URA TIN AYRA 27
27
Yakob ɓaɗ ŋgolla vi wayamma, Ezawra, kiyo
1Isaak mbuɗ ki maari, irim maŋ kiyo, ka wi gay oloɗi. Nam yi gorom ma ŋgolna Ezaw ana, «Goonna.» Ezaw ana, «An wanni.» 2Isaak dam ana, «Cemmi an mbuɗ ki maari, an ka wi buurun ma miɗnaɗi. 3Cemi yow tlegeyeŋ suu ndonda ugi mbuuru maŋga u dogolora, can tliw ay ci. 4Lan ti ma jivi ma an minimma, ɦanna ay an tam tini, paɗ vunun ki kaŋ jew bay an miɗ tuwa.»
5Rebeka hum boy ma Isaak dam maŋ goromma, Ezawna. Ezaw gi tam tuɗ ŋgoo a hal tliwna ay maŋ bumba gaw. 6Rebeka di goroɗna Yakob ana, «Gola an hum buŋ di wayaŋŋa, Ezaw, ana, 7Tuɗ can tliwna ay mbay lan ti ma jivina an ti tini, hin paɗ vunun ki kaŋ fok Yawe jew bay an miɗ tuwa. 8Cecemi, goonna, humun boy ma an daŋŋana haa. 9Tuɗ ha duk ɦugunina, yowon gor ɦuguni suu jivi ay mba', an li ti ma jivina maŋ buŋu ko nam minda na. 10Aŋ hin tuɗ ɦal ti namma ha maŋ buŋu, nam tam tini paɗ vunum ki kaŋ jew bay nam miɗ tuwa.»
11Yakob hoŋ dira maŋ sum ana, «Wayanna, Ezaw, tam tlimiɗi, tan ka tlimiɗɗi. 12Bun li hin laman tan kalani an hin mbuɗ irimmi sa kaboyna. Ni mbaaran kan ni givunna na ɗow ka paɗvunnaɗi.» 13Sum dam ana, «Goonna, ko givunna namma hoŋŋi kan an na ɗow. Humun vununu tuɗ yowon ay gor ɦuni suu mbana ɗow.» 14Yakob tuɗ yowosi, mbaarasi ay maŋ sumu, ndaɗ hin li ti ma jivina ko bum minda na. 15Rebeka tuɗ yow baraw ma jivina vi goroɗ ma ŋgolna, Ezaw, ma ay kalafi varaɗna, hin cukum ta goroɗ ma goona, Yakob. 16Ndaɗ ɗuɗum bak gor ɦunina ki kom may u delemba hindi duk ɦawara may. 17Ndaɗ ɦal ti ma jivi ma ndaɗ lamma u komnjodina may ko goroɗna Yakob.
18Nam mbay eg bum dam ana, «Bunu.» Isaak ana, «An wanni. Ni aŋ gege goonna?» 19Yakob hoŋ di bum ana, «Ni an, Ezaw, goroŋ ma ŋgolna. An li dlara aŋ dandara ay wa, col kolo kaki ha uŋu, kom tliw ma an caŋŋa ayna, a aŋ hin paɗ vunuŋ ki kanda.» 20Isaak joɓom ana, «Goonna aŋ fi ay na zak gaw su?» Yakob hoŋ dira ana, «Yawe, Looŋŋa, mbaarana ay fokon zakŋi namu.» 21Isaak di Yakob ana, «Ҥuɗ taŋ ay egen, an lamaŋu lini aŋ goonna, Ezaw, gasi ɗowba ka nambi su?» 22Yakob ɦuɗ tam ay eg bum Isaak ɦuɗni, nam lamamu hin di ana, «Della ni a del Yakob, kona ni a ko Ezaw may.» 23Nam wam kaɗi kay kom ki u tlimiɗta ko wayamma Ezaw na. Nam gijaŋ a paɗ vunum ki kamba.
24Nam joɓom ana, «Aŋŋi goonna Ezaw gasi su?» Yakob hoŋom dira ana, «Ni anu.» 25Isaak dam ana, «Ҥan tliw ma goronna cannana aya, an komom kommi an tanda paɗ vunun ki kaŋu.» Yakob ɦamma. Nam hin komomu. Nam ɦam sum veŋŋa ay nam hin cam may. 26Bum Isaak dam ana, «Ҥuɗ taŋ ay egen tani huwa goonna, mboɗon huruŋu.» 27Yakob ɦuɗ tam ay mboɗom hurumu, Isaak his baraw mamma cuk kamu, nam paɗ vunum ki kam di ana,
«His goonna ni ko sene
ma Yawe paɗ vunum ki kamma na.#Heb. 11.20
28Ko Lona ɦaŋ mbaɗagira ay kolora,
sene maŋŋa jiv tlena cocoo,
wana u sum veŋŋa laŋ cocoo.
29Ko suuna halaŋ li ni gaa uŋu,
ko njaf suuna halaŋ goɓ kaŋga fokoŋu.
Aŋ li ni a ŋgolla vi gorseŋŋa.
Ko goryoŋ suŋŋa lay goɓ kaŋga ni fokoŋu.
Sa ma gaŋ vunnana sa hin gam vunna may,
sa ma paɗ vunum ki kaŋŋa paɗvunna hin li kam may.»#Ura 12.3
30Isaak daɓ paɗta paɗvunum ki kay Yakobpa daɓmi. Yakob kal ay ki bunsu may ni, wayamma Ezaw ay ndonda kal ay vo may. 31Ezaw li ti ma jivina, tlam ay maŋ bum may. Nam di bum ana, «Col ki koloo, kom tliw ma goroŋŋa caŋŋa ayna, a aŋ kay taŋga hin paɗ vunuŋ ki kanu.» 32Bum Isaak joɓom ana, «Ni aŋ gege?» Nam hoŋom dira ana, «Ni an goroŋŋa ŋgolna, Ezaw.» 33Isaak hum na ni mbuɗ ki ndaana, tam dlaki cocoo. Nam di ana, «Sa ma hin ci tliwna ay ki jew ɦanna an komom ki, paɗvunun ki kam jew bay aŋ mbana ni gege? Sa namma vunna ki kam paɗi da.»
34Hu li ma Ezaw hum boy ma bum damma na ni, nam oo um kolo tiina eŋga u hurum ma haɗta ana, «Paɗ vunuŋ ki kan may, bunu.» 35Isaak dam ana, «Wayaŋŋa mbay u mbeleŋŋa tlaŋ paɗvun maŋŋa kiwa.» 36Ezaw di ana, «Ni ko sem ma tin ana Yakobma naɗi su? Kay nam lan irin ki cemi yam mba'. Nam ɓaɗan ŋgol manda kiyo, hin ɓaɗan paɗvun manna ki cemi olo. Na ni aŋ hin paɗ vun ma daŋ ka man na ndeɗi su?»#Ura 25.29-34 37Isaak hoŋ di Ezaw ana, «An tinim ki ni a ŋgol maŋga, an ɦam gorsemma halaŋ ki ni a suu sunumma, an ɦam wana u sum veŋŋa ki ni mam lay, goonna, an ka ndak a laŋ va ma daŋ oloɗi.»
38Ezaw di bum ana, «Paɗvun namma koŋ dew ni nam su? Paɗ vunuŋ ki kan may bunu.» Ezaw di na ni, hoŋ mun ki tiina olo.#Heb. 12.17 39Bum Isaak hin dam ana,
«Aŋ hin kak ha ki eg ndaŋgara jiv tlena ni na day,
ha ki eg mbaɗagira ay kolo huulonara day lay.#Heb. 11.20
40Aŋ hin doo kay taŋŋi u ŋgew maŋŋa,
aŋ hin lini sa sun wayaŋŋana.
Lini aŋ tuɗ ki cow cow ni
aŋ hin buɗ taŋ ki ko nekka vi wayaŋŋara.»#Ura 36.8; 2 Mul. 8.20
Yakob pii ki vi ndusum Laban
41Ezaw vi Yakob ki hurum gonokka kay paɗta bum paɗ vunum ki kamba. Ezaw ɓak tam hurum ana, «Buu ma bun miɗna ni an hin ci wayanna Yakob kiyo.» 42Rebeka hum boy ma vi goroɗ ma ŋgolna, Ezaw. Ndaɗ yi goroɗ ma goona Yakob ay egeɗ dam ana, «Gol taŋ jiviya, wayaŋŋa Ezaw hal a sasukulum u aŋ a caŋ kiyo. 43Goonna, an daŋ wanna hum ha jiviya, col kolo pii tuɗ ki vi wayanna, Laban, ha ki hu Haran. 44Aŋ tuɗ kak ha ki varam gak gak huu wayaŋŋa heɓ ka ki tuwa. 45Aŋ kak ha ki tana ta ta huu wayaŋŋa ma yara heɓ ka ki tuwa, humum maa ka ki kay dlara aŋ laɗta wa ni an hin yaŋ ay vo tuwa. An ka min a baagi ki hu buu ma dewna na jakgi.»
46Rebeka di Isaak ana, «An cemi tan loɓ ko boyogi suu vi Ezaw suu Hetna wa, lini Yakob ɗum cara duk gorɓii suu Hetna olo, ni an kak iiri ni kayme ologe?»
Currently Selected:
URA TIN AYRA 27: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
URA TIN AYRA 27
27
Yakob ɓaɗ ŋgolla vi wayamma, Ezawra, kiyo
1Isaak mbuɗ ki maari, irim maŋ kiyo, ka wi gay oloɗi. Nam yi gorom ma ŋgolna Ezaw ana, «Goonna.» Ezaw ana, «An wanni.» 2Isaak dam ana, «Cemmi an mbuɗ ki maari, an ka wi buurun ma miɗnaɗi. 3Cemi yow tlegeyeŋ suu ndonda ugi mbuuru maŋga u dogolora, can tliw ay ci. 4Lan ti ma jivi ma an minimma, ɦanna ay an tam tini, paɗ vunun ki kaŋ jew bay an miɗ tuwa.»
5Rebeka hum boy ma Isaak dam maŋ goromma, Ezawna. Ezaw gi tam tuɗ ŋgoo a hal tliwna ay maŋ bumba gaw. 6Rebeka di goroɗna Yakob ana, «Gola an hum buŋ di wayaŋŋa, Ezaw, ana, 7Tuɗ can tliwna ay mbay lan ti ma jivina an ti tini, hin paɗ vunun ki kaŋ fok Yawe jew bay an miɗ tuwa. 8Cecemi, goonna, humun boy ma an daŋŋana haa. 9Tuɗ ha duk ɦugunina, yowon gor ɦuguni suu jivi ay mba', an li ti ma jivina maŋ buŋu ko nam minda na. 10Aŋ hin tuɗ ɦal ti namma ha maŋ buŋu, nam tam tini paɗ vunum ki kaŋ jew bay nam miɗ tuwa.»
11Yakob hoŋ dira maŋ sum ana, «Wayanna, Ezaw, tam tlimiɗi, tan ka tlimiɗɗi. 12Bun li hin laman tan kalani an hin mbuɗ irimmi sa kaboyna. Ni mbaaran kan ni givunna na ɗow ka paɗvunnaɗi.» 13Sum dam ana, «Goonna, ko givunna namma hoŋŋi kan an na ɗow. Humun vununu tuɗ yowon ay gor ɦuni suu mbana ɗow.» 14Yakob tuɗ yowosi, mbaarasi ay maŋ sumu, ndaɗ hin li ti ma jivina ko bum minda na. 15Rebeka tuɗ yow baraw ma jivina vi goroɗ ma ŋgolna, Ezaw, ma ay kalafi varaɗna, hin cukum ta goroɗ ma goona, Yakob. 16Ndaɗ ɗuɗum bak gor ɦunina ki kom may u delemba hindi duk ɦawara may. 17Ndaɗ ɦal ti ma jivi ma ndaɗ lamma u komnjodina may ko goroɗna Yakob.
18Nam mbay eg bum dam ana, «Bunu.» Isaak ana, «An wanni. Ni aŋ gege goonna?» 19Yakob hoŋ di bum ana, «Ni an, Ezaw, goroŋ ma ŋgolna. An li dlara aŋ dandara ay wa, col kolo kaki ha uŋu, kom tliw ma an caŋŋa ayna, a aŋ hin paɗ vunuŋ ki kanda.» 20Isaak joɓom ana, «Goonna aŋ fi ay na zak gaw su?» Yakob hoŋ dira ana, «Yawe, Looŋŋa, mbaarana ay fokon zakŋi namu.» 21Isaak di Yakob ana, «Ҥuɗ taŋ ay egen, an lamaŋu lini aŋ goonna, Ezaw, gasi ɗowba ka nambi su?» 22Yakob ɦuɗ tam ay eg bum Isaak ɦuɗni, nam lamamu hin di ana, «Della ni a del Yakob, kona ni a ko Ezaw may.» 23Nam wam kaɗi kay kom ki u tlimiɗta ko wayamma Ezaw na. Nam gijaŋ a paɗ vunum ki kamba.
24Nam joɓom ana, «Aŋŋi goonna Ezaw gasi su?» Yakob hoŋom dira ana, «Ni anu.» 25Isaak dam ana, «Ҥan tliw ma goronna cannana aya, an komom kommi an tanda paɗ vunun ki kaŋu.» Yakob ɦamma. Nam hin komomu. Nam ɦam sum veŋŋa ay nam hin cam may. 26Bum Isaak dam ana, «Ҥuɗ taŋ ay egen tani huwa goonna, mboɗon huruŋu.» 27Yakob ɦuɗ tam ay mboɗom hurumu, Isaak his baraw mamma cuk kamu, nam paɗ vunum ki kam di ana,
«His goonna ni ko sene
ma Yawe paɗ vunum ki kamma na.#Heb. 11.20
28Ko Lona ɦaŋ mbaɗagira ay kolora,
sene maŋŋa jiv tlena cocoo,
wana u sum veŋŋa laŋ cocoo.
29Ko suuna halaŋ li ni gaa uŋu,
ko njaf suuna halaŋ goɓ kaŋga fokoŋu.
Aŋ li ni a ŋgolla vi gorseŋŋa.
Ko goryoŋ suŋŋa lay goɓ kaŋga ni fokoŋu.
Sa ma gaŋ vunnana sa hin gam vunna may,
sa ma paɗ vunum ki kaŋŋa paɗvunna hin li kam may.»#Ura 12.3
30Isaak daɓ paɗta paɗvunum ki kay Yakobpa daɓmi. Yakob kal ay ki bunsu may ni, wayamma Ezaw ay ndonda kal ay vo may. 31Ezaw li ti ma jivina, tlam ay maŋ bum may. Nam di bum ana, «Col ki koloo, kom tliw ma goroŋŋa caŋŋa ayna, a aŋ kay taŋga hin paɗ vunuŋ ki kanu.» 32Bum Isaak joɓom ana, «Ni aŋ gege?» Nam hoŋom dira ana, «Ni an goroŋŋa ŋgolna, Ezaw.» 33Isaak hum na ni mbuɗ ki ndaana, tam dlaki cocoo. Nam di ana, «Sa ma hin ci tliwna ay ki jew ɦanna an komom ki, paɗvunun ki kam jew bay aŋ mbana ni gege? Sa namma vunna ki kam paɗi da.»
34Hu li ma Ezaw hum boy ma bum damma na ni, nam oo um kolo tiina eŋga u hurum ma haɗta ana, «Paɗ vunuŋ ki kan may, bunu.» 35Isaak dam ana, «Wayaŋŋa mbay u mbeleŋŋa tlaŋ paɗvun maŋŋa kiwa.» 36Ezaw di ana, «Ni ko sem ma tin ana Yakobma naɗi su? Kay nam lan irin ki cemi yam mba'. Nam ɓaɗan ŋgol manda kiyo, hin ɓaɗan paɗvun manna ki cemi olo. Na ni aŋ hin paɗ vun ma daŋ ka man na ndeɗi su?»#Ura 25.29-34 37Isaak hoŋ di Ezaw ana, «An tinim ki ni a ŋgol maŋga, an ɦam gorsemma halaŋ ki ni a suu sunumma, an ɦam wana u sum veŋŋa ki ni mam lay, goonna, an ka ndak a laŋ va ma daŋ oloɗi.»
38Ezaw di bum ana, «Paɗvun namma koŋ dew ni nam su? Paɗ vunuŋ ki kan may bunu.» Ezaw di na ni, hoŋ mun ki tiina olo.#Heb. 12.17 39Bum Isaak hin dam ana,
«Aŋ hin kak ha ki eg ndaŋgara jiv tlena ni na day,
ha ki eg mbaɗagira ay kolo huulonara day lay.#Heb. 11.20
40Aŋ hin doo kay taŋŋi u ŋgew maŋŋa,
aŋ hin lini sa sun wayaŋŋana.
Lini aŋ tuɗ ki cow cow ni
aŋ hin buɗ taŋ ki ko nekka vi wayaŋŋara.»#Ura 36.8; 2 Mul. 8.20
Yakob pii ki vi ndusum Laban
41Ezaw vi Yakob ki hurum gonokka kay paɗta bum paɗ vunum ki kamba. Ezaw ɓak tam hurum ana, «Buu ma bun miɗna ni an hin ci wayanna Yakob kiyo.» 42Rebeka hum boy ma vi goroɗ ma ŋgolna, Ezaw. Ndaɗ yi goroɗ ma goona Yakob ay egeɗ dam ana, «Gol taŋ jiviya, wayaŋŋa Ezaw hal a sasukulum u aŋ a caŋ kiyo. 43Goonna, an daŋ wanna hum ha jiviya, col kolo pii tuɗ ki vi wayanna, Laban, ha ki hu Haran. 44Aŋ tuɗ kak ha ki varam gak gak huu wayaŋŋa heɓ ka ki tuwa. 45Aŋ kak ha ki tana ta ta huu wayaŋŋa ma yara heɓ ka ki tuwa, humum maa ka ki kay dlara aŋ laɗta wa ni an hin yaŋ ay vo tuwa. An ka min a baagi ki hu buu ma dewna na jakgi.»
46Rebeka di Isaak ana, «An cemi tan loɓ ko boyogi suu vi Ezaw suu Hetna wa, lini Yakob ɗum cara duk gorɓii suu Hetna olo, ni an kak iiri ni kayme ologe?»
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.