Kulawa 4

Musa apewa uwezo wa kutenda maajuza

1Ikisa Musa akinjibu Mwenyezimungu: “Falakini waIziraeli awoka kunisikiriza, wala awoka kunamini, kamana wanambira: ‘Mola aakulawirire.’ ” 2Noparepare Mola kandairi Musa: “Causukure mmakono-co kinani?” Musa kajibu: “Eyi ngombo.” 3Iye akimwambíra: “Ngombo-yo, efya pansi!” Nakwefya pansi, ngombo ire itadúka nyoka. Musa paamonire, akitanúka. 4Fala Mola akimwambíra Musa: “Olosa nkono-wo, unkore nkira-wo!” Na iye akolósa nkono, akinkola, ikiludíra kuwa ngombo mmakono mwake. 5Mola akamba: “Kwa javyo, waIziraeli wápata kukwamini kuwa omi Mola, Nlungu wa wababuzo, Nlungu wa Iburahima, Izaki pamoja na Yankubu, omi nukulawirira.” 6Visitoshe, Mola akimwambira: “Tula nkono-wo pakifuwa!” Musa akiténda novire. Na paaturire, ona, nkono ure ankola magundula, ukíwa mwelupa vú kamba báfuta. 7Ikisa Mwenyezimungu akamba: “Tula tena nkono-wo pakifuwa!” Iye akitula. Nakulavya, ona, uwa kamba vyaukíwa mwiri wake tangu mida. 8Mwenyezimungu akizídi kumwambira: “Ikíwa awakwaminire wala awakusikirize ukweli wa alama yakwanza, dalili wakwamini alama yapiri. 9Fala wakitówa kwamini anta alama zombiri, na wakitowa kusikiriza shauti yako, ukateke maji a muto wa Nilu, utawanyire pansi, átaduka damu.”

10Fala Musa akimwambíra Mola: “Ha, Mola wangu! Omi tangu mida sikidiri kusowera sana, mpaka epa pausowera nomi ntumisi wako-pa. Niwa munu wa kunirimba kusowera.” 11Ikisa Mola akimwambíra akámba: “Ombire kanywa ya munu nani? Anténda munu kuwa bubu au saasikira, nani? Anténda munu kuwona au kutowa kuwona, nani? Sumi Mola mwanyewe? 12Basi, úka! Omi nukupa uwezo wakusowera, na nukufunda caujuzi kusowera.” 13Fala Musa kaamba: “Ha, Mola wangu! Tafadali nukulebela ntume munu mwengine.” 14Basi Mola kakimiwa kwa sababu ya Musa, kamwambira: “Aapo nduyo Aruna, nLawi? Nukwijiwa kuwa iye ákidiri kusowera sana. Ona, iye akuja muwonane, na paasaka kukuwona akuwa radi pakulu sana. 15Uwe upakanira naye na umwambire piya vyaajuzi kwamba. Omi nukwavyani na nukufundani mambo vyamujuzi kutenda. 16Aruna ásowera na waIziraeli kwa ídini yako, iye akuwa ntumisi wako, na uwe úkuwa kamba nlungu wake. 17Usukula ngombo-yi mmakono mwako, upate kutendera maajuza.”

Musa aludira Miswiri

18Musa kaludira ka Yetro nkwewe, kamwambira: “Tafadali nipeni nafasi niludire ka wanduzangu Miswiri, nikawawone kamba wangari hai.” Yetro akimwambíra: “Úka! Wenende vyema.” 19Saanamba kulawa Midiyani kure, Mola kamwambira Musa javi: “Ludira Miswiri konta wakisáka kukuulaya ware wafwa piya.” 20Ndimana Musa akintwála nkawake pamoja na wanawe, akiwapakíra mburu, wakilawa safari yakuka Miswiri. Mmakono mwake, kasukula ngombo yaâmuriwe na Mwenyezimungu ire.

21Sambi Mola akimwambíra Musa akámba: “Pausaka kufika Miswiri, usiriware kutenda kumaso ka Firyauna maajuza piya anúkupere uwezo kuwa utende. Falakini omi nítenda moyo wa Firyauna ukuwa ngumu, neye aawasa waIziraeli kulawa. 22Ikisa uwe umwambire Firyauna: ‘Mola asema javi: “Iziraeli ndi mwanangu kifundi nlume! 23Na omi nankukwambira kuwa mwase mwanangu akanábudu omi! Ukinkatáza kuwa asuke, ona, nímulaya mwanawo nlume kifundi-yo!” ’ ”

24Ari munjira saanamba kufika Miswiri, Musa ákiwa mahala pakufikira wayeni. Nopare Mola akisimanána naye, ákisaka kumuulaya. 25Noparepare Zipora kangupa upesi katwala riwe ra urere, kantaya itani mwanawe, na sambala ire kankumburisa Musa mmaulu, kaamba: “Kweli, kwangu omi uwe ndi nlume wa harusi wa damu.” 26Zipora cimwámbise: “Uwe ndi mwenye-harusi wa damu” kwa sababu ya itani. Basi, Mola akimwása Musa kusafiri.

27Kwa javire Mola kamwambira Aruna, kaamba: “Uka kulanga ukawonane na Musa!” Basi, Aruna akilawa akuka, wakisimanana pamwango wa Mwenyezimungu, wakipana beju. 28Musa neye akimwambira Aruna masemo piya ambiriwe na Mola akaseme, pamoja na maajuza piya alaiziriwe akatende. 29Ikisa Musa pamoja na Aruna wakilawa wakuka Miswiri, wakiwajumanísa piya wakulungwa wa waIziraeli. 30Aruna akiwambira piya vyaambiriwe Musa na Mola. Na Musa akitenda maajuza are kumaso ka wanu, 31newo wankubali. Na pawasikire kuwa Mola kawajirira waIziraeli kuwanusuru kwa kuwawona kutabika kwawo, wakinama kumwabudu.

Currently Selected:

Kulawa 4: wmwBI

Highlight

Copy