te Atua.

21“Kia tiaki te tangata māro'iro'i ma te au tao'onga tamaki i tōna ngutu'are, tē vai meitaki ra ia tōna 'apinga. 22Kia 'aere mai rā tēta'i tangata ririnui 'ua atu, e 'autū i'ora ki runga a'o i aia, 'apai atura i te au tao'onga tamaki tāna i 'irinaki ana, ē tu'a 'aere atura i tōna au 'apinga.

23 # Mār 9.40 “Ko tei kore i piri mai ki āku nei, kua pāto'i mai ia i āku. Ē ko tei kore i kāpiti mai ki āku i te 'akaputuputu, tē 'akapue'urikiriki kē ra aia.”

Te 'oki 'aka'ou'anga mai o te vaerua vi'ivi'i

(Mātaio 12.43-45)

24“Kia 'aere mai te vaerua vi'ivi'i i roto i tēta'i tangata nei ki va'o, kua 'aere atura aia nā roto i te au ngā'i pāpāmarō ē e kimi i te 'akangāro'i'anga. Ē kāre akera i kitea, kua nā kō i'ora, ‘Ka 'oki au ki te 'are mei reira mai au nei.’ 25Ē kia tae mai aia ra, kite i'ora ē, kua oti i te tāmā'ia ē te 'akamānea'ia. 26Kua 'aere atura aia e tiki i 'e toko'itu vaerua kino ma'ata rava, e tomo atura rātou ki roto, no'o atura ki reira. Ē i te 'openga i'ora kino ma'ata 'ua atura tō taua tangata ra i tei muatangāna ra.”

Te rekareka tau tikāi

27Tē tuatua 'ua ra a Iēsū i taua tuatua ra, kua kāpiki 'ua maira tēta'i va'ine i rotopū i te urupū tangata ra, “'E ao tō te kōpū i 'apai i a koe, ē te ū tā'au i ngote ra.”

28Kua pa'u atura a Iēsū, “'E ao māri tō rātou tei 'akarongo i te tuatua a te Atua ē kua 'ākono atura i te reira.”

Te mānono'anga nō tēta'i 'akairo

(Mātaio 12.38-42)

29 # Māt 16.4; Mār 8.12 E kōnoninoni ma'ata maira te tangata, kua karanga atura a Iēsū, “'E uki tangata kikino tikāi tēia, tē pati nei rātou i tēta'i 'akairo. Ē kāre e 'ōronga'ia atu tēta'i 'akairo, māri rā ko te 'akairo o te peroveta ra i a Iōna. 30#Ion 3.4Mei a Iōna 'oki i riro 'ei 'akairo nō tō Nīneve, pērā katoa te Tamaiti a te Tangata nā tēianei uki. 31#1 Arik 10.1-10; 2 Par 9.1-12E tū katoa mai te ariki va'ine nō 'apatonga ē te tangata o tēia uki nei i te 'akavā'anga ra e 'aka'apa i a rātou, i te mea, i 'aere mai aia mei te 'openga mai o tēianei ao e 'akarongo i te tuatua pakari a Sōlomona; ē inā, tei konei tei ma'ata atu i a Sōlomona. 32#Ion 3.5E tū katoa mai te au tangata o Nīneve ma tēianei uki tangata i te 'akavā'anga ra, e 'aka'apa mai i a rātou, kua tatarā'ara 'oki rātou i te ako'anga'ia atu e Iōna; ē inā, tei konei tei ma'ata atu i a Iōna.”

Te tūrama o te kōpapa

(Mātaio 5.15; 6.22-23)

33 # Māt 5.15; Mār 4.21; Luk 8.16 “Kāre 'oki 'e tangata e tutungi i te lāmepa ka tuku atu ei ki te ngā'i muna ē ki raro ake i te 'āite ra, 'ei runga rā i te vairanga kia kite te aronga e tomo mai ki roto i te mārama. 34Ko te mārama o te kōpapa ko tō'ou mata ia. Mē tē meitaki ra tō mata, kua mārama ia tō'ou kōpapa katoa; kāreka kia kino, ka pōiri tō'ou kōpapa katoa. 35Ē tēnā na, e matakite kia kore e riro te mārama i roto i a koe na 'ei pōiri. 36Mei te mea ē, kua pini kātoatoa 'oki tō kōpapa i te mārama, ē kāre 'e ngā'i pōiri, e mārama kātoatoa ia, mei te mārama lāmepa e tūrama i a koe ki tōna kakā.”

Tō Iēsū 'aka'apa'anga i te au Phārīsea ē te au Pū'āpi'i Ture

(Mātaio 23.1-36; Māreko 12.38-40)

37I te oti'anga a Iēsū i te tuatua, kua pati maira tēta'i Phārīsea ki aia e 'aere e kaikai ki ōna ra. 'Aere atura aia, no'o atura ki te ngā'i kaikai ra. 38Vā 'ua i'ora taua Phārīsea ra i te 'ākara'anga mai, ko ia kāre i nā mua i te 'ōrei ka kai ei i te mānga. 39Kua tuatua atura te 'Atu ki aia, “Kōtou, e te au Phārīsea na, tē tāmā na kōtou i te kapu ma te mereki nā va'o ake; kāreka i a roto i a kōtou 'ua'orāi, tē kī nei ia i te noinoi 'apinga ē te kino. 40E te aronga nēneva ē, kāre āinei nā tei 'anga i a va'o, i 'anga katoa i a roto ra? 41E 'ōronga rā ki te puta'ua i tō roto i tā kōtou vairanga, 'ei reira e mā ei te au mea katoa ra i a kōtou.

42 # Lev 27.30 “Auē kōtou, e te au Phārīsea ē! Tē 'ōronga na kōtou i te nga'uru o te tu'anga o te minete ē te pegāno, ē te au rākau rikiriki rava rāi, inārā, tē kōpae nei kōtou i te 'akatere'anga tau tikāi ē te 'inangaro mou tikāi i te Atua. Ko tēia au mea tā kōtou ia e 'ākono e tikāi, ē auraka e 'akaruke i tērā au mea.

43“Auē kōtou, e te au Phārīsea ē! Tē 'inangaro na 'oki kōtou i te au no'o'anga mēmeitaki i te au sūnago ra ē te au aro'a'anga i te ngā'i 'oko'oko'anga ra. 44Auē 'oki kōtou, nō te mea, mei te va'arua turuma 'akairokore'ia ra kōtou na, ko tei 'aere vare 'ua'ia e te tangata nā runga a'o ē kāre i kite.”

45Kua pa'u maira tēta'i Pū'āpi'i Ture ki aia, nā kō maira, “E te Pū'āpi'i, kia pērā mai koe ra, kua 'akakino katoa mai koe i a mātou.”

46Kua karanga atura a Iēsū, “Auē katoa 'oki kōtou, e te au Pū'āpi'i Ture ē! Tē tuku na 'oki kōtou i te 'apainga teima'a rava ki runga i te tangata, ē kāre rava 'oki tēta'i mangamangā rima o kōtou na e mirimiri 'ua atu i taua 'apainga ra. 47Auē 'oki kōtou ē, nō te mea tē patu nei kōtou i te au tanumanga nō te au peroveta, tā tō kōtou 'ai metua i tā ra. 48'E au kite kōtou ē kua tika i a kōtou tā tō kōtou 'ai metua i rave ra. Nā rātou 'oki i tā i te au peroveta, ē nā taua peroveta rāi te tanumanga e patu nei kōtou. 49Nō reira 'oki i tuatua ai te pakari o te Atua ē, ‘E tono au i te au peroveta ē te au 'āpōsetolo ki a rātou ra, ka tā 'oki rātou i tēta'i pae, ē ka tākinga kino 'oki,’ 50ē ka umuumu'ia maira mei tēianei uki te toto o te au peroveta rava rāi i 'akamaringi'ia mei te 'akamata'anga mai o tēianei ao, 51#a: Gen 4.8; b: 2 Par 24.20,21mei te toto mai o Ābela e tae roa ake ki te toto o Zākāria tei tā'ia i rotopū i te 'atarau ē te nao ra. Koia mou tāku e karanga atu, ka umuumu'ia mai rāi te reira mei tēianei uki.

52“Auē 'oki kōtou, e te au Pū'āpi'i Ture ē, nō te mea ē, kua 'apai kē kōtou i te tāviri o te kite. Kāre kōtou 'ua'orāi i tomo ki roto, ē kua ārai katoa kōtou i te aronga e tomo ra.”

53I tō Iēsū 'akaruke'anga i taua ngā'i ra, kua unuunu tikāi te au Pū'āpi'i Ture ē te au Phārīsea i aia, ē kua 'akakōkō i aia ki te au ui'anga 'e mānganui, 54ē tē tiaki ra 'oki rātou i te tāpepe i aia nā roto i tēta'i tuatua tāna ka tuatua mai.

Currently Selected:

Luka 11: CIMRNT

Highlight

Copy