Kulawa 11
11
Habari ya kuulayiwa vifundi vya waMiswiri
1Mola kamwambira Musa, kaamba: “Hukumu moja tena nímwisusira Firyauna na inti ya Miswiri. Ikisa, iye akwasani múlawa. Neye akukwasani kulawa, akutuwisani nfululu. 2Epa sambi, wambire sana-sana waIziraeli muka kamba nlume wasikire kuwa, kila mmoja ájuzi kunlebela jirani wake mMiswiri vifure vya parata na vya oru.” 3Mola neye kawatendera fadili mbere ya waMiswiri. Visitoshe, Musa neye ákiwa munu wakuwinshimiwa sana inti ya Miswiri, mbere ya watumisi wa Firyauna pamoja na wanu piya.#11:3 Ona Kulawa 3:21.
4Kwa javyo, Musa akimwambira Firyauna: “Mola kasema javi: ‘Usiku wa finahali rero nípita piya inti ya Miswiri. 5Nikipíta, mwana nlume kifundi onse akufwa, kwanza kifundi wake Firyauna (aja kuriti kiti cake) mpaka kifundi wa njakazi wa mwinsho wa kuluwani, na piya vifundi vya mifuwo newo wakufwa. 6Kukuja kuwa kiriro kikulu inti piya ya Miswiri, kiriro sico sacinálawirira tangu wala sacija kulawirira tena cakupunda suku ire. 7Falakini nkati ya waIziraeli ikuwepo salama. Wala umbwa ansuwa anta munu mmoja wala nyama mmojawapo! Kwa javyo, mwijiwe kuwa Mola katula kusiyana kati ya waIziraeli na waMiswiri.’ ” 8Musa akizidi kusowera, akimwambira Firyauna javi: “Na piya watumisi wako-wo wakuja kunikola maulu, kunipembeza nilawe inti ya Miswiri, omi na wanu piya wari kunifulata. Bandi ya evyo, nílawa!” Pesire kwamba javyo, Musa akilawa kumaso ka Firyauna, waakukimiwa wawenye. 9Ikisa Mola kamwambira Musa: “Firyauna aakusikirizangani, ipate maajuza angu ongezeke inti ya Miswiri.”
10Basi Musa na Aruna watenda piya maajuza are kumaso ka Firyauna, fala Mola akintenda Firyauna awe na moyo ngumu, ipate asiwase waIziraeli kulawa inti yake.
Currently Selected:
Kulawa 11: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
