Kulawa 14
14
waMiswiri wawafulata waIziraeli
1Ikisa Mola akimwambira Musa, akamba: 2“Wambire waIziraeli waludire nyuma, wakamange karibu ya Pi-Hahiloti, kati ya inti ya Migdoli na Bahari Nyeundu. Wakamange nanyenje ya mwani mbere ya Baal-Zefoni. 3Kamana Firyauna áwaza kuwa waIziraeli ware wasíka wankupayapaya, langa riwaziwíriza. 4Nomi níntenda Firyauna moyo wake uwe ngumu, ipate akufulateni. Nomi nípata kusifiwa kwa sababu ya Firyauna pamoja na makava wake piya. WaMiswiri ndi pawasaka kwijiwa kuwa omi niwa Mola mwanyewe.” Basi waIziraeli wakitenda novire.
5Nfalume wa Miswiri, paambiriwe kuwa waIziraeli watira, iye pamoja na watumisi wake wakipindúla mawazo awo, wakamba: “Epa sambi catitendire-ci kinani? Tiwasa woka vyawo awatitumikira tena! Namunani?” 6Kwa javyo, Firyauna akitengeza ringisho rake ra vita na makava wake. 7Akitwala maringisho a vita a mana sana-sana miya sita pamoja na piya maringisho mengine a vita ya Miswiri, kila rimoja ríkilongoziwa na nfalume mmoja wa makava. 8Mola kantenda Firyauna nfalume wa Miswiri moyo wake kuwa ngumu, ipate iye awafulate waIziraeli wari kulawa Miswiri bila wofi. 9WaMiswiri ware wakiwafuláta waIziraeli. Makava wa Firyauna piya na maringisho ake, na wacamakavalu pamoja na makavalu wawo wakiwasingana, wamangire nanyenje ya mwani, karibu ya Pi-Hahiloti karibu ya Baal-Zefoni.
10Firyauna paafikire karibu, waIziraeli wakefya maso, wammóna akíja na makava wake nyuma yake, wé! Ukiwengíra wofi pakulu futi, waIziraeli wakinlalamikíra Mola. 11Wakimwambíra Musa: “Mwaja? Miswiri kure aapo makaburi? Nini kutilavya kure ipate tije tifwire-pa eri langa-ri? Sababuni kutitenda javi, kutilavya Miswiri kure? 12Mwaja si noci-ci catukwambire Miswiri kure, kuwa tase tiwatumikire waMiswiri ware? Ndi fadari tínekala kuwatumikira, koliko kuja kufwira palanga-pa!” 13Noparepare Musa akiwajibu wanu akamba: “Tengemanani musope. Rero múwona Mola vyaasaka kukuvushani. Kamana ware waMiswiri wamuwawona ware, rero ndi mwinsho amuwawona tena! 14Mola akwingirirani. Umwe nyamalani tu, musitende kinu.”
waIziraeli wapita kati-kati ya bahari
15Mola akimwambira Musa, akamba: “Kunilalamikira omi sababuni? Wambire waIziraeli wendeleye safari yawo. 16Uwe-po, lamusa ngombo wako-wo wolotere bahari. Maji akwawanyika, na waIziraeli wápata kupita kati-kati ya bahari pavula. 17Ona! Omi mwanyewe níwatenda waMiswiri kuwa na myoyo migumu, wákufulatani kati-kati ya bahari. Nomi nínshinda Firyauna pamoja na makava wake, maringisho ake, na wacamakavalu wake. 18Nikinshinda Firyauna, makava wake, maringisho ake pamoja na wacamakavalu wake, waMiswiri ndi pawasaka kwijiwa kuwa omi niwa Mola mwanyewe.”
19Basi sambi, laika wa Mwenyezimungu alongoze nkonjo wa waIziraeli ire, akiludíra nyuma yawo. Na ribwi rirefu ra wingu rire rikiláwa mbere kure rikimíra nyuma yawo, 20rikikála kati-kati ya waMiswiri na waIziraeli. Rire wingu rikiwatáya waMiswiri kisi, falakini waIziraeli rikiwalangazíra usiku ngwê. Awapatire kusimanana tena kwa noure usiku ure.
21Sambi Musa akolosa nkono akolota bahari. Kwa noure usiku ure, Mola akipereka mepo za julu nyingi zikivúma usiku mpaka kukica ngwê, akawanyíka maji kati-kati ya bahari pakitenda vula. 22WaIziraeli wakipíta pavula pare kati-kati, maji are atendire nsunju kuno na kuno. 23WaMiswiri wakingíra norire vula ritendire kati-kati ya bahari rire, pamoja na makavalu awo piya, maringisho awo, na wacamakavalu wawo, wakiwafuláta waIziraeli. 24Alufajiri, Mola kati ya ribwi rirefu ra moto na ra wingu rire, kawawona makava wa waMiswiri, akiwesusíra makutuba. 25Akinusuru maroda a maringisho awo are akiláwa, wakingíra kwenenda kwa tafauti. Basi waMiswiri wakamba: “Tukeni tiwatire waIziraeli, konta Mola kankuwengirira koliko ofwe!”
26Ikisa Mola akimwambira Musa: “Olosa nkono wako wolote bahari-yo, ipate maji akusanyike awejarire waMiswiri pamoja na maringisho awo na wacamakavalu wawo.” 27Basi Musa akolosa nkono wake julu ya bahari. Pakucere subuu, bahari ire ikiludira kamba vyaíkiwa. WaMiswiri kawakitiríra konse wakisimanana nawo maji, kwa javyo Mola akiwazamísa mbahari. 28Maji are aludira vyaákiwa, azamísa maringisho are na wacamakavalu. Kati ya piya makava wa Firyauna wâwafulate waIziraeli ware, anta mMiswiri mmoja aanusurike. 29Fala waIziraeli wapita luwansi pavula pare kati-kati, maji are atendire nsunju kuno na kuno.
30Kwa javyo Mola ndi vyaawanusurire waIziraeli mmakono mwa waMiswiri! WaIziraeli wakiwawoneréra waMiswiri nlufuko wakufwa wawenye. 31WaIziraeli wawona uwezo nkulu Mola caawatendire waMiswiri cire, ndimana wakimopa pakulu Mola, wakanza kumwamini pamoja na Musa, ntumisi wake.
Currently Selected:
Kulawa 14: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
