JAŊ 14
14
Yesu ni voɗ mayra tuɗ eg Lonara
1Yesu dasi ana, «Li hurugi ndaaɗi. Tin hurugi kay Lona may, kan may. 2Hu ziŋ bunna lii kakka ka hu ŋgolo. An nda minigi lina ha ki foko. Boy namma li ni gasagiɗi ni an hin ka daginaɗi. 3An min li namma ha ki wa ni, an hin hoŋ aya mba yowogi ha ki egen tok, a agi li laki hu lii an huna may. 4Agi wi voɗta tinigi hu li ma an tuɗ huna.» 5Tomas dam ana, «Bu Suuna, ami ka wi hu lii aŋ tuɗ hunaɗi may ni, ami wi voɗ ndaɗta ni nanage?» 6Yesu hoŋom dira ana, «Anni voɗta, anni gasira, anni iirira lay. Sa ndak ka a tuɗ eg Lona bay tli kanɗi. 7Agi wan wa ni, agi wi ni Bun may. Cecem wanda ni, agi wam ki da, agi wam u irigi wa.»
8Filip dam ana, «Bu Suuna, takami Buŋu ami hurumi hin li furira may.» 9Yesu hoŋom dira ana, «Filip, an na day day egegi ni, aŋ bay wan tu su? Sa ma wanna, wi ni Bun gaw may. Aŋ hin di ana, Takami Buŋu ni nanage? 10Aŋ ka saa ana an eg Bunu, Bun egen may naɗi su? Boy ma an dagina magina halaŋŋi col ha ka kon anɗi. Bun ma hurunna li sun mamba ni namu. 11An li di ana an ka eg Bunu ni, Bun u an may ni, tinigi hurugi kanu. Tinigi hurugi kay sun ndaɗta ɗow. 12An dagi ni gasira ana, Sa ma tin hurum kanna hin li ni sunda an laɗta may. Nam hin li ta ŋgolora lay, kayme an tuɗ eg Bunu. 13Tlege suu agi joɓom kasi u senna halaŋŋi, an lasiya a Goona a tak ki ni geleɗta vi Bumba. 14Lini agi joɓon ki va wa u senu ni, an hin lamu.
Yesu di ana nam hin sun Musuk Lonara aya
15«Agi li mininu ni, agi hin vagi vun gaɗ manda. 16An hin joɓ Bun nam sunugi sa ma daŋ ma njun ugina aya, ni Musukka Gasira a ndaɗ mba kak u agi gak gak. 17Suu hu duliyara ka ndak a faɗɗi kayra asi ka waɗɗira. Agiya, agi waɗu, kay ndaɗ kak hurugiya, ka u agi tew tew lay.
18«An ka hinigi kay tagiɗi. An hin hoŋ ay egegiya. 19Hin a kak hu njokŋi, suu hu duliyara ka wan oloɗi. Lini agiya ni, agi hin wanu, kayme an ka iiriya, agi hin li iiri may. 20Buu namma ndak wa ni, agi hin wi ana an ka hu Bunu, agi ka hurun may, an ka hurugi may.
21«Sa ma vi gaɗ mandana li laɗu ni, sa ma mininna. Sa namma, Bun minim may, an minim may, an hin tak tan irimu.» 22Yudas (ni ka Yudas ma Iskariyotnaɗi) nam di Bu Suuna ana, «Hin li ni nana a aŋ tak taŋ ki irimiya ka ii suu hu duliyaraɗi nanage?» 23Yesu hoŋom dira ana, «Sa ma mininna, hum u boy ma an damma, Bun hin minimu, Bun may an may, ami mba lak hurumu. 24Sa ma ka mininɗina, ka hum u boy mannaɗi, boy ma an dagina ha wanna, ni ka boy manna vaydegembi, col ay ni ko sa ma sunun ayna.
25«An dagi boy namma na ni, kay an ka u agi tura. 26Sa ma hin njun ugina ni Musuk Lonara, ta Lona hin sunuɗ ay u senda. Ndaɗ hin haɗagiya hin gagi humugi kay tlege suu an dagisinana halaŋ.
27«Heɓpa an hin hinigira kara, ni heɓ manda, an hin hinigira ha ni ndaɗu. An ka ɦagira ko suu hu duliyarana ɦaɗta naɗi. Ɓigigi vundikigiɗi, lagi ndaaɗi. 28Agi humugi ana an dagi ana an tuɗa, hin hoŋ ay egegiya. Agi li mininu ni, agi hin li furira kay wan ki ana an tuɗ eg Bunu, nammi ŋgol suunu. 29An dagi ki u wanda bay tlege asina mba tu gaw. Asi hin mba wa ni, hurugi li tini kanu. 30Cecemmi, an hin ka ɓak u agi ŋgol oloɗi. Mul ma hu duliyarana mba wa. Saɓak mamma ka tew egenɗi. 31Na may ni, suuna halaŋ hin wi ki ana an min Bunu, an li ni ko nam dan ayra na may. Yowoygi koloo. Tuɗuygiya.»
Currently Selected:
JAŊ 14: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
