Exodo 22
22
Ding Batas tungkul king Pamamayad Pinsala
1Nung menako yang baka o kaya tupa ing ninuman, at kaybat kinatat ne o kaya pisali neng mabie, sukat neng alilan limang baka ing bakang penako na; apat a tupa nung tupa ne man ing penako na. 2-4Sukat yang mamayaran king penako na. Nung ala yang bitasang pamayad, sukat yang mipisali bilang ipus ban abayaran na ing penako na. Nung ing animal a mepanako baka ya o asno o tupa, at mayakit yang mabie pang atyu king sakup na; sukat neng bayaran dobli ing balang animal a penako na.
Nung mebante ya ing manlub neng bengi, at apate ne ning makibale, ala yang pakibatan ing mekapate. Nung iti merapat neng aldo, atin yang pakibatan ing mekapate king kasalanan pamakamate tau.
5Nung king pamibulus nang animal ning metung a tau king metung a marangle o tamnanan ubas, at ikua rang miglub at minyira ding animal na king marangle ning aliwa, sukat yang mamayaran ketang dake pengan da ring animal na; alilan na king pupul na king sarili nang asikan o tamnanan ubas.
6Nung magdapug ya ing ninuman king marangle na, at ikua nang mikalat king dikut, at mirasan ing marangle na ning aliwa, at minyilab king pupul na a makatalakad pa o kaya mepalut na at makatumpuk na, sukat yang mamayaran ing taung mekapasari king silab king sablang mesira.
7Nung ating ninumang menilas salapi o nanumang bage king aliwa at mepanako la reti king bale na ning pipanilasan, nung marakap ya ing menako, sukat yang mamayad dobli. 8Nung e ya merakap ing menako, sukat yang ituki ing pipanilasan king lugal a pisasamban king Dios, at karin na patunayan king e na la teginan ding penilas da bilang kargu na.
9Ing nanumang pisasabian tungkul king pibandian maging iti metung yang baka, asno, tupa, imalan o nanumang bage mebating, ding adua kataung parehung sasabing bandi re, sukat lang piyarapan king lugal a pisasamban king Dios; ninuman karela ing atulan nang mikasala ning Dios sukat yang mamayaran dobli king tune makibandi.
10Nung ing ninuman atin yang penabilin a asno, baka, tupa o kaya aliwa pang animal king aliwa, at mete ya ing animal o kaya mepinsala ya o mepanako ya at alang menakit king milyari, 11sumpa ya ing penabilinan ketang lugal a pisasamban king Dios king ya e ne pigimbutan ing animal a mipanabilin bilang kargu na. Panaligan na na ning makibandi iting sumpa at ala yang bayaran nanuman ing penabilinan. 12Nung mepanako ya ing animal sukat yang mamayaran ing penabilinan king makibandi. 13Nung pete#22:13 King Hebreo: piglapak. de ring lasip ing animal, iyapag ne ning penabilinan bilang katunayan king mete ya ing animal; e ya sukat mamayaran kanita para king animal a pete da ring lasip.
14Nung mindam yang metung a animal ing ninuman king aliwa, at mepinsala ya ing animal o kaya mete ya king e na akakit ning makibandi, sukat yang mamayaran ing menandam. 15Nung atyu ya ing pipanandaman inyang mete ya o mepinsala ing animal, e ya sukat mamayaran ing mindam. Nung animal yang pakiupa na ning makibandi, ing upang tinggap na makagyu neng maging kabayaran.
Ding Batas tungkul king Mayap a Ugali
16 # Deut 22:28, 29. Nung lininlang ne ning metung a lalaki ing metung a dalagang e na kakaburi at sipingnan ne, sukat nang bayaran ing duru#22:16 duru: ing babie o babayad da ring lalaking makiasawa king tata na ning babai. na at pakasalan ne. 17Nung tutul ya ing tata na ning dalaga king pamiyasawa ra, sukat yang mamayaran king tata ing miglinlang king alagang katumbas ning karaniwan a duru para king metung a dalagang makiasawa.
18 # Deut 18:10, 11. Paten ya ing ninumang babaing mangkukulam.
19 # Lev 18:23; 20:15, 16; Deut 27:21. Paten ya ing ninumang lalaking mekipangatawan king metung a animal.
20 # Deut 17:2-7. Atulan yeng kamatayan ing ninumang miyain ain-sakripisyu karing aliwang dios, subali mu kanaku, ing Ginu.
21 # Exo 23:9; Lev 19:33, 34; Deut 24:17, 18; 27:19. E ye liligaligan o lulupigan ing ninumang dayuan; ganakan yu king meging dayuan kayu naman kanitang atyu kayu Ehipto. 22E ye alipustan ing mebalu o ing ninumang ulila. 23Nung alipustan yu la, siguradu lang maus pasaup kanaku at aku, ing Ginu, pakibatan ku la; 24mibua ing mua ku at paten da kayu king kapamilatan ning gera.#22:24 King Hebreo: pataram o talibung. Mabalu la ring asawa yu at maging ulila la ring anak yu.
25 # Lev 25:35-38; Deut 15:7-11; 23:19, 20. Nung paparam na kayu mang salapi kenu man karing memalen kung kalulu, e kayu makiapus karing usurero at e ye sukat maniad patubu. 26#Deut 24:10-13.Nung tanggapan yeng anting pekasangla ing balabal ning metung a tau, sukat yeng ibalik king miniangla bayu ya lumbug ing aldo, 27uling ing balabal ya mu kabud ing malyari nang panakap king katawan na ban e ya dimla. Nanu ing ulasan na potang matudtud ya? Nung maus yang pasaup kanaku, pakiramdaman ke uling aku tune kung mapaglunus.
28 # Dapat 23:5. E kayu magsalitang e mayap laban king Dios o panagkasan ing manimuna na ning balen yu.
29E yu piluat-luat ing pamiyain yu kaku karing sukat yung iyain ibat king pupul yu, king alak a apalto yu karing ubas yu, at king laru a ibat karing tanaman yung olibo.
Iyain ye kanaku ing pangane karing anak yung lalaki. 30Ibie yu la naman kanaku ding pangane karing baka yu at tupa. Papanatilian yeng pitung aldo king gaindu na ing biseru, at iyain yu ne kanaku king kawalung aldo.
31 # Lev 17:15. Ikayu ing balen a pinili ku, inya e kayu mamangan king karni na ning animal a piglapak da ring lasip; pakan yu nia mu karing asu.
Currently Selected:
Exodo 22: PmPV
Highlight
Share
Compare
Copy
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
