Luka 5

Tō Iēsū kāpiki'anga i tāna au pipi mua

(Mātaio 4.18-22; Māreko 1.16-20)

1 # Māt 13.1,2; Mār 3.9,10; 4.1 Ē tē tū 'ua ra a Iēsū i te pae i te roto i Genesāreta ra, kua 'ōtotitoti 'ua te tangata katoa 'e mānganui ki aia, e 'akarongo i te tuatua a te Atua. 2E kite atura aia i e rua poti i te pae roto, kāre te aronga ravakai i roto, tei uta rātou e tāmā ra i tā rātou kupenga. 3'Aere atura aia ki runga a'o i tēta'i poti, nō Simona 'oki te reira, ē kua pati atura ki aia e toko aia ki tai i'o kia ātea mei uta mai. Kua no'o i'ora a Iēsū ki raro, ē mei taua poti maira kua 'āpi'i maira i te tangata tini.

4E oti akera tāna tuatua, kua karanga atura aia ki a Simona, “'Ō atu ki te moana, tuku atu ei i tā kōtou kupenga kia rauka mai te ika.”

5 # Ioa 21.3 Kua pa'u maira a Simona, nā kō maira, “E te pū, i tautā 'ua ana mātou mei te a'ia'i e ao ake nei, ē kāre 'e ika i rauka mai. Kia tuatua mai rā koe, ka tuku rāi au i te kupenga ki raro.” 6#Ioa 21.6Ē kia pērā i'ora rātou, kua pini rava akera i a rātou tēta'i kōpū ika; e motumotu atura tā rātou kupenga. 7Kua kamokamo atura rātou ki ēta'i o rātou i runga i tēta'i poti kia 'aere mai rātou e tauturu. Kua 'aere maira 'oki rātou, kua 'akakī i'ora i ngā poti e rua, e vaitata rava akera i te tomo.

8Ē kia kite akera a Simona Pētero i te reira, tīpapa i'ora aia ki raro i te pae turi nō Iēsū, tuatua maira, “E 'aere kē atu koe, e te 'Atu, 'e tangata 'ara 'oki au.”

9Pō'itirere 'oki aia ē rātou katoa nō te ma'ata o taua ika i rauka mai i a rātou ra. 10Mei te reira katoa 'oki a Iākōbo rāua ko Ioane, ngā tamariki a Zebedaio, 'e taeake ravakai piri 'oki rāua nō Simona. Kua tuatua atura rā a Iēsū ki a Simona, “'Eia'a e mataku! Mei tēianei atu 'e tangata tā'au e rauka mai.”

11E tae maira tō rāua puke poti ki uta, 'akaruke atura rātou i te au mea kātoatoa, ē kua āru maira i a Iēsū.

Tō Iēsū 'akaora'anga i tēta'i tangata lēpera

(Mātaio 8.1-4; Māreko 1.40-45)

12Tei tēta'i 'ōire a Iēsū, ē inā, kua 'aere maira tēta'i tangata, kua kī rava i te maki lēpera. Ē i tōna kite'anga mai i a Iēsū, tīpapa i'ora aia ki raro, pati maira ki aia, nā kō maira, “E te 'Atu, mē ka tika i a koe na, kia mā au i a koe.”

13Kua 'akatoro atura a Iēsū i tōna rima, 'akatūkia atura i aia, nā kō atura, “Kua tika ia i āku, kia mā koe.” Peke kē atura tōna lēpera i reira. 14#Lev 14.1-32Ē kua karanga atura a Iēsū ki aia, “Auraka rava e 'akakite ki tēta'i 'ua atu tangata. E 'aere rā e 'akaāri i a koe 'ua'orāi ki te ta'unga ra, ē e 'apai atu nō te tāmā'anga i tei 'akaue'ia e Mōse 'ei 'akakite'anga atu ki a rātou.”

15Vāvāria rava atura tōna rongo, ē 'e urupū ma'ata tei 'uipā katoa mai e 'akarongo i aia, ē kua 'akaora'ia rātou i tō rātou maki. 16Ē kua riro kē atura aia ki te ngā'i motuta'a e pure atura.

Tō Iēsū 'akaora'anga i tēta'i tangata maki 'akangoru

(Mātaio 9.1-8; Māreko 2.1-12)

17E tae akera ki tēta'i rā i a Iēsū e 'āpi'i ra, tē no'o vaitata maira te au Phārīsea ē te aronga 'āpi'i Ture, tei 'aere mai mei te au 'ōire rikiriki rava rāi i Galilea ē Iūdea, ē mei Iērūsalēma katoa 'oki. Tei a Iēsū te mana o te 'Atu i te 'akaora i te tangata. 18Ē inā, tē 'apai maira ēta'i tangata i tēta'i 'akangoru i runga i te ro'i. Tē kimi rāvenga ra rātou i te 'apai mai i aia ki roto, e tuku ki mua i a Iēsū. 19Ē kāre akera 'e mataara i kitea nō te ra'i o te tangata, kake akera rātou ki runga a'o i te 'are, kua tuku i'ora i aia ki raro ma te ro'i iti katoa nā roto i tēta'i puta o te tāpoki 'are, ki mua i a Iēsū i rotopū i te tangata. 20E kite atura a Iēsū i tō rātou 'akarongo, kua karanga atura aia ki te tangata 'akangoru, “E tama, kua 'akakore'ia tā'au 'ara.”

21Kua 'ēumiumi i'ora te au Pū'āpi'i Ture ē te au Phārīsea, nā kō akera, “Ko 'ai tēia e tuatua nei i te tuatua 'akakino Atua? Ko 'ai te ka rauka i te 'akakore i te 'ara, māri rā ko te Atua anake 'ua?”

22Tē nakiro akera a Iēsū i tō rātou 'ēumiumi'anga, ē kua karanga atura ki a rātou, “'E a'a kōtou e 'ēumiumi 'ua na i roto i tō kōtou ngākau? 23Ko tē'ea te mea rave ngō'ie atu, ko te tuatua āina, ‘Kua matara tā'au 'ara,’ mē kore ko te tuatua āina, ‘Ka tū ki runga, ka 'aere’? 24Kia kite rā kōtou ē 'e mana tō te Tamaiti a te Tangata i te ao nei kia 'akakore i te 'ara.” Kua nā kō atura ki taua 'akangoru ra, “Tē karanga atu nei au ki a koe, ka tū ki runga, ka rave i tō ro'i, ka 'aere ki tō'ou ngutu'are!”

25Kua tū akera taua tangata 'akangoru ra ki runga i reira rāi i mua i tō rātou mata, rave i'ora i tōna moenga, 'aere atura ki tōna ngutu'are ma te 'akakakā'anga i te Atua. 26Roko'ia anake i'ora rātou e te ūmere ma'ata, ē kua 'akakakā atura i te Atua. E kī akera rātou e te mataku, nā kō akera, “'E au mea tūkē ma'ata tā tātou i kite i'o i tēianei rā.”

Te kāpiki'anga a Iēsū i a Levi

(Mātaio 9.9-13; Māreko 2.13-17)

27Ē muri akera, 'aere atura a Iēsū ki va'o, e kite atura aia i tēta'i tangata ko'i tero, ko Levi te ingoa, i te no'o'anga i te 'are ko'i'anga tero. Kua karanga atura aia ki aia, “Ka āru mai i āku.” 28Kua tū akera a Levi ki runga, vao'o atura i te 'apinga tini, e āru atura i a Iēsū.

29Kua 'akatupu i'ora a Levi i tēta'i kaingākai ma'ata nō Iēsū i tōna 'ua'orāi 'are. Ē 'e mānganui te aronga ko'i tero ē ēta'i atu tangata i no'o i taua kaingākai ra ma rātou katoa. 30#Luk 15.1,2Kua kō'umu'umu i'ora te au Pū'āpi'i Ture ē te au Phārīsea ki tāna au pipi ra, nā kō atura, “'E a'a kōtou i kai katoa ai ē i inu ei 'oki ma te aronga ko'i tero ē te aronga 'ara ra?”

31Kua pa'u maira a Iēsū ki a rātou, nā kō maira, “Kāre nō te aronga meitaki te ora'anga te ta'unga, nō te aronga maki rā. 32Kāre au i 'aere mai e kāpiki i te aronga tuatua tika, māri rā i te aronga 'ara kia tatarā'ara.”

Te tūranga nō runga i te 'akakore'angā kai

(Mātaio 9.14-17; Māreko 2.18-22)

33Kua karanga atura tēta'i pāpāki tangata ki a Iēsū, “E 'akakore putuputu ana te au pipi a Ioane i te kai, ē tā te au Phārīsea 'oki ma te pure katoa, kāreka tā'au tē kai 'ua nei ia ē tē inu ra.”

34Kua tuatua maira a Iēsū ki a rātou, “Ka rauka āina i a kōtou i te pati i te au manu'iri 'akaipoipo'anga kia 'akakore rātou i te kai i te tāne 'ōu e no'o ra i rotopū i a rātou? 35Ka tae mai te tuātau e 'apai kē'ia ai te tāne 'ōu ra mei rotopū i a rātou, ē i aua rā ra rātou e 'akakore ei i te kai.”

36Kua tua maira a Iēsū ki a rātou i tēianei parabole: “Kāre tēta'i 'ua atu tangata e kō'ae i tēta'i potonga mei tēta'i kāka'u 'ōu mai, ka pānanaki atu ei ki runga i tēta'i kāka'u piro. Kia pērā aia ra, ka nga'ae te kāka'u 'ōu, ē te potonga 'ōu ra kāre e tau i te mea piro. 37Kāre katoa 'e tangata e tuku i te uaina 'ōu ki roto i te au 'āriki ta'ito ra. Kia pērā aia ra, e nga'ae te 'āriki i taua uaina 'ōu ra, maringi atura aia, e kino katoa atura te 'āriki. 38Kia tuku'ia rā te uaina 'ōu ki roto i te 'āriki 'ōu e tikāi. 39Ē kāre 'oki tēta'i 'ua atu tangata tei inu ana i te uaina ta'ito ra, e kakī i te uaina 'ōu. E tuatua 'oki aia ē, ‘Te uaina ta'ito ra te mea meitaki.’ ”

Currently Selected:

Luka 5: CIMRNT

Highlight

Copy