Kulawa 6
6
Mwenyezimungu akumpa tamaa Musa kuwavusha waIziraeli
1Mola akimwambira Musa: “Rinda úwona sambi-pa canisaka kuntenda Firyauna-co, konta kwa nguvu zangu ndi paasaka kuwasa wanu wangu kulawa. Kweli-kwelini, kwa nguvu zangu, iye akuja kukutuwisani muinti-mo.”
2Mwenyezimungu kasowera naye tena Musa kaamba: “Omi ndi Mola mwanyewe. 3Niwesúkira Iburahima, Izaki pamoja na Yankubu kwa zina ra Mwenyezimungu Mwenyé uwezo piya, fala sirijiwise nawo kwa zina rangu Mola. 4Novyo, nitula miyadi yangu ya kupatana nawo, kwa ánzima niwape inti ya Kanaa, inti yawâinshire kamba wayeni. 5Visitoshe, omi-pa panisikire kulalamika ka waIziraeli kuwa waMiswiri wawawengéza, siriware miyadi yangu ya kupatana nawo. 6Kwa javyo wambire wanu wa Iziraeli javi: ‘Omi ndi Mola! Kweli núkupumuzani mashaka amukuníshiwa na waMiswiri, núkulavyani utwana, na núkunusuruni kwa uwezo wangu na vitendo vya kuwahukumu. 7Núkutendani kuwa wanu wangu, na omi nikuwa Nlungu wenu. Javyo ndi pamusaka kwijiwa kuwa omi Mola, Nlungu wenu, núkupumuzani mashaka amukuníshiwa na waMiswiri. 8Nomi núkuperekani inti yanîwapere tamaa Iburahima, Izaki pamoja na Yankubu. Noyo inti-yo núkupani kuwa yenu. Omi ndi Mola.’ ” 9Musa kawámbira waIziraeli masemo are piya. Falakini ewo awasikirize kwa kuwazizima myoyo yawo konta ya kutumiwa kitwana.
10Ndimana Mola akimwambira Musa: 11“Uka, ukamwambire Firyauna nfalume wa Miswiri awase wanu wa Iziraeli walawe muinti mwake-mo.” 12Fala Musa akinjibu Mola javi: “Ona! Wanu wa Iziraeli awanisikirize caniwámbire, futi Firyauna akuka kunisikiriza sanikidiri kusowera sana?” 13Fala Mola kamwamuru Musa na Aruna, kuhusu waIziraeli pamoja na Firyauna nfalume wa Miswiri, wapate mamulaka a kuwalavya wanu wa Iziraeli muinti ya Miswiri.
Wakinya babu zawo Musa na Aruna
14Ewa ndi makolo wakulu a marikolo a waIziraeli. Rubeni, mwana ntanzi wa Iziraeli, wanawe wákiwa Hanoki, Palu, Hesironi pamoja na Karimi. Ewa ndi makolo a kinya-Rubeni. 15Wana wa Ansumani wákiwa Yemuweli, Yamini, Ohadi, Yakini, Sohari pamoja na Shauli. Wa mwinsho-yu kâmpongola na mwanamuka wa Kanaa. Ewa ndi makolo a kinya-Ansumani. 16Eya ndi mazina a wana wa Lawi, mwanzo wa kifundi mpaka kifindi: Gerishoni, Kohathi, pamoja na Merari. Lawi kâinshi myaka miya na talatini na saba. 17Wana wa Gerishoni wákiwa Libni na Shimeyi, kwa kila mmoja na jamaa zake. 18Wana wa Kohathi wákiwa Amramu, Ishali, Heboroni pamoja na Uziyeli. Kohathi kâinshi myaka miya na talatini na mitatu. 19Wana wa Merari wákiwa Mahali na Mushi. Ewa ndi makolo wa kinya Lawi, kwa kila mmoja na rikolo rake. 20Amramu kânlomba Yokebedi, matiye, neye akipongóla naye Aruna na Musa. Amramu kâinshi myaka miya na talatini na saba. 21Wana wa Ishali wákiwa Kora, Nefegi, pamoja na Zikri. 22Wana wa Uziyeli wákiwa Mishaeli, Elsafani, pamoja na Sitri. 23Aruna kânlomba Elisheba, binti Aminadabu, nlumbuwe Nashoni. Neye akipongóla naye Nadabu, Abihu, Eleazari, pamoja na Itamari. 24Wana wa Kora wákiwa Asiri, Elikana, na Abiasafu. Ewo ndi makolo a kinya Kora. 25Eleazari, mwana wa Aruna, kânlomba binti Putiyeli mmojawapo, akipongóla naye Finiyasi. Ewa ndi wâwere makolo a kinya Lawi, kwa kila mmoja na jamaa zake.
26Aruna na Musa ndi wâmbiriwe na Mola: “Walavyeni wanu wa Iziraeli inti ya Miswiri, makundi ka makundi.” 27Ndi nowa-nowani Aruna na Musa wâsowere na Firyauna, nfalume wa Miswiri, ipate wawalavye waIziraeli inti ya Miswiri ire.
28Suku Mola yaasowere na Musa inti ya Miswiri, 29Mola akimwambíra Musa: “Omi ndi Mola mwanyewe. Mwambire Firyauna, nfalume wa Miswiri, piya vyanukwámbira-vi.” 30Fala Musa akinjíbu Mola: “Ona! Omi sikidiri kusowera sana. Iye anisikirizája?”
Currently Selected:
Kulawa 6: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
