Luka 16
16
Te parabole o te 'aka'aere kāraperape
1Kua karanga katoa atura a Iēsū ki tāna au pipi, “'E 'aka'aere tō tēta'i tangata 'apinga nui. Kua tāpepe'ia mai taua 'aka'aere ra ē, kua kaimoumou aia i te 'apinga a tōna pū. 2Kua tiki atura te pū i aia, ē kua nā kō atura, ‘'E a'a tēia tāku i 'akarongo i a koe nei? Ka 'akakite mai i te tuatua i tā'au 'aka'aere'anga, nō te mea, kāre koe e riro 'aka'ou 'ei 'aka'aere.’ 3Kua tuatua 'ua i'ora taua 'aka'aere ra i roto i aia 'ua'orāi, ‘E 'akapē'ea ra au? Tē 'apai kē nei 'oki taku pū i te 'aka'aere'anga i āku nei. Kāre au e māro'iro'i i te kenu one, e 'akamā 'oki au i te patipati 'aere. 4Ā, kua kite au ē, ka 'akapē'ea au kia 'ō'ō mai rātou i āku ki roto i tō rātou ngutu'are mē 'akaruke'ia mai au i te tao'onga 'aka'aere'anga nei.’
5“Kua tiki atura aia i te tangata kaio'u tātakita'i a tōna pū ē kua ui atura aia ki te tangata mua, ‘E 'ia ā'au kaio'u ki tōku pū?’ 6Kua pa'u maira aia, ‘'E 'okota'i 'ānere paero#16.6 Eleni bātō: mei te toru 'ānere litera. 'inu 'ōlive.’ Kua karanga atura taua 'aka'aere ra ki aia, ‘E rave i tā'au 'akapapa'anga kaio'u, e no'o viviki ki raro, ka tātā ai ē, e rima ake nga'uru.’ 7Kua ui atura aia ki tēta'i kē mai, ‘Ko koe, e 'ia ā'au kaio'u?’ Kua pa'u maira aia, ‘E 'okota'i 'ānere kora#16.7 Eleni kora: mei te rua 'ānere e toru nga'uru litera. sītona.’ Kua karanga atura taua 'aka'aere ra ki aia, ‘E rave i tā'au 'akapapa'anga kaio'u, ka tātā ai ē, e varu ake nga'uru.’
8“Kua 'akapa'apa'a atura te 'atu i te 'aka'aere tikakore, nō te mea, kua 'anga'anga aia ma te kāraperape. 'E ma'ata te pakari o te tamariki o tēianei ao i tā rātou au peu i tō te tamariki o te mārama.
9“Tē 'akakite atu nei au ki a kōtou, e 'akariro i te moni tikakore 'ei tāvarenga taeake mai nō kōtou, kia 'āriki mai rātou i a kōtou ki roto i te au pū'ākapa mutukore mē pou taua moni ra. 10Ko te tāvini i 'irinaki'ia i te mea meangiti rava, kua 'irinaki katoa'ia ia i te mea ma'ata; ē ko tei tikakore i te mea meangiti ra, ka tikakore katoa ia i te mea ma'ata. 11Mē kore kōtou e 'irinaki'ia i te moni tikakore, ko 'ai te ka 'irinaki i a kōtou i te mea mou tikāi? 12Ē, mē kore kōtou i 'irinaki'ia i tā tēta'i kē ra 'apinga, nā 'ai e 'ōronga atu ki a kōtou i tōna 'ua'orāi?
13 #
Māt 6.24
“Kāre e rauka i te tāvini 'okota'i kia 'ākono i ngā pū e rua. Nō te mea, ka mākitakita atu aia i tēta'i ē ka 'inangaro atu i tēta'i, mē kāre ra, ka 'akangāteitei atu aia i tēta'i ē ka 'akava'ava'a 'oki i tēta'i. Kāre 'oki e tika i a kōtou kia tāvini i te Atua ē i te moni.”
Ēta'i tuatua a Iēsū
(Mātaio 11.12-13; 5.31-32; Māreko 10.11-12)
14I tō te au Phārīsea 'akarongo'anga i aua tuatua ra, kua 'āviri rātou i a Iēsū, nō te mea, kua noinoi ma'ata rātou i te moni. 15Kua karanga atura a Iēsū ki a rātou, “Ko kōtou na te aronga e 'akatikatika ra i a kōtou 'ua'orāi i mua i te aroaro o te tangata nei. Kua kite rā te Atua i tō kōtou ngākau. Ē ko te mea pu'apinga ma'ata i tō te tangata nei manako'anga, 'e mea pu'apingakore ia i mua i te Atua.
16 #
Māt 11.12,13 “Ko te Ture ē te au peroveta e tae 'ua atu ki a Ioane. Mei reira mai kua tūtū 'aere'ia te tuatua meitaki o te bāsileia o te Atua, ē te tangata tātakita'i te mānono ra ma te ririnui e tomo ki roto. 17#Māt 5.18'E mea rauka ngō'ie atu i te rangi ē te 'enua kia ngaro kē atu, i tēta'i ngā'i iti po'epo'e o te Ture nei kia tākore'ia.
18 #
Māt 5.32; 1 Kōr 7.10,11 “Ko tei kōpae atu i tāna va'ine ka 'akaipoipo ei i tēta'i, kua 'akaturi ia; ē tei 'akaipoipo i taua va'ine i kōpae'ia e te tāne ra, kua 'akaturi ia.”
Te tangata 'apinga nui ē Lāzaro
19“I no'o ana tēta'i tangata 'apinga nui, ko tei 'a'ao i te kāka'u vare'au ē te mānea tikāi ē tē 'akananave ra i te au rā katoa. 20Ē tēta'i tangata 'apingakore ko Lāzaro te ingoa, kua kapi roa tōna kōpapa i te 'une'une, i tukuna'ia ki te pae ngūtupa, 21ē kua kakī aia kia pangia tōna kōpū i te au mea tei topa mai mei runga mai i te kaingākai a taua tangata 'apinga nui ra. Kua 'aere katoa maira te au puakaaoa e mitimiti i'ora i te 'une'une i runga i aia.
22“E mate i'ora taua tangata puta'ua ra, 'apaina'ia atura aia e te au 'āngela ki runga rava a'o i te umauma o Āberahāma ra. E mate katoa atura taua tangata 'apinga nui ra, e tanumia i'ora. 23I roto i te pō kua pini rava aia i te mamae mate, ē kua nānā akera tōna mata ki runga, kite atura aia i a Āberahāma i te ātea kē ra, ē i a Lāzaro ki runga a'o i tōna umauma. 24I reira, kua kāpiki atura aia, nā kō atura, ‘E taku Metua, e Āberahāma, e aro'a mai i āku. E tono mai ana koe i a Lāzaro, e tūto'u aia i tōna kāuru rima ki te vai 'ei 'akaanu i tōku nei arero. Kua mamae ma'ata 'oki au i tēianei mura a'i.’
25“Kua pa'u maira a Āberahāma, ‘E tama, ka 'akama'ara ana, kua rauka i a koe tō'ou meitaki i tō ora'anga ra, ē pērā katoa i a Lāzaro te au kikino. Ē i tēianei rā, tē rekareka nei aia i konei, tē mamae rā koe. 26Ē tēia 'oki tēta'i, 'e māreva ma'ata 'oki tei tuku'ia i rotopū i a mātou ē i a kōtou, kia kore e rauka i te aronga e 'inangaro nei i te 'aere atu mei konei ki a kōtou, mē kāre mei ko nā i te 'aere mai ki a mātou nei.’ 27Kua tuatua atura aia ki a Āberahāma, ‘Tēia māri tāku e pati atu nei ki a koe, e taku metua, e tono atu koe i a Lāzaro ki te ngutu'are o taku metua, 28nō te mea, e tokorima ōku 'ai teina. Kia 'akamatakite atu aia i a rātou, ko te tae katoa mai ā'ea rātou ki roto i tēia ngā'i mamae ma'ata.’
29“Kua pa'u atura a Āberahāma, ‘Tei a rātou a Mōse ē te au peroveta ra. Kia 'akarongo atu rātou ki te reira.’ 30Kua karanga atura aia, ‘'Eia'a, e taku metua, e Āberahāma; kia 'aere atu rāi tēta'i mei te mate atu nei ki a rātou, ka tatarā'ara i a rātou.’ 31Kua pa'u atura a Āberahāma ki aia, ‘Mei te mea ē kāre rātou e 'akarongo ki a Mōse ē te au peroveta, kāre rāi rātou e 'āriki mai i te 'akamatakite'anga, noa atu rāi ē ka tū 'aka'ou mai tēta'i tangata mei te mate atu nei.’ ”
Currently Selected:
Luka 16: CIMRNT
Highlight
Share
Copy
Want to have your highlights saved across all your devices? Sign up or sign in
Cook Island Maori Revised New Testament © Bible Society of the South Pacific, 2021.
