Mātaio 4

Tō Iēsū tīmata'anga'ia

(Māreko 1.12-13; Luka 4.1-13)

1 # Ebe 2.18; 4.15 I reira, kua arataki'ia a Iēsū e te Vaerua ki roto i te mēdēbara ra kia tīmata'ia e te Tiāporo ra. 2Kua 'akakore i'ora aia i te kai e 'ā nga'uru pō ē e 'ā nga'uru 'oki ao, e oti akera, pongi i'ora aia. 3Kua 'aere maira te Tīmata ra, nā kō maira ki aia, “'E Tamaiti koe nā te Atua ra, ka karanga atu koe ki tēianei au toka kia riro mai 'ei kai.”

4 # Deut 8.3 Kua pa'u atura a Iēsū, nā kō atura, “Kua tātā'ia ē, ‘Kāre ē ko te mānga anake ra te mea e ora ai te tangata nei, ko te au mea katoa rā nō roto mai i te va'a o te Atua ra.’ ”

5I reira, kua arataki te Tiāporo i aia ki te 'ōire tapu ra, ē kua tuku atura i aia ki runga a'o i te ngā'i teitei rava o te 'iero ra, 6#Sal 91.11,12ē kua karanga atura ki aia, “'E Tamaiti koe nā te Atua ra, 'akatopa atu koe i a koe 'ua'orāi ki raro; kua tātā'ia 'oki ē,

‘Ka 'iku'iku aia i tāna au 'āngela i a koe.

Ka mou rātou i a koe ki tō rātou rima,

ko te tūkia 'ua atu ā'ea tō vaevae ki te toka.’ ”

7 # Deut 6.16 Kua tuatua maira a Iēsū ki aia, “Kua tātā katoa'ia ē, ‘Auraka koe e 'akakōkō atu i te 'Atu, i tō'ou Atua ra.’ ”

8Kua arataki 'aka'ou atura te Tiāporo i aia ki runga i tēta'i maunga teitei rava, ē kua 'akaāri maira ki aia i te au bāsileia katoa o te ao nei ē tō rātou kakā, 9ē kua tuatua maira ki aia, “E 'ōronga atu au i tēianei au mea katoa ki a koe, kia tūpou mai koe ki raro e 'akamori mai i āku.”

10 # Deut 6.13 Kua pa'u atura a Iēsū ki aia, “E 'aere kē atu koe, e Sātani, nō te mea kua tātā'ia ē, ‘Ko te 'Atu tō'ou Atua ra tā'au e 'akamori, ē ko ia anake rāi tā'au e tāvini.’ ”

11I reira, kua 'akaruke maira te Tiāporo i aia, ē inā, 'e aronga 'āngela tei 'aere mai ē kua mātuāpuru maira i aia.

Tē 'akamata nei a Iēsū i tāna 'anga'anga i Galilea

(Māreko 1.14-15; Luka 4.14-15)

12 # Māt 14.3; Mār 6.17; Luk 3.19,20 I tōna 'akarongo'anga ē, kua tīria'ia a Ioane ki roto i te 'are 'āuri, kua 'aere atura a Iēsū ki Galilea. 13#Ioa 2.12'Akaruke i'ora aia i a Nāzarēta, 'aere atura e no'o atura ki Kāperenāuma i te pae roto ra, i te kōtinga i te 'enua o Zēbulūna ē Nāphatari, 14kia tupu tei 'akakite'ia mai nā roto i te peroveta ko Īsaia, i te nā kō'anga ē,

15 # Isa 9.1,2 “Te 'enua o Zēbulūna, ē te 'enua o Nāphatari,

nā te mataara ki ta'atai, i tērā pae i Iōrīdāna,

ko ia a Galilea i ō te 'ētene ra.

16Ko te 'iti tangata i no'o i te pōiri ra,

kua 'ākara ia i te mārama ma'ata;

ē te aronga i no'o i te ngā'i o te mate ra,

kua 'iti'ia rātou e te mārama.”

17 # Māt 3.2 Mei te reira tuātau mai, kua 'akamata a Iēsū i te tūtū 'aere i te nā kō'anga ē, “Ka tatarā'ara, nō te mea, tē vaitata mai nei te bāsileia o te ao.”

Tō Iēsū kāpiki'anga i tāna au pipi mua

(Māreko 1.16-20; Luka 5.1-11)

18Ē tē 'aere ra a Iēsū nā te pae roto i Galilea ra, kite atura aia i tēta'i tokorua tangata, i a Simona, ko tei karanga'ia i a Pētero ra, ē tōna teina ko Ānēderea, i te tuku'anga i te kupenga i taua roto ra; 'e puke ravakai 'oki rāua. 19Kua karanga atura aia kia rāua, “Ka āru mai kōrua i āku, e 'akariro au i a kōrua 'ei ravakai tangata.” 20'Akaruke i'ora rāua i tā rāua kupenga i reira, ē kua āru maira i aia.

21Ē tē 'aere atura aia mei te reira ngā'i, kite atura i e tokorua rāi tangata, ko Iākōbo a Zebedaio ra ē tōna teina ko Ioane, tei runga i te poti ē tō rāua metua ko Zebedaio, tē 'ono ra i tā rātou au kupenga; kua kāpiki atura aia i a rāua. 22'Akaruke i'ora rāua i te poti i reira rāi ē tō rāua metua, āru atura i aia.

Tē tūtū 'aere ra ē tē 'āpi'i ra a Iēsū ma te 'akaora i te maki

(Luka 6.17-19)

23 # Māt 9.35; Mār 1.39 'Aere atura a Iēsū nā Galilea katoa e kako rava ake i te 'āpi'i'anga i roto i tō rātou au sūnago ra, ē te tūtū 'aere'anga i te 'ēvangelia o te bāsileia, ē te 'akaora'anga i te au tū maki rava rāi, ē te au mate katoa o te 'iti tangata. 24Tutuki atura tōna rongo e pini rava ake a Sūria; ē kua 'apai maira rātou i te aronga maki katoa ki aia ra, ko tei mate i tērā maki i tērā maki ē te mamae, ē tei uru'ia e te dēmoni ra, ē te au nēneva, ē te au 'akangoru; kua 'akaora atura aia i a rātou. 25'E motu'anga tangata ma'ata tei āru mai i aia nō Galilea mai, nō Dēkāpoli, nō Iērūsalēma, nō Iūdea ē nō tērā pae mai i Iōrīdāna.

Currently Selected:

Mātaio 4: CIMRNT

Highlight

Copy