Genesis 49
49
Ding Tauli nang Amanung Jacob
1Inaus na lang Jacob ding anak na at ngana karela, Lumapit kayung makapadurut kanaku ban asabi ku kekayu ing malyari karing aldo daratang.
2Lumapit kayu at makiramdam, O anak nang Jacob,
at pakiramdaman ye i Israel a tata yu.
3Ika, Ruben, ing kakung pangane,
ika ing kakung sikanan at mumuna nang bunga ning kakung pangalalaki,
tutu kang kagalang-galang at mayupaya.
4Mengari kang danum ning albug a lalagusgus,
oneng aliwa ika ing mipaygit karing kapatad mu,
uling dinatan me ing pagkeran nang tata mu;
asawa na sipingnan me.
5I Simeon at Levi mikapatad la,
panampalasan da la ring pataram da.
6E ku tagunan ing pulung da
o makiabe king dapat da.
Kabud mimua la, makamate la;
potang makaratang la tula pati toro pipilayan da.
7Isumpa ing mabangis dang mua,
antimu rin ing ugali dang mabagsik.
Pangalat ku la king bansa nang Jacob,
at isambulat king mabilug a Israel.
8Ika naman, Juda, purian da ka
at duku la keka ding kapatad mu;
kalaban mu tatalnan mu la batal;
9 # Bilang 24:9; Kap 5:5. Juda, anti ka waring leon,
pasibayu kang sasalikut kaybat mung mekamate;
leon kang magpaynawa a e na lalapitan ning ninuman.
10E ya mako misan man ing setro kang Juda
ni ing simbulu ning kayupayan na.
Angga king datang ya itang talan king setro mu
a sukat dang pamintuan ding tau.
11Tatali ne ing asno na king tanaman ubas,
king pun a tutung mepili;
alak ing pamipi na karing imalan na,
at ing balabal na king malutung sabo ubas.
12Mata na malutu na la king lasing na,
at ding ipan na maputi la king gatas a inuman na.
13Zebulun, manuknangan ka lele ning dagat;#49:13 O kaya: dayatmalat.
maging sadsaran kang barku,
miras ya ing gabun mu angga Sidon.
14Isacar, anti ka king metung a asnong masikan,
sasalikut pilatan da ring kawan.
15Panakit mu king masanting a pipagpaynawan, at king makayamang gabun,
beba mu na la ding pago mu ban mamusan at pa-ipus.
16Panimunan na lang Dan ding taung sakup na
anting metung karing tribu na ning Israel.
17Anti yang ubingan king lele ning dalan, kamamalu king pidadalanan;
sakung ning kabayu tuktukan na ban anabu ne itang makasake.
18Ing kekang pamagligtas, O Ginu, kakung panenayan.
19Salakayan de ring tulisan i Gad,
pero tagal ya at salakayan na la.
20Ing pupul nang Aser tutung dakal,
pamangan karapatdapat karing aring marangal.
21Usa yang mebulus i Neftali;
masanting la ding maging anak na.
22Asno yang malyap i Jose,
asnong malyap lele ning sibul;
malyap yang asno king libis ning bunduk.
23Penagal de ring mamana,
pemana re at pepasakitan e makanyan-kanyan.
24Pero menatili yang makayabit ing pana na, at ding gamat na matatag la.
King saup ning Mayupayang Dios nang Jacob,
king lagyu ning Pastul a matibe nang Batu ning Israel.
25Dios ning kekang tata, datang ya sa ban sumaup keka,
bendisyunan na ka sa ning Dios a Mayupaya
karing bendisyun a ibat king matas a banua,
bendisyun a ibat king kalalalaman,
bendisyun a ibat karing salu at sepupunan.
26Ding bendisyun nang ibpa mu
maygit la karing bendisyun ding pipumpunan ku,
mamabut la king alang anggang bunduk.
Mibie la sana kang Jose,
king kanuan ning mipasubali karing kapatad na.
27Asu yang gubat a mabangis i Benjamin;
neng abak gigisanan ne ing kalaban;
neng bengi naman pirakerakayan na ing banding mesamsam.
28Ila deti ring labing adua nang tribu ning Israel, at yan ing sinabi nang tata ra tungkul karela, kanitang memun ya karela at menabilin king metung at metung.
Ing Kamatayan at Pangakutkut nang Jacob
29Kaybat ngana karela, Malapit na kung makiabe karing kanakung pipumpunan. Ikutkut yu ku at iyabe karing pipumpunan ku king kueba a atyu king marangle nang Efron a Hiteo. 30#Gen 23:3-20.Atyu iting kueba king marangle karin Makpela, king dane aslagan ning Mamre, king sakup ning Canaan. Seli neng Abraham iting marangle kang Efron a Hiteo bilang pikutkutan. 31#Gen 25:9, 10; Gen 35:29.Karin ya makakutkut i Abraham at i Sarah a asawa na, antimu rin i Isaac at i Rebeca a asawa na. Karin kia naman pepakutkut i Lea. 32Mesali ya karing Hiteo ing marangle at ing kueba. 33#Dapat 7:15.Kayari nang menabilin karing anak na, simpa na la king pagkeran ding bitis na, at saka ne mepatlud a inawa at mekiabe karing pipumpunan na.
Currently Selected:
Genesis 49: PmPV
Highlight
Share
Compare
Copy
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
