URA TIN AYRA 31
31
Yakob pii ay ki, hin Laban haa
1Yakob hum goryoŋ Labanna ɓak kam ana, «Yakob yow bege ma vi buygina ki ni bel, nam ɦiz tam ki ni u begera vi buygira.» 2Yakob wi ana huu Laban ka egem jivi ko jewra na oloɗi. 3Yawe di Yakob ana, «Hoŋ hu mbassa vi somoyoŋga hu li ma aŋ vuɗ ay huna. An hin li u aŋ lay.» 4Yakob yi ki Rasel u Lea ay hu li ma taa yoorina egem bagiya. 5Nam dasi ana, «An ka wi huu bugi jivi egen ko jewra na oloɗi, na may ni Lo ma vi bunna ay u anu. 6Agi tagira lay wi ana an sun bugi ni u saɓakan halaŋ. 7Bugi mbaɗan irin cocoo, nam mbuɗun warak manna zeɗ zeɗ sem doogo. Na may Lona hinim ka a nam lan va co egenɗi. 8Nam di wa ana, suu ndunduɓukŋa ni warak maŋŋa ni timigiina vuɗ ki ni ndunduɓuk gaw, nam di wa ana suu jarina ni warak maŋŋa ni timigiina halaŋ vuɗ ni tasi ki jariya. 9Lona yow yoori suu vi bugina ɦansina ki manu. 10Hu li ma timigiina ka un tasina doyra dan ana gamlagi suu unusina tasi kelee kelee, jari may, ndunduɓuk may. 11Sa sunda huulona vi Lona yan hu doyra ana, Yakob. An humum ana, An wanni. 12Nam di ana tli iriŋ kolo, gol gige, ŋgekgi suu un dogonira wanna halaŋ tasi klekle, jari may, ndunduɓuk may. Kay an wi dlara Laban laŋga egeŋga halaŋ. 13Anni Lo ma tak tam ay iriŋ hu Betel ma aŋ voom mbulna ha kay ɦinirana, ni ma aŋ yi vana ay kaŋ fokomma. Cemi col kolo kal ki hin mbas ndaɗta, hoŋ hu mbassaŋga aŋ vuɗ ay hura.»#Ura 28.18-22
14Rasel u Lea hoŋ dam ana, «Vaami maa ɗowba, va ma ami yowom hu jo bumi hin ha su? 15Nam golomi ni ko koyogina na layɗi su? Kay nam gusumi kiyo, ti bege mamira ki lay. 16Begera Lona yowoɗ ay ki ko bumira belni mami u goryomiya, cemi ni aŋ li dlara Lona daŋgara halaŋ.»
17Yakob col koloo, yow goryom u boyogom kolo kay jamballa. 18Nam koɗ yoori mamsina u tlegeyem halaŋ, ni yoori mam suu nam fasi ay Padan-Aramma. Nam hoŋ irim ay eg bum Isaak hu mbassa Kanaanda. 19Ni hu li ma Laban tuɗ a caw ta timigii mamsina, Rasel kul lo ma vi buɗna ay koɗ gaw.
20Yakob ganyam Laban ma Aramma dam yam ka ana nam tuɗaraɗi. 21Nam pii u tlegeyem halaŋ, nam taɓa lumma, Efratna, ki taɓani tuɗ ha kay ɦinira Galaadta na. 22Hu buu ma hindina ɗaŋŋi asi da Laban ana, «Yakob pii wa.» 23Laban yow gorsemma um yowni, cuɗum sem gak gak buuna kiɗisiya kay tuɗta, tuɗ fam ha ki kay ɦinira Galaadta.
Laban fi Yakob
24Lona tak tam ii Laban ma Aramma njeŋge hu doyra dam ana, «Gol taŋ jiviya, aŋ di va ma jiviɗi lay, di va ma co kay Yakobɗi lay.»
25Laban fi Yakob, Yakob min mbutluɓ mamma kolo kay ɦinira. Laban u gorsemma min mbutluɓ masina kay ɦinira Galaadta may. 26Laban di Yakob ana, «Aŋ a li na ni dla mege? Aŋ ganan yanni nanage? Aŋ tuɗ ay u goryon ko suu ɓaɗasi ay fun duunana na ni kay mege? 27Aŋ hin pii ay danɗi ni kay mege? Lini aŋ dan gini ni an ndak tiniŋ ay u furira u soolla u darina u diŋŋa lay. 28Aŋ hinin ka a gi deɓpa furira maŋ goryonɗi lay, aŋ li dla ndaɗta ni bay saara. 29An ndaki a laŋ dla cora egeŋu na may Looŋ bugina dan kaa doyra ana an laŋ va egeŋgi. 30Cemi an wi ana aŋ hoŋ voo, kay may ziŋ buŋŋa vaŋu, na ɗaŋŋi aŋ hin kulun loogi mansina ay koŋŋi kay mege?» 31Yakob hoŋ di Laban ana, «An li gin ndaana ni ana aŋ hin yow goryoŋ ki kon kalage. 32Sa ma aŋ fi loogi maŋsina komma cam kiyo. Hal tlegeyeŋ suu ka varanna ki fok gorseŋŋa halaŋ vaaŋ ma aŋ famma tlamu.» Yakob wi ka ana Rasel kulum ay ni ndaɗuraɗi.
33Laban hal hu mbutluɓ Yakobma, hu mbutluɓ Leara, hu mbutluɓ mborɓii suu mbana lay, ni fi va kaɗi. Nam kal ay ki hu mbutluɓ Leara hin kal hu mbutluɓ Rasella. 34Rasel tli lo namma tani kalam ki u tlesuu ŋgoo jamballana kak ki kasiya. Laban hal huu mbutluɓ ta ta ni fi va kaɗi. 35Rasel di buɗ ana, «Sa ŋgol manna huruŋ ɓeŋ egenɗi, lini an col ka kolo fokoŋgi lay ni kay an u tuguɗiira vi boyoginara egenu.» Nam hal ta ta ni fi loomma kaɗi.
36Yakob hurum ɓeŋ eg Laban dam ana, «Va ma co ma an lamma ni mege? Suluk manna ni maanage? Aŋ cuɗun un ay u yara na ni kay mege? 37Aŋ halan tlegeyen na ni fi vaaŋ maa duk su? Tak va namma ki fok gorseŋŋa u gorsenna asi kaay ii ɓak namma ki dukuya. 38An li basara varaŋ dok-mba' ni huu timii maŋ taa ɗowba ɦuuŋ lay ndi ka kiɗi, an kom gamlagi suu duk yoori maŋsina ka kiɗi lay. 39An mbaaraŋ ɦaa va ma vabak vam ki kaɗi, lini vaaŋ ma ba ki wa na ni an warakamu. Sa kulun va ki un faali lay njeŋge lay ni aŋ joɓom kiyo. 40Faali ni faɗta can cocoo, njeŋge ni semeɗna can coco lay, an ka buu senɗi lay. 41Aŋ gol gige an li basara varaŋ cemi na dok-mba'. An laŋ sunda basara doogo yam fiɗi kay gorɓii maŋ suu mbana, li basara karkiya kay yoori maŋsina may, aŋ mbuɗun warak manna zeɗ zeɗ seŋ doogo. 42Lini Loŋ bunna, Loŋ Abrahamma, ma Isaak lam ndaaramma u anɗi ni aŋ dikin ginni u kon ma vadlna. Lona wan las manda u sunda an laɗ u konda wa kaa ni nam kaan ɓak manna ki wa.»
Yakob u Laban vi banara
43Laban hoŋ di Yakob ana, «Gorɓii asina ni goryonu, goryosi asina ni goryon lay, yoorina ni mansina lay, tlesuu aŋ wasi wanna halaŋŋi mansina. Va ma an lam karam eg goryon u goryosi suu asi vuɗusina ni mege? 44Mbay vay banara, an u aŋu, a bana ndaɗta tak ki kaya an u aŋu.»
45Yakob tli ɦinira coloɗ kolo a gi humba. 46Yakob di gorsemma ana, «Yowogi ɦinira aya.» Asi yow ɦinira ay moloɗ kay taɗu, asi hin ti tina kay ɦini ndaɗta. 47Laban yi ɦini ndaɗta ana Yegar Sahaduta, Yakob yaɗ ana Galed may.
48Laban di ana, «Ko ɦinira moli kay taɗ ndaɗta li duk ɦoŋoŋ u anni a va diki kayna.» Kay ndaɗta asi yaɗ ana Galed. 49Asi hin yi sem ɦini ndaɗta olo ana, Mispa kay Laban di ana ko Yawe li ni sa ma goloyna hu li ma ay ɓorow ki ka wi tay oloɗina. 50Lini aŋ lasan goryonu, tuɗ yow boyogi suu daŋŋa egesi olo, ni sa ma kal duk ɦoŋoyna ni ka sa warɗi, Lona hin li duk hoŋoy ni namu.
51Laban di Yakob ana, «Gol ɦini mayra an moloɗta gige, ndaɗ hinni a va ma gi humba duk ɦoŋon u aŋu. 52Ko ɦinira moli ndaɗta u va ma tak kina lini a va ma diki kayna, ana an ka cala ha kay ɦini ndaɗta a laŋ va ma co egeŋgi, aŋ calaɗ ay kaɗ a mba lan va ma co egenɗi may. 53Ko Lona vi Abraham u Nahor li duk ɦoŋoy a sa ma ka ɓakŋa.» Yakob suu tam u Lo ma bum Isaak lam ndaaramma. 54Yakob li ɓivunna kay ɦinira, nam yi gorsemma ay kay tina. Asi ti tini buu kay ɦini ndaɗta gaw.
Currently Selected:
URA TIN AYRA 31: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
