Kulawa 10
10
Hukumu ya nane: mazorombe
1Nakisa, Mola kamwambira Musa: “Uka ka Firyauna. Kamana omi nintenda moyo wake uwe ngumu, iye pamoja na watumisi wake ipate niwolotere ezi alama za maajuza-zi mbere yawo, 2na umwe muwambire wanenu pamoja na wajukulwenu namuna vyaniwatabishe waMiswiri na namuna vyanitendire maajuza muinti mwawo. Kwa javyo ndi pamusaka kwijiwa kuwa omi ndi Mola.”
3Kwa javyo, Musa na Aruna wakuka ka Firyauna, wakimwambira: “Mola, Nlungu wa Waebraniya, kaamba javi: Úkatala kunyenyekeya mbere yangu mpaka rini? Wase wanu wangu woke wakanábudu. 4Ukikatala kuwasa wanu wangu kuka, ona, makeso níwapereka mazorombe inti yako-yo piya. 5Ewo wáfinika ardhi-yo piya tapa-tapa pakutowa kuwoneka pansi. Ewo wakurya cinusurike cikibaki paipitire hukumu ya nvula ya mawe ire, ewo wakurya pamoja na miti piya iwotire mmasamba. 6Wakuja kwijala mmanyumba mwako na mwa watumisi wako pamoja na mwa waMiswiri piya. Wakuwa wengi kiyasi ca kuwa babu zawo waripo awawonire tangu kupongoriwa kwawo mpaka rero.” Basi Musa akizungunuka, akilawa ka Firyauna.
7Sambi, watumisi wa Firyauna wakindairi: “Noyu munu-yu átilumbata mpaka rini? Wase wanu-wa woke vyawo, ipate wakamwambudu Mola Nlungu wawo. Mwaja, auwona kuwa inti ya Miswiri-yi yankufujika?” 8Kwa javyo, Firyauna akitumíza tena kuweta Musa na Aruna, akiwambíra: “Ukani mukamwabudu Mola Mwenyezimungu wenu! Fala nísaka nijiwe oka naninanani?” 9Musa akijíbu: “Tijuzi tuke piya, wasimana pamoja na wazee wetu, wanetu waka na walume. Tisukure mifuwo ya makondoo na ng'ombe zetu, konta tíjuzi tikantendere furaha Mola wetu.” 10Firyauna akámba: “Ikiwa nukuhurusuni kulawa, umwe na wanenu, Mola akujanliyeni kweli! Ila sukwasani, niwona kuwa muwa nawo niya mbaya. 11Sinovyo! Woke walume basi, ipate mukamwabudu Mola, kamba vyamulebelanga!” Noparepare wakilaviríwa panja.
12Basi, Mola akimwambira Musa: “Lamusira nkono wako inti ya Miswiri, ipate wawesúkire mazorombe wamarize kila mbeyu îtowire kwaribika na nvula ya mawe-yo.” 13Kwa javyo, Musa akilamusíra ngombo yake Miswiri, na Mola akipereka mepo yakulawa malawira-juwa ya noire inti ire, ikivúma kutwa nzima usiku na nsana. Pakucere, mepo za malawira-juwa zikíja na mazorombe. 14Mazorombe walawirira inti piya ya Miswiri, wakijala Miswiri kure kila mahala. Wákiwa sawanalawirira tangu wala awaja kulawirira mazorombe wengi wakupunda ire suku ire. 15Wakifinika pansi pare piya, pakutowa kuwoneka nsanga. Wakirya mbeyu piya pamoja na visumo piya vîbakire muinti mure bandi ya kupita nvula ya mawe ire. Inti ya Miswiri ire piya aibakire anta minyani wala miti wala visumo vya mmasamba. 16Nowo upande-wo Firyauna akitumiza kuwetisa upesi-upesi Musa na Aruna, akiwambíra: “Nikola dambi ka Mola, Nlungu wenu, na umwe-po nukukosani. 17Kwa javyo nukulebelani eyi mara-yi muniswamii makosa angu, na mukanilebelele ka Mola Mwenyezimungu wenu, anisapuse na eci kifo-ci.” 18Musa paalawire ka Firyauna, akuka akinlebela Mola. 19Basi, Mola akipindula mepo nyingi yakulawa maswera-juwa, ikiwaveverusa mazorombe ikiwefya kuBahari Nyeundu. Aabakire nanga zolombe mmoja Miswiri ire piya. 20Fala Mola kantenda Firyauna mara nyengine kuwa awe mbishi, asiwase waIziraeli kulawa.
Hukumu ya kenda: kisi
21Nakisa, Mola kamwambira Musa: “Lamusa nkono wako julu, ipate inti ya Miswiri cije kisi kwinukare pí, wanu wapite wakipamapama.” 22Kwa javyo, Musa akilamusa nkono wake julu, kunja kukinukala pí inti ya Miswiri ire piya muda wa suku natu. 23Muda wa suku natu, wanu sawawonana wala aâwerepo wakulawa mahala paákiwa. Falakini waIziraeli piya wákiwa nawo nlangaza upande wawêkare. 24Basi, Firyauna akitumiza kumwita Musa, akimwambíra: “Ukani mukamwabudu Mola. Wanenu muwasukure, ila mifuwo ya ng'ombe na makondoo musisukure.” 25Fala Musa akijíbu: “Uwe ndi ujuzi kutipa nyama zakutosha kutendera kafara, tikoce kwa kuntukuza Mola Mwenyezimungu wetu. 26Mifuwo yetu neyo tikuka nawo, anta mmoja aabaki, konta tíjuzi tikawatondore wamojawapo tikantendere kafara Mwenyezimungu Mola wetu. Na atijiwa namuna vyatuka kuntukuza Mola wetu, kábula ya kufika eko.” 27Fala Mola kantenda Firyauna kuwa mbishi, neye aasakire kuwasa kulawa. 28Ikisa Firyauna kamwambira tena Musa: “Lawa-pa! Nusukuwone tena kumaso kwangu! Suku yausaka kuja-pa, ulayiwe!” 29Musa akijibu: “Kwamba sana kweli. Auniwona tena pakaya pako-pa.”
Currently Selected:
Kulawa 10: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
