Kulawa 13
13
Shariya kuhusu wana watanzi
1Nakisa Mola kamwámbira Musa: 2“Niturire kila mwana nlume anza kupongoriwa onse. Konta wana wanza kupongoriwa onse Iziraeli, wanu pamoja na manyama, wangu omi.”
Sherehe ya mikate saina furumento
3Musa akiwambíra wanu: “Kumbukirani daima eyi suku-yi kuwa ndi yamulawire Miswiri, kure kamúkiwa watwana, konta ndi suku yaakulavireni noko Mola kwa nguvu zake ulu. Ntamana, ikifíka noyi suku-yi, musitafune mikate yakutaiwa furumento. 4Umwe rero novi-vi mwezi wa Abibu-wu, múlawa inti ya Miswiri. 5Na Mola paasaka kukufikisani inti ya waKanaa, waHiti, waAmori, waHivi, pamoja na ya waYebusi, inti mója yaawalápire wababu zenu kukupani, inti mója ya rutuba na mali matupu, noyo inti-yo ilazimu mukumbukire na musherehekere kila mwaka, paufika mwezi wa kwanza ponse. 6Muda wa suku saba mutafunane mikate saitayiwe furumento, na suku ya saba mutende suku ulu ya sherehe yakuntuza Mola. 7Muda wa suku saba mutafune mikate saina furumento. Isiwepo mikate yakutaiwa furumento wala furumento yawenye isiwepo mmanyumba mwenu inti-yo piya. 8Noyo suku-yo muwambire wanenu javi: ‘ Tankutenda piya-vi kwa sababu ya mambo âtitendere Mola kulawa kwetu ofwe-pa inti ya Miswiri.’ 9Eci kinu-ci cikuwa alama ya pankono wako na cakukumbukira pacenye pako, ipate shariya za Mola daima ziwe pakanywa penu. Kamana kwa nguvu zake Mola kakulavyani inti ya Miswiri. 10Ntamana kila mwaka, ikifíka noyi suku-yi, mújuzi muwe radi mutambe.
Shariya kuhusu kifundi
11Wakati Mola waasáka kukufikisani inti ya waKanaa kukupani kuwa yenu, kamba vyaâkulapireni umwe na wababu zenu, 12lazima munturire Mola kila mwana nlume ntanzi kupongoriwa. Kila mwana nlume wa mifuwo yenu ntanzi kupongoriwa wa Mola mwanyewe. 13Fala ikíwa kifundi nlume wa buru, mumombore kwa kunkakanya na kondoo. Mukitówa kunkakanya, lazima mumpote buru noyo. Falakini ikíwa mwana ntanzi wa mwanadamu, siti kumombola kwa kondoo. 14Mbere-ko wanenu wákukudairini kuwa ‘Piya viri kutendiwa-vi mana ake kinani?’, umwe muwajibu: ‘Kwa nguvu zake ulu, Mola katilávya inti ya Miswiri katíkiwa watwana. 15Kamana, Firyauna kwa ubishi wake kâtikataza kulawa, Mola akiwoláya piya wana vifundi wa inti ya Miswiri, mwanzo wa wanu mpaka na wa manyama. Ntamana omi nítenda kafara ka Mola ya piya wana watanzi kupongoriwa, fala piya wajukulwangu watanzi kupongoriwa, níwombola na kafara ya kondoo.’ 16Eci kinu-ci cikuwa kamba alama ya pankono wako au pacenye pako paunang'aniza daima, konta kwa nguvu zake, Mola kâtilavya Miswiri.”
Mwenyezimungu awolotera wanu njira
17Firyauna paawásire wanu kuka vyawo, ingawa njira ya inti ya Mafilisteu ndi ya karibu, fala Mwenyezimungu aawolotere njira-yo, konta iye kaamba: “Ewa wanu-wa wasije kumana, kuwapinduka myoyo, kuludira Miswiri.” 18Fala Mwenyezimungu kawapitisa njira ya kuzungunuka kupita kulanga kukirira Bahari Nyeundu. WaIziraeli waláwa inti ya Miswiri, walongozane wakupanganyiwa wawenye. 19Musa akisukula makongolo a Yusufu, kamba mwanyewe vyaâwalapise saanamba kufwa. Konta tangu mida Yusufu kâwalapisa waIziraeli kuwa “Kweli-kwelini Mwenyezimungu akujanliyeni. Paasaka kukulavyani muinti-mu, lazima musukure makongolo angu.”
Ribwi rirefu ra wingu na ra moto
20Basi waIziraeli pawalawire Sukoti woka Ethamu paranzire langa. 21Nsana Mola kalongorera mbere yawo kwa namuna ya ribwi rerefu ra wingu, awolótere njira. Na usiku kalongorera kwa namuna ya ribwi ra moto rakuwamwarikira. Kwa javyo wákipita wakenénda usiku na nsana. 22Wakati wa nsana ribwi rerefu ra wingu rire aríkilawa kumaso ka wanu ware, wala usiku ribwi ra moto rire aríkilawa novyo.
Currently Selected:
Kulawa 13: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
