Māreko 7

Te 'āpi'i'anga a te 'ui tupuna

(Mātaio 15.1-9)

1Kua 'uipā maira ki a Iēsū i reira te au Phārīsea ē ēta'i Pū'āpi'i Ture tei 'aere mai mei Iērūsalēma maira. 2Ē kua 'ākara rātou i ēta'i pipi āna i te kai'anga ma te rima vi'ivi'i, koia 'oki, te rima 'ōreikore'ia ra. 3E 'ākono rāi 'oki te au Phārīsea ē te Ngāti Iūda katoa i te peu i tuku'ia mai e te aronga ta'ito ra, kāre e kai 'ua i te kai, e nā mua rā i te 'ōrei i te rima, 4ē kāre 'ua e kaikai kia 'oki mai rātou mei te ngā'i 'oko'oko'anga ra, e nā mua rā i te 'ōrei. 'E mānganui te au peu kē atu tā rātou e 'ākono, koia 'oki, i te 'ōrei'anga i te au kapu ē te au pāni ē te au kapu veo ra ē te au ro'i 'oki.

5Kua ui maira te au Phārīsea ē te au Pū'āpi'i Ture ki a Iēsū, “'E a'a tā'au au pipi nei i kore ei i 'ākono i tei tuku'ia mai e te aronga ta'ito ra? Tē kai nei rā rātou i te kai ma te rima 'ōreikore'ia ra.”

6 # Isa 29.13 Kua pa'u atura a Iēsū ki a rātou, nā kō atura, “Tē tika 'ua ra tā Īsaia i tōna toto'u'anga i a kōtou, e te au tangata tāpikipiki ē, mei tei tātā'ia ra ē,

‘Tē 'akangāteitei mai nei tēianei aronga tangata i āku ki tō rātou ngutu,

tei te ātea kē roa rā tō rātou ngākau i āku.

7'E 'akamori'anga pu'apingakore ra tā rātou i āku,

ē ko tā rātou 'āpi'i'anga rā,

nā te tangata 'ua 'oki te reira i tuku mai.’

8“Tē 'ākono nei kōtou i tei tuku'ia mai e te tangata nei ma te 'akaruke i tā te Atua ra 'akaue'anga.”

9Ē kua nā kō atura aia ki a rātou, “'E kimi'anga rāvenga meitaki tā kōtou i te 'akakore i te 'akaue'anga a te Atua kia 'ākono'ia tā kōtou 'ua'orāi 'iku'iku'anga. 10#a: Exo 20.12; Deut 5.16; b: Exo 21.17; Lev 20.9I tuatua mai 'oki a Mōse ē, ‘E 'akangāteitei atu i tō metua tāne ē tō metua va'ine,’ ē pērā katoa atura, ‘Ko tēta'i 'ua atu tei 'akakino atu i tōna metua tāne, mē kāre ra metua va'ine, kia tāmate tākiri roa'ia ia.’ 11Tē tuatua nei rā kōtou ē, Mē nā kō atu tēta'i tangata ki tōna metua tāne, mē kāre ra metua va'ine ē, ‘Ko tēta'i 'ua atu tauturu te ka rauka i a koe mei konei i āku nei, e Corban ia,’ koia 'oki, 'e 'ātinga tapu ia ki te Atua. 12Kāre e tika 'aka'ou i aia kia tākinga meitaki aia i tōna metua tāne, mē kāre ra metua va'ine. 13Tē pērā nei 'oki kōtou i te 'akakore'anga i tā te Atua ra tuatua nā roto i te au 'iku'iku'anga tā kōtou e 'āpi'i atura. Ē mei te reira tā kōtou e rave nei 'e mānganui.”

Ko te au mea e vi'ivi'i ei tēta'i tangata

(Mātaio 15.10-20)

14Kua kāpiki 'aka'ou atura a Iēsū i te urupū tangata ki aia, ē kua nā kō atura ki a rātou, “E 'akarongo mai ana i āku nei, ko kōtou rava rāi kia nakiro. 15Kāre rava e vi'ivi'i te tangata nei kia 'aere tō va'o ra ki roto i aia; ko te au mea rā tei 'aere atu ki va'o nō roto mai i aia ra e vi'ivi'i ei te tangata.”#7.15 Kua tātā'ia te 'īrava i roto i ēta'i pōkaikai tuatua, kāre rā i roto i te au pōkaikai ta'ito tikāi: 16 'E taringa tōna 'ei 'akarongo'anga ra, e 'akarongo aia.

17Kia vai'o atu aia i te urupū tangata ra, ē 'aere maira ki roto i te 'are, kua ui maira tāna au pipi ki aia i taua parabole ra. 18Ē kua pa'u atura aia ki a rātou, “Kāre rāi kōtou i mārama ana? Kāre rāi kōtou i kite ē, ko te au mea katoa nō va'o kia 'aere ki roto i te tangata, kāre aia i vi'ivi'i i te reira? 19Kāre 'oki te reira i 'aere ki roto i tōna ngākau, ki roto rā i tōna kōpū, e 'akaruke'ia ki va'o.” Nā roto i tēia tuatua i 'āpi'i a Iēsū ē, 'e mā te au kai katoa.

20Ē kua nā kō atura aia, “Ko te mea tei 'aere mai nō roto mai i te tangata, ko te mea ia e vi'ivi'i ei te tangata, 21nō te mea, nō roto mai i te ngākau o te tangata te au manako kikino, te moeāana, te keiā, te tā tangata, 22te 'akaturi, te noinoi 'apinga, te manava kino, te pikika'a, te kanga, te vare'ae, te 'akakino Atua, te nengonengo ē te 'āuouō. 23Nō roto mai 'oki taua au mea kikino i te tangata, ē ko te au mea ia e vi'ivi'i ei te tangata.”

Te 'akarongo ma'ata o tēta'i va'ine

(Mātaio 15.21-28)

24Kua tū akera a Iēsū ki runga, 'aere atura mei reira ki te tu'anga 'enua o Tūria ra. Tomo atura aia ki roto i tēta'i 'are, i 'inangaro 'oki aia auraka tēta'i tangata kia kite. Kāre rā aia i ngaro. 25Tēta'i va'ine 'oki, i uru'ia tāna tamā'ine iti e te vaerua vi'ivi'i, kua 'akarongo akera aia nō runga i a Iēsū, ē kua 'aere maira, 'akatopa maira ki tōna pae vaevae. 26'E Eleni 'oki taua va'ine ra, nō Phēnia Sūria. Kua pati maira aia ki a Iēsū, kia tuaru aia i te dēmoni mei roto mai i tāna tamā'ine ra. 27Kua karanga rā a Iēsū ki aia, “Kia pangia nā mua te tamariki e tikāi. Kāre i te mea meitaki i te rave i te kai a te tamariki ē ka titiri atu ei nā te au punua kurī.”

28Kua pa'u maira aia ki a Iēsū, nā kō maira, “E te 'Atu, tē kai ra rāi te au punua kurī i raro i te kaingākai i te 'unga'ungā kai a te tamariki.”

29Kua karanga atura a Iēsū ki aia, “Nō tēnā tuatua nā'au, ka 'aere ki te kāinga. Kua riro te dēmoni i roto i tō tamā'ine ki va'o.”

30Ē kua 'aere atura aia ki te ngutu'are, ē kua kitea i'ora tāna tamā'ine ki runga i te ro'i, ē kua riro te dēmoni ki va'o.

Tē 'akaora nei a Iēsū i te tangata taringa turi ē te mūrare

31Kua 'akaruke atura a Iēsū i te tu'anga 'enua o Tūria, 'aere atura nā roto i Sīdona ki te pae roto i Galilea i rotopū i te 'enua ra i Dēkāpoli. 32Kua arataki maira rātou i tēta'i tangata taringa turi ē te mūrare ki aia ra, ē kua pati 'akatenga maira ki aia kia tuku atu i tōna rima ki runga a'o. 33Kua arataki kē atura a Iēsū i aia i taua urupū tangata ra, tuku i'ora i tōna mangamangā rima ki roto i ōna taringa, tūtu'a akera i te 'uāvare ē kua 'akatūkia atura i tōna arero ki tōna rima. 34Kua nānā akera ki runga i te rangi, ngunguru i'ora, ē kua nā kō atura ki aia, “Epheta!” koia 'oki, “Kia pu'ata!”

35Pu'ata i'ora ōna taringa, matara akera 'oki tōna arero, meitaki maira tāna tuatua i reira ra. 36Kua ako atura a Iēsū i a rātou, auraka rava rātou e 'akakite ki te tangata. Te ma'ata atu i aia i te ako atu i a rātou ē, “'Eia'a,” te ma'ata rava atu ia i tō rātou 'akakite 'aere'anga. 37Kua vā ma'ata i'ora rātou, nā kō akera, “'E mea tika rava te au mea kātoatoa tāna e rave nei; tē 'akapu'ata nei aia i te turi ē tē tuatua nei te mūrare i aia.”

Currently Selected:

Māreko 7: CIMRNT

Highlight

Copy