Exodo 1

Ing Pangayalipusta da ring Israelita karing Tau Ehipto

1 # Gen 46:8-27. Oreti ding lagyu da ring anak nang lalaking Jacob a minta karin Ehipto a kayabe na at ding pamilya ra: 2i Ruben, Simeon, Levi, Juda, 3Isacar, Zebulun, Benjamin, 4Dan, Neftali, Gad ampon i Aser. 5Pitu lang pulu kabilangan ding heganaganang lahi nang Jacob. Atyu ne kanita i Jose karin Ehipto. 6Kaybat na nita, mete ya i Jose at ding sabla nang kapatad ampon ding anak da ring anak da. 7#Dapat 7:17.Oneng menganak la ding Israelita a lahi da at merakal na lang merakal; mabilis lang merakal at tutung masikan angga king milaganapan ya karela ing Ehipto.

8 # Dapat 7:18. Linabas ing panaun at ing Ehipto mika bayu yang ari a ala nang bitasang balu tungkul kang Jose. 9Nganang sinabi karing sasakupan na, Lawan yu, mas dakal la at masikan kesa kekatamu deting Israelita. 10#Dapat 7:19.Nung sakaling lusuban da katamu ding kalaban pota makikampi la pa karela at kaybat takasan de ing bansa tamu. Inya kailangan tamung lumawe paralan ban e na la dakal pa. 11Inya mibili lang kapatas karing Israelita ban pasakitan da la king kapamilatan na ning mabayat a obra. Makanyan lang mengapuersa ding Israelita king pamitalakad karing siudad ning Pitom at Rameses a pipagponduan nang kabiayan at kagamitan ning ari. 12Oneng kabang pasakitan da la ring Israelita kanita la lalung merakal at mikalat. Makanyan lang mitakutan ding tau Ehipto karing Israelita. 13Inya lalu da la pang inalipusta. 14At alang lunus da lang pepagawan laryu at binie da karela ing sablang mabayat a obra king marangle.

15Misan a aldo, pekisabian na la ning ari na ning Ehipto di Sipra at Pua, ding aduang ilut a papanganak karing babaing Hebreo.#1:15 O kaya: Israelita. 16Ngana karela, Potang papanganak kayu, kabud akit yu king ing anak a mibait lalaki ya, paten ye. Nung babai ya paburen yeng mie. 17Oneng ding ilut, uli na ning takut da king Dios, e ra pemintuan ing utus na ning ari. E da la pete ding anak a lalaking mibait. 18Inya pepayaus na la ning ari ning Ehipto at ngana karela, Obat makanyan ing depat yu? Obat pepaburen yu lang mebie ding anak a lalaki?

19Ngarang mekibat ding ilut king ari, Kasi pu deng babaing Hebreo e ra la pu kalupa ding babai tamu keti Ehipto; e la pu magkasakit manganak at akakua rang makapanganak bayu na akuang datang ning ninuman kekami. 20Metula ya ing Dios karing ilut at lalu lang merakal ampon mesikan ding Israelita. 21Uling atin lang takut ding ilut king Dios, binendisyunan na la ning Dios at dininan sarasariling pamilya. 22#Dapat 7:19.Kanita minie yang utus ing ari karing sasakupan na. Ngana karela, Iyugse ya king Ilug ning Nilo ing balang anak a lalaking mibait karing Hebreo, oneng paburen yu lang mie ding anak a babai.

Currently Selected:

Exodo 1: PmPV

Highlight

Compare

Copy