URA TIN AYRA 28
28
Isaak sun Yakob ki vi Laban
1Isaak yi Yakob ay yini, paɗ vunum ki kamu, hin gaɗam ana, «Ɗum ca ka duk gorɓii suu Kanaannaɗi. 2Col kolo, tuɗ Padan-Aram hu zina vi Betuel, bu suŋu. Vi cara ay uŋŋi duk gorɓii suu vi ndusuŋ Labanna.
3Ko Lona ma Saɓakŋa Kom Belna,
paɗ vunum ki kaŋu, a aŋ vuɗ gorra zula.
A njafaŋ mbuɗ ni suu zuli cocona.
4Ko Lona ɦaŋ paɗvun ma vi Abrahamma
maŋ aŋ u njafaŋ halaŋ,
kay a ndaŋgara aŋ cuki kaɗ ko koyna nara
mbuɗ ki maŋga.
Ko nam ɦaɗ ay maŋ Abrahamba na may.»#Ura 17.4-8
5Isaak sun Yakob hu Padan-Aram vi Laban, ma goŋ Betuel ma Aramma, ma wayaŋ Rebeka ta su Yakob u Ezawra.
6Ezaw wi ana Isaak paɗ vunum ki kay Yakob, hin sunum ki Padan-Aram a tuɗ ɗum cara ha ki huwa, nam a paɗ vunum ki kamba ni gaɗam ana, aŋ tli ca ka duk gorɓii suu Kanaannaɗi. 7Nam wi ana Yakob hum vun bum u sumu, hin tuɗ ki Padan-Aram. 8Ezaw wi ki ana gorɓii suu Kanaanna ka ii bum Isaak jiviɗi ni, 9nam tuɗ vi Ismael, ɗum cara daŋga eg mamsina yaɗ ana Mahalat ta goŋ Ismael ma goŋ Abrahamma, ndaɗ ni wayaŋ Nebayotta.
Doyra di Yakob hu Betel
10Yakob col ha Berseba tuɗ hu Haran. 11Nam tew hu li maa dew ni, nam buu huwa kay faɗta ɗik kiyo. Nam tli goyra ɗagal yam kaɗu, buu senna hu li namma. 12Doyra dam ana, nam wi jaŋalana col ha kaŋga kay ndaŋgara day yam tuɗ tew ha ki kolo huulona. Nam wi suu sunda huulona ɗiŋ ha kolo hu jaŋalana hoŋi ay kaŋga may.#Jaŋ 1.51
13Yawe coli kolo kay jaŋalana di ana, «Anni Yawe, Lona vi buŋ ŋgolo, Abraham, Lona vi buŋ Isaak, ndaŋgara aŋ buuri kaɗ wanda an hin ɦaŋga ni maŋ u njafaŋu.#Ura 13.14-15 14Njafaŋ hin zulni ko gugum ndaŋgara na, aŋ hin col ha u maɗiina, u fiɗigina, col ha mbayaw day gak gak daliya, suu kay ndaŋgarana halaŋ hin fi paɗvunna ni uŋ u njafaŋu.#Ura 12.3; 22.18 15Gola, an ka u aŋu, an hin goloŋ hu li ma aŋ tuɗ huna halaŋ. An hin hoŋoŋ ay hu mbassa wanda, an ka a noyoŋ ki bay an daɓ dlara an daŋgara kiɗi.»
16Yakob dliɗ ki kolo dliɗ ni di ana, «Yawe ka hu li namma gasi, an wi ka jew naɗi.» 17Nam mbuɗ ki ndaana di ana, li namma ni li ma ndaana. Ziŋ Lonna ka doyni tani, ni vun grek ma huulonna. 18Yakob col kolo maɗii feɗet tli ɦinira nam ɗagal yam kaɗta, coloɗ kolo u jeŋeɗ vooɗ mbulna kaɗ a mbuɗuɗ ki ɦinira teteɗta. 19Nam yi li namma ana Betel, ni ana ziŋ Lonara, sem ɦoŋzi namma jew ni ana Luz.
20Yakob gi vunum di ana, Lini Lona ka u anu, golon hu koy manda wanda, lini nam ɦan funa a tira, ɦan baraw ma cuk tanna may, 21lini an hoŋ ay ki vo vi bun jivi wa ni, Yawe hinni Loonna. 22Ҥinira an coloɗ wanda hinni a ziŋ Lonna. An hin ɦaŋ keŋ ma doogona u tlesuu aŋ ɦansinana halaŋ.
Currently Selected:
URA TIN AYRA 28: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
