Luka Nō runga i tēia puka
Nō runga i tēia puka
Nō te tangata kātoatoa te aro'a 'ua o te Atua! Kua 'aere mai a Iēsū ki tēianei ao 'ei 'Akaora nō te au 'iti tangata kātoatoa. Ko ngā tumu manako ma'ata ēia e rua i roto i tēia puka nei.
'E ma'ata te au tua rongonui tā Iēsū i tā'anga'anga 'ei 'āpi'i'anga nāna i te aro'a 'ua o te Atua, tei roto anake 'ua rātou i te 'ēvangelia i tātā'ia e Luka:
Te tangata Sāmāria meitaki (10.25-37)
Te māmoe ngaro (15.1-7)
Te tama tamāroa ngaro ra (15.11-32).
Ko Luka anake rāi tei 'akakite mai ē, i 'ātoro ana a Iēsū i te ngutu'are o tēta'i tangata ko'i tero mākitakita'ia (19.1-10), ē kua poroaki i te ora'anga pārataito ki tēta'i o ngā tangata rave kino e mate atura (23.39-43).
Ko Luka tei tā'iku putuputu roa atu i te Vaerua o te Atua i rotopū i te au tātā tuatua o te kōreromotu 'ōu. 'Ei 'ākara'anga: tei roto te mana o te Vaerua i a Ioane Bāpetīto mei te 'ati'anga mai rāi i 'ānau mai ei aia (1.15). Ē kua poroaki 'oki te 'āngela ki a Māria ē, “Ka 'eke mai te Vaerua Tapu ki runga a'o i a koe. Ē nō reira, ka tuatua'ia tēnā na tamaiti tapu i te Tamaiti nā te Atua” (1.35). Kua āru a Iēsū i te Vaerua (4.1,14, 18; 10.21), ē kua 'āpi'i ē, ko te Vaerua ko tā te Atua tao'ongā rima ma'ata rava atu ia (11.13).
Kua 'akaāri mai a Luka i tō te pure pu'apinga ma'ata ki a Iēsū. E pure putuputu ana a Iēsū: i muri ake i tōna bāpetīto'anga'ia (3.21), i mua ake i tōna 'iki'anga i te au pipi ta'i nga'uru mā rua (6.12), i mua ake i tōna ui'anga ki tāna ua pipi ē, ko 'ai tikāi aia i tō rātou manako (9.18), ē i mua ake ka tuku atu ei aia i tōna vaerua i runga i te sātauro (23.34,46). Mei roto mai i a Luka, ka kite tātou e toru tua tā Iēsū i taki 'ei 'āpi'i nō runga i te pure (11.5-9; 18.1-14).
Ko tēta'i tu'anga pu'apinga i tā Luka tua, koia te 'akaāri'anga mai aia i te tū tangi o Iēsū i te aronga puta'ua: kua tūtū'ia te 'ēvangelia ki a rātou (4.18; 7.22), kua tae te 'akameitaki'anga a te Atua ki runga i a rātou (6.20), kua pati'ia rātou kia 'aere mai ki te umukai ma'ata (14.13,21), kua 'apaina'ia atu te tangata puta'ua ra a Lāzaro ki runga i te rangi e te au 'āngela (16.20,22), ē kua 'akaue a Iēsū i tāna au pipi kia 'oko atu i tō rātou au 'apinga ē kia 'ōronga atu i te moni tei rauka mai nā te puta'ua (12.33).
'Ei 'akapāpū ē, ka 'āriki te aronga e tatau ē kua 'akatū kōpapa ora'ia mai a Iēsū mei te mate mai, kua 'akakite mai a Luka ē, kua kai a Iēsū i tū 'aka'ou maira i tēta'i mānga ika (24.42,43). Kāre tākiri 'e ngā'i 'ēkōkō nō runga i a Iēsū i tū 'aka'ou maira, kāre aia i te tūpāpaku. 'E mea tika tikāi tōna 'akatū 'aka'ou'anga'ia mai mei te mate maira, ē kāre i te mea mānakonako'ia e tēta'i 'ua atu tangata.
Kua tātā katoa rāi a Luka i tēta'i puka 'aka'ou, Te au 'Anga'anga a te au 'Āpōsetolo, 'ei 'akaāri mai ē, 'e a'a tei tupu ki te au pipi a Iēsū i muri ake i te 'akatū'anga'ia mai aia mei te mate mai ē te 'apaina'ia atu'anga ki runga i te rangi. Tēia 'ua te 'ēvangelia, 'e puka taurua tāna 'ei 'akaoti atu ei i te tua.
Kua 'akamutu a Luka i tēia puka mua tāna i tātā nā roto i te 'akakite'anga mai ē, kua 'oki a Iēsū ki runga i te rangi. Inārā, i mua 'ua ake tikāi ka 'akaruke mai ei a Iēsū, kua tuatua mai aia ki tāna au pipi:
“Ko tēia 'oki tei tātā'ia ra: ka tākinga kino'ia te Mesia, ē ka tū 'aka'ou mai mei te mate mai i te pō toru ra. Ka tūtū 'aere'ia te tuatua o te tatarā'ara nō te 'akakore'angā 'ara i roto i tōna ingoa ki te au 'iti tangata rava rāi, ē kia 'akamata'ia mei Iērūsalēma atu nei. Ē ko kōtou rāi 'oki te au kite i ēia mea nei” (24.46-48).
Te 'akano'ono'o'anga o tēia puka
1. 'E a'a a Luka i tātā ai i tēia puka 1.1-4
2. Te 'ānau'anga o Ioane Bāpetīto rāua ko Iēsū 1.5—2.52
3. Te karere a Ioane Bāpetīto 3.1-20
4. Te bāpetīto'anga'ia ē te tīmata'anga'ia a Iēsū 3.21—4.13
5. Te 'anga'anga 'ēvangelia a Iēsū i Galilea 4.14—9.50
6. Tē 'aere nei a Iēsū mei Galilea atu ki Iērūsalēma 9.51—19.27
7. Tō Iēsū 'akavā'anga ē te mate'anga 19.28—23.56
8. Tē ora nei rāi a Iēsū 24.1-12
9. Tō Iēsū mama'anga mai ē te 'aere atu'anga ki runga i te rangi 24.13-53
Currently Selected:
Luka Nō runga i tēia puka: CIMRNT
Highlight
Share
Copy
Want to have your highlights saved across all your devices? Sign up or sign in
Cook Island Maori Revised New Testament © Bible Society of the South Pacific, 2021.