Torubu 49
49
Yɑkɔbun ɡɑri dɑ̃ɑki
1Yen biru Yɑkɔbu u win bibu sokɑ u nɛɛ,
i mɛnnɑmɑ kpɑ n bɛɛ sɔ̃
ye n koo bɛɛ deemɑ ɑmɛn biru.
2I nɑ i nɔ nɛn bibu, i mɑn swɑɑ dɑkio.
3Rubɛni, wunɛ nɛn bii yerumɑ, ɑ sɑ̃ɑwɑ nɛn dɑm.
Wunɑ nɑ mɑrɑ nɛn ɑluwɑɑsiru sɔɔ.
Wunɑ ɑ yiiko kɑ dɑm bo nɛn bibu sɔɔ.
4Adɑmɑ ɑ sɑ̃ɑwɑ nɡe nim torɑ, ɑ ǹ ɡɑyɑ mɔ.
Yen sɔ̃nɑ ɑ ǹ kɑɑ ko wunɛn wɔnɔbun wiruɡii.
Domi ɑ kɑ nɛn kurɔ Bilihɑ kpunɑ,
ɑ nɛn kpin yeru disi doke.
5Wunɛ Simɛɔ kɑ Lefi, dɑɑ tiɑ i mɔ.
I rɑ bɛɛn tɑkobi suewɑ kɑ ɡbɑnɑ i kɑ kɔ̃sɑ ko.
6Bɛɛn mɔrun sɔ̃ i tɔmbu ɡo.
Bɛɛn nuku kɔ̃surun sɔ̃
i kɛtɛ kinɛnun nɑɑ sĩinu bɔɔrɑ.
Yen sɔ̃, nɛn ɡɔ̃ru ɡu ku rɑɑ du
bɛɛn kɑnkɑm wesiɑnɔ sɔɔ.
Nɛn bwɛ̃rɑ yu ku rɑɑ kɑ bɛɛ mɛnnɛ.
7Bɛɛn mɔru yu ko bɔ̃rurɑ yèn sɔ̃ yɑ sɑ̃ɑ ɡbɑnɑɡiɑ.
Mɛyɑ mɑɑ kɑ bɛɛn nuku ɡbisibu yèn sɔ̃ bu ǹ wɔnwɔndu mɔ.
I ko n yɑrinɛwɑ bɛɛn tem kpuro sɔɔ.
8Wunɛ mɑɑ Yudɑ, wunɛn mɑɑbu kɑ wɔnɔbu bɑ koo nun siɑrɑ.
Kɑɑ wunɛn yibɛrɛbɑn wĩinu tɑɑre.
Wunɛn tundo bisibu bɑ koo nun yiirɑwɑ.
9Yudɑ nɛn bii, ɑ sɑ̃ɑwɑ nɡe ɡbee sunɔ kpɛmbu,
ɡe ɡɑ yɑɑ ɡoomɑ ɡɑ wee,
kpɑ ɡu kpɑm wurɑ ɡu yɑɑ sɑ̃kiriɑ.
A sɛ̃ nɡe ɡbee sunɔ mɛro.
Wɑrɑ koo kɑ̃ku u nun bɛsu.
10Bɑndɑ kun doonɔ wunɛn bweserun di.
Sinɑ bɔrɑ kun kisirɑmɔ wunɛn nɔmun di,
sere Silo ù n tunumɑ,
kpɑ bwesenu kpuro nu nùn mɛm nɔɔwɑ.
11Wunɛn resɛm yɑ koo kuurɑ
sere ɑ wunɛn kɛtɛku kɑ ɡen buu sɔri mi.
Yen mɑrum mu koo nun tɑm wɛ̃ mu n kpɑ̃
sere ɑ kɑ mu wunɛn yɑ̃nu teɑ nɡe nim.
12Kpɑ wunɛn nɔni yi n sɔ̃ri tɑm mɛn sɔ̃.
Kpɑ wunɛn donnu nu n buriri bom bekum sɔ̃.
13Wunɛ mɑɑ Sɑbuloni, kɑɑ n wɑ̃ɑwɑ nim wɔ̃kun ɡoorɔ mi ɡoo nimkusu rɑ yɔ̃re.
Wunɛn tem mu ko n tɛriewɑ sere Sidoni ɡiɑ.
14Isɑkɑri, wunɛ ɑ sɑ̃ɑwɑ nɡe kɛtɛku dɑmɡuu.
A rɑ kɑ̃ ɑ n wɑ̃ɑ tem nɔɔ burɑ yenun bɑɑbɑ sɔɔ.
15A wɑ mɑ mi ɑ wɛ̃re n wɑ̃.
Tem mɛ, mu mɑɑ ɡeɑ sɑ̃ɑ.
Yen sɔ̃nɑ ɑ wurɑ ɑ sɔmunu suɑ kpɑ ɑ yoo sɔmburu ko.
16Wunɛ mɑɑ Dɑnu, wunɑ kɑɑ n dɑ wunɛn bweserun ɡɑri wunɑnɛ Isirelibɑn suunu sɔɔ.
17Kɑɑ n sɑ̃ɑwɑ nɡe surɔkɔru swɑɑ sɔɔ,
te tɑ dumin nɑɑ sĩinu dwɛ̃ɛmɔ,
mɑɑsɔbu bu kɑ fukurɑ yin wɔllun di.
18Yinni Gusunɔ, nɑ wunɛn fɑɑbɑ yĩiyɔ.
19Wunɛ mɑɑ Gɑdi, wɛrɔ dɑbirɑ tɑ koo nun wɔri,
ɑdɑmɑ kɑɑ bu kɑmiɑ ɑ ɡirɑ.
20Asɛɛ, wunɛ mɑɑ, wunɛn tem mu ko n dĩɑ ɡeenu mɔ.
Sinɑ dimɑ kɑɑ n dɑ di.
21Wunɛ mɑɑ Nɛfitɑli, ɑ sɑ̃ɑwɑ nɡe ɡinɑ ye yɑ tii mɔru kĩ,
yɑ mɑɑ bii burɑnu mɑrumɔ.
22Wunɛ Yosɛfu, ɑ sɑ̃ɑwɑ nɡe kɛtɛku ɡbeeku ɡe ɡɑ wɑ̃ɑ bwiɑn bɔkuɔ.
A sɑ̃ɑwɑ nɡe kɛtɛku buu ɡe ɡɑ wɑ̃ɑ ɡuurun ɡɑ̃ɑrɔ.
23Yibɛrɛbɑ bɑ nun nɔɔ kuurɑ,
bɑ nun wɔri kɑ mɔru,
bɑ nun sɛ̃ɛnu twee.
24Adɑmɑ wunɛn tɛndɑ kun wurure
yèn sɔ̃ nɛn Yinni, Gusunɔ Dɑm kpuroɡii, u wunɛn nɔmɑ dɑm kɑ̃ɑ.
Wi, wi u Isirelibɑ kpɑre,
u bu ɡɑnuɑ nɡe kpee bɑkɑru,
25wiyɑ u koo nun somi u nun domɑru kuɑ,
kpɑ ɡurɑ yu nun nɛɛyɑ,
kpɑ nim mu n yibɑ bwiiyɔ yi ɑ mɔ wunɛn tem sɔɔ.
U koo mɑɑ wunɛn kurɔbu ko bii mɛrobu,
kpɑ wunɛn sɑbenu nu mɑ.
26Wunɛn domɑru tɑ koo wunɛn bɑɑbɑbɑɡiru kerɑ.
Tɑ kpɑ̃ tɑ ɡuunu kpuro kere.
Domɑ te, tɑ ko n nun wɑ̃ɑsiwɑ, Yosɛfu,
wunɛ wi ɑ sɑ̃ɑ nɛnɛm wunɛn mɑɑbu sɔɔ.
27Wunɛ mɑɑ Bɛnyɑmɛɛ, ɑ sɑ̃ɑwɑ nɡe dɛmɑku
ɡe ɡɑ rɑ n yɑɑ ɡoomɔ bururu kɑ yokɑ ɡɑ n temmɔ.
28Nɡe mɛyɑ Isireli u kɑ win bibu domɑru kuɑ nɛnnɛnkɑ. Ye u mɑɑ bu sɔ̃ɔwɑ, yerɑ mi. Bii beyɑ bɑ kuɑ win bwese kɛri wɔkurɑ yiru ye.
Yɑkɔbun ɡɔɔ
29Yen biru Yɑkɔbu u win bibu yiire u nɛɛ, nɑ dɔɔ n nɛn tɔmbu deemɑ ɡɔriɔ. I mɑn sikuo nɛn bɑɑbɑbɑn sikirɔ, kpee wɔru sɔɔ ɡe ɡɑ wɑ̃ɑ Eforoni Hɛtin ɡberɔ. 30Kpee wɔru ɡerɑ ɡɑ wɑ̃ɑ Mɑkpelɑn ɡberɔ, Mɑnden deedeeru Kɑnɑnin temɔ. Gbee terɑ Aburɑhɑmu u dwɑ Eforoni Hɛtin mi, tu kɑ ko win tɔmbun siku yeru. 31Miyɑ bɑ Aburɑhɑmu sikuɑ kɑ win kurɔ Sɑɑrɑɑ, kɑ mɑɑ Isɑki kɑ win kurɔ Rebekɑ. Miyɑ nɑ mɑɑ Leɑ sikuɑ. 32Bɑ ɡbee te kɑ ten kpee wɔru ɡe dwɑwɑ Hɛtibɑn mi.
33Sɑnɑm mɛ Yɑkɔbu u win bibu ɡɑri yi sɔ̃ɔwɑ u kpɑ, yerɑ u win nɑɑsu suɑ u sɔndi kpin yeru wɔllɔ mɑ u ɡu u dɑ u win bɑɑbɑbɑ deemɑ.
Currently Selected:
Torubu 49: BAR
Highlight
Share
Copy
Want to have your highlights saved across all your devices? Sign up or sign in
Bariba Bible © UEEB/SIM au Benin, 1996.
